অ'চেনিড
অ'চেনিড বা অ'চেনাইড (/oʊˈsiːənɪdz, ˈoʊʃənɪdz/ ইংৰাজী Oceanids বা Oceanides) গ্ৰীক পৌৰাণিক কাহিনী অনুসৰি টাইটান অ'চেনাছ আৰু টেথিছৰ তিনি হাজাৰ (এটা সংস্কৰণৰ মতে "অসংখ্য" বুলি ব্যাখ্যা কৰা) সামুদ্ৰিক কন্যা।[1]
বিৱৰণ আৰু কাৰ্য্য
[সম্পাদনা কৰক]অ'চেনিডসকলৰ পিতৃ অ'চেনাছ আছিল মহান আদিম বিশ্বক আগুৰি থকা নদী, তেওঁলোকৰ মাতৃ টেথিছ আছিল এগৰাকী সাগৰীয় দেৱী আৰু তেওঁলোকৰ ভাতৃ নদী দেৱতাসকল (সংখ্যাত তিনি হাজাৰ) আছিল পৃথিৱীৰ মহান নদীসমূহৰ মূৰ্তমান প্ৰকাশ। তেওঁলোকৰ পৰিয়ালৰ বাকীসকলৰ দৰেই অ'চেনিড অপেশ্বৰীসকলকো বসন্তৰ ব্যক্তিত্ব হিচাপে পানীৰ সৈতে জড়িত কৰা হৈছিল।[2] হেচিঅ'ডৰ মতে তেওঁলোক "দূৰ-দূৰণিলৈ বিয়পি থাকে" আৰু সকলোতে "পৃথিৱী আৰু গভীৰ পানীৰ সেৱা কৰে",[3] আনহাতে ৰোডছৰ এপ'লনিয়াছৰ (Apollonius of Rhodes) আৰ্গ'ন'টিকা (Argonautica) কাব্যত লিবিয়াৰ মৰুভূমিত আবদ্ধ হৈ থকা আৰ্গ'ন'টসকলে "অ'চেনাছৰ জাতিৰ পবিত্ৰ অপেশ্বৰী"সকলক "শিলৰ বুকুৰ পৰা বা পৃথিৱীৰ গৰ্ভৰ পৰা পবিত্ৰ পানীৰ প্ৰবাহ" উলিয়াই দিবলৈ ভিক্ষা মাগিছিল।[4]
অ'চেনিডবোৰক তেওঁলোকৰ কাৰ্য অনুসৰি সহজে শ্ৰেণীভুক্ত কৰিব নোৱাৰি, বা তেওঁলোক কোনো এটা নিৰ্দিষ্ট কাৰ্য্যত সীমাবদ্ধ নহয়, আনকি পানীৰ সৈতেও জড়িত হোৱাটোও বাধ্যতামূলক নহয়। বেছিভাগ অপেশ্বৰীক ক্ষুদ্ৰ দেৱতা বুলি গণ্য কৰা হৈছিল যদিও বহুতো অ'চেনিড উল্লেখযোগ্য ব্যক্তিত্ব আছিল। বুদ্ধিমত্তাৰ ব্যক্তিত্ব মেটিছ আছিল জ্যুছৰ প্ৰথম পত্নী, এথেনা গৰ্ভত থাকোতেই জ্যুছে তেঁওক গিলি পেলাইছিল।[5] মাতৃ টেথিছৰ দৰেই অ'চেনিড ড'ৰিছো এগৰাকী গুৰুত্বপূৰ্ণ সাগৰীয় দেৱী। তেওঁলোকৰ ভাতৃ নদীৰ দেৱতাসকল প্ৰধান নদীৰ সাধাৰণ ব্যক্তিত্ব আছিল যদিও ষ্টাইক্স পাতাল জগতৰ ষ্টাইক্স নামৰ এখন ডাঙৰ নদীৰ ব্যক্তিত্ব আছিল। ইউৰোপা, এছিয়া আদি অ'চেনিড পানীৰ পৰিৱৰ্তে ভূমিৰ সৈতেহে জড়িত যেন লাগে।[6] অ'চেনিডসকলে কেঁচুৱাৰ ওপৰত চকু ৰখাৰ দায়িত্বও লৈছিল।[7]
