ৰুবিয়াছ হেগ্ৰিড

অসমীয়া ৱিকিপিডিয়াৰ পৰা
ৰুবিয়াছ হেগ্ৰিড
হেৰী পটাৰ-ৰ চৰিত্ৰ
RubeusHagrid.jpg
ৰুবিয়াছ হেগ্ৰিডৰ চৰিত্ৰত ৰব্বি কোলট্ৰেন
হেৰী পটাৰ এণ্ড দ্য চেম্বাৰ অৱ ছিক্ৰেটছ (চলচ্চিত্ৰ)'ত
প্ৰথম আৱিৰ্ভাৱ হেৰী পটাৰ এণ্ড দ্য ফিল’ছ’ফাৰ্ছ ষ্টোন
শেষ আৱিৰ্ভাৱ হেৰী পটাৰ এণ্ড দ্য ডেডলী হোলোজ
স্ৰষ্টা জে কে ৰাউলিং
ৰূপায়ণ ৰব্বি কোলট্ৰেন (বয়স্ক)
মাৰ্টিন বেইফিল্ড (কিশোৰ)
তথ্য
পৰিয়াল ফ্ৰিডৱুল্ফা (মাক)
গ্ৰপ (সতীয়া ভাতৃ)

ৰুবিয়াছ হেগ্ৰিড (ইংৰাজী: Rubeus Hagrid) জে কে ৰাউলিং সৃষ্ট হেৰী পটাৰ শৃংখলাৰ এক কাল্পনিক চৰিত্ৰ। হেৰী পটাৰ এণ্ড দ্য ফিল’ছ'ফাৰ্ছ ষ্ট'নত আবিৰ্ভাৱ ঘটা অৰ্ধ-দৈত্য আৰু অৰ্ধ-মানৱ হেগ্ৰিড হ’ল হগৱাৰ্টছৰ গৰখীয়া তথা ছাবিসমূহৰ ৰক্ষক। তৃতীয় উপন্যাস ‘’হেৰী পটাৰ এণ্ড দ্য প্ৰিজনাৰ অৱ আজকাবান’’ত হেগ্ৰিডক যাদু প্ৰাণী সমূহৰ তত্ত্বাৱধানৰ শিক্ষক হিচাপে নিযুক্তি দিয়া হয় আৰু পিছলৈ তেওঁ অৰ্ডাৰ অৱ দ্য ফিনিক্সৰ এজন সদস্য হয়।

চাৰিত্ৰিক বিকাশ[সম্পাদনা কৰক]

ৰাউলিংৰ মতে হেগ্ৰিড এনে এটা চৰিত্ৰ যাক তেওঁ “প্ৰথমদিনাই” সৃষ্টি কৰিছিল[1]। তেওঁৰ নামটিৰ বিষয়ে ৰাউলিঙে কয় “এক পূৰণি ইংৰাজী শব্দ-যাৰ অৰ্থ-তুমি যদি হেগ্ৰিড হ’লাহেতেন-এইটো এটা স্থানীয় শব্দ-তুমি ভয়ানক ৰাতিৰ সন্মুখীন হ’ব লগা হ’লহেতেন। হেগ্ৰিড এক বৃহত্ সুৰাপায়ী-আৰু তেওঁৰ বহুতো ভয়ানক ৰাতিৰ অভিজ্ঞতা আছে।"[2] ৰোজমেৰী গ’ৰিঙে তেওঁৰ নিবন্ধ “হেৰীজ ফেম”ত কৈছে যে ৰাউলিঙৰ লিখনিত “ফৰেষ্ট অৱ ডীন”ৰ প্ৰভাৱ আছে আৰু হেগ্ৰিডেই একমাত্ৰ চৰিত্ৰ তাক “ফৰেষ্ট অৱ ডীনৰ পৰা পোনে পোনে অংকিত কৰা হৈছে”। গৰিঙৰ মতে হেগ্ৰিডৰ “শব্দৰ শেষ অংশ উচ্চাৰণ নকৰাটো এক চেপষ্ট’ৰ বিশেষত্ব।. [3]

হেগ্ৰিডৰ চৰিত্ৰটো আৰু হেগ্ৰিডৰ জুপুৰীত হেৰী পটাৰ, ৰণ ৱিজলী আৰু হাৰমাইনী গ্ৰিঞ্জাৰৰ মাজৰ কথোপকথনে দৰাচলতে গোটেই শৃংখলাটিত এক ধাৰাভাষ্য হিচাপে কাম কৰে কিয়নো হেগ্ৰিডৰ লগত কথা পাতি ইহঁত তিনিও প্ৰায়েই হগৱাৰ্টছ আৰু এলবাছ ডাম্বলডোৰৰ বিষয়ে বিভিন্ন গোপন কথা আৱিষ্কাৰ কৰে কাৰণ হেগ্ৰিডৰ কথাৰ মাজতে ভুলতে নক’বলগীয়া কথা কৈ দিয়াৰ এক অভ্যাস আছে। হেগ্ৰিডেই প্ৰথমতে যাদুকৰ সকলৰ মাজত থকা বিশুদ্ধ তেজ আৰু লেতেৰা তেজৰ ধাৰণা যে বহু পুৰণি সেইকথা আন্গুলিয়াই দিয়ে।

এক সাক্ষাত্কাৰত ৰাউলিঙে কয় যে ছাত্ৰাৱস্থাত হেগ্ৰিড গ্ৰীফিন্দৰ হাউছত আছিল[4] হেগ্ৰিডে যেতিয়া আৰাগগ নামৰ এটা মকৰা পোহে তেতিয়া সেইটোৱেই স্লাইথেৰিণৰ দৈত্য বুলি ভাবি তেওঁক হগৱাৰ্ট্ছৰ পৰা উলিয়াই দিয়া হয়। যেতিয়া হেৰীয়ে হগৱাৰ্ট্ছত নাম ভৰ্তি কৰে তেতিয়া হেগ্ৰিডে হগৱাৰ্ট্ছৰ ছাবিৰ ৰখীয়া হৈ কাম কৰি থাকে যাৰ অৰ্থ ৰাউলিংৰ ভাষাত “সেইজন যিয়ে তোমাক হগৱাৰ্ট্ছৰ ভিতৰ সোমাবলৈ আৰু বাহিৰ ওলাবলৈ দিব” ।[5] তদুপৰি হেগ্ৰিডেই প্ৰথম বাৰ্ষিকৰ ছাত্ৰ-ছাত্ৰী সকলক তেওঁলোকৰ হগৱাৰ্ট্ছলৈ প্ৰথম আগমনৰ সময়ত নাৱেৰে হ্ৰদটো পাৰ কৰি দিয়ে।

আবিৰ্ভাৱ[সম্পাদনা কৰক]

হেৰী পটাৰ এণ্ড দ্য ফিল’ছ’ফাৰ্ছ ষ্টোন[সম্পাদনা কৰক]

হেৰী পটাৰ এণ্ড দ্য ফিল’ছ’ফাৰ্ছ ষ্টোনৰ "কীপাৰ অৱ দ্য কীজ" অধ্যায়ত থকা মেৰী গ্ৰেণ্ডপ্ৰীৰ হেগ্ৰিডৰ চিত্ৰায়ণ

