উইজাৰ্ড ক্লিপ
উইজাৰ্ড ক্লিপৰ কিংবদন্তি (ইংৰাজী: Wizard Clip) হ’ল ১৮২০-ৰ দশকত ৱেষ্ট ভাৰ্জিনিয়াৰ মিডলৱেত সংঘটিত হোৱা বুলি কোৱা এটা জনপ্ৰিয় ভূতৰ গল্প। উইজাৰ্ড ক্লিপৰ কাহিনীটো সেই অঞ্চলৰ মৌখিক ইতিহাসৰ এটা অংশ। কেথলিক ৰিভিউৰ মুখ্য সম্পাদক তথা কাৰ্ডিনেল গিবনছৰ সচিব ৰেভাৰেণ্ড এলফ্ৰেড ই. স্মিথে ইয়াক "এতিয়ালৈকে কোৱা আটাইতকৈ সঁচা ভূতৰ গল্প" বুলি অভিহিত কৰিছিল।[1]
কিংবদন্তি
[সম্পাদনা কৰক]ক্লিপ বা কৰ্তন
[সম্পাদনা কৰক]কাহিনীটোৰ মতে, ১৭৯৪ চনৰ আশে-পাশে এজন ভ্ৰমণকাৰী অচিনাকি ব্যক্তি আডাম লিভিংষ্টন নামৰ পেনচিলভেনিয়াৰ এজন প্ৰাক্তন বাসিন্দাৰ ঘৰত আশ্ৰয় লৈছিল। তাত তেওঁ অসুস্থ হৈ পৰে আৰু লিভিংষ্টনক এজন কেথলিক পুৰোহিত মাতি আনিবলৈ অনুৰোধ কৰে। সেই অঞ্চলটোত কেথলিক ধৰ্মালম্বী লোক তেনেই কম আছিল আৰু কোনো পুৰোহিত বিচাৰি পোৱা নগৈছিল; তদুপৰি লুথাৰীয় ধৰ্মৰ লিভিংষ্টনো পুৰোহিত এজন বিচৰাৰ ক্ষেত্ৰত বিশেষ আগ্ৰহী নাছিল। অৱশেষত, অচিনাকি ব্যক্তিজনৰ মৃত্যু হয় আৰু কোনো কেথলিক ধৰ্মীয় ৰীতি-নীতি নোহোৱাকৈয়ে ওচৰতে তেওঁক সমাধিস্থ কৰা হয়।[2]
ব্যক্তিজনৰ মৃত্যুৰ পিছত কোৱা হয় যে যিটো কোঠাত তেওঁৰ মৃতদেহ আছিল, তাত মমবাতি জ্বলাই ৰাখিব পৰা নগৈছিল। ঘোঁৰাৰ খোজৰ শব্দ, বাচন-বৰ্তন ভঙাৰ শব্দ শুনা গৈছিল আৰু জুইশালৰ পৰা আঙঠিবোৰ চটিওৱা দি বাহিৰলৈ ওলাই আহিছিল। ঘৰটোৰ বিভিন্ন অংশত গধুৰ কেঁচিয়ে কিবা কটাৰ দৰে শব্দ শুনা গৈছিল আৰু সকলো ধৰণৰ সামগ্ৰী — কাপোৰ, চাদৰ আৰু বুট জোতা — আধা-চন্দ্ৰাকাৰ আৰু অন্যান্য আকৃতিৰ দৰে কটা দেখা গৈছিল। কিংবদন্তি অনুসৰি, এই অলৌকিক ঘটনাবোৰ কেইবা বছৰ ধৰি চলি আছিল, যাৰ ফলত লিভিংষ্টন পৰিয়ালটোৱে গভীৰ যন্ত্ৰণা ভোগ কৰিছিল। এটা জনপ্ৰিয় কাহিনী মতে, এগৰাকী দৰ্শকে লিভিংষ্টনৰ ঘৰত থকা সময়ত সুৰক্ষিত কৰি ৰাখিবলৈ তেওঁৰ নতুন ৰেচমী টুপীটো এখন ৰুমালত মেৰিয়াই থৈছিল; কিন্তু যোৱাৰ সময়ত তেওঁ দেখিলে যে ৰুমালখনত একো হোৱা নাই যদিও টুপীটো টুকুৰা-টুকুৰকৈ কটা হৈছে।[2]
