লখিমপুৰ জিলা

অসমীয়া ৱিকিপিডিয়াৰ পৰা
(লখিমপুৰৰ পৰা পুনঃনিৰ্দেশিত)
লখিমপুৰ জিলা
—  জিলা  —
অসমত জিলাখনৰ অবস্থান
দেশ ভাৰত ভাৰত
ৰাজ্য অসম
সদৰ উত্তৰ লখিমপুৰ
মাটিকালি
 - মুঠ 2,277 কি.মি. (879.2 বৰ্গ মাইল)
জনসংখ্যা (২০১১)
 - মুঠ 10,40,644
সময় অঞ্চল ভাৰতীয় মান সময় (গ্ৰী.মা.স.+৫:৩০)
ৱেবছাইট www.lakhimpur.nic.in

লখিমপুৰ বা লক্ষীমপুৰ হৈছে ভাৰতৰ উত্তৰ-পূবত অৱস্থিত অসম ৰাজ্যৰ এখন জিলা। ইয়াৰ চাৰিসীমা হ'ল উত্তৰে অৰুণাচল প্ৰদেশ, দক্ষিণে যোৰহাট জিলা আৰু ব্ৰহ্মপুত্ৰ নদী, পূবে ধেমাজি জিলা আৰু ডিব্ৰুগড় জিলা আৰু পশ্চিমে শোণিতপুৰ জিলা৷ জিলাখনৰ সদৰ হৈছে উত্তৰ লখিমপুৰ। মহকুমা দুটা- উত্তৰ লখিমপুৰ আৰু ঢকুৱাখনা

লখিমপুৰ (লক্ষীমপুৰ) নামৰ উৎপত্তি[সম্পাদনা কৰক]

জিলাখনৰ লক্ষীমপুৰ নামকৰণৰ বিষয়ে কেইবাটাও তথ্য প্ৰচলিত। ব্ৰহ্মপুত্ৰৰ উত্তৰ পাৰৰ,পৰ্বতমালালৈকে বিস্তৃত বিৰাট সমতল অঞ্চল একালত সমৃদ্ধিৰ শিখৰত আছিল ৷ লক্ষীমপুৰ এই অঞ্চলৰ এখন প্ৰাচীন,প্ৰখ্যাত, ধন-সোণ,মনি –মৰকত,শস্যে-মৎস্যে নদন-বদন ভোগালী আৰু প্ৰতাপী স্বাধীন ৰাজ্য আছিল৷ “লক্ষীমপুৰ” নামকৰণৰ বিষয়ে কেবাটিও তথ্য প্ৰচলিত৷ কোনোৱে কয় মহাপুৰুষ শ্ৰীমন্ত শঙ্কৰদেৱৰ মাতৃ মহী লক্ষীআইৰ নামেৰেহে নামকৰণ৷ প্ৰখ্যাত বুৰঞ্জীবিদ স্বৰ্গীয় সৰ্বেশ্বৰ বৰুৱা দেৱৰ মতে চুতীয়া নৃপতি লক্ষীনাৰায়ণৰ নামেৰে লক্ষীমপুৰ হয়৷ কিন্তু প্ৰাচীন গ্ৰন্থ “আদি-চৰিত”ৰ মতে বাৰভূঞা ৰাজবংশৰ ধৰণী স্বৰূপা লক্ষী আইৰ নামেৰেহে এই অঞ্চল “লক্ষীমপুৰ” বুলি জনাজাত হয়৷ লক্ষীদেৱী হেনো সূৰ্য দেৱতাৰ পত্নী আছিল আৰু সূৰ্য দেৱতাই পত্নীক বৰদি কৈছিল,- “তোমাৰ নামত গ্ৰাম্য হৈব লক্ষীমপুৰ৷

তাহাতে বসতি প্ৰিয়া হৈবেক তোমাৰ ৷৷

অনেক ঐশ্বৰ্যসুখ হৈবেক তথাত ৷৷

লক্ষীমপুৰ নাম হৈব জগত প্ৰখ্যাত ৷৷" ( আদি চৰিত )