প্ৰথম উপন্যাস খনৰ প্ৰথম অধ্যায়তে ৰুবিয়াছ হেগ্ৰিডে আত্মপ্ৰকাশ কৰে। লৰ্ড ভ'লডেমৰ্টে জেমছ পটাৰ আৰু লিলি পটাৰক হত্যা কৰাত ডাম্বলডোৰে হেগ্ৰিডৰ ওপৰত বিশ্বাস স্থাপন কৰি কণমানি হেৰীক মাক-দেউতাকৰ ঘৰৰ পৰা উদ্ধাৰ কৰি আনিবলৈ পথিয়াই| যেতিয়া মিনাৰ্ভা মেকগোনাগলে ইমান এটা দৰকাৰী কামত হেগ্ৰিডক বিশ্বাস কৰাটো সঠিক হয়নে বুলি ডাম্বলডোৰক প্ৰশ্ন কৰে, ডাম্বলডোৰে কয় যে নিজৰ জীৱন জৰিত হৈ থকা কথাকলৈও তেওঁ হেগ্ৰিডক বিশ্বাস কৰে আৰু এই কথাষাৰ তেওঁ শৃংখলাটিত বহুবাৰ উল্লেখ কৰে যিহেতু তেওঁ হেগ্ৰিডক প্ৰায়ে কিছুমান গোপন কাম কৰিবলৈ নিৰ্দেশ দিয়ে। ইয়াৰে দহ বছৰ পিছত হেগ্ৰিডে গ্ৰিংগটছ ধনগুলৈ বেংকৰ পৰা ফিল’ছ’ফাৰ্ছ ষ্ট’নটি হগৱাৰ্ট্ছলৈ লৈ আহে আৰু তিনিমূৰীয়া কুকুৰ ফ্লাফীক ইয়াৰ পহৰা দিবলৈ থৈ দিয়ে। ডাম্বলডোৰে হেগ্ৰিডক হেৰীক বিচাৰি উলিওৱা আৰু যাদুবিশ্ব তথা বিদ্যালয়ৰ সামগ্ৰী সমূহ কিনাত সহায় কৰিবলৈ দ্বায়িত্ব দিয়ে। পিছলৈ হেগ্ৰিড ৰণ আৰু হাৰমাইনীৰো ভাল বন্ধু হৈ পৰে। কিতাপখনত পিছলৈ এক মুখ ঢকা অবয়ৱে(ছদ্মৱেশী কুইৰেল) হেগ্ৰিডক এটা ড্ৰ্ৰেগনৰ কণী দি ফ্লাফীৰ বিষয়ে জানি লয়। হেগ্ৰিডে ভুলবশতঃ হেৰী,ৰণ আৰু হাৰমাইনীৰ আগত কৈ দিয়ে যে সংগীত শুনাই ফ্লাফীকঅতি সহজে শুৱাই থৈ দিব পাৰি। ড্ৰেগনৰ কণীটো ফুকোৱাৰ পিছত তিনিও ড্ৰেগন পোৱালি নৰবাৰ্টক ৰণৰ ককায়েক চাৰ্লিয়ে কাম কৰা ৰোমানিয়াৰ ড্ৰেগন অভয়াৰণ্যলৈ পলুৱাই পঠিওৱাত হেগ্ৰিডক সহায় কৰে।

হেৰী পটাৰ এণ্ড দ্য চেম্বাৰছ অৱ ছিক্ৰেটছ[সম্পাদনা কৰক]

এই দ্বিতীয় উপন্যাসখনতহে পাঠকে হেগ্ৰিডক হগৱার্ট্ছৰ পৰা অপসাৰণ কৰাৰ কাৰণটো গম পায়। এইটোও গম পোৱা যায় যে পিছলৈ লর্ড ভ'লডেমর্ট হিচাপে পৰিচিত হোৱা টম ৰিডল কনিষ্ঠ হগৱার্ট্ছত পঢ়ি থকা সময়তেই হেগ্ৰিডো হগৱার্ট্ছৰ ছাত্র আছিল। তৃতীয় বার্ষিকত থাকোতে হেগ্ৰিডক এৰাগগ নামৰ এক বৃহত্‍ ভয়ানক মকৰাৰ সৈতে পোৱা যায় আৰু সকলোৱে ভাবে যে ইয়েই সেই "স্লিদেৰিণৰ দৈত্য"টি যাক হেগ্ৰিডে গোপন কোঠাৰ পৰা মুকলি কৰি দিছে আৰু উদ্দেশ্যপ্রণোদিতভাৱে বা উদ্দেশ্যঅপ্রণোদিতভাভাৱে ছাত্র-ছাত্রীসকলক আক্রমণ বা জড়ভৰত (একার্থত হত্যা)কৰিবলৈ ব্যৱহাৰ কৰিছে। এই কাৰণতেই হেগ্ৰিডক বিদ্যালয়ৰ পৰা নাম কটাই দিয়া হয়। এৰাগগে অন্ধকাৰ অৰণ্যলৈ পলাই গৈ মকৰাৰ এক চুবুৰী গঢ়ি তোলে। আনহাতে প্রকৃত অপৰাধী টম ৰিডলে,যিয়ে বাছিলিস্ক নামৰ দৈত্যৰ সহায়ত ছাত্র-ছাত্রী সকলক আক্রমণ কৰি আছিল,সকলোৰে মনত হেগ্ৰিড অপৰাধী বুলি থকা সন্দেহক ঘনীভূত কৰি তোলে। ঘটনাৰ পাকচক্রত বাছিলিস্কে পুনৰ বিদ্যালয়ত সন্ত্ৰাস চলায় আৰু হেগ্ৰিডকেই পুনৰ দোষী বুলি তেওঁক আজকাবান কয়দীশাললৈ পঠিওৱা হয়। কৰায়ত্ত হোৱাৰ আগতে হেগ্ৰিডে হেৰী আৰু ৰণক মকৰাবোৰক অনুসৰণ কৰা বুলি কৈ যায় যাতে দুয়ো এৰাগগক লগ ধৰি প্রকৃত দৈত্যটোৰ বিষয়ে জানিব পাৰে। হেৰীয়ে গোপন কোঠাত বাছিলিস্কক বধ কৰাৰ পিছত এইটো উদ্ঘাটন হয় যে প্রকৃততে জিনি ৱিজলীয়েহে টম ৰিডলৰ ডায়েৰীৰ প্রভাৱত কামবোৰ কৰি আছিল। তাৰ পিছত হেগ্ৰিডক মুক্তি দিয়া হয়।

হেৰী পটাৰ এণ্ড দ্য প্ৰিজনাৰ অৱ আজকাবান[সম্পাদনা কৰক]

তৃতীয় উপন্যাসখনত প্রফেছৰ ছিলভেনাছ কেটলবাৰ্ণে হগৱার্ট্ছৰ পৰা অৱসৰ লোৱাত,ডাম্বলডোৰৰ মতে যিয়ে নিজৰ অৱশিষ্ট অংগবোৰৰ সৈতে কিছু সময় কটাব বিচাৰে,হেগ্ৰিডক যাদু প্রাণীৰ তত্ত্বাৱধান বিষয়ৰ শিক্ষক হিচাপে নিয়োগ কৰা হয়। যিহেতু তেওঁৰ নামৰ সকলো অভিযোগ মিছা বুলি প্রমাণিত হয় সেয়েহে তেওঁক যাদু প্রয়োগৰ অনুমতি দিয়া হয়।[6] প্রথম শ্রেণীতেই হেগ্ৰিডে তৃতীয় বার্ষিকক বাকবীক নামৰ হিপ'গ্রিফটোৰ সৈতে চিনাকি কৰোৱায় কিন্তু, ড্রেকো মেলফয়ে তাক অপমান কৰাত সি ড্রেকোক আক্রমণ কৰে। ডাম্বলডোৰে হেগ্ৰিডক নির্দোষী বুলি প্রমাণিত কৰে যদিও যাদু মন্ত্ৰালয়ে বাকবীকক মৃত্যুদণ্ডৰ আদেশ দিয়ে। এনেকৈয়ে হেগ্ৰিডৰ শ্রেণীটো বৰ বিৰক্তিকৰ হৈ পৰে আৰু হেৰী ,ৰণ আৰু হাৰমাইনীয়ে হেগ্ৰিডে বাকবীকক কেনেকৈ বচাব পাৰে সেই সম্বন্ধে তথ্য বিচাৰি সময় কটাব ধৰিলে। কিতাপখনৰ শেষৰফালে হাৰমাইনী আৰু হেৰীয়ে এটা সময় পৰিৱর্তকৰ সহায়ত বাকবীকক মৃত্যুৰ পৰা আৰু ছিৰিয়াচ ব্লেকক ডিমেনটৰৰ চুমাৰ পৰা ৰক্ষা কৰে।

হেৰী পটাৰ এণ্ড দ্য গব্লেট অৱ ফায়াৰ[সম্পাদনা কৰক]

