আগলি বাঁহৰে লাহৰী গগনা
| আগলি বাঁহৰে লাহৰী গগনা | |
|---|---|
| লেখক | ভূপেন হাজৰিকা |
| অংগসজ্জা | ও. চি. গাংগুলী, ভূপেন হাজৰিকা |
| প্ৰচ্ছদ শিল্পী | মান্না |
| দেশ | ভাৰত |
| ভাষা | অসমীয়া |
| প্ৰকাৰ | গীত |
| প্ৰকাশক | গতি প্ৰকাশ (১ম প্ৰকাশ), লয়াৰ্ছ বুক ষ্টল (২য় প্ৰকাশ) |
| প্ৰকাশ | অক্টোবৰ, ১৯৬৪ |
| মিডিয়া প্ৰকাৰ | ছপা |
| পৃষ্ঠা সংখ্যা | ২৪ |
আগলি বাঁহৰে লাহৰী গগনা (১৯৬৪, ইংৰাজী: Agali Bahare Lahari Gagana) অসমীয়া ভাষাৰ গীতৰ সংকলন৷ ৰচক ড੦ ভূপেন হাজৰিকা৷[1]
বিষয়বস্তু
[সম্পাদনা কৰক]সংকলনটিত মুঠ বাৰটি গীত সন্নিৱিষ্ট হৈছে৷ সন্নিৱিষ্ট হোৱা গীতসমূহ হ’ল: ‘আগলি বাঁহৰে লাহৰী গগনা’, ‘যায় যদি যায় জীৱনটো যাক’, ‘হেজাৰজনৰ বেজাৰ দেখি’, ‘তোমাৰ লিখা : মিছা’, ‘দুঃসহ বেদনাত ভুগিলেও’, ‘লাগে পিচে বহাগতে ৰং’, ‘হংসকাপেৰে বুৰঞ্জী লিখে’, ‘খুবলেই শ্বিবুন’, ‘দুয়োটি বাঁহী বাঁহৰে বাঁহী’, ‘ৰঙাকৈ গোলাপৰ কলি হীৰালালে’, ‘গীত গাই কঁপাম দিগন্ত’ আৰু ‘বৈধ কি অবৈধ কি : প্ৰশ্ন হ’ব’৷[1] লেখকে প্ৰতিটো গীতৰে বিষয়বস্তুৰ একোটাকৈ চিত্তাকৰ্ষক চমু পৰিচয় সন্নিৱিষ্ট কৰিছে৷ চমু পৰিচয়বোৰে পঢ়ুৱৈক গীতকেইটাৰ বিষয়বস্তুৰ ভিতৰত সোমোৱাত সহায় কৰিব৷ উদাহৰণস্বৰূপে সংকলনটোৰ প্ৰথম গীত ‘আগলি বাঁহৰে লাহৰী গগনা’ৰ পৰিচয়টো উল্লেখ কৰা হ’ল:
“গভীৰ নিশা ন কইনাক গগনা বজাই শুনাব খোজা ন দৰা আছে, যদি কইনাই শুনিব খোজে৷ সি আৰু নো কি দিব? কুবেৰৰো পো নহয় যে সি ধন-সোণ দিব৷ আনৰ ধন চান কাঢ়িবলৈ বা মিঠা তেলত বিহ ঢালিবলৈ পিতায়ে শিক্ষা নিদিলে যে৷ সি কংসবধৰ ভাওনা দেখুৱাব পাৰে— যদি তাই বিচাৰে!”[1]
প্ৰকাশন ইতিহাস
[সম্পাদনা কৰক]এইখন ভূপেন হাজৰিকাৰ প্ৰথম প্ৰকাশিত গ্ৰন্থ৷ গ্ৰন্থখনৰ প্ৰথম তাঙৰণটি ১৯৬৪ চনৰ অক্টোবৰ মাহত প্ৰকাশ পায়৷ প্ৰকাশৰ পিছৰ মাহটোতে সংকলনটিৰ দ্বিতীয় তাঙৰণো প্ৰকাশ পায়৷ ১৯৬৭ চনত সংকলনটিৰ তৃতীয় তাঙৰণটি প্ৰকাশ পায়৷ সংকলনটিৰ প্ৰথম প্ৰকাশক আছিল গতি প্ৰকাশ৷ দ্বিতীয় তাঙৰণটি লয়াৰ্ছ বুক ষ্টলে প্ৰকাশ কৰে৷[1]
গ্ৰন্থখনৰ বেটুপাতৰ পৰিকল্পনা আৰু ভিতৰৰ ৰেখাচিত্ৰবোৰ অংকন কৰিছে ও. চি. গাংগুলীয়ে৷ প্ৰথম আৰু শেষৰ গীতটোৰ লগত থকা ৰেখাচিত্ৰ দুটা লেখকে নিজে অঁকা৷ বেটুপাতত ব্যৱহৃত আলোকচিত্ৰখন আছিল মান্নাৰ৷[1]