ঐতিহাসিক দৃষ্টিভঙ্গীৰে চালে দেখা যায় শদিয়াৰ চুতীয়া ৰাজ বংশৰ এটা ঠালে চহৰৰ পৰা পাঁচ মাইল নিলগৰ ধল আৰু ঘাগৰ নৈৰ মাজত এখন চহৰ প্ৰতিষ্ঠা কৰি ৰাজত্ব কৰিছিল৷ তাত এখন প্ৰাচীন পৰিত্যক্ত নগৰৰ চিন এতিয়াও বিৰাজমান ৷পৰৱৰ্তী কালত ৰজা সত্য নাৰায়ণ আৰু ৰজা লক্ষ্মীনাৰায়ণ প্ৰদত্ত দেৱোত্তৰ, ব্ৰহ্মোত্তৰ মাটি দান কৰা তামৰ ফলি উদ্ধাৰ হোৱাত ই প্ৰমাণ হয় যে ৰজা লক্ষ্মীনাৰায়ণৰ নামেৰে এই অঞ্চলৰ নাম লক্ষীমপুৰ হয়৷ প্ৰত্নতাত্ত্বিক, বুৰঞ্জীবিদ পণ্ডিত সৰ্ব্বেশ্বৰ বৰুৱাদেৱে এই তামৰ ফলি দুখনৰ পাঠোদ্ধাৰ কৰি যুক্তি সহকাৰে প্ৰতিপন্ন কৰিছিল যে ৰজা লক্ষ্মীনাৰায়ণৰ নামেৰেহে এই অঞ্চলৰ নাম লক্ষ্মীমপুৰ ৷আন এটা মতানুসাৰে এই নাম বাৰভূঞা সকলৰ উৎপত্তিৰ উল্লেখ থকা “আদি চৰিত” নামৰ পুথিত বাৰভূঞা সকলৰ বুঢীমাক লক্ষ্মীদেৱীৰ নামানুসাৰে ব্ৰহ্মপুত্ৰৰ উত্তৰাঞ্চল বিশ্বনাথৰ পৰা চিচি-ধেমাজি পৰ্যন্ত্ লক্ষীমপুৰ ৰখা হৈছিল৷ লক্ষীমপুৰ নামটো বাৰ ভূঞাৰ বুঢ়ী মাক লক্ষ্মীদেৱীৰ নামৰ পৰাই হওক বা শস্যে মৎসে নদন বদন লখিমীৰ ভঁৰাল হোৱাৰ বাবেই হওক, এইটো ঠিক যে বৃটিছে অধিকাৰ কৰাৰ আগতেও এই অঞ্চলৰ নাম লক্ষীমপুৰেই আছিল৷ ইং ১৮৩৮ চনত বৃটিছ ইষ্ট ইণ্ডিয়া কোম্পানীয়ে উজনি অসমৰ কৰতলীয়া শেষ আহোম ৰজা পুৰন্দৰ সিংহৰ পৰা উজনি অসম ঘূৰাই লৈ দক্ষিণ পাৰত শিৱসাগৰ আৰু উত্তৰ পাৰত পশ্চিমে বিশ্বনাথ আৰু পূবে চিচি ধেমাজি অঞ্চল সামৰি লক্ষীমপুৰ জিলা গঠন কৰে ৷

ইং ১৮৪২ চনত বৃটিছে শদিয়া আৰু মটক ৰাজ্য নিজ দখললৈ অনাৰ পিছত জিলাৰ আকাৰ বৃহৎ হোৱাত আৰু লক্ষীমপুৰৰ আওহতীয়া অৱস্থিতি, যাতায়তৰ অসুবিধাৰ বাবে জিলাৰ সদৰ দক্ষিণপাৰৰ ডিব্ৰুগড় চহৰলৈ স্থানান্তৰিত কৰিলে আৰু উত্তৰ পাৰৰ ভূখণ্ডক এটা মহকুমা কৰি নাম থলে উত্তৰ লক্ষীমপুৰ ৷ ইং ১৯৭১ চনৰ ২ অক্টোবৰ গান্ধী জয়ন্তীৰ দিনা সেই সময়ৰ অসমৰ মুখ্যমন্ত্ৰী প্ৰয়াত মহেন্দ্ৰ মোহন চৌধুৰীৰ আদেশ মৰ্মে লক্ষীমপুৰ জিলাক দ্বি-খণ্ডিত কৰি ডিব্ৰুগড় জিলা আৰু লক্ষীমপুৰ জিলা গঠন কৰে ৷ উত্তৰ লক্ষীমপুৰক নব গঠিত লক্ষীমপুৰ জিলাৰ সদৰ ঘোষণা কৰে ৷এই নতুন জিলাখনক পুনৰ ইং ১৯৮৯ চনত দ্বি-খণ্ডিত কৰি লক্ষীমপুৰ আৰু ধেমাজি জিলা নামকৰণেৰে দুখন পৃথক জিলাৰ সৃষ্টি কৰিলে৷ বৰ্তমানৰ লক্ষীমপুৰ জিলাত দুটা মহকুমা- উত্তৰ লক্ষীমপুৰ আৰু ঢকুৱাখনা৷[1]