চতুর্থ উপন্যাসখনত প্রকাশ হয় যে হেগ্ৰিড এক মিশ্রিত তেজৰ যাদুকৰ আৰু দৈত্যৰ সন্তান। তেওঁৰ মাক ফ্রিডৱুল্ফা এক দৈত্য আছিল যিয়ে হেগ্ৰিডৰ শিশু অৱস্থাতে যাদুকৰ দেউতাকক এৰি গৈছিল। যিহেতু দৈত্যবোৰ নিষ্ঠুৰ প্রকৃতিৰ আৰু এসময়ৰ ভ'লডেমর্টৰ সংগী,গতিকে হেগ্ৰিডে নিজৰ মাক দেউতাকৰ কথা গুপুতে ৰাখে আৰু মানুহবোৰক তেওঁৰ বৃহদাকাৰ শৰীৰৰ ৰহস্যৰ অন্য এক ব্যাখ্যা আগবঢ়ায় (প্রয়োজন নৌহওঁতেই এবটল হাড়-বাঢ় ঔষধ খোৱা)। হেগ্ৰিডৰ এই গুপ্ত পৰিচয় ৰীতা স্কিটাৰে ডেইলী প্রফেটত প্রকাশ কৰি দিয়ে আৰু হেগ্ৰিডক বিপদজনক(বিপদজনক জীৱ-জন্তুৰ প্রতি তেওঁৰ আকর্ষণৰ বাবে) আৰু অনুপযোগী হিচাপে বর্ণনা কৰে। এই ঘটনাত হেগ্ৰিডে বৰ দুখ পায় আৰু শিক্ষক পদৰ পৰা অব্যাহতি ল'ব খোজে অৱশ্যে ডাম্বলডোৰে তেওঁৰ এই আবেদন নাকচ কৰে। উপন্যাসখনত হেগ্ৰিডে আন এজনী অর্ধ দৈত্য যাদুকৰী আৰু ফৰাচী যাদু বিদ্যালয় বউবেটনৰ প্রধান শিক্ষয়িত্রী অলিম্প মেক্সিমৰ সৈতে এক প্রেমময় সম্পর্ক গঢ়ি তোলে। তদুপৰি হেগ্ৰিড সেইসকলৰ এজন আছিল যিয়ে আৰম্ভণিৰে পৰা বিশ্বাস কৰিছিল যে যাদুৰ ত্রিকোণীয় প্রতিযোগিতাত হেৰীয়ে নিজে নিজৰ নাম দিয়া নাছিল। পিছলৈ এলাষ্টৰ মুদীয়ে (প্রকৃততে ছদ্মবেশী বার্টী ক্রাউচ কনিষ্ঠ) হেগ্ৰিডক প্রতিযোগিতাৰ প্রথম পর্যায়ত যে ড্রেগনৰ সৈতে যুঁজিব লাগিব সেয়া হেৰীক দেখুৱাই দিবলৈ পৰামর্শ দিয়ে। তদুপৰি প্রতিযোগিতাৰ তৃতীয় পর্যায়ত ব্লাষ্ট এণ্ডেড স্ক্রুটছ বোৰৰ যোগানো হেগ্ৰিডেই ধৰিছিল।

হেৰী পটাৰ এণ্ড দ্য অৰ্ডাৰ অৱ দ্য ফিনিক্স[সম্পাদনা কৰক]

পঞ্চম উপন্যাসখনৰ প্রথমাংশত হেগ্ৰিড উপস্থিত নাথাকে। তেওঁ পিছত হেৰী,ৰণ আৰু হাৰমাইনীক কয় যে অর্ডাৰৰ এক অভিযান অনুসৰি তেওঁ আৰু মেডাম মেক্সিমে সমগ্র ইউৰোপ ভ্রমণ কৰে আৰু দৈত্যসকলক বিচাৰি সিহঁতক ভাল পক্ষ অর্থাত্‍ ডাম্বলডোৰৰ পক্ষ ল'বলৈ অনুৰোধ কৰে। অৱশ্যে ডেথ্ ইটাৰ সকলেও দৈত্য সকলক বিচাৰি পায় আৰু ভ'লডেমর্টৰ সংগ লবলৈ মান্তি কৰায়। এই অভিযানত দৈত্যসকলে হেগ্ৰিডক আক্রমণ কৰে আৰু মেডাম মেক্সিমে তেওঁক বচায়। অৱশ্যে ওভটনি যাত্রাত দুয়ো বেলেগে বেলেগে আহে কাৰণ হেগ্ৰিডে তেওঁৰ সতীয়া ভাতৃ গ্রপক বিচাৰি পায় আৰু তাক ঘৰলৈ লৈ আহিবলৈ চেষ্টা কৰে যাক লৈ মেক্সিম বিৰক্ত হৈ পৰে। দৈত্যসকলৰ সৈতে থাকি যাব খোজা গ্রপে হেগ্ৰিডক যথেষ্ট আঘাতপ্রাপ্ত কৰে। হেগ্ৰিডে হেৰী আৰু হাৰমাইনীক তেওঁৰ সতীয়া ভাতৃৰ সৈতে চিনাকি কৰি দিয়ে আৰু তেওঁ হগৱার্ট্ছ এৰি গ'লে তাক চোৱা-চিতা কৰিবলৈ অনুৰোধ কৰে। হগৱার্ট্ছৰ উচ্চ তদন্তকাৰী বিষয়া ডলর্ছ আমব্রিজে হেগ্ৰিডকে ধৰি হগৱার্ট্ছৰ সকলো শিক্ষক-শিক্ষয়িত্রীৰ শ্রেণীসমূহ নিৰীক্ষণ কৰে আৰু ডাম্বলডোৰৰ সৈতে ঘনিষ্ঠ বাবে হেগ্রিডক অপসাৰণ কৰাৰ চেলু বিচাৰি ফুৰে। কিতাপখনৰ শেষৰফালে আমব্রিজ আৰু মন্ত্রালয়ৰ অন্য বিষয়ববীয়াসকলে হেগ্রিডক কৰায়ত্ত কৰাৰ চেষ্টা কৰে। হেগ্রিড পলাই সাৰে কিন্তু তেওঁক বচাবলৈ গৈ প্রফেছৰ মেকগোনাগল আঘাতপ্রাপ্ত হয়। অৱশেষত যেতিয়া ডাম্বলডোৰ পুনৰ প্রধান শিক্ষক পদত অধিস্থিত হয়,হেগ্রিড স্কুললৈ ঘূৰি আহে।

হেৰী পটাৰ এণ্ড দ্য হাফ ব্লাড প্ৰিন্স[সম্পাদনা কৰক]

ষষ্ঠ উপন্যাসখনত হেৰী,ৰণ আৰু হাৰমাইনীয়ে যাদু প্রাণীৰ তত্ত্বাৱধান বিষয়ৰ শ্রেণী নলয় আৰু তাকে লৈ কিতাপখনৰ প্রথমাংশত হেগ্রিড হতাশ আৰু খঙাল হৈ থাকে, কিন্তু শীঘ্রেই হেগ্ৰিডে বুজি পায় যে ইয়াৰ অর্থ এইটো নহয় যে সিহঁতে হেগ্রিডক বেয়া পায়। পিছলৈ যেতিয়া এৰাগগৰ মৃত্যু হয়,হেগ্রিডে প্রাণৰ ভয়কো নেওচি মকৰাটোৰ অন্ত্যেষ্টিক্রিয়া সম্পন্ন কৰিবলৈ যায়। তাৰ পিছত তেওঁ আৰু হোৰাছ স্লাগহর্ণে অত্যাধিক ফায়াৰহুইস্কী খাই দিয়ে আৰু এই সুযোগৰ সুবিধা লৈ হেৰীয়ে (যি সেইসময়ত ফেলিক্স ফেছিলিছ ঔষধ বা "পনীয়া সৌভাগ্য"ৰ প্রভাৱত আছিল) স্লাগহর্ণৰ পৰা এক স্মৃতি আহৰণ কৰে। কিতাপখনৰ শেষৰফালে ডেথ্ ইটাৰ বোৰে হগৱার্ট্ছ আক্রমণ কৰে আৰু সিহঁতৰ লগত যুঁজ কৰোতে হেগৰিডৰ জুপুৰীটোত জুই লাগে। ডাম্বলডোৰৰ অন্ত্যেষ্টিক্রিয়াৰ সময়ত হেগ্রিডে ডাম্বলডোৰৰ শৰীৰটো কঢ়িয়াই নিয়ে।

হেৰী পটাৰ এণ্ড দ্য ডেডলী হ’ল’জ[সম্পাদনা কৰক]

