কলিয়াবৰ

অসমীয়া ৱিকিপিডিয়াৰ পৰা
কলিয়াবৰ
—  মহকুমা  —
কলিয়াবৰ
কলিয়াবৰৰ অৱস্থান
অসম
স্থানাঙ্ক 26°19′N 92°39′E / 26.31°N 92.65°E / 26.31; 92.65
দেশ  ভাৰত
ৰাজ্য অসম
জিলা নগাঁও
লোকসভা সমষ্টি কলিয়াবৰ
সময়াঞ্চল ভাৰতীয় মান সময় (গ্ৰী.মা.স. +০৫:৩০)

কলিয়াবৰ (ইংৰাজী: Kaliabor), অসমনগাঁও জিলাৰ পূব দিশত অৱস্থিত অন্তৰ্ভুক্ত এখন মহকুমা৷ নগাঁও জিলাৰ পৰা ইয়াৰ দূৰত্ব ৪৮ কিলোমিটাৰ৷ উজনি আৰু নামনি অসমৰ মধ্যত ইয়াৰ অৱস্থিতি। উপক্ৰান্তীয় অঞ্চলটোৰ ৯৩ - ৯৮ পূব দ্ৰাঘিমাংশ ২৬-২৭ উত্তৰ অক্ষাংশৰ মাজত অৱস্থিত। কলিয়াবৰৰ মাটিকালি প্ৰায় ৯৭,১১৮ হেক্টৰ৷[1]

চাৰিসীমা[সম্পাদনা কৰক]

কলিয়াবৰৰ পূবে কাজিৰঙা ৰাষ্ট্ৰীয় উদ্যান, পশ্চিমে চামধৰা গড়, উত্তৰে ব্ৰহ্মপুত্ৰ নদী আৰু দক্ষিনে কাৰ্বি পাহাৰ অৱস্থিত৷[1]

নামৰ উত্পত্তি[সম্পাদনা কৰক]

মধ্যযুগৰ বুৰঞ্জী সমূহত 'কলিয়াবৰ' বা 'কলীয়াবৰ'(কলীয়াবড়) - এই দুই বিশেষ নামেৰে ঠাইখণ্ড প্ৰখ্যত হোৱা দেখিবলৈ পোৱা যায় ৷ এই ঠাইত নকল ৰূপত পোৱা ভূঞা বুৰঞ্জীখনিয়ে 'কলিয়াবৰ'ক এজন মহা শিৱভক্ত কছাৰী ৰজা বুলি উল্লেখ কৰিছে, যাৰ প্ৰাৰ্থনাত শিৱ এজোপা কলীয়া বৰগছ হৈ তেওঁৰ ৰাজ্যখনৰ মহিমা প্ৰকাশ কৰিছিল আৰু লগতে কৰিছিল ঠাইখনি পৱিত্ৰ ।

কলিয়াবৰৰ চাৰিজন পুত্ৰৰ নামেৰেও কাজিৰঙা, চিকনি, বাগৰি, আৰু দ্'লাল -- এই চাৰিখন ঠাইৰ নামৰ সৃষ্টি হৈছে । কলিয়াবৰৰ পুত্ৰ দ্'লাল আৰু তেওঁৰ পুত্ৰ -- বৰভাগ্, সৰুভাগ, চতিয়াল আৰু ডিচিয়াল পৰাও ঠাইৰ নমকৰণ হৈছে । কালক্ৰমত কলিয়াবৰৰ নামটিয়েই পুত্ৰ-নাতিৰ পৰা সমগ্ৰ অঞ্চলটিত প্ৰধান্য লাভ কৰাত ঠাইখন তেওঁৰ নামেৰেই প্ৰখ্যত হৈ পৰিল বুলি সহযেই ধাৰণা কৰিব পাৰি । অন্যহাতে আকৌ মহাভক্ত সাধনালব্ধ আৰু তেওঁৰ নামেৰেই সৃষ্টি হোৱা ডাঙৰ বৰ গছজোপা (কলিয়া বা কলীয়া বৰগছ্)ৰ পৰাও ঠাইখণ্ড বিখ্যাত হৈ পৰাটোও সমানেই তাতপৰ্যপূৰ্ণ কথা । [2]

"টু্ন্‌-ৰুং-ডাম্‌" - আহোম বা টাই ভাষাৰ কলিয়াবৰ নামটোৰ পৰিচয় থকা বুলি জনা যায়৷ আহোমসকলৰ ভাষাত টু‌ন্‌ মানে কলীয়া বা ক’লা ডাৱৰ ৰুং মানে বৰ আৰু ডাম্‌ শব্দৰ অৰ্থ হ’ল গছ৷ অৰ্থাৎ কলীয়া বৰ গছেৰে ভৰি থকা ঠাই কলিয়াবৰ৷[1]

ইতিহাস[সম্পাদনা কৰক]

