ইণ্ডিয়ান এয়াৰলাইনছ ফ্লাইট ৮১৪
 কান্দাহাৰ আন্তঃৰাষ্ট্ৰীয় বিমানবন্দৰ,কান্দাহাৰত অপহৃত বিমানখন| অগ্ৰভূমিত তালিবানৰ লোক | |
| হাইজেকিঙৰ সাৰাংশ | |
|---|---|
| তাৰিখ | ২৪ ডিচেম্বৰ ১৯৯৯ – ৩১ ডিচেম্বৰ ১৯৯৯ |
| সংক্ষিপ্ত বিবৰণ | বিমান হাইজেক |
| স্থান | কাঠমাণ্ডুৰ পৰা দিল্লীলৈ যোৱাৰ পথত ভাৰতীয় আকাশমাৰ্গত হাইজেক কৰে; পিছলৈ অমৃতসৰ, লাহোৰ, ডুবাই আৰু কান্দাহৰত অৱতৰণ কৰে। |
| যাত্ৰীৰ সংখ্যা | ১৭৯ (৫জন হাইজেকাৰৰ সৈতে) |
| কৰ্মচাৰীৰ সংখ্যা | ১১ |
| আহত | ১৭ |
| নিহত | ১ |
| জীৱিত থাকে | ১৮৯ |
 ইয়াৰ লগত জড়িত বিমানখন, ভিটি-ইডিডব্লিউ, হাইজেকিঙৰ কেইদিনমান পিছত দেখা গৈছে | |
| বিমানৰ ধৰণ | এয়াৰবাছ A300 |
| পৰিচালক | ইণ্ডিয়ান এয়াৰলাইনচ |
| পঞ্জীয়ন | VT-EDW |
| যাত্ৰাৰ আৰম্ভনি | ত্ৰিভুৱন আন্ত:ৰাষ্ট্ৰীয় বিমানবন্দৰ |
| লক্ষ্যস্থান | ইন্দিৰা গান্ধী আন্ত:ৰাষ্ট্ৰীয় বিমানবন্দৰ |
ইণ্ডিয়ান এয়াৰলাইনছৰ বিমান ৮১৪, (ইংৰাজী: Indian Airlines Flight 814) সাধাৰণতে আইচি ৮১৪ নামেৰে জনাজাত। এইখন আছিল ইণ্ডিয়ান এয়াৰলাইন্সৰ এয়াৰবাছ এ৩০০ যিখন ১৯৯৯ চনৰ ২৪ ডিচেম্বৰত হৰকত-উল-মুজাহিদীনৰ পাঁচজন সদস্যই হাইজেক কৰিছিল। কাঠমাণ্ডুৰ পৰা দিল্লী অভিমুখী পথত থকা যাত্ৰীবাহী বিমানখন ভাৰতীয় আকাশমাৰ্গত প্ৰৱেশ কৰাৰ কিছু সময়ৰ পিছতে প্ৰায় ১৬:৫৩ বজাত অধিগ্ৰহণ কৰা হয়। বিমানখনত ১৯০ জন লোক আছিল — ১৭৯ জন যাত্ৰী আৰু কেপ্তেইন দেৱী শৰণ, প্ৰথম বিষয়া ৰাজিন্দৰ কুমাৰ, আৰু বিমান অভিযন্তা অনিল কুমাৰ জাগিয়াকে ধৰি ১১ জন ক্ৰু সদস্য।[1]
বিমানখন অমৃতসৰ, লাহোৰ, আৰু ডুবাইলৈ উৰুৱাই দিয়া হৈছিল। ডুবাইত থকাৰ সময়ত হাইজেকাৰে ২৭ জন যাত্ৰী আৰু লগতে হাইজেকাৰে একাধিকবাৰ ছুৰীৰে আঘাত কৰা এজন পুৰুষ পণবন্দীৰ মৃতদেহ মুকলি কৰি দিয়ে। পিছত ২৫ ডিচেম্বৰত অপহৰণকাৰীয়ে আফগানিস্তানৰ কান্দাহাৰত বিমানখন অৱতৰণ কৰিবলৈ বাধ্য কৰে। সেই সময়ত কান্দাহাৰ বিমানবন্দৰকে ধৰি আফগানিস্তানৰ অধিকাংশ অঞ্চল তালিবানৰ নিয়ন্ত্ৰণত আছিল। বিমানখনক ঘেৰি ধৰা তালিবান লোকে, আৰু পাকিস্তানৰ আন্তঃসেৱা চোৰাংচোৱা সংস্থাৰ দুজন বিষয়াৰ উপস্থিতিৰ বাবে বাহ্যিক হস্তক্ষেপত বাধাৰ সৃষ্টি হৈছিল।[2][3]
২৭ ডিচেম্বৰত দুদিনীয়া আভ্যন্তৰীণ আলোচনাৰ অন্তত ভাৰত চৰকাৰে গৃহ পৰিক্ৰমা মন্ত্ৰালয়ৰ পৰা বিবেক কাটজুৰ নেতৃত্বত আলোচনাপন্থীৰ এটা দল প্ৰেৰণ কৰে, য’ত বিষয়া আছিল অজিত ডোভাল আৰু চি.ডি. সাহায়। কেইবাদিনো চলি থকা আলোচনাৰ অন্তত ভাৰতে পণবন্দীসকলৰ বিনিময়ত সন্ত্ৰাসবাদৰ বাবে কাৰাগাৰত বন্দী কৰি ৰখা তিনিজন লোক – আহমেদ ওমৰ ছাইদ শ্বেখ, মাছুদ আজহাৰ আৰু মুস্তাক আহমেদ জাৰগাৰক মুকলি কৰি দিবলৈ সন্মত হয়।[4]