ভৌগোলিক তথ্য[সম্পাদনা কৰক]

অসমৰ উত্তৰ-পূব অংশত লখিমপুৰ জিলাৰ অৱস্থান। অক্ষাংশ ২৬° ৪৮' উত্তৰৰপৰা ২৭° ৫৩' উত্তৰলৈ; আৰু দ্ৰাঘিমাংশ ৯৩° ৪২' পূবৰপৰা ৯৪° ২০' পূবলৈ বিস্তৃত।

হিমালয় পৰ্বতৰ কাষ চুই ব্ৰহ্মপুত্ৰৰ উত্তৰ পাৰৰে বিয়পি আৰু মাজুলী নদী দ্বীপৰ পদ স্পৰ্শ কৰি থকা লখিমপুৰ জিলা ,যি নদ-নদী,খাল-বিল, জলাশয় আৰু অলেখ জলজ সম্পদেৰে আছিল অতীত মহীয়ান ৷এইখন জিলাৰ উত্তৰে অৰুনাচল প্ৰদেশ,পূবে ধেমাজি জিলা,দক্ষিণে খেৰকটীয়া-লোহিত(সোৱণশিৰি) সুঁতি,যাক মাজুলীক সাৱটি থকা ব্ৰহ্মপুত্ৰৰ উত্তৰাংশ বোলা হয় আৰু পশ্চিমে শোণিতপুৰ জিলাৰে পৰিৱেষ্টিত ৷২২৭৭ বৰ্গ কিলোমিটাৰ মাটিকালিৰ লখিমপুৰ জিলাখন দক্ষিণ পশ্চিমৰ পৰা উত্তৰ-পূবলৈ ৮৫ কিলোমিটাৰ আৰু সোৱণশিৰি নদীৰ বুকুৱেদি উত্তৰা-দক্ষিণাকৈ প্ৰায় ৪৫ কি: মি: বহল ৷ ব্ৰহ্মপুত্ৰ উপত্যকাৰ শীৰ্ষভাগলৈ বিয়পি থকা এইখন জিলা গঢ় লয় ব্ৰহ্মপুত্ৰ আৰু ইয়াৰ উপনৈ যেনে,সোৱনশিৰি,ৰঙানৈ,ডিক্ৰং আৰু ইহঁতৰ অলেখ উপনৈয়ৈ পেলাই যোৱা পলসেৰে, যি হিমালয়ৰ পৰা বাগৰি অহা মূল্যবান গেদেৰে চহকী ৷ ব্ৰহ্মপুত্ৰ উপত্যকাৰ উপ-তৰপামটো আছিল এখন শিলৰ বিচনা ,যি ভাৰতীয় সমতলৰ আগছোৱাৰ প্ৰতিনিধি আৰু উত্তৰ-পূব মুখী প্ৰব্ৰজনত সংকুচিত হৈ আহিছে ৷ যোৱা এক নিযুত বছৰ-জুৰি এই অঞ্চলৰ ওপৰত তৰপে তৰপে জমা হোৱা গেদ আৰু মাটিৰ সম্পদে গঢ়ি তুলিছে বৰ্তমানৰ সমতলভাগ ৷ নৈ, উপনৈৰ সম্পদে এইভাগ মাটিক কৰি তুলিছে আৰু বেছি উৰ্বৰা ৷ লখিমপুৰ জিলাৰ সমতলভাগক তিনিটা স্থলভাগত ভাগ কৰিব পাৰি,যাৰ প্ৰতিটোৰে স্বকীয় বৈশিষ্ট্য আছে ৷ পাহাৰীয়া এলেকাটো বালি,পলসুৱা মাটি,চকমকী পাথৰ(শিলগুটি) আৰু নদীৰ শিলেৰে গঠিত হৈছে ৷সাগৰীয় পৃষ্ঠভাগৰ পৰা প্ৰায় ১২০ মিটাৰ উচ্চতাত এই অঞ্চল অৱস্থিত ৷ এই উচ্চতা জিলাখনৰ মধ্যভাগত ৮৫-১০০মিটাৰলৈ আৰু দক্ষিণৰ ঢকুৱাখনা এলেকাত ৮৫ মিটাৰ,বদতিঘাটত ৮৩ মিটাৰ আৰু একেবাৰে দক্ষিন-পূবত ৭৯ মিটাৰ নমা ৷ যিহেতু জিলাখনৰ সাধাৰণ সমতলভাগ স্বাভাৱিকতে বহুত নিম্ন ,সেয়েহে বৰ্ষাকালৰ বাহিৰে বছৰৰ অ্ন্য সময়ত নদ-নদীৰ সোঁতৰ তীব্ৰতা সিমান প্ৰচণ্ড নহয় ৷