সপ্তম উপন্যাসখনত হেৰীক ডার্চলীসকলৰ ঘৰৰ পৰা যাদুৰে সুৰক্ষিত কৰি ৰখা বাৰ'লৈ নিবলৈ অর্ডাৰ অৱ ফিনিক্সে গঠন কৰা দলটিত হেগ্রিডো থাকে। হেগ্রিডে হেৰীক ছিৰিয়াছ ব্লেকৰ পৰা পোৱা উৰণীয়া মটৰচাইকেল খনত হেৰীক লৈ যায় কিন্তু ডেথ্ ইটাৰে তেওঁলোকক আক্রমণ কৰে। স্বয়ং ভ'লডেমর্টে আহি আক্রমণ কৰাৰ পিছত দুয়ো কোনোমতে আহি বাৰ' ত উপস্থিত হয়। বিল ৱিজলী আৰু ফ্লিউৰ ডেলেকৰৰ বিয়াৰ পিছত হেগ্রিডে পুনৰ হগৱার্ট্ছলৈ উভতি যায়। কিতাপখনৰ শেষৰফালে ডেথ্ ইটাৰবোৰে নিয়ন্ত্রণ কৰা হগৱার্ট্ছৰ ভয়াবহ পৰিবেশত হেগ্ৰিডে নিজৰ জুপুৰীত "হেৰী পটাৰক সমর্থন কৰা" শীর্ষক অনুষ্ঠানৰ আয়োজন কৰে ফলত ডেথ্ ইটাৰৰ ভয়ত ফেং আৰু গ্রপেৰে সৈতে পর্বতত গৈ লুকাই থাকে। হগৱার্ট্ছৰ যুদ্ধৰ শেষত যেতিয়া হেৰীয়ে ভ'লডেমর্টৰ ওচৰত আত্মসমর্পণ কৰে তেতিয়া হেগ্রিডক ডেথ্ ইটাৰ শিবিৰত বন্দী হৈ থকা দেখা পোৱা যায়। হেগ্রিডক হেৰীক স্কুললৈ কঢ়িয়াই লৈ যাবলৈ বাধ্য কৰা হয় আৰু হেৰীয়ে পুনর্জীৱন পোৱা বুলি গম নাপায় পথত থকা অশ্বনৰবোৰক একো নকৰাকৈ চাই থকা বাবে দোষ দিয়ে। ইয়াৰ পিছত অশ্বনৰ সকলে যুদ্ধত অংশগ্রহণ কৰে আৰু ডেথ্ ইটাৰ,যাদু প্রাণীৰ জল্লাদ ৱাল্ডেন মেকনেয়াৰক নিজৰ প্রতিদ্বন্দী বুলি ভাবি হেগ্রিডেও যুদ্ধৰ দ্বিতীয়ার্দ্ধত অংশগ্রহণ কৰে আৰু ভলডেমর্টক পৰাস্ত কৰাৰ পিছত হেৰীক পোনপ্রথমে অভিনন্দন জনায়।

ৰাউলিঙৰ মতে অন্তিম কিতাপখনত থকা হেগ্রিডে হেৰীৰ শৰীৰটো মৃত বুলি ধৰি লৈ কঢ়িয়াই অনা দৃশ্যটো যথেষ্ট তাত্‍পর্য্যপূর্ণ কাৰণ "হেগ্রিডেই হেৰীক ডার্ছলীহঁতৰ ঘৰৰ পৰা আনিছিল। হেগ্রিডেই হেৰীক যাদুবিশ্বলৈও আনিছিল… দৰাচলতে তেওঁ তাৰ অভিভাৱক বা দিকনির্ণয়কাৰীৰ দৰে আছিল ...আৰু এতিয়া মই বিচাৰো হেৰীক অৰণ্যৰ পৰা কঢ়িয়াই অনা মানুহজন হেগ্রিডেই হওঁক।"[7] ৰাউলিঙে এয়াও কয় যে হেগ্ৰিডৰ কেতিয়াও মৃত্যুৰ ভয় নাছিল কাৰণ তেওঁৰ "মনত সদায় দৈত্যাকায় হেগ্ৰিডে হেৰীক কোলাত লৈ কান্দি কান্দি অৰণ্যৰ মাজেৰে আহি থকা দৃশ্যটো ভাঁহি আছিল।".[8]

উপসংহাৰ[সম্পাদনা কৰক]

হগৱার্ট্ছৰ যুদ্ধৰ ঊনৈশ বছৰ পিছতো হেগ্ৰিড হগৱার্ট্ছতেই থাকে যদিও তেওঁৰ সামর্থ্য কিমান তাক জনা নাযায় (কাৰণ এই সময়ত তেওঁ প্রায় ৮৭ বছৰীয়া হ'ব)। ঠিক হেৰীক মতাৰ দৰেই তেওঁ হেৰীৰ পুত্র এলবাছক চাহ খাবলৈ নিজৰ জুপুৰীলৈ মাতে আৰু ইয়েই সূচায় যে হেৰী আৰু হেগ্রিডৰ মাজত তেতিয়াও ঘনিষ্ঠ সম্বন্ধ আছে। ২০০৭ চনত হেগ্রিডে বিয়া কৰালেনে নাই বুলি সোধা এক প্রশ্নৰ উত্তৰত ৰাউলিঙে কয় যে হেগ্রিডে এজনী দৈত্যৰ সৈতে এক সম্বন্ধ গঢ়ি তুলিছিল যদিও ই বেছিদিন নিটিকিল।[9]

চলচ্চিত্ৰ ৰূপায়ণ[সম্পাদনা কৰক]

স্কটিছ অভিনেতা ৰব্বি কোলট্রেনে হেৰী পটাৰ উপন্যাসসমুহৰ আটাইকেইখন চলচ্চিত্র অভিযোজনতেই হেগ্ৰিডৰ চৰিত্রত অভিনয় কৰিছে।[10] ৰাউলিঙৰ মনত আগৰেপৰা এই চৰিত্রটোৰ বাবে কোলট্রেনৰ কথা খেলাই আছিল আৰু তেওঁৰ তালিকাখনত কোন শীর্ষস্থানত আছে বুলি সোধাত একে উশাহেই "হেগ্ৰিডৰবাবেৰব্বিকোলট্রেন বুলি উত্তৰ দিছিল।[11][12] কোলট্রেনে মন্তব্য দিছিল যে হেৰী পটাৰ ছবি সমূহৰ অংশ হোৱাটো "এক চমত্‍কাৰী ক্ষেত্রত জড়িত হোৱা।"[13] ৰাউলিঙে কোলট্রেনক হেগ্ৰিডৰ পটভূমিৰ বিষয়ে কিছু কৈছিল। [14] ৰাউলিঙে এয়াও কয় যে, "ৰব্বি হেগ্ৰিডৰ কাৰণে সম্পূর্ণ নিখুঁট নির্বাচন কাৰণ হেগ্ৰিড এক মৰমলগা,পছন্দ হোৱা আৰু কিছু জমনি চৰিত্র[...] কিন্তু তেওঁৰ – তুমি এয়া গম পাব লাগিব – এক সুনিশ্চিত ভিতৰুৱা কঠিনতা আছে[...] আৰু মই ভাবো এই ক্ষেত্রত ৰব্বি একদম পাকৈত।"[12]

ইংৰাজ ৰাগবী য়ুনিয়নৰ ফুটবলাৰ মার্টিন বেইফিল্ডে তেওঁৰ গুৰুকায় শৰীৰৰ বাবে বিপদজনক দীঘলীয়া দৃশ্যসমূহত হেগ্ৰিডৰ ভাওঁ লৈছে। বেইফিল্ডে হেৰী পটাৰ এণ্ড দ্য চেম্বাৰ অৱ ছিক্রেটছত কিশোৰ হেগ্ৰিডৰ ভূমিকাতো অভিনয় কৰিছে।[15]

চৰিত্ৰায়ণ[সম্পাদনা কৰক]

বাহ্যিক অৱয়ব[সম্পাদনা কৰক]