আহোম ৰাজত্বকাল[সম্পাদনা কৰক]

কলিয়াবৰৰ জখলাবন্ধাৰ শ্ৰীশ্ৰীবাসুদেৱ থান; পিছত নৰসিংহ মূৰ্তি প্ৰতিষ্ঠা কৰা বাবে নৃসিংহ মন্দিৰ ৰূপেও জনাজাত

অলেখ প্ৰাচীন ঐতিহ্যৰে ভৰা কলিয়াবৰ আহোম ৰাজত্ব কালৰ এক উল্লেখ্যোগ্য ঠাই আছিল৷ ১৪৯৭ - ১৫৩৯ ত ৰাজত্ব কৰা স্বৰ্গদেউ ছুহুংমুং দিহিংগীয়া ৰজাৰ দিনত কলিয়াবৰ আহোম ৰাজ্যৰ অন্তৰ্ভুক্ত হোৱাৰ পূৰ্বে কছাৰী-জয়ন্তীয়া সল্কলৰ অধীনত আছিল৷ ১৫৩২ খ্ৰীষ্টাব্দত তুৰ্বকৰ আক্ৰমনত ব্ৰহ্মপুত্ৰ আৰু কলংমুখৰ ৰণত সেনাপতি ফ্ৰাচেংমুখৰ হাতত মুছলমান সেনা হায়াত খান বধ হোৱাৰ পাছত নাৰী বাহিনী লৈ তেওঁৰ পত্নী মূলাগাভৰুৱে কলিয়াবৰতে তুৰ্বকৰ বিৰুদ্ধে যুঁজ দি প্ৰাণ ত্যাগ কৰিছিল৷ প্ৰতাপ সিংহৰ (১৬০৩-১৬৬১ খ্ৰীঃ) ৰাজত্বকালত তীব্ৰৰূপ ধাৰন কৰা মুছলমান আক্ৰমনৰ পৰা ৰাজ্য ৰক্ষাৰ বাবে পৰিকল্পিতভাৱে কলিয়াবৰৰ পাহাৰ আঅৰু বিশাল ব্ৰহ্মপুত্ৰক কেন্দ্ৰ কৰি শ্যামলা গড়, মিছা কোঠ, দিজু কোঠ, চামধৰা গড়, ৰাঙলী গড়, শালনা পাহাৰৰ কোঠ, কেচু কাটিগড় আদি নিৰ্মান কৰাইছিল৷ আহোম স্বৰ্গদেউ চুখ্ৰাংফা বা ৰুদ্ৰ সিংহৰ দিনৰ পৰা ৰাজেশ্বৰ সিংহৰ দিনলৈ (১৭১৪ - ১৭৬৯খ্ৰীঃ) কলিয়াবৰ সাংস্কৃতিক বুৰঞ্জীত উল্লেখযোগ্য ৰেখাপাত কৰিছে৷ শিবসিংহই কলিয়াবৰত দৌল-দেৱালয়, মঠ-মন্দিৰ আদি স্থাপন কৰিছিল।[1]

ব্ৰিটিছ শাসন কাল[সম্পাদনা কৰক]

ব্ৰিটিছ শাসন কালৰ প্ৰায় ১৮৪০ চনৰ পৰাই কলিয়াবৰৰ স্বাস্থ্যসেৱা, চাহ বাগান, ৰেলসেৱা, ফেৰীসেৱা, আদিৰ উন্ন্তি হৈছিল৷ ব্ৰিটিছৰ দিনতেই শিলঘাটৰ পৰা চাপৰমুখলৈ ৰেলপথ নিৰ্মান কৰা হয়৷ ১৯২০ চনৰ ২০ মাৰ্চত মালবস্তু কঢ়িওৱা আৰু সেই বছৰতে আগষ্ট মাহত যাত্ৰী পৰিবহনৰ মিটাৰ গজ ৰেলসেৱা আৰম্ভ হৈছিল৷[1]

ৰাজনীতি[সম্পাদনা কৰক]

কলিয়াবৰ. কলিয়াবৰ (লোক সভা সমষ্টি)ৰ এটা অংশ৷[3]

প্ৰাচীন কীৰ্তিচিহ্নসমূহ[সম্পাদনা কৰক]

ৰামগোৱিন্দদেৱে ১৫৯৩ শকত প্ৰতিষ্ঠা কৰা কলিয়াবৰৰ ভলাগুৰি সত্ৰ। কাল সংহতিৰ এই সত্ৰৰ উপাস্য মূৰ্তি কলীয়া গোসাঁই
ব্ৰহ্মপুত্ৰৰ পাৰত হাতীমূৰা পাহাৰ স্থিত দুৰ্গা মন্দিৰ, কলিয়াবৰ।

নগৰ আৰু বাণিজ্যিক কেন্দ্ৰ[সম্পাদনা কৰক]

