কেমেৰন কাৰ্টিঅ’

কেমেৰন কাৰ্টিঅ’
জন্ম নাম	কামৰান চবাহী
অন্য নাম	কেমেৰন
জন্ম	০৯ এপ্ৰিল, ১৯৭৮ (৪৮ বছৰ)
উৎসস্থান	ইৰান / ছুইডেন
সংগীতৰ ধৰণ	পপ, ফাৰ্চী/মধ্য প্ৰাচ্যৰ সংগীত
পেচা	গায়ক
সক্ৰিয়তাৰ বছৰ	২০০৫–বৰ্তমান
লেবেল	চনী মিউজিক ইউনিভাৰ্চেল মিউজিক গ্ৰুপ তাৰানেহ ৰেকৰ্ডচ শ্বেৰফা মিউজিক আভাং মিউজিক

কামৰান চবাহী (ফাৰ্চী: کامران صباحی; জন্ম ৯ এপ্ৰিল ১৯৭৮) হৈছে পেছাগতভাৱে কেমেৰন কাৰ্টিঅ’ নামেৰে পৰিচিত এগৰাকী ইৰানী মূলৰ চুইডিছ পপ গায়ক।

চনী মিউজিকৰ সৈতে চুক্তিবদ্ধ হোৱাৰ পিছত তেওঁ ২০০৫ চনত নিজৰ প্ৰথম এলবাম *বৰ্ডাৰলেছ* মুকলি কৰে। পূৰ্বতে তাৰানেহ ৰেকৰ্ডচ আৰু শ্বেৰফা মিউজিকৰ সৈতে কাম কৰা কেমেৰন বৰ্তমান আভাং মিউজিকৰ সৈতে চুক্তিবদ্ধ। ইয়াৰ উপৰি ইউনিভাৰ্চেল মিউজিক গ্ৰুপ স্কেণ্ডিনেভিয়াৰ সৈতেও তেওঁৰ এটা প্ৰকাশন চুক্তি আছে আৰু তেওঁ নিজৰ নতুন গীতসমূহৰ কাম কৰি আছে। তেওঁ ইৰান, চুইডেন আৰু ইৰানী প্ৰব্ৰজনকাৰীসকলৰ মাজত সমানেই জনপ্ৰিয়।

কেৰিয়াৰ

কেমেৰন কাৰ্টিঅ’ই চুইডেনত নিজৰ সংগীত জীৱন আৰম্ভ কৰিছিল। তেওঁ ফাৰ্চী, ইংৰাজী আৰু স্পেনিছকে ধৰি বিভিন্ন ভাষাত কথা ক’ব আৰু গান গাব পাৰে। স্পেনিছ ভাষা তেওঁ স্পেইনত থকাৰ সময়ত শিকিছিল। এটা কলাত্মক পৰিয়ালৰপৰা অহাৰ বাবে তেওঁৰ সংগীত জীৱনত যথেষ্ট সহায় হৈছিল। তেওঁৰ ভাতৃ আলেক কাৰ্টিঅ’ এগৰাকী সংগীত প্ৰযোজক আৰু সংগীত ভিডিঅ’ পৰিচালক।

কেমেৰন কাৰ্টিঅ’ই ২০০৫ চনৰ মেলোডিফেষ্টিভালেনত ৰোমা গীতটিৰে আত্মপ্ৰকাশ কৰে। ৰোমা গীতৰ কথাখিনি কেমেৰনে নিজেই তৈয়াৰ কৰা এটা কৃত্ৰিম ভাষাত লিখা হৈছিল, যাক তেওঁ মৰমৰ সীমাহীন ভাষা বুলি অভিহিত কৰিছিল। তেওঁ একেটা গীতৰে এটা স্পেনিছ সংস্কৰণো উলিয়াইছিল। ২০০৫ চনৰ ১৯ ফেব্ৰুৱাৰীত লিংকোপিং ছেমিফাইনেলত যোগ্যতা অৰ্জন কৰাৰ পাছত তেওঁ প্ৰতিযোগিতাখনৰ দ্বিতীয় সুযোগ পৰ্যায়লৈ উন্নীত হয়। ২০০৫ চনৰ ৬ মাৰ্চত এই পৰ্যায়ত প্ৰতিযোগিতা কৰি তেওঁ ফাইনেলত প্ৰৱেশ কৰাত ব্যৰ্থ হয়। কিন্তু গীতটো চুইডিছ দৰ্শকৰ মাজত অতি জনপ্ৰিয় প্ৰমাণিত হয় আৰু চুইডিছ মিউজিক চাৰ্টৰ শীৰ্ষ ৫টা গীতৰ ভিতৰত স্থান লাভ কৰি ২০০৫ চনৰ এপ্ৰিলত চতুৰ্থ স্থানলৈ উন্নীত হয়।

ৰোমা গীতটোৰ পিছত তেওঁৰ প্ৰথম ষ্টুডিঅ’ এলবাম বৰ্ডাৰলেছ মুকলি কৰে, য’ত ৰাই গায়ক খালেদৰ সৈতে এটা যুগল গীত অন্তৰ্ভুক্ত আছিল। হেনা নামৰ এই গীতটো আৰবী আৰু ফাৰ্চী ভাষাত আছিল। কেমেৰন আৰু খালেদে ২০০৬ চনত স্পেইনৰ বাবে এটা আৰবী-স্পেনিছ সংস্কৰণো মুকলি কৰিছিল। তেওঁৰ হেনা গীতটো আৰু চেব খালেদৰ সৈতে কৰা সহযোগিতাই তেওঁক সমগ্ৰ আৰব বিশ্বত জনপ্ৰিয় কৰি তুলিছিল। তেওঁৰ নি না নায় গীতটোৱেও সফলতা লাভ কৰিছিল। এদুৰ্নেৰ সৈতে গোৱা ইংৰাজী-স্পেনিছ দ্বিভাষিক গীত ডণ্ট টেল মি টুনাইট গ্ৰীক ৰেডিঅ’ চাৰ্টৰ শীৰ্ষ ৪০টা গীতৰ ভিতৰত স্থান পাইছিল। বৰ্ডাৰলেছ এলবামটোৰ বেছিভাগ গীততে কেমেৰনে সংগীত ৰচক আৰু প্ৰযোজক আলেক পি আৰু মাৰ্কাছ এংলফৰ সৈতে কাম কৰিছিল।