মেটিছৰ দৰে অ'চেনিডসকলে বহুতো দেৱতাৰ পত্নী (বা প্ৰেমিকা) হিচাপে কাম কৰিছিল আৰু এই দেৱতাৰ দ্বাৰা আন বহুতো দেৱ-দেৱীৰ মাতৃ হৈছিল।[8] ড'ৰিছ আছিল সাগৰ দেৱতা নেৰিয়াছৰ পত্নী আৰু পঞ্চাশগৰাকী সাগৰৰ অপেশ্বৰী নেৰেইডৰ মাতৃ।[9] ষ্টাইক্স টাইটান পালাছৰ পত্নী আৰু জেলুছ, নাইক, ক্ৰাটছ আৰু বিয়াৰ মাতৃ আছিল। ইউৰিনম জ্যুছৰ তৃতীয় পত্নী আৰু চাৰিটেছসকলৰ মাতৃ আছিল। ক্লাইমেন আছিল টাইটান ইয়াপেটাছৰ পত্নী আৰু এটলাছ, মেন'ইটিয়াছ, প্ৰমিথিউছ আৰু এপিমিথিউছৰ মাতৃ। ইলেক্ট্ৰা আছিল সাগৰ দেৱতা থাউমাছৰ পত্নী আৰু আইৰিছ আৰু হাৰ্পিৰ মাতৃ। আন উল্লেখযোগ্য অ'চেনিডসমূহৰ ভিতৰত আছে: পাৰ্ছেইছ হৈছে টাইটান সূৰ্য্য দেৱতা হেলিঅ'ছৰ পত্নী আৰু চাৰ্চেৰ আৰু কলচিছৰ ৰজা আইটেছৰ মাতৃ; ইডিয়া হৈছে আইটেছৰ পত্নী আৰু মেডিয়াৰ মাতৃ; আৰু কেলিৰ' হৈছে ক্ৰাইছ'ৰৰ পত্নী আৰু গেৰিয়ানৰ মাতৃ।
সমুদ্ৰৰ নাৱিকসকলে নিয়মিতভাৱে অ'চেনিডসকলক সন্মান আৰু প্ৰাৰ্থনা কৰিছিল, তেওঁলোকৰ বাবে পূজা আৰু বলিদান উৎসৰ্গা কৰিছিল। নাৱিকসকলক ধুমুহা আৰু অন্যান্য সাগৰীয় বিপদৰ পৰা ৰক্ষা কৰিবলৈ তেওঁলোকৰ ওচৰত আহ্বান জনাইছিল। সোণালী নোমৰ সন্ধানত কলচিছলৈ কিংবদন্তি যাত্ৰা আৰম্ভ কৰাৰ আগতে আৰ্গন'টসকলে সাগৰীয় দেৱতাসকলক আটা, মৌ আৰু সাগৰৰ প্ৰসাদ দিছিল, তেওঁলোকক ম'হ বলি দিছিল আৰু তেওঁলোকৰ যাত্ৰা পথত আহিবলগীয়া সাম্ভাব্য বিপদৰ পৰা ৰক্ষা কৰিবলৈ অনুৰোধ কৰিছিল। হেডিছে অপহৰণ কৰাৰ সময়ত তেওঁলোকক পাৰ্চেফোনৰ সংগী বুলিও লিপিবদ্ধ কৰা হৈছিল।
দেৱী আৰ্টিমিচে অনুৰোধ কৰিছিল যে ন বছৰ বয়সৰ ষাঠিগৰাকী অ'চেনিডক তেওঁৰ ব্যক্তিগত গায়িকা হিচাপে গঢ়ি তুলিব লাগে, তেওঁলোকে ব্যক্তিগত দাসী হিচাপে সেৱা আগবঢ়াব আৰু কুমাৰী হৈ থাকিব লাগিব।[10]
তথ্য সংগ্ৰহ
[সম্পাদনা কৰক]- ↑ Hard, pp. 40–41; Tripp, s.v. Oceanids, p. 401; Grimal, s.v. Oceanus, p. 315.
- ↑ Fowler, p. 13; Most, p. 31 n. 21; Grimal, s.v. Oceanus, p. 315; West, p. 259.
- ↑ Hesiod, Theogony 365–366.
- ↑ Apollonius of Rhodes, Argonautica 9.1410–4118.
- ↑ Hesiod, Theogony 886–900; Apollodorus, 1.3.6.
- ↑ Fowler, pp. 13–14; Tripp, s.v. Oceanids, p. 401.
- ↑ Hard, p. 40; Larson, p. 30; Gantz, p. 28; Tripp, s.v. Oceanids, p. 401.
- ↑ Grimal, s.v. Oceanus, p. 315. Larson, p. 7 says that the Oceanids "serve mainly as genealogical starting points".
- ↑ Hesiod, Theogony 240–264; Apollodorus, 1.2.7.
- ↑ Callimachus, Hymn III to Artemis 1-27.