ক্ৰিষ্টাল ৰিড

ক্ৰিষ্টাল ৰিড
২০১৩ চনত ৰিড
জন্ম	ক্ৰিষ্টাল মেৰী ৰিড ৬ ফেব্ৰুৱাৰী, ১৯৮৫ (৪১ বছৰ) ডেট্ৰাইট, মিছিগান, আমেৰিকা
পেচা	অভিনেত্ৰী
সক্ৰিয় হৈ থকা সময়	২০১০–বৰ্তমান

ক্ৰিষ্টাল মেৰী ৰিড (জন্ম ৬ ফেব্ৰুৱাৰী, ১৯৮৫) এগৰাকী আমেৰিকান অভিনেত্ৰী। তেওঁ টিন উলফ (২০১১–২০১৪) ধাৰাবাহিকত এলিছন আৰ্জেণ্টৰ চৰিত্ৰত অভিনয় কৰি বিশেষ জনপ্ৰিয়তা লাভ কৰে। তৃতীয় ছিজনৰ পিছত তেওঁ ধাৰাবাহিকখন এৰি যায় যদিও পঞ্চম ছিজনত এলিছনৰ পূৰ্বপুৰুষ মেৰী-জিন ভেলেট হিচাপে অতিথি চৰিত্ৰত উপস্থিত হৈছিল। পিছত তেওঁ পুনৰ মিলন চলচ্চিত্ৰ টিন উলফ: দ্য মুভি (২০২৩) ত এলিছন আৰ্জেণ্টৰ চৰিত্ৰত পুনৰ অভিনয় কৰে।

ৰিডে গথাম (২০১৭–২০১৮) ধাৰাবাহিকৰ চতুৰ্থ ছিজনত ছফিয়া ফেলকনৰ চৰিত্ৰত অভিনয় কৰিছিল আৰু শ্বাম্প থিং (২০১৯) ধাৰাবাহিকত এবি আৰ্কেনৰ মুখ্য চৰিত্ৰত অভিনয় কৰিছিল। তেওঁ স্কাইলাইন (২০১০), ক্ৰাশ (২০১৩), টু লেট (২০১৫) আৰু গোষ্টলেণ্ড (২০১৮) চলচ্চিত্ৰসমূহতো অভিনয় কৰিছে।

প্ৰাথমিক জীৱন আৰু শিক্ষা

ৰিড ডেট্ৰাইটত জন্মগ্ৰহণ কৰি ডাঙৰ হৈছিল আৰু তেওঁৰ পিতৃ-মাতৃ পোলিছ আৰু আমেৰিকাৰ থলুৱা জনগোষ্ঠীৰ আছিল। তেওঁ এটা ৰক্ষণশীল কেথলিক পৰিয়ালত ডাঙৰ হৈছিল যদিও তেওঁ কৈছে যে ডাঙৰ হোৱা সময়ত বেপ্টিষ্ট গীৰ্জাতো গৈছিল আৰু ইয়াক তেওঁ ভাল নাপাইছিল। তেওঁ কৈছিল, “মই একেবাৰে এইটো ঘৃণা কৰিছিলোঁ আৰু জানিছিলোঁ যে মই ইয়াত কেতিয়াও খাপ খাব নোৱাৰিম।”

২০০৩ চনত তেওঁ ৰোজভিল হাইস্কুলৰপৰা স্নাতক ডিগ্ৰী লাভ কৰে। ৰিডে সৰুৰেপৰা নৃত্য শিকিছিল আৰু হাইস্কুলত নৃত্যৰ অধিনায়ক আছিল। তেওঁ স্থানীয় কমিউনিটি থিয়েটাৰৰ সক্ৰিয় সদস্য আছিল আৰু এনি, ফিডলাৰ অন দ্য ৰুফ আৰু গ্ৰীজ মিউজিকেলত অভিনয় কৰিছিল। তেওঁ ৱেইন ষ্টেট ইউনিভাৰ্চিটিত পঢ়িছিল আৰু সূক্ষ্ম কলাৰ স্নাতক কাৰ্যসূচীৰ অংশ আছিল যদিও পিছত এই কাৰ্যসূচী এৰি থৈ যায়। পিছত তেওঁ চিকাগোলৈ গুচি গৈ কেইবাটাও স্থানীয় নাট্য প্ৰযোজনাত অভিনয় কৰে। ২০০৮ চনৰ ডিচেম্বৰ মাহত তেওঁ পৰ্দাৰ কেৰিয়াৰ গঢ়িবলৈ হলিউডলৈ গুচি যায়।

কেৰিয়াৰ

২০১০ চনত ৰিডে অতিথি হিচাপে চি এছ আই: ক্ৰাইম ছিন ইনভেষ্টিগেচন, চি এছ আই: এন ৱাই, ৰিজ'লি এণ্ড আইলছ আৰু দ্য হাৰ্ড টাইমছ অৱ আৰ জে বাৰ্গাৰ ধাৰাবাহিকত অভিনয় কৰে।

