আনন্দী

আনন্দী
২০১৬ চনত আনন্দী
জন্ম	ৰক্ষিতা ৯ ডিচেম্বৰ, ১৯৯২ (৩৩ বছৰ) ৱাৰাংগল, অন্ধ্ৰপ্ৰদেশ (বৰ্তমান তেলেংগানা), ভাৰত
অন্য নাম	হাচিকা
পেচা	অভিনেত্ৰী
সক্ৰিয় হৈ থকা সময়	২০১২–বৰ্তমান
দাম্পত্যসঙ্গী	চক্ৰেটিছ (বি. ২০২১)
সন্তান	১
আত্মীয়-স্বজন	নবীন (পৰিচালক) (চক্ৰেটিছৰ খুলশালি)

আনন্দী (জন্ম: ৰক্ষিতা; ৯ ডিচেম্বৰ ১৯৯২) এগৰাকী ভাৰতীয় অভিনেত্ৰী যিয়ে প্ৰধানকৈ তামিল আৰু তেলুগু চলচ্চিত্ৰত অভিনয় কৰে। ২০১২ চনত তেলুগু ছবি বাছ ষ্টপৰ জৰিয়তে আত্মপ্ৰকাশ কৰাৰ পাছত তেওঁ ভেট্ৰিমাৰানৰ তামিল নিৰ্মাণ পুৰীয়ালান (২০১৪)-ত অভিনয় কৰে। একে বছৰতে তেওঁ প্ৰভু চলোমনৰ ছবি কায়াল (২০১৪)-ৰ জৰিয়তে বিশেষ সফলতা লাভ কৰে, যাৰ বাবে তেওঁক 'কায়াল আনন্দী' বুলিও জনা যায়। তেওঁ কায়াল ছবিখনৰ বাবে তামিলনাডু ৰাজ্যিক চলচ্চিত্ৰ বঁটাত 'বিশেষ বঁটা'ও লাভ কৰিছিল।

প্ৰাৰম্ভিক জীৱন

আনন্দীৰ জন্ম হৈছিল তেলেংগানাৰ ৱাৰাংগলৰ এটা তেলুগু পৰিয়ালত।

কৰ্মজীৱন

আনন্দীয়ে মাৰুতিৰ ছবি বাছ ষ্টপ (২০১২) যোগে অভিনয় জগতত পদাৰ্পণ কৰে। তেওঁৰ পৰৱৰ্তী ছবি প্ৰিয়তমা নীৱাচতা কুশলমা ২০১৩ চনৰ মাৰ্চ মাহত মুক্তি পায়। ছবিখনে নেতিবাচক সমালোচনা লাভ কৰিছিল যদিও এজন সমালোচকে কয় যে "বৰুণ সন্দেশ আৰু হাচিকাৰ অভিনয়েই ছবিখনৰ একমাত্ৰ সকাহ", লগতে তেওঁ যোগ দিয়ে যে হাচিকাক "পৰম্পৰাগত ৰূপত দেখিবলৈ ভাল লাগিছে আৰু তেওঁ এক শালীন প্ৰদৰ্শনো আগবঢ়াইছে।"

তেওঁ মণিমাৰনৰদ্বাৰা লিখিত তামিল চলচ্চিত্ৰ পুৰীয়ালান (২০১৪)-ত হৰিশ কল্যাণৰ বিপৰীতে অভিনয় কৰিবলৈ চুক্তিবদ্ধ হৈছিল। নিৰ্মাণ কাৰ্য চলি থকাৰ সময়তে পৰিচালক ভেট্ৰিমাৰানে এই প্ৰকল্পটোত সহ-প্ৰযোজক হিচাপে বিনিয়োগ কৰিব বুলি ঘোষণা কৰাৰ পাছত ছবিখনৰ পৰিসৰ বৃদ্ধি পায়।