কলিয়াবৰৰ একমাত্ৰ স্বীকৃতিপ্ৰপ্ত নগৰখন হৈছে শিলঘাট টাউন ।

জখলাবন্ধা হৈছে কলিয়াবৰৰ সৰ্ব্ববৃহ্ত্ বাণিজ্যিক কেন্দ্ৰ । আন বাণিজ্যিক কেন্দ্ৰসমূহ হৈছে কুঁৱৰীটোল্, হাটবৰ, নলটলি, আমনি, শালনা, মিছা আৰু কুঠৰী

শৈক্ষিক প্ৰতিষ্ঠান[সম্পাদনা কৰক]

বিখ্যাত লোকসকল[সম্পাদনা কৰক]

আলোকচিত্ৰ ভৰাল[সম্পাদনা কৰক]

কলিয়াবৰৰ শিলঘাটত অৱস্থিত অসমৰ দ্বিতীয়টো কামাখ্যা মন্দিৰ
কিম্বদন্তীমূলক কাহিনীৰ ভঁৰালী বৰুৱাই সৰু কুঁৱৰী কমলাক উৎসৰ্গা কৰা কলিয়াবৰৰ ভঁৰালী বৰুৱা পুখুৰী
কলিয়াবৰৰ শ্ৰীশ্ৰীচামগুৰি সত্ৰত সংৰক্ষিত মহাপুৰুষ শ্ৰীমন্ত শঙ্কৰদেৱৰ এখন ভৰিৰ পাদুকা।
শ্ৰীমন্ত শঙ্কৰদেৱ সংঘই নিৰ্মাণ কৰা কলিয়াবৰৰ দাৰিগজিস্থ নামঘৰ।
সচিত্ৰ তন্ত্ৰসাৰ পুথি (দুলাল-মাধৱ, কলিয়াবৰ)
মাধ্যম আন্দোলনৰ শ্বহীদ নৰেন্দ্ৰ নাথ মহন্তৰ স্মৃতিত কলিয়াবৰৰ কুঁৱৰীটোলত স্থাপন কৰা শ্বহীদ স্মৃতি স্তম্ভ।
কলিয়াবৰ আৰু তেজপুৰক সংযোগ কৰা ব্ৰহ্মপুত্ৰৰ ওপৰৰ কলিয়াভোমোড়া দলং।
কলিয়াবৰৰ দীঘলী গাঁৱত উদ্ধাৰ হোৱা আহোম স্বৰ্গদেৱে প্ৰদান কৰা তাম্ৰফলি

লগতে চাওক[সম্পাদনা কৰক]

তথ্যসূত্ৰ[সম্পাদনা কৰক]

  1. 1.0 1.1 1.2 1.3 1.4 1.5 অসমীয়া প্ৰতিদিন, প্ৰবন্ধ: ইতিহাস প্ৰসিদ্ধ কলিয়াবৰ, লেখক: কিশোৰী কুমাৰ ডেকা,প্ৰকাশ: ৫ ফেব্ৰুৱাৰী, ২০১২, পৃষ্ঠা নং ৪
  2. দাপোণত কলিয়াবৰ, পৃষ্ঠা নং ১৪, লেখক- লীলাধৰ বৰা, সম্পাদনা- উপেন্দ্ৰ বৰকটকী, প্ৰকাশক- শ্ৰীমন্ত শঙ্কৰদেৱ সংঘ (কলিয়াবৰ জিলা শাখা)
  3. "List of Parliamentary & Assembly Constituencies". Assam. Election Commission of India. http://archive.eci.gov.in/se2001/background/S03/AS_ACPC.pdf। আহৰণ কৰা হৈছে: 2008-10-06. 
  4. কলিয়াবৰ মহাবিদ্যালয়ৰ ৱেবছাইট
  5. কলিয়াবৰ শিক্ষন মহাবিদ্যালয়ৰ তথ্য
  6. অসমীয়া প্ৰতিদিনৰ শণিবৰীয়া এনাজৰী, লেখক: উপেন্দ্ৰ বৰকটকী, প্ৰবন্ধ: সাহিত্যৰ ক্ষেত্ৰত কলিয়াবৰ, প্ৰকাশ: ১৮ ফেব্ৰুৱাৰী, ২০১২, পৃষ্ঠা "গ" (৩)
  7. 7.0 7.1 7.2 7.3 অসমীয়া প্ৰতিদিনৰ শণিবৰীয়া এনাজৰী, লেখক: উপেন্দ্ৰ বৰকটকী, প্ৰবন্ধ: সাহিত্যৰ ক্ষেত্ৰত কলিয়াবৰ, প্ৰকাশ: ২৫ ফেব্ৰুৱাৰী, ২০১২, পৃষ্ঠা "খ" (২)

বাহ্যিক সংযোগ[সম্পাদনা কৰক]