ফিল'ছ'ফার্ছ ষ্ট'নত হেগ্রিডক সাধাৰণ মানুহতকৈ দুগুণ ওখ আৰু পাঁচগুণ শকত বুলি কোৱা হৈছে কিন্তু ছবিখনত তেওঁক মিটাৰ) হিচাপে দেখুওৱা হৈছে আৰু পিছৰ কিতাপকেইখনত তেওঁক সাধাৰণ মানুহতকৈ তিনিগুণ শকত বুলি কোৱা হৈছে। হেগ্রিড তেওঁৰ পশ্চিমীয়া ধৰণৰ কথনশৈলীৰ বাবে জনাজাত। এজন অর্ধ-দৈত্য হোৱা হেতুকে তেওঁক যাদুবাণ আৰু মন্ত্রবোৰে মানুহতকৈ কম ক্ষতি সাধন কৰে। অর্ডাৰ অৱ দ্য ফিনিক্সত যেতিয়া আমব্রিজ আৰু অন্য যাদুকৰ সকলে তেওঁক হগৱার্ট্ছৰ পৰা আঁতৰ কৰিবলৈ আহে তেতিয়া তেওঁ উভতি যুঁজ কৰে। তেওঁলোকে হেগ্ৰিডৰ ওপৰত যাদুবাণ আৰু মূর্চ্ছাবান প্রয়োগ কৰে যদিও তেওঁ দৈত্যবংশী হোৱা সূত্রে লাভ কৰা প্রতিৰক্ষাৰ ফলত এইবোৰ তেওঁৰ গাত লাগি ওফৰি যায়। হাফ ব্লাড প্রিন্সফ্লাইট অৱ দ্য প্রিন্স অধ্যায়ত এই গুণতে হেগ্রিডে এজন ডেথ্ ইটাৰৰ শক্তিশালী যাদু সমুহৰ প্রতিৰোধ কৰিব পাৰে। কিছুমান ৰসায়ন যেনে কেৱল মানুহৰ কাৰণে নির্মাণ কৰা পলীজ্যুচ ৰসায়ন আদিও হেগ্রিডৰ ক্ষেত্রত নিষ্ক্রিয়।[16]

ব্যক্তিত্ত্ব[সম্পাদনা কৰক]

হেগ্রিড এক বন্ধুত্বপূর্ণ তথা কোমল হৃদয়ৰ ব্যক্তি আৰু তেওঁৰ সহজে চকুপানী ওলাই যিটো কথা প্রথম দৃশ্যতে দেখা যায় ,যেতিয়া ফিল'ছ'ফাছ ষ্ট'নত হেগ্রিডে হেৰীক ডার্ছলীহঁতৰ ঘৰত থৈ আহে। বন্ধুৰ প্রতি তেওঁ খুবেই বিশ্বাসী,বিশেষকৈ ডাম্বলড'ৰৰ প্রতি যাক তেওঁ কেবাবাৰো পৃথিৱীৰ সর্বশ্রেষ্ঠ যাদুকৰ বুলি অভিহিত কৰে। ফিল'ছ'ফার্ছ ষ্ট'নৰ প্রথম দৃশ্যতে দেখা যায় যে কোনোবাই তেওঁৰ ওচৰত ডাম্বলড'ৰক অপমান কৰিলে তেওঁ খঙত অগ্নিশর্মা হৈ পৰে(যেতিয়া ভার্ণন ডার্ছলীয়ে ডাম্বলড'ৰক এটা "পগলা মূর্খ বুঢ়া" বুলি কয়)। হেৰীৰ ক্ষেত্রতো তেওঁ খুবেই বিশ্বাসী আৰু এই বিশ্বাস ৰক্ষার্থেই শৃংখলাটিত কেবাবাৰো কষ্ট ভূগিব লগীয়া হৈছে আৰু কাৰাগাৰলৈ নাযাবলৈ দুবাৰ আত্মগোপন কৰিবলগীয়া হৈছে। ৰাউলিঙে হেগ্ৰিডৰ বিষয়ে কৈছে , "হেগ্রিড সদায় এক মৌলিক শক্তিৰ নিছিনা আছিল। তেওঁ যেন অৰণ্যৰ ৰজা নাইবা এক সেউজীয়া মানৱ। তেওঁ এক অর্ধবন্য মানুহ যিয়ে অৰণ্যৰ দাঁতিত বাস কৰে।".[17]

যাদুকৰী সামৰ্থ্য আৰু দক্ষতা[সম্পাদনা কৰক]

হগৱার্ট্ছৰ পৰা উলিয়াই দিয়াৰ পিছত যাদু মন্ত্রালয়ে হেগ্ৰিডৰ ওক গছৰ যাদুদণ্ডডাল ভাঙি পেলাই আৰু তেওঁৰ যাদু প্রয়োগত প্রতিবন্ধকতা আৰোপ কৰে।[18] হেগ্রিডে তেওঁৰ যাদুদণ্ডদাল এটা গুলপীয়া ছাতিৰ ভিতৰত সুমুৱাই থয় আৰু মাজে মাজে সৰু সুৰা যাদু প্রয়োগ কৰে; অৱশ্যে তৃতীয় কিতাপখনলৈ তেওঁৰ যাদু প্রয়োগত বাধা থাকে, আৰু যিহেতু তেওঁ পূর্ণ পর্যায়ৰ যাদুকৰ নহয়, তেওঁ অন্য বয়স্ক যাদুকৰ সকলতকৈ "সদায় কিছু অপৈণত হৈ থাকিব",[6] কিন্তু তেওঁ "প্রায়ে কিছুমান আকর্ষণীয় যাদু প্রয়োগ কৰি সকলোকে,আনকি নিজকো আচৰিত কৰি তোলে।"[19] তদুপৰি দৈত্যৰ বংশধৰ হোৱাৰ সুবাদতে তেওঁ উত্তৰাধিকাৰী সূত্রেও কিছুমান যাদুকৰী শক্তি লাভ কৰে। উদাহৰণস্বৰূপে হেৰী পটাৰ এণ্ড দ্য অর্ডাৰ অৱ দ্য ফিনিক্সত মন্ত্রালয়ৰ যাদুকৰবোৰে নিক্ষেপ কৰা মূর্চ্ছাবাণবোৰ হেগ্রিডৰ গাত লাগি ওফৰি যায়।

পৰিয়াল[সম্পাদনা কৰক]

গ্ৰপ[সম্পাদনা কৰক]

গ্রপ হল এক দৈত্য আৰু হেগ্ৰিডৰ সতীয়া ভাতৃ। দুয়োৰে মাক একেজনীয়েই,ফ্রিডৱুল্ফা।[20] গ্রপ প্রায় ১৬ feet (৪.৯ m) ওখ যিটো হেগ্ৰিডৰ মতে দৈত্যৰ হিচাপত সৰু। তাৰ আঙুলিৰ পাববোৰ একোটা ক্রিকেট বলৰ সমান ডাঙৰ (~২২৫ মিমি পৰিধিৰ)। অন্য দৈত্য সকলে মাৰ ধৰ কৰি থাকে বাবে হেগ্রিডে গ্রপক নিষিদ্ধ অৰণ্যলৈ লৈ আহে। সি মাত্র কেইটামানহে ইংৰাজী শব্দ জানে আৰু তাৰ ব্যৱহাৰবোৰ বন্য আৰু অনুমান কৰিব নোৱাৰা বিধৰ।

প্রথমতে গ্রপে হেগ্ৰিডে তাক সভ্য কৰিবলৈ চলাই থকা প্রচেষ্টাবোৰৰ প্রতি সঁহাৰি নিদিয়ে আৰু গছবোৰ উভালি সময় কটায় থাকিবলৈ পছন্দ কৰে। হেগ্ৰিডে হগৱার্ট্ছ এৰি পলাই থকা সময়ত গ্রপক হেৰী,ৰণ আৰু হাৰমাইনীৰ তত্ত্বাৱধানত থৈ যায়। এবাৰ যেতিয়া হেৰী আৰু হাৰমাইনীয়ে অৰণ্যৰ মাজত অশ্বনৰসকলৰ সৈতে মুখামুখি হৈ এক বিপদজনক পৰিস্থিতিত পৰে তেতিয়া গ্রপে হেগ্রিডক 'হেগাৰ' বুলি মাতি তেওঁক বিচাৰি বিচাৰি অশ্বনৰ সকলৰ মনোযোগ আকর্ষণ কৰে।