লখিমপুৰৰ মুঠ মাটিকালি ২২৭৭ বৰ্গ কিলোমিটাৰ [2]

জলবায়ু[সম্পাদনা কৰক]

হিমালয় পৰ্বতৰাশিৰ গাতে লাগি থকা এই জিলাৰ জলবায়ু তুলনামুলক ভাৱে চেঁচা আৰু সেমেকা। গড় উষ্ণতা শীতকালত ৫º ৰ পৰা ২০º ছেলছিয়াছ আৰু গ্ৰীষ্মকালত ১৮º ৰ পৰা ৩৬º ছেলছিয়াছলৈকে পৰিৱৰ্তিত হয়। আগষ্ট আৰু জানুৱাৰী মাহেই এইখন জিলাৰ ক্ৰমে আটাইতকৈ গৰম আৰু চেঁচা মাহ। বাৰ্ষিক গড় বৰষুণৰ পৰিমাণ ২০০ ছে.মি.ৰ পৰা ২৫০ ছে.মি.। ৬০% ৰ পৰা কেতিয়াও তললৈ ননমা এই অঞ্চলৰ জলবায়ুৰ আৰ্দ্ৰতা সদায়ে উচ্চ।অসমৰ অন্যান্য এলেকাত দেখা দিয়া বালি –ধুমুহা এই জিলাত নাই ৷

জনগাঁথনি[সম্পাদনা কৰক]

২০১১ চনৰ লোকপিয়ল অনুসৰি জিলাখনৰ মুঠ জনসংখ্যা হৈছে ১০,৪০,৬৪৪ [3]৷ ২০০১-২০১১ চনৰ ভিতৰত জনসংখ্যাৰ হাৰ হৈছে ১৭.০৫%[4]