লোককথা অনুসৰি, লিভিংষ্টনে চেফাৰ্ডচটাউনৰ এজন আইৰিছ প্ৰব্ৰজনকাৰী পুৰোহিত ফাদাৰ ডেনিছ কাহিলক তেওঁৰ ঘৰলৈ তদন্ত কৰিবলৈ আমন্ত্ৰণ জনাইছিল। ফাদাৰ কাহিলে ঘৰটোৰ চাৰিওফালে পবিত্ৰ পানী ছটিয়াই দিয়াৰ পিছত কিছুমান উপদ্ৰৱ সলনি হৈছিল আৰু আগতে হেৰোৱা কিছু টকা ঘৰৰ দুৱাৰ মুখত পোৱা গৈছিল। পিছলৈ ফাদাৰ কাহিলৰ সৈতে ফাদাৰ ডেমেট্ৰিয়াছ গেলিটজিন আহিছিল। গেলিটজিনে কোনেৱাগোত থকা নিজৰ ঘৰত "ক্লিপ"ৰ এই কাহিনীটোৰ বিষয়ে শুনিবলৈ পাইছিল। তেওঁ লিভিংষ্টনৰ ঘৰত এখন বিশেষ ধৰ্মীয় সভা (Mass) পাতিছিল, যাৰ পিছত সেই উপদ্ৰৱসমূহ বন্ধ হৈছিল।[3][4] গেলিটজিনে পিছলৈ এই ঘটনাবোৰৰ বিষয়ে তেওঁৰ বিশপ জন কেৰললৈ এটা দীঘলীয়া প্ৰতিবেদন লিখিছিল, কিন্তু সেই নথিখন হেৰাই থাকিল। অৱশ্যে গেলিটজিনে তেওঁৰ অন্যান্য লেখা যেনে 'গেলিটজিনচ লেটাৰ্ছ'ৰ "এ লেটাৰ টু এ প্ৰটেষ্টাণ্ট ফ্ৰেণ্ড" নামৰ অধ্যায়টোত ইয়াৰ উল্লেখ কৰিছে।[5]
সেই কণ্ঠস্বৰ
[সম্পাদনা কৰক]কিংবদন্তিটোৰ মতে "উইজাৰ্ড ক্লিপ"ৰ উপদ্ৰৱ বন্ধ হোৱাৰ পিছতো লিভিংষ্টনৰ সম্পত্তিত অলৌকিক ঘটনাৰ অন্ত পৰা নাছিল। ফাদাৰ গেলিটজিনৰ ভ্ৰমণৰ কিছু সময়ৰ পিছতেই পৰিয়ালটোৱে এক "সান্ত্বনাদায়ক কণ্ঠস্বৰ" শুনিবলৈ পাইছিল। কোৱা হয় যে সেই ৰহস্যময় উপস্থিতিয়ে তেওঁলোকৰ সৈতে সোতৰ বছৰ ধৰি আছিল। এই কণ্ঠস্বৰটো প্ৰথমবাৰৰ বাবে এটা উজ্জ্বল পোহৰ হিচাপে দেখা দিছিল যিয়ে লিভিংষ্টনক টোপনিৰ পৰা জগাই তুলিছিল। এটা স্পষ্ট আৰু মধুৰ মাতে তেওঁক সাৰ পাবলৈ, পৰিয়ালটোক একগোট কৰিবলৈ আৰু প্ৰাৰ্থনা কৰিবলৈ কৈছিল। তেওঁ সেইমতে কাম কৰিছিল আৰু সেই ৰহস্যময় কণ্ঠস্বৰটোৱে তেওঁলোকৰ সৈতে প্ৰাৰ্থনা কৰিছিল আৰু তেওঁলোকক পথ দেখুৱাইছিল। সেই একেই কণ্ঠস্বৰটোৱে তেওঁলোকক কেথলিক ধৰ্মৰ বিষয়ে অতি সৰল অথচ সাৱলীলভাৱে শিক্ষা দি গৈছিল।[6] লিভিংষ্টন পৰিয়ালে সেই অলৌকিক উপস্থিতিক 'পাৰ্গেটৰী'ত থকা কোনো এটা আত্মাৰ কণ্ঠ বুলি গণ্য কৰিছিল আৰু ইয়াৰ ফলতেই তেওঁলোকে কেথলিক ধৰ্মলৈ ধৰ্মান্তৰিত হৈছিল।[6]
ভূমিদান
[সম্পাদনা কৰক]১৮০২ চনত লিভিংষ্টনে ওপেংকুৱন ক্ৰিকৰ পাৰত থকা তেওঁৰ নিজৰ ৩৫ একৰ (১৪ হেক্টৰ) ভূমি "এজন পুৰোহিতক পোহপাল দিবলৈ এক পথাৰ" হিচাপে কেথলিক চাৰ্চক দান কৰিছিল। কিংবদন্তি অনুসৰি, কথিত অশৰীৰী আত্মাৰ উপদ্ৰৱৰপৰা মুক্তি পোৱাৰ কৃতজ্ঞতা স্বৰূপে এই ভূমি দান কৰা হৈছিল।[7] এই ভূমিখণ্ড তেতিয়াৰপৰাই "দ্য প্ৰিষ্টচ ফিল্ড" (পুৰোহিতৰ পথাৰ) নামেৰে জনাজাত। ১৯৮৩ চনত হুইলিং–চাৰ্লষ্টনৰ ৰোমান কেথলিক ডাইচিছে এই স্থানত প্ৰিষ্ট ফিল্ড পষ্টৰেল চেণ্টাৰ উৎসৰ্গা কৰে।[8]