দ্য হাফ ব্লাড প্রিন্সত গ্রপক পর্বতলৈ লৈ যোৱা হয় য'ত থাকি সি বেছি আনন্দ পায়। আগতকৈ বহুত সভ্য আৰু শান্ত হৈ আৰু ভাল কাপোৰ-কানি পিন্ধি হসি হেগ্রিডৰ লগত ডাম্বলড'ৰৰ অন্ত্যেষ্টিক্রিয়াতো উপস্থিত থাকে। সি অনুভূতিবোৰো কিছু পৰিমাণে বুজি পায় আৰু হেগ্রিডক সান্ত্বনা দিবলৈ তেওঁৰ মূৰত লাহে লাহে থপৰিয়াই। হেৰী পটাৰ এণ্ড দ্য ডেডলী হ'ল'জত হেগ্রিডে তেওঁৰ জুপুৰীত "হেৰী পটাৰক সমর্থন কৰা" শীর্ষক এক অনুষ্ঠান আয়োজন কৰে ফলত গ্রপ,হেগ্রিড আৰু ফেং লুকাই ফুৰিবলগীয়া হয় আৰু এই ক্ষেত্রত গ্রপে তেওঁলোকক সহায় কৰে। গ্রপেই একমাত্র দৈত্য যিয়ে হগৱার্ট্ছৰ যুদ্ধত ভ'লডেমর্টৰ বিৰূদ্ধে যুঁজে। গ্রপ ভ'লডেমর্ট পৰাস্ত হোৱাৰ পিছত হোৱা বিজয় উত্‍সৱটো ভাগ লয় (এখন খিৰিকিৰে হে কাৰণ হলঘৰটোত তাক নধৰে) আৰু হগৱার্ট্ছৰ ছাত্র-ছাত্রী সকলে তাৰ হাঁহি থকা মুখখনলৈ খাদ্য দলিয়াই তাৰ প্রতি থকা মৰম দেখুৱাই।

পঞ্চম কিতাপখনৰ চলচ্চিত্র অভিযোজনত দেখুওৱা গ্রপটো কম্পিউটাৰেৰে তৈয়াৰী।[21] চলচ্চিত্রখনৰ কাৰণে এই দৈত্যটো সৃষ্টি কৰিবলৈ এন্দ্রিউ হোৱাইটহেডে প্রায় ১৮ মাহ কাম কৰে।[22] গ্রপৰ চৰিত্রত কণ্ঠদান কৰিছে টনী ম'ডস্লীয়ে।[23]


মাক-দেউতাক[সম্পাদনা কৰক]

দ্য গব্লেট অৱ ফায়াৰত হেগ্রিডৰ মাক দেউতাকৰ ৰহস্যটো ফাদিল হয়: শৃংখলাটিত এবাৰো নাম উল্লেখ নকৰা তেওঁৰ দেউতকে ফ্রিডৱুল্ফা নামৰ এজনী দৈত্য বিয়া কৰাইছিল। হেগ্রিড সৰু হৈ থাকোতেই তেওঁক দেউতাকৰ তত্ত্বাৱধানত থৈ ফ্রিডৱুল্ফা গুচি যায়। হেগ্রিডৰ মতে তাই বৰ মাতৃসুলভ নাছিল। পিছলৈ তাই গ্রপক জন্ম দিয়ে। অর্ডাৰ অৱ দ্য ফিনিক্সত হেগ্রিডে দৈত্যসকলক বিচাৰি যোৱাৰ বহু আগতেই তাইৰ মৃত্যু ঘটে। হেগ্রিডৰ মতে তেওঁৰ দেউতাক "এটা কণমানি মানুহ" আছিল যাক তেওঁ ছয় বছৰ বয়সতে এখন হাতেৰে উঠাই আলমাৰিৰ ওপৰত থৈ দিব পাৰিছিল। হেগ্রিডে তেওঁক খুব ভাল পাইছিল। হেৰী পটাৰ এণ্ড দ্য প্রিজনাৰ অৱ আজকাবানত হেগ্রিডে কয় যে হগৱার্ট্ছৰ তৃতীয় বার্ষিকত থাকোঁতে দেউতাকৰ মৃত্যু হোৱাটো তেওঁৰ জীৱনৰ আটাইতকৈ দুখলগা স্মৃতি।

পোহনীয়া জীৱ-জন্তু[সম্পাদনা কৰক]

ফেং,হেগ্ৰিড আৰু নৰবাৰ্টৰ চিত্ৰ

হেগ্ৰিডৰ এনে কিছুমান পোহনীয়া জন্তু আছে যাক যাদুবিশ্বৰ মানুহবোৰে পোহাটো অসম্ভৱ বুলি ভাৱে আৰু বিপদজনক প্ৰাণীৰ প্ৰতি হেগ্ৰিডৰ এই প্ৰেমে শৃংখলাটোৰ বহুকেইখন কিতাপৰ কাহিনীত কেন্দ্ৰীয় ভূমিকা গ্ৰহণ কৰে।

এৰাগগ[সম্পাদনা কৰক]

এৰাগগ আছিল এক বৃহত্‍ আৰু বিপদজনক কথা ক'ব পৰা এটা মকৰা—যিয়ে চিকাৰৰ সন্ধানত ভ্রমণ কৰিলে এক ক্লিক ক্লিক মাত ওলায়। হগৱার্ট্ছত ছাত্র হৈ থাকোতে এটা কণীৰ পৰা হেগ্রিডে তাক আলমাৰিত লুকাই লুকাই ডাঙৰ কৰিছিল। হেগ্রিড তৃতীয় বার্ষিকত থাকোতে টম ৰিডলে হেগ্রিডক এৰাগগৰ লগত কথা পাতি থকা আৱিষ্কাৰ কৰে আৰু প্রচাৰ কৰে যে এৰাগগেই "শ্লিদেৰিণৰ ৰাক্ষস"টো আৰু হেগ্রিডেই গোপন কোঠাটো খুলিছে। কিন্তু বাস্তৱত ৰিডলেহে কোঠাটো খুলিছিল আৰু ৰাক্ষসটো আছিল এটা বাছিলিস্ক।

হেগ্রিডক অপসাৰণ কৰাৰ পিছত এৰাগগে নিষিদ্ধ অৰণ্যত বাস কৰে। হেগ্রিডে তাক মোছাগ নামৰ এজনী সংগী বিচাৰি দিয়ে যাৰ লগত এৰাগগে দৈত্যকাৰ মকৰাৰ এক চুবুৰী গঢ়ি তোলে। গোটেই জীৱনটো সি হেগ্রিডৰ ওচৰত কৃতজ্ঞ হৈ থাকে আৰু হেগ্রিডে তাক লগ কৰিবলৈ আহিলে আঘাত নিদিবলৈ তাৰ মাংসভোজী সন্তানবোৰক আদেশ দি থয়। অৱশ্যে হেৰী পটাৰ এণ্ড দ্য চেম্বাৰ অৱ ছিক্রেটছত সি সন্তানবোৰক হেৰী,ৰণ আৰু ফেঙক আক্রমণ কৰিবলৈ বাধা নিদিয়ে। হেগ্রিডে সিহঁতক "মকৰা বোৰক অনুসৰণ কৰা" বুলি পৰামর্শ দিয়ে। এৰাগগেই হেৰী আৰু ৰণক কয় যে স্লিদেৰিণৰ ৰাক্ষসটো সি নহয় বৰং হগৱার্ট্ছতে জন্ম লাভ কৰা এক প্রাণী যাক মকৰাবোৰে ইমানেই ভয় কৰে যে কেতিয়াও তাৰ নাম নলয়। এৰাগগৰ সন্তানবোৰে হেৰীহঁতক আক্রমণ কৰিলেও মি০ ৱিজলীৰ উৰণীয়া গাড়ীখনে সিহঁতক ৰক্ষা কৰে। জীৱনৰ বাকীছোৱা এৰাগগে নিষিদ্ধ অৰণ্যতেই থাকে আৰু বুঢ়া হৈ হেৰী পটাৰ এণ্ড দ্য হাফ ব্লাড প্রিন্সত তাৰ মৃত্যু ঘটে। সন্তানবোৰে তাৰ দেহটো নষ্ট কৰি পেলাব বুলি হেগ্রিডে এৰাগগৰ দেহটো লৈ আহি তাক সসন্মানে সমাধিস্থ কৰে।