৩১ ডিচেম্বৰত ভাৰত চৰকাৰে বন্দী তিনিজনক তালিবানৰ হাতত গতাই দিয়াৰ পিছত যাত্ৰী আৰু ক্ৰুক মুকলি কৰি দিয়াত পণবন্দী সংকটৰ অন্ত পৰে। প্ৰাক্তন বন্দী তিনিজন আৰু অপহৰণকাৰীক গ্ৰেপ্তাৰ কৰা হ’ব বুলি ভাৰতে আশা কৰা সত্ত্বেও লোককেইজনক গাড়ীৰে পাকিস্তান সীমান্তলৈ লৈ যোৱা হয় আৰু মুকলি কৰি দিয়া হয়, আৰু তেতিয়াৰ পৰাই তেওঁলোক ২০০১ চনৰ ভাৰতীয় সংসদ আক্ৰমণ, ২০০২ চনত ডেনিয়েল পাৰ্লৰ অপহৰণ আৰু হত্যা, ২০১৬ চনত পাঠানকোট আক্ৰমণ আৰু ২০১৯ চনত পুলৱামা আক্ৰমণৰ দৰে আন আন সন্ত্ৰাসবাদ সম্পৰ্কীয় কাণ্ডৰ সৈতে জড়িত থকাৰ সন্দেহ কৰা হৈছে। ভাৰতৰ কেন্দ্ৰীয় তদন্তকাৰী সংস্থাই এই গোচৰৰ সন্দৰ্ভত দহজন লোকৰ বিৰুদ্ধে অভিযোগ উত্থাপন কৰে (পাঁচজন অপহৰণকাৰীকে ধৰি সাতজনৰ অৱস্থা অজ্ঞাত), ইয়াৰে মাত্ৰ দুজনকহে দোষী সাব্যস্ত কৰি যাৱজ্জীৱন কাৰাদণ্ডৰ শাস্তি প্ৰদান কৰা হয়। ১৯৯৯ চনৰ শেষৰ ফালে আৰু ২০০০ চনৰ আৰম্ভণিতে আল কায়দাৰ সৈতে জড়িত সন্ত্ৰাসবাদীয়ে সহস্ৰাব্দৰ আক্ৰমণৰ পৰিকল্পনাৰ অংশ হিচাপে এই অপহৰণ সংঘটিত কৰিছিল।[5][6]
তথ্যসূত্ৰ
[সম্পাদনা কৰক]- ↑ "Unlawful Interference Airbus A300B2-101 VT-EDW, Friday 24 December 1999". Aviation Safety Network. https://asn.flightsafety.org/asndb/323604। আহৰণ কৰা হৈছে: 1 June 2024.
- ↑ "What happened during IC-814 hijack?". Business Standard. 2 September 2024. https://www.business-standard.com/india-news/what-happened-during-ic-814-hijack-the-focus-of-netflix-s-new-series-124090200554_1.html.
- ↑ "What was the IC-814 aircraft hijack, the subject of a new Netflix series?". The Indian Express. 2 September 2024. https://indianexpress.com/article/explained/ic-814-aircraft-hijack-kandahar-real-story-9540351/.
- ↑ Rahman, Maseeh (17 January 2000). "Who Was That Special Passenger?" (en-US ভাষাত). Time. ISSN 0040-781X. Archived from the original on 1 October 2020. https://web.archive.org/web/20201001195232/http://content.time.com/time/world/article/0,8599,2053713,00.html। আহৰণ কৰা হৈছে: 2 September 2020.
- ↑ "Union Home Minister's Statement(Indian Airlines Flight IC-814)". Ministry of External Affairs, Government of India. 6 January 2000. https://www.mea.gov.in/Speeches-Statements.htm?dtl/5481/Union+Home+Ministers+StatementIndian+Airlines+Flight+IC814। আহৰণ কৰা হৈছে: 1 June 2024.
- ↑ Bhattacharya, Samir (2014). Nothing But!. Partridge Publishing. পৃষ্ঠা. 213. ISBN 978-1-48281-787-4. https://books.google.com/books?id=xO3HAgAAQBAJ&pg=PA213। আহৰণ কৰা হৈছে: 8 September 2022.