তেওঁ ইউনিভাৰ্চেল মিউজিক গ্ৰুপ, শ্বেৰফা মিউজিক আৰু তাৰানেহ ৰেকৰ্ডচৰ সৈতে চুক্তিবদ্ধ হৈছিল। ২০১১ চনত তেওঁ মেলডী ক্লাবৰ এটা গীতৰ ফাৰ্চী সংস্কৰণ ইলেক্ট্ৰিক নামৰ এটা ডান্স হিট গীত মুকলি কৰে।

২০১৯ চনৰ ডিচেম্বৰ মাহত কেমেৰনে ঈশ্বৰৰ প্ৰতি উৎসৰ্গিত এটা আধ্যাত্মিক পপ গীত বেচপাৰ বে খোদা মুকলি কৰে। কেমেৰন কাৰ্টিঅ’ বৰ্তমান আভাং মিউজিকৰ সৈতে চুক্তিবদ্ধ আৰু তেওঁ আভালো আখৰ গীতটি মুকলি কৰিছে।

সহযোগিতা

কেমেৰন নামেৰে তেওঁ আণ্ডাৰছ নাইমেন, কেমেৰন কাৰ্টিঅ’ আৰু ৰবিন ৰেক্সৰদ্বাৰা প্ৰযোজনা কৰা ইউ কিপ মি হেঙিং অন মুকলি কৰে। ইয়াত কেমেৰনে নিজেই প্ৰযোজনা কৰা ইয়াৰ ৰিমিক্স সংস্কৰণো অন্তৰ্ভুক্ত আছিল।

তেওঁ ৰাই গায়ক খালেদৰ সৈতে কৰা যুগল গীত হেনাই চুইডেনত ৯ নম্বৰ স্থান লাভ কৰাৰ লগতে নেদাৰলেণ্ড আৰু বেলজিয়ামতো স্থান লাভ কৰিছিল। ২০০৬ চনত চুইডেনৰ গোটেনবাৰ্গত অনুষ্ঠিত ইউৰোপীয় এথলেটিক্স চেম্পিয়নশ্বিপৰ উদ্বোধনী অনুষ্ঠানত প্ৰায় এক লাখ দৰ্শকৰ সন্মুখত খালেদ আৰু কেমেৰনে এই গীতটো পৰিৱেশন কৰিছিল। এই অনুষ্ঠান সমগ্ৰ ইউৰোপৰ ৰাষ্ট্ৰীয় টেলিভিছনসমূহে সম্প্ৰচাৰ কৰিছিল।

আন এটা গুৰুত্বপূৰ্ণ সহযোগিতা আছিল লেবাণীজ-গ্ৰীক চাইপ্ৰিয়ট চাৰ্বেলৰ সৈতে কৰা মি চিকা গীতটো, যিটো চাৰ্বেলৰ বাবে গ্ৰীক ভাষাত আৰু কেমেৰনৰ বাবে সম্পূৰ্ণ ফাৰ্চী ভাষাত এটা সফল গীত আছিল।

স্পেনিছ পপ গায়ক এদুৰ্নেৰ সৈতে গোৱা ইংৰাজী ভাষাৰ হিট গীত ডণ্ট টেল মি টুনাইটত কাৰ্টিঅ’ই অংশগ্ৰহণ কৰিছিল। তেওঁ পূৰ্বে কানাডাৰ শিল্পী মাছাৰীৰ সৈতে কাম কৰা সংগীত প্ৰযোজক হমিদ শ্বেকাৰীৰ সৈতেও অংশীদাৰিত্ব কৰিছে।

ব্যক্তিগত জীৱন

কেমেৰন কাৰ্টিঅ’ বৰ্তমান কেলিফৰ্ণিয়াত বাস কৰে আৰু ডেলৰাম কাৰ্টিঅ’ৰ সৈতে বিবাহপাশত আবদ্ধ হয়। তেওঁলোকৰ দুটি পুত্ৰ সন্তান আছে। ২০১৭ চনলৈকে তেওঁ আৰু তেওঁৰ ভাতৃ আলেক কাৰ্টিঅ’ই লছ এঞ্জেলছৰ ছাণ্টা মনিকাত এটা চুইডিছ পিজ্জা হাউচ চলাইছিল।

কাৰ্টিঅ’ই তৃতীয় বিশ্বৰ দেশসমূহৰ দৰিদ্ৰতা দূৰীকৰণ আৰু শিশুৰ অধিকাৰৰ বাবে কাম কৰা বিভিন্ন দাতব্য সংস্থাৰ সৈতে জড়িত। শেহতীয়াকৈ ২০১৯ চনৰ অক্টোবৰ মাহত তেওঁ গ্ল’বেল চেৰিটি ইনিচিয়েটিভৰ সহযোগত কেলিফৰ্ণিয়াৰ বেভাৰ্লি হিলছত এটা দাতব্য কাৰ্যসূচীত অংশগ্ৰহণ কৰিছিল।

বাহ্যিক সংযোগ

• Cameron Cartio on Spotify