এৰাগগৰ সন্তানবোৰ হেৰী পটাৰ এণ্ড দ্য ডেডলী হ'ল'জৰ হগৱার্ট্ছৰ যুদ্ধত অৰণ্যৰ পৰা ওলাই আহে আৰু যাকে পায় তাকে আক্রমণ কৰে। হেগ্রিডে সিহঁতক ৰক্ষা কৰিবলৈ যায় আৰু তাৰেই প্রতিদান হিচাপে সিহঁতে হেগ্রিডক ধৰি ভ'লডেমর্টৰ হাতত গতাই দিয়ে।

দ্য চেম্বাৰ অৱ ছিক্রেটছৰ চলচ্চিত্র অভিযোজনত জুলিয়ান গ্লোভাৰে এৰাগগৰ ভূমিকাত কণ্ঠদান কৰে।

বাকবীক[সম্পাদনা কৰক]

হেগ্ৰিডৰ এটা যাদু প্রাণীৰ তত্ত্বাৱধান বিষয়ৰ শ্রেণীত বাকবীকৰ লগতে আৰু এঘাৰটা হিপ'গ্রিফে আত্মপ্রকাশ কৰে। হেগ্রিডে বুজাই যে হিপগ্রিফবোৰ যথেষ্ট শান্ত,শক্তিশালী আৰু গৌৰৱী প্রাণী,কিন্তু সিহঁত বৰ অনুভূতিপ্রৱণ আৰু সিহঁতে সন্মান দাবী কৰে। হেৰীয়ে বাকবীকৰ কাষ চাপিবলৈ সক্ষম হয় আৰু বাকবীকে হেৰীক পিঠিত উঠাই স্কুলৰ চাৰিওফালে এপাক ঘূৰাই আনে।

ড্রেকো মেলফয়েও এক অহং ভাৱত হেগ্রিডৰ হাকবচন নামানি বাকবীকৰ পিঠিত উঠি দেখুওৱাবলৈ যায় আৰু বাকবীকৰ বিষয়ে তুচ্ছ মন্তব্য কৰে। ইয়াত খং খাই বাকবীকে ড্রেকোৰ হাতত তাৰ হাতোঁৰাৰে এখুন্দা দিয়ে। অলপ আঘাতকে বেছি বুলি কৈ ড্রেকোৱে দেউতাক লুছিয়াছ মেলফয়ক ৰাজনৈতিক শক্তি প্রয়োগ কৰি বাকবীকক মৃত্যুদণ্ড দিবলৈ দাবী কৰে। হেগ্রিডৰ আৱেদন অগ্রাহ্য কৰি বাকবীকক মৃত্যুদণ্ড দিবলৈ বিপদজনক প্রাণী সংহাৰ সমিতিৰ সদস্য সকল হগৱার্ট্ছত উপস্থিত হয়। হাৰমাইনী আৰু হেৰীয়ে এটা সময় পৰিৱৰ্তকৰ সহায়ত অতীতলৈ গৈ বাকবীকক ৰক্ষা কৰে আৰু ডিমেনটৰ বোৰক গতোৱাৰ আগতে বন্দী কৰি ৰখা দূর্গৰ পৰা ছিৰিয়াছ ব্লেকক উদ্ধাৰ কৰে। ছিৰিয়াছে বাকবীকৰ পিঠিত উঠি পলাই যায়। হেৰীৰ চতুর্থ বছৰটোৰ বেছিভাগ সময় ছিৰিয়াছ আৰী বাকবীকে হগছমীডৰ ওচৰৰ পর্বত এখনৰ গুহাত লুকাই থাকি কটায়।তাৰ পিছত তেওঁলোকে নাম্বাৰ ১২ গ্রিম'ল্ড প্লেচত থাকে য'ত বাকবীকে ছিৰিয়াছৰ মৃতা মাকৰ কোঠাত থাকে।

হাফ ব্লাড প্রিন্সত হেৰীয়ে বাকবীকক লাভ কৰে আৰু সি হেগ্রিডক ইয়াৰ চোৱা চিতা কৰিবলৈ দি দিয়ে। মন্ত্রালয়ৰ বিষয়াসকলে সন্দেহ নকৰিবলৈ ইয়াক "ৱিদাৰৱিংছ" নাম দিয়া হয়। এক বিশ্বাসী প্রাণী হিচাপে বাকবীকে কিতাপখনৰ শেষত চেভেৰাছ স্নেইপক হেৰীৰ ওচৰৰ পৰা খেদি পঠিয়াই। হগৱার্ট্ছৰ যুদ্ধত বাকবীকে থেষ্ট্রেলবোৰক লৈ ভলডেমর্টৰ বিৰূদ্ধে যুঁজে।

ফেং[সম্পাদনা কৰক]

ফেং হ'ল এটা ডাঙৰ বোৱাৰহাউণ্ড(ছবিখনত এটা নীপোলিটান মেস্তিফ) যি অতি বৃহত্‍ হ'লেও এটা অতি সাধাৰণ কুকুৰ। হেগ্রিডৰ মতে, "সি এটা মস্ত ভয়াতুৰ।" সি চিনাকি মানুহবোৰৰ সৈতে থকিবলৈ পছন্দ কৰে আৰু হেৰী,ৰণ বা হাৰমাইনীৰ মুখ বা কাণখন চেলেকি থাকি ভাল পায়।

দ্য ফিল'ছ'ফাছ ষ্ট'নত এটা আঘাতপ্রাপ্ত ইউনিকর্ণক বিচাৰি হেৰী,হেগ্ৰিড,ড্রেকো আৰু হাৰমাইনীৰ লগত নিষিদ্ধ অৰণ্যলৈ যায়। দ্য চেম্বাছ অৱ ছিক্রেটছত হেৰী আৰু ৰণে অৰণ্যলৈ ফেঙকো লৈ যায় য'ত সি দৈত্যাকাৰ মকৰাবোৰ আৰু উৰণীয়া গাড়ীখন দেখি ভয়ত বিতত হয়। হেৰী পটাৰ এণ্ড দ্য হাফ ব্লাড প্রিন্সত এটা পলৰীয়া ডেথ্ ইটাৰে ফেং ভিতৰত থাকোঁতেই হেগ্রিডৰ ঘৰটোত জুই লগাই দিয়ে; তেতিয়া হেগ্রিডে জুই লগা ঘৰটোত সোমাই ফেঙক সুৰক্ষিতভাৱে উলিয়াই আনে। হেৰী পটাৰ এণ্ড দ্য ডেডলী হ'ল'জত ফেং আৰু হেগ্রিডে হগৱার্ট্ছৰ যুদ্ধত অংশগ্রহণ কৰে যদিও ফেঙে কি কৰে সেয়া জনা নাযায়। ফেং নিশ্চিত ভাৱে বাচি থাকে কাৰণ পিছলৈ হেগ্রিডক ফেঙৰ কাৰণে দুখী হোৱা দেখা নাযায়। হেৰীৰ সন্তান হগৱার্ট্ছলৈ অহালৈকে ফেং বাচি থাকে নে নাই সেয়াও জনা নাযায়।

ফ্লাফী[সম্পাদনা কৰক]

ফ্লাফী হৈছে এটা দৈত্যাকায় তিনিমূৰীয়া কুকুৰ যাক হেগ্রিডে ফিল'ছ'ফার্ছ ষ্ট'ন থকা গোপন কোঠাটোৰ গুপ্তদুৱাৰ খন পহৰা দিবলৈ ৰাখি থৈছিল। কেৱল গীত বজাই শুৱাই থৈ হে ফ্লাফীক পাৰ হৈ যাব পাৰি। গ্রীক সাধুকথাৰ নৰকৰ দুৱাৰত পহৰা দিয়া তিনিমূৰীয়া কুকুৰ ছেৰবেৰাছৰ ওপৰত ফ্লাফী আধাৰিত। ফ্লাফীৰ দৰে ছেৰবেৰাছকো অৰফিয়াছে সংগীতেৰে শুৱাই থৈছিল।