২০১১ চনত তেওঁ এমটিভিৰ ধাৰাবাহিক টিন উলফত এলিছন আৰ্জেণ্টৰ চৰিত্ৰত অভিনয় আৰম্ভ কৰে। তৃতীয় ছিজনৰ আগতে তেওঁ ধাৰাবাহিকখন এৰি নতুন কাম কৰিবলৈ আৰু চলচ্চিত্ৰৰ অন্য ক্ষেত্ৰ অন্বেষণ কৰিবলৈ ইচ্ছা প্ৰকাশ কৰিছিল। তেওঁ শ্ব’টোৰ কাৰ্যবাহী প্ৰযোজক জেফ ডেভিছৰ সৈতে এই বিষয়ে আলোচনা কৰে আৰু ডেভিছে তেওঁৰ সিদ্ধান্ত সমৰ্থন কৰে। ২০১৪ চনৰ মাৰ্চ মাহত তৃতীয় ছিজনৰ শেষত এলিছন আৰ্জেণ্টৰ মৃত্যুৰ জৰিয়তে তেওঁ ধাৰাবাহিকখন এৰি যায়।

২০১৬ চনৰ ২৩ ফেব্ৰুৱাৰীত তেওঁ “দ্য মেইড অৱ গেভাউডান” খণ্ডত প্ৰথম আৰ্জেণ্ট ৱেৰউলফ চিকাৰী মেৰী-জিন ভেলেট হিচাপে অভিনয় কৰে।

ৰিডৰ চলচ্চিত্ৰসমূহৰ ভিতৰত স্কাইলাইন আৰু ক্ৰেজি, ষ্টুপিড, লাভ অন্তৰ্ভুক্ত। তেওঁ ফৰাচী চলচ্চিত্ৰ নিৰ্মাতা পাস্কাল লগিয়াৰৰদ্বাৰা লিখা আৰু পৰিচালিত ভৌতিক চলচ্চিত্ৰ গোষ্টলেণ্ডত অভিনয় কৰিছিল। এই চলচ্চিত্ৰখন প্ৰথমে ১৪ মাৰ্চ ২০১৮ তাৰিখে ফ্ৰান্সত মুক্তি পায়।

২০১৭ চনৰ ২২ জুলাইত ৰিডক ফক্স টেলিভিছন ধাৰাবাহিক গথামৰ চতুৰ্থ ছিজনত ছফিয়া ফেলকনৰ চৰিত্ৰত অভিনয়ৰ বাবে নিৰ্বাচিত কৰা হয়।

২০১৮ চনৰ ৬ ছেপ্টেম্বৰত জানিব পৰা যায় যে তেওঁ ডি চি ইউনিভাৰ্চ টেলিভিছন ধাৰাবাহিক শ্বাম্প থিংত মুখ্য চৰিত্ৰত অভিনয় কৰিব। তেওঁ এবি আৰ্কেন নামৰ এজন বুদ্ধিমান আৰু যত্নশীল চিডিচি চিকিৎসকৰ চৰিত্ৰত অভিনয় কৰে, যি লুইজিয়ানাত নিজৰ জন্মস্থানলৈ উভতি গৈ এক বিপজ্জনক জলাশয়-জনিত ভাইৰাছৰ অনুসন্ধান কৰে আৰু পিছত জলাশয়ত লুকাই থকা ৰহস্যমজ় আৰু ভয়ংকৰ সত্য উদ্ঘাটন কৰে।

২০২১ চনৰ ছেপ্টেম্বৰ মাহত ঘোষণা কৰা হয় যে টিন উলফৰ পুনৰ মিলন চলচ্চিত্ৰ পেৰামাউণ্ট+ৰ বাবে নিৰ্মাণ কৰা হ'ব, য'ত জেফ ডেভিছ চিত্ৰনাট্যকাৰ আৰু কাৰ্যবাহী প্ৰযোজক হিচাপে উভতি আহিব। অধিকাংশ মূল অভিনয়শিল্পীৰ লগতে ৰিডেও নিজৰ চৰিত্ৰ পুনৰ অভিনয় কৰে। এই চলচ্চিত্ৰখন ২৬ জানুৱাৰী ২০২৩ তাৰিখে মুক্তি পায়।

ব্যক্তিগত জীৱন

ৰিডে কৈছে যে তেওঁ নিজৰ জন্মস্থান এৰি গৈছিল কাৰণ সেই ঠাইখন “অতি সংকীৰ্ণ মানসিকতাৰ আছিল আৰু মই যিবোৰ বিষয় গ্ৰহণ কৰোঁ সেইবোৰ গ্ৰহণযোগ্য নাছিল।”

২০১৬ চনৰ আমেৰিকাৰ ৰাষ্ট্ৰপতি নিৰ্বাচনৰ আগতে তেওঁ হিলাৰী ক্লিণ্টনৰ সমৰ্থনত প্ৰচাৰ চলাইছিল।

অভিনয় নকৰা সময়ত তেওঁ গ'লফ খেলাক নিজৰ অন্যতম শখ হিচাপে উল্লেখ কৰিছে।

বাহ্যিক সংযোগ

• ক্ৰিষ্টাল ৰিড সম্পৰ্কে ইণ্টাৰনেট মুভি ডাটাবেছত থকা তথ্য।
• ইনষ্টাগ্ৰামত ক্ৰিষ্টাল ৰিড