অতীততে লখিমপুৰ ঘন জনবসতিৰ অঞ্চল নাছিল৷ হয়তো ডাঠ হাবি-জংঘল, বাৰিষা সঘনাই হোৱা বানপানী আৰু যাতায়ত ব্যৱস্থাৰ অসুবিধাৰ বাবে মানুহে এই অঞ্চলত বাস কৰিবলৈ আগ্ৰহী নাছিল৷ চীনা আক্ৰমণৰ ঠিক পিছতে ১৯৬৩-৬৪ চনৰ ভিতৰত জিলাখনে মিটাৰগজ ৰেললাইনৰ মুখ দেখে৷ ৰেল চলাচল হোৱাৰ পিছৰ পৰাই লাহে লাহে জনসংখ্যা বৃদ্ধি পাবলৈ ধৰে৷ লগতে ইংৰাজৰ ঔপনিৱেশিক ব্যৱস্থাই জনসংখ্যা বৃদ্ধিত অৰিহণা যোগালে৷[উদ্ধৃতিৰ প্ৰয়োজন] ঊনৈশ শতিকাৰ পৰা জিলাখনত একেলগে বাইশটা জনগোষ্ঠীয়ে বাস কৰিছিল৷ ১৮৪৭-৪৮ চনত মুঠ জনসংখ্যা আছিল ৩৬,৭৪২ জন৷ ১৮৫২-৫৩ চনত কৰা জৰীপত জনসংখ্যা হয়গৈ ৪১,৭২৬ জন৷ তেওঁলোকৰ ভিতৰত হিন্দুলোকৰ সংখ্যা আছিল ৩৪,৬৬৫ জন৷ মুছলিম ২৫১ জন , জনগোষ্ঠীয় লোক আছিল ৫,৫৪৭ জন৷ ১৮৭২ চনত প্ৰথম চৰকাৰী লোকপিয়ল অনুসৰি জিলাখনৰ মুঠ জনসংখ্যা হয়গৈ ৩৯,১৫৪ জন৷ ১৯০১ চনত ৮৮.৩ শতাংশ বৃদ্ধিৰে এই জনসংখ্যা হয়গৈ ৭৩,৭৩৬ জন৷

হয়তো জিলাখনৰ ঠাইবিশেষে চাহ বাগিছা স্থাপনেই আছিল জনসংখ্যা বৃদ্ধিৰ মূল কাৰণ৷ বিশ-শতিকাৰ প্ৰথম দশকবোৰত পূব-বঙ্গৰ পৰা অবৈধভাৱে আহি বৰ্তমানৰ বঙালমৰা,ইছলামপুৰ, দৌলতপুৰৰ নিম্নপৃষ্ঠত থিতাপি লোৱা ভূমিহীন মুছলিম পৰিয়ালবোৰে জনসংখ্যা বৃদ্ধিত বিশেষ ভুমিকা বহন কৰিছিল৷[উদ্ধৃতিৰ প্ৰয়োজন] সেই সময়তে আকৌ কিছু সংখ্যক নেপালীলোক ম’হসহ খেতি-বাতি হোৱা ঠাইত থিতাপি লৈছিল৷ এনেকৈ ১৯২১ চনত জিলাখনৰ জনসংখ্যা এক লাখৰো অধিক হয়গৈ৷ অবৈধ প্ৰবেশ চলি থাকি ১৯০১ চনৰ জনসংখ্যা তিনিগুণ হৈ ১৯৫১ চনত হ’লগৈ ২,২২,৯৬৯ জন৷ আচৰিতজনকভাৱে এক অৰ্ধশতিকাতে (২০০১-২০০৩) চাৰিগুণ বাঢ়ি গৈ জনসংখ্যা হয় ৮,৮৯,০১০ জন৷ ২০০১ চনত জিলাখনত জনজাতিলোকৰ সংখ্যা মুঠ জনসংখ্যাৰ ২৩.৪৯% হৈ এক বিশেষ স্থান লাভ কৰে, যি সময়ত ৰাজ্যখনত জনজাতিলোকৰ পৰিমাণ ১৯.৪১%৷ ৰাজ্যৰ অনুসূচীত জাতিৰ লোকৰ পৰিমাণ মুঠ জনসংখ্যাৰ ৬.৫৫ % হোৱাৰ বিপৰীতে লখিমপুৰত এই পৰিমাণ ৭.২৮ % ৷

২০০১ চনত মুঠ জনসংখ্যা ৮,৮৯,০১০ জনৰ ভিতৰত বিভিন্ন ধৰ্মাৱলম্বী লোকৰ সংখ্যা আছিল এনে ধৰণৰ –

  • হিন্দু- ৭,০২,৪৪১ জন -৭৯.০৬ % ,
  • মুছলিম ১,৪৩,৫০৫ জন -১৬.১৪ %,
  • খ্ৰীষ্টিয়ান ৩৬,৬৬৭ জন -৪.৪২ % ৷
  • বৌদ্ধ ধৰ্মাৱলম্বী -১,৩৬২ জন
  • জৈন ধৰ্মাৱলম্বী -১৪৮ জন আৰু
  • অন্যান্য ধৰ্মৰ লোক -৩,৩৭১ জন ৷