ফিল'ছ'ফার্ছ ষ্ট'নত পীভ্ছ আৰু ফিলছৰ পৰা পলাই ফুৰোতে এদিন হেৰী,ৰণ,হাৰমাইনী আৰু নেভাইলে দুর্ঘটনাবশতঃ ফ্লাফীৰ ওচৰ পাইগৈ। ফ্লাফীয়ে ফিল'ছ'ফার্ছ ষ্ট'নটি পহৰা দি থাকোঁতে ভ'লডেমর্টৰ সেৱক প্রফেছৰ কুইৰেলে ষ্ট'নটি পাবলৈ হার্প বজাই ফ্লাফীক শুৱাই থয় আৰু হেৰীয়ে ষ্ট'নটি উদ্ধাৰ কৰিবলৈ যাঁওতে হেগ্রিডে দিয়া এটা বাঁহী ব্যৱহাৰ কৰে। এক সাক্ষাত্‍কাৰত ৰাউলিঙক ষ্ট'নটিৰ পহৰাদাৰৰ প্রয়োজন নোহোৱাত ফ্লাফীৰ কি হ'ল বুলি সোধাত তেওঁ ফ্লাফীক নিষিদ্ধ অৰণ্যত এৰি দিয়া হয় বুলি কয়।

নৰবাৰ্টা[সম্পাদনা কৰক]

নৰবার্টা বা নৰবার্ট হ'ল এটা নৰৱেইয়ান ৰিজবেক ড্রেগন যাক হেগ্ৰিডে হগছ হেডত এজন ৰহস্যময়,মুখঢকা অচিনাকি মানুহৰ পৰা কণী অৱস্থাতে পাইছিল যি দৰাচলতে প্রফেচৰ কুইৰেল আছিল। হেগ্রিডে ড্রেগনটোক কণীৰ পৰা ওলাবলৈ সহায় কৰে। পিছৰ কেইসপ্তাহমানতে নৰবার্টা বহু ডাঙৰ আৰু বিপদজনক হৈ পৰে। সি ৰণক কামোৰে আৰু তাৰ দাঁতত থকা বিষৰ কাৰণে ৰণে চিকিত্‍সা গ্রহণ কৰিবলগীয়া হয়। হেৰী,ৰণ আৰু হাৰমাইনীয়ে ড্রেগনটিক ৰোমানিয়াত ড্রেগনৰ বিষয়ে পঢ়ি থকা ৰণৰ ককায়েক চার্লি ৱিজলীৰ ওচৰলৈ পঠিয়াই দিবলৈ হেগ্রিডক জোৰ কৰে। দ্য ডেডলী হ'ল'জত চার্লিয়ে হেগ্রিডক কয় যে "নৰবার্ট" প্রকৃততে মাইকীহে গতিকে তাৰ নাম নৰবার্টালৈ সলনি কৰা হয়।

সঁহাৰি[সম্পাদনা কৰক]

আইজিএনে হেগ্রিডক তেওঁলোকৰ ত্রয়োদশ শীর্ষ "হেৰী পটাৰ" চৰিত্র হিচাপে আখ্যা দি কৈছে যে দর্শকৰ বাবে হেগ্রিড এক অতি চিনাকি চৰিত্র আৰু হেৰী পটাৰ এণ্ড দ্য গব্লেট অৱ ফায়াৰ ছবিৰ সেই দৃশ্যটো যত তেওঁ হেৰী,ৰণ আৰু হাৰমাইনীৰ লগত তেওঁৰ মধুৰ স্মৃতিবোৰ ৰোমন্থন কৰে সেয়া তেওঁলোকৰ বাবেও এক "সুখদায়ক স্মৃতি" হৈ পৰে।[24] আইজিএনৰ জো য়ুটিছিয়ে হেগ্ৰিডক তেওঁৰ সপ্তম প্ৰিয় "হেৰী পটাৰ" চৰিত্ৰ বুলি কয়।[25]

তথ্য সংগ্ৰহ[সম্পাদনা কৰক]

  1. Conversations with JK Rowling, p.37-8, accio-quote.org
  2. "WBUR radio interview, 12 October 1999". Accio Quote!. http://www.accio-quote.org/articles/1999/1099-connectiontransc2.htm। আহৰণ কৰা হৈছে: 15 August 2011. 
  3. Goring, Rosemary (17 January 1999), "Harry’s Fame", Scotland on Sunday.
  4. Barnes and Noble & Yahoo! chat with J.K. Rowling at barnesandnoble.com, 20 October 2000, republished at accio-quote.org
  5. Anelli, Melissa and Emerson Spartz (16 July 2005), "The Leaky Cauldron and MuggleNet interview Joanne Kathleen Rowling: Part Three", The Leaky Cauldron
  6. 6.0 6.1 World Exclusive Interview with J K Rowling
  7. "Rowling: 'I wanted to kill parents' – Wild about Harry", – MSNBC.com
  8. "New Interview with J.K. Rowling for Release of Dutch Edition of 'Deathly Hallows'." (18 November 2007). The Leaky Cauldron. Retrieved 19 November 2007.
  9. Weingarten, Tara. "Rowling Says Dumbledore Is Gay". Newsweek. http://www.newsweek.com/id/50787। আহৰণ কৰা হৈছে: 20 October 2007 
  10. "Casting Is Complete on ‘Harry Potter and the Half-Blood Prince’" (Press release). Warner Bros.. 16 November 2007. http://www.prnewswire.co.uk/cgi/news/release?id=213122। আহৰণ কৰা হৈছে: 16 November 2007. 
  11. "Movie Trivia: Harry Potter and the Sorcerer’s Stone". Neatorama.com. 17 July 2007. http://www.neatorama.com/2009/07/17/movie-trivia-harry-potter-and-the-sorcerers-stone/। আহৰণ কৰা হৈছে: 15 August 2011. 
  12. 12.0 12.1 "‘They really do look as I’d imagined they would inside my head.’". Accio Quote!. 13 March 2007. http://www.accio-quote.org/articles/2001/1111-telegraph-alderson.html। আহৰণ কৰা হৈছে: 15 August 2011. 
  13. Harry Potter And The Personal Demons
  14. JK Rowling interview in full CBBC Retrieved on 29 July 2007
  15. "Martin Bayfield Filmography". http://movies.yahoo.com/movie/contributor/1809048458। আহৰণ কৰা হৈছে: 15 August 2011. 
  16. Rowling, J. K. (2007). Harry Potter and the Deathly Hallows. London: Bloomsbury/New York City: Scholastic, et al. UK ISBN 1551929767/U.S. ISBN 0545010225. , chapter 5
  17. "Robbie Coltrane on South Bank". Accio Quote!. 25 September 2006. http://www.accio-quote.org/articles/2006/0925-southbank.html। আহৰণ কৰা হৈছে: 15 August 2011. 
  18. Section: Extra Stuff
  19. "JK Rowling’s World Book Day Chat". 4 March 2004. http://www.accio-quote.org/articles/2004/0304-wbd.htm। আহৰণ কৰা হৈছে: 15 August 2011. 
  20. Darby Dickerson (2008). "Professor Dumbledore's Advice for Law Deans". University of Toledo Law Review. http://papers.ssrn.com/sol3/papers.cfm?abstract_id=1088056 
  21. Sharon Waxman (15 October 2006). "Cyberface: New Technology That Captures the Soul". The New York Times. http://www.nytimes.com/2006/10/15/movies/15waxm.html?th&emc=th 
  22. H Tucker (2007). "At the movies". ITNOW (British Computer Society) খণ্ড 49 (5): 8–9. doi:10.1093/itnow/bwm023. http://itnow.oxfordjournals.org/cgi/content/abstract/49/5/8 
  23. Tony Maudsley as Grawp in 'Order of the Phoenix'. HPANA. 26 April 2006. http://www.hpana.com/news.19394.html 
  24. Brian Linder, Phil Pirrello, Eric Goldman, Matt Fowler (14 July 2009). "Top 25 Harry Potter Characters". IGN. http://uk.movies.ign.com/articles/100/1002569p3.html। আহৰণ কৰা হৈছে: 3 April 2011. 
  25. Joe Utichi (3 November 2010). "The Top 10 Harry Potter Characters". IGN. http://uk.movies.ign.com/articles/113/1132181p1.html। আহৰণ কৰা হৈছে: 3 April 2011. 

বাহ্যিক সংযোগ[সম্পাদনা কৰক]