আৰু চাওক
[সম্পাদনা কৰক]তথ্যসূত্ৰ
[সম্পাদনা কৰক]- ↑ Wood, Don C. (October 28, 2007). "The mystic of Priest's Field". The Martinsburg Journal (Martinsburg, WV). Archived from the original on January 27, 2016. https://web.archive.org/web/20160127140630/http://www.journal-news.net/page/content.detail/id/500237.html?nav=5004.
- 1 2 Laidley, W. S. (January 1904). ""WIZZARD CLIP" (Wizard Clip)". West Virginia Historical Magazine Quarterly. http://www.wvculture.org/history/notewv/wizardclip1.html। আহৰণ কৰা হৈছে: January 3, 2016.
- ↑ Dichtl, John (May 2008). Frontiers of Faith: Bringing Catholicism to the West in the Early Republic. University Press of Kentucky. পৃষ্ঠা. 114–115. ISBN 978-0813124865. https://archive.org/details/frontiersoffaith0000dich.
- ↑ Hayden, Thomas (1869). A Memoir on the Life and Character of the Rev. Prince Demetrius A. de Gallitzin. J. Murphy & Company. পৃষ্ঠা. 190–200. https://books.google.com/books?id=pD7SAAAAMAAJ&dq=demetrius+gallitzin+++livingston&pg=PA200.
- ↑ Gallitzin, Demetrius Augustine (1940). Gallitzin's Letters. প্ৰকাশক Loretto, PA: Angelmodde Press. পৃষ্ঠা. 221.
- 1 2 Dallaire, Glenn (November 2011). "The Wizard Clip – Adam Livingston's miraculous conversion". Miracles of the Church. https://www.miraclesofthechurch.com/2011/11/wizard-clip-adam-livingstons-miraculous.html। আহৰণ কৰা হৈছে: March 22, 2020.
- ↑ Barry, Joseph (1903). The Strange Story of Harper's Ferry, with Legends of the Surrounding Country. প্ৰকাশক Project Gutenberg. পৃষ্ঠা. 207–219. https://www.gutenberg.org/ebooks/35459?msg=welcome_stranger। আহৰণ কৰা হৈছে: January 3, 2016.
- ↑ "Our Story". Priest Field Pastoral Center. https://priestfield.org/our-story/। আহৰণ কৰা হৈছে: March 22, 2020.