জনবসতিৰ ঘনত্ব প্ৰতি বৰ্গ কিলোমিটাৰত ৪৫৭ জন [5]

২০১১ চনৰ লোকপিয়ল অনুসৰি জিলাখনৰ সাক্ষৰতাৰ হাৰ ৭৮.৩৯% ৷ পুৰুষ আৰু মহিলাৰ সাক্ষৰতাৰ হাৰ ক্ৰমে ৮৪.৬৬% আৰু ৭১.৯১%[6]

ভাষা[সম্পাদনা কৰক]

লখিমপুৰ জিলা অঞ্চল সুবৃহৎ অসমীয়া জাতিৰ অন্তৰ্ভুক্ত প্ৰায়বিলাক ধৰ্মীয়লোকৰ উপৰিও অজনজাতি আৰু জনজাতি লোকৰ বাসস্থান৷ ইয়াৰ বাহিৰেও কৰ্মেসূত্ৰে নেপাল, ৰাজস্থান, মৰোৱাড়, বিহাৰ, বঙ্গ,বাংলাদেশ, মধ্যপ্ৰদেশ, উৰিষ্যা,তামিলনাডু আদি ভাৰতৰ বিভিন্ন প্ৰান্তৰৰ পৰা অহা ভিন্ন ভাষীলোকো এই অঞ্চলত বহুকাল থাকি লখিমপুৰত স্থায়ীভাৱে বাসকৰা অসমীয়া লোকৰ লগত মিলি ভাষা সংস্কৃতি সমন্বয়ৰ পৰম্পৰাৰে এক স্বকীয় বৈশিষ্ট্য বহন কৰি আহিছে৷ লখিমপুৰ জিলাত স্থায়ীভাৱে বসবাস কৰি থকা বিভিন্ন ভাষা গোষ্ঠীৰ ভিতৰত (১) আৰ্য গোষ্ঠীৰ অন্তৰ্গত -অসমীয়া, বঙালী, নেপালী, মাৰোৱাৰী, হিন্দী, উড়িয়া, পাঞ্জাৱী আদি ভাষা-ভাষীসকল অন্যতম৷ (২) চীন-তিব্বতীয় শাখাৰ অন্তৰ্গত-বড়ো ভাষা গোষ্ঠীৰ উপশাখাৰ বড়ো,সোণোৱাল কছাৰী, মিচিং, দেউৰী-চুতীয়া,ৰাভা, খামতি সকলেই প্ৰধান ৷ (৩) অষ্ট্ৰীক গোষ্ঠীৰ অন্তৰ্গত-কোল বা মুণ্ডা শাখা ৷ এই শাখাৰ উপশাখা হ’ল-চাওতালী, মুণ্ডাৰী, শৱৰ আদি ৷ ইয়াৰ অন্তৰ্গত বিভিন্ন ভাষা সমূহ চাহ বাগিচাৰ মজদুৰ বা বনুৱা সকলৰ মাজত প্ৰচলিত ৷ উল্লিখিত ভাষা সমূহৰ ভিতৰত অসমীয়া ভাষীৰ বাদে আন ভাষা-ভাষী সকল হ’ল দ্বি-ভাষী৷ তেওঁলোক নিজ নিজ অঞ্চলত নিজৰ ভাষাভাষীৰ মাজত নিজৰ ভাষাতে কথা পাতে যদিও আনৰ লগত কথা বতৰা হওঁতে অসমীয়া ভাষাতে কথা পাতে৷ শিক্ষা-দিক্ষা, ব্যৱসায়িক লেনদেন, সাংস্কৃতিক অনুষ্ঠান আদিত এওঁলোকে অসমীয়া ভাষাক সংযোগী বা সহযোগী ভাষা হিচাপে প্ৰয়োগ কৰে৷