আনন্দীয়ে প্ৰভু চলোমনৰ পৰিচালনাত নিৰ্মিত ছবি কায়ালত নামভূমিকাত অভিনয় কৰে। পৰিচালকজনে ছবিখনৰ বাবে তেওঁৰ নাম ৰক্ষিতাৰপৰা সলাই আনন্দী কৰাৰ সিদ্ধান্ত লয়। দুবাৰকৈ অডিচন দিয়াৰ পাছতহে তেওঁ চলোমনক মুগ্ধ কৰিবলৈ সক্ষম হৈছিল আৰু নিৰ্বাচিত হৈছিল। ছবিখনত তেওঁৰ অভিনয় প্ৰশংসিত হৈছিল। ২০১৪ চনৰ বিজয় বঁটা আদিকে ধৰি কেইবাটাও শ্ৰেষ্ঠ নৱাগতা অভিনেত্ৰীৰ বঁটাৰ বাবে তেওঁ মনোনীত হৈছিল।

২০১৫ চনত আনন্দীৰ প্ৰথম মুক্তিপ্ৰাপ্ত ছবি আছিল বালাৰদ্বাৰা প্ৰযোজিত এ. চৰগুনমৰ চান্দি বীৰন, য’ত তেওঁ অথৰ্ভাৰ বিপৰীতে অভিনয় কৰিছিল। ইয়াৰ পিছত তেওঁ জি. ভি. প্ৰকাশ কুমাৰৰ সৈতে এডাল্ট কমেডী ছবি ত্ৰিছা ইল্লানা নয়নতৰা (২০১৫)-ত অভিনয় কৰে। ছবিখন মুক্তি পোৱাৰ পিছত আনন্দীয়ে পৰিচালকজনৰ সৈতে কাম কৰি অসন্তুষ্টি প্ৰকাশ কৰিছিল। তেওঁ জানিবলৈ দিছিল যে তেওঁক কোৱা হৈছিল যে ছবিখন এখন "মৰমলগা প্ৰেমৰ কাহিনী" হ’ব, "এডাল্ট কমেডী" নহয়। তথাপি আনন্দীয়ে ছবিখনৰ তেলুগু সংস্কৰণৰ প্ৰচাৰত সহায় কৰিছিল। ২০১৬ চনত তেওঁ জি. ভি. প্ৰকাশ কুমাৰৰ সৈতে আকৌ দুখন ছবিত অভিনয় কৰে — এনাক্কু ইন্নোৰু পেৰ ইৰুক্কু আৰু কাডাভুল ইৰুক্কান কুমাৰু। ২০১৭ চনত তেওঁৰ মুক্তিপ্ৰাপ্ত ছবিসমূহ আছিল ৰুবায়, পাণ্ডিগাই আৰু এন আলুডা ছেৰুপ্পা কানম। ২০১৮ চনত তেওঁ মাৰি চেল্ভাৰাজৰ প্ৰথম ছবি পাৰীয়েৰুম পেৰুমলত অভিনয় কৰে, যিখন জাতিভেদৰ ওপৰত নিৰ্মিত এখন উচ্চ প্ৰশংসিত তামিল চলচ্চিত্ৰ। ছবিখনে ইতিবাচক সমালোচনা লাভ কৰাৰ লগতে শিল্পীসকলৰ অভিনয়েও যথেষ্ট উচ্চ প্ৰশংসা বুটলিছিল।

ব্যক্তিগত জীৱন

২০২১ চনৰ ৭ জানুৱাৰীত তেলেংগানাৰ ৱাৰাংগলত আনন্দী চক্ৰেটিছৰ সৈতে বিবাহপাশত আবদ্ধ হয়। তেওঁ এজন মেৰিন ইঞ্জিনিয়াৰ আছিল, যিয়ে পিছলৈ সহ-পৰিচালক হিচাপে কাম কৰিবলৈ আৰম্ভ কৰে। তেওঁ 'মুডাৰ কুডাম' খ্যাত পৰিচালক নবীনৰ খুলশালি আৰু তেওঁ আলাউধিনিন অৰ্পুথা কেমেৰা তথা অগ্নি চিৰাগুগলৰ দৰে ছবিত কাম কৰিছে। আনন্দী আৰু চক্ৰেটিছৰ এজন পুত্ৰ সন্তান আছে।

বাহ্যিক সংযোগ

• আনন্দী সম্পৰ্কে ইণ্টাৰনেট মুভি ডাটাবেছত থকা তথ্য।
• ইনষ্টাগ্ৰামত আনন্দী
• এক্সত আনন্দী