লখিমপুৰৰ প্ৰধান ভাষা অসমীয়া ৷ ইয়াৰ ৰূপ ঘাইকৈ দুটা - (ক) মান্য ৰূপ ( লিখিত ) (খ) কথ্য ৰূপ ( মুখে মুখে প্ৰচলিত ) (ক) মান্য ৰূপ : মান্যভাষাটো সাধাৰণতে ৰুচিমাৰ্জিত আৰু পৰিশীলিত৷ লিখোঁতেহে এই মান্যৰূপৰ অসমীয়াৰ প্ৰচলন হয় ৷ অৱশ্যে বিশেষ পৰিস্থিতিত নাটক, উপন্যাসৰ কথোপকথন তথা সংলাপ আদিত কেতিয়াবা সাহিত্যিক প্ৰয়োজনত কথ্য অসমীয়া প্ৰয়োগ কৰা হয় যদিও সেয়া কৃত্ৰিম ব্যৱহাৰ ৷ (খ ) কথ্য ৰূপ : দৈনন্দিন জীৱনত প্ৰচলিত ভাষাৰ মাজত মানুহৰ ৰুচি অনুযায়ী মাতকথাই এটা নিৰ্দিষ্ট ৰূপ লয়৷ এনে কথ্যৰূপৰ প্ৰতিফলন লখিমপুৰৰ কথ্য অসমীয়াতো পোৱা যায় ৷

লখিমপুৰৰ উল্লেখযোগ্য[সম্পাদনা কৰক]

লক্ষীমপুৰ জিলাৰ নগৰ/চহৰ[সম্পাদনা কৰক]

ঐতিহাসিক স্থানসমূহ[সম্পাদনা কৰক]

  • ৰজাবাৰী
  • হাৰ্হি দেৱালয়
  • গৰখীয়া দৌল
  • নীল দেৱালয়
  • পঞ্চানন দেৱালয়
  • লোণপানী দৌল
  • মাঘনোৱা দৌল আৰু দোতোলা
  • ফুলবাৰী দেৱালয়
  • বুটীকুৰ
  • চাউলধোৱা
  • দুলুংমুখ
  • কদম
  • খগা
  • হাতীলুং
  • পকা দ’ল পিঠাগুৰি
  • হাৰমতী
  • ৰাজগড় আলি
  • বৈঠাৱতী দেৱালয়
  • মুঢ়া ভগা দ’ল
  • বুঢ়ী গোসাঁনীৰ থান
  • দেওঘৰ
  • ঘাৰমৰা সত্ৰ
  • নাহৰ আটি সত্ৰ
  • বিষ্ণু বালিকুচি
  • লেতেকু পুখুৰী
  • বেলগুৰি থান বা সত্ৰ
  • পুণীয়া সত্ৰ
  • চাঙিনী থান
  • বাহজেঙনী সত্ৰ

শিক্ষানুষ্ঠান[সম্পাদনা কৰক]

  • উত্তৰ লখিমপুৰ মহাবিদ্যালয়
  • লক্ষীমপুৰ বালিকা মহাবিদ্যালয়
  • লক্ষীমপুৰ বাণিজ্য মহাবিদ্যালয়
  • লক্ষীমপুৰ কেন্দ্ৰীয় মহাবিদ্যালয়
  • লক্ষীমপুৰ আইন মহাবিদ্যালয়
  • স্নাতকোত্তৰ প্ৰশিক্ষণ মহাবিদ্যালয়
  • লক্ষীমপুৰ তেলাহী কমলাবৰীয়া মহাবিদ্যালয়
  • ঘিলামৰা নৰ্থ বেংক মহাবিদ্যালয়
  • ঢকুৱাখনা মহাবিদ্যালয়
  • ঢকুৱাখনা বাণিজ্য মহাবিদ্যালয়
  • শংকৰদেৱ মহাবিদ্যালয়
  • ওম প্ৰকাশ দিনোদিয়া মহাবিদ্যালয় (পানীগাঁও)
  • মাধৱদেৱ মহাবিদ্যালয়
  • বিহপুৰীয়া মহাবিদ্যালয়
  • বিহপুৰীয়া বাণিজ্য মহাবিদ্যালয়
  • পূব ডিক্ৰং মহাবিদ্যালয়
  • লালুক মহাবিদ্যালয়
  • নাওবৈচা মহাবিদ্যালয়
  • ভিবিৰাম হাজৰিকা মহাবিদ্যালয়
  • খেৰাজখাত মহাবিদ্যালয়
  • ব্ৰহ্মপুত্ৰ ভেলী একাডেমী
  • জিনিয়াছ একাডেমী
  • উত্তৰ লক্ষীমপুৰ চৰকাৰী উচ্চতৰ মাধ্যমিক বিদ্যালয়
  • উত্তৰ লক্ষীমপুৰ বালিকা উচ্চতৰ মাধ্যমিক বিদ্যালয়
  • পদ্মনাথ গোহাঞিবৰুৱা বালিকা উচ্চতৰ মাধ্যমিক বিদ্যালয়
  • ধলপুৰ উচ্চতৰ মাধ্যমিক বিদ্যালয়
  • নাৰায়ণপুৰ উচ্চতৰ মাধ্যমিক বিদ্যালয়
  • লোহিত-ডিক্ৰং উচ্চতৰ মাধ্যমিক বিদ্যালয়
  • শংকৰদেৱ কলেজিয়েট
  • খ'ৰা উচ্চতৰ মাধ্যমিক বিদ্যালয়
  • বঙালমৰা উচ্চতৰ মাধ্যমিক বিদ্যালয়
  • খেৰাজখাত উচ্চতৰ মাধ্যমিক বিদ্যালয়
  • নামনি সোৱনশিৰি উচ্চতৰ মাধ্যমিক বিদ্যালয়
  • টাউন হাইস্কুল
  • জন ফাৰ্থ হাইস্কুল
  • বসন্তলতা বিশ্বেশ্বৰ চাংকাকতি সোঁৱৰণী শংকৰদেৱ শিশু নিকেতন, লখিমপুৰ
  • পিছলা নেশ্যনেল একাডেমি, নাৰায়ণপুৰ
  • সংগম একাডেমী
  • এচিয়ান পাব্লিক স্কুল
  • টাউন হাই মাদ্ৰাছা স্কুল
  • ৰে’লৱে স্কুল
  • লীলাৱতী বৰদলৈ হিন্দী স্কুল
  • টোল আদৰ্শ প্ৰাথমিক বিদ্যালয়
  • বৰবালি উচ্চতৰ মাধ্যমিক বিদ্যালয়

সাংস্কৃতিক অনুষ্ঠান[সম্পাদনা কৰক]

  • পঞ্চানন নাট্য মন্দিৰ
  • নট সৈনিক
  • নাবিক

লক্ষীমপুৰ জিলাৰ উল্লেখযোগ্য ৰাজহুৱা প্ৰতিষ্ঠান[সম্পাদনা কৰক]


লক্ষীমপুৰ জিলাৰ উল্লেখযোগ্য ব্যক্তি[সম্পাদনা কৰক]

  • গনেশ পেগু
  • বিশ্ব বৰুৱা
  • ড° চন্দ্ৰধৰ চমুৱা
  • জীৱন বৰা
  • তোষেশ্বৰ চেতিয়া
  • হৰেন্দ্ৰ দেৱগোস্বামী
  • শিৱ শৰ্মা
  • অনু বৰুৱা
  • দেবেন বৰগোঁহাই
  • চন্দ্ৰকমল গগৈ
  • আলি হাইদৰ
  • মুনীন ভূঞা
  • ঘন হাজৰিকা
  • ইন্দ্ৰ বনিয়া

তথ্য সংগ্ৰহ[সম্পাদনা কৰক]

  1. 'লক্ষীমপুৰ'-লক্ষীমপুৰ কেন্দ্ৰীয় ৰঙালী বিহু সন্মিলনৰ স্বৰ্ণজয়ন্তী স্মাৰক গ্ৰন্থ, সম্পাদনা- হিৰণ্য সভাপণ্ডিত আৰু অৰবিন্দ ৰাজখোৱা, পৃষ্ঠা ?
  2. ..http://lakhimpur.nic.in/..
  3. ..http://lakhimpur.nic.in/profile.htm..
  4. ..http://lakhimpur.nic.in/profile.htm..
  5. ..http://lakhimpur.nic.in/profile.htm..
  6. ..http://lakhimpur.nic.in/profile.htm..

বাহ্যিক সংযোগ[সম্পাদনা কৰক]