গুৱাটেমালাৰ মায়ান হৰিণা নৃত্য
গুৱাটেমালাৰ মায়ান ডিয়াৰ (হৰিণাা) নৃত্য (ইংৰাজী: Mayan Deer Dance), যাক স্পেনিছ ভাষাত "বাইল ডি ভেনাডো" (Baile de Venado) বুলিও জনা যায়, হ’ল গুৱাটেমালাৰ খিলঞ্জীয়া মায়ান লোকসকলৰদ্বাৰা পৰিৱেশন কৰা এক পৰম্পৰাগত নৃত্য। এই নৃত্য প্ৰায়ে গুৰুত্বপূৰ্ণ সাংস্কৃতিক তথা ধৰ্মীয় উদ্যাপন আৰু অনুষ্ঠানত পৰিৱেশন কৰা হয়। ইয়াত মাৰিম্বা, মাৰাকাছ, ঢোল আৰু বাঁহীৰ দৰে বাদ্যযন্ত্ৰৰে পৰম্পৰাগত সংগীত সংগত কৰা হয়।
ইতিহাস আৰু গুৰুত্ব
[সম্পাদনা কৰক]মায়ান হৰিণাা নৃত্যৰ মূল উৎস প্ৰাক-কলম্বিয়ান সময়লৈকে বিচাৰি পোৱা যায়, যেতিয়া মায়ান লোকসকলৰ মাজত হৰিণাা পহু শক্তি আৰু অভিজাত শ্ৰেণীৰ প্ৰতীক আছিল। এই নৃত্যটো মূলতঃ এক চিকাৰৰ ধৰ্মীয় ৰীতি হিচাপে পৰিৱেশন কৰা হৈছিল বুলি বিশ্বাস কৰা হয় আৰু ইয়াৰ উদ্দেশ্য আছিল খাদ্যৰ বাবে চিকাৰ কৰা জন্তুৰ আত্মাক সন্মান জনোৱা।
সময়ৰ লগে লগে মায়ান হৰিণাা নৃত্য মায়ান সংস্কৃতি আৰু পৰম্পৰাৰ এক গুৰুত্বপূৰ্ণ অংশ হৈ পৰিল, যি ধৰ্মীয় অনুষ্ঠান আৰু অন্যান্য গুৰুত্বপূৰ্ণ অনুষ্ঠানত পৰিৱেশন কৰা হয়। এই নৃত্যক প্ৰাকৃতিক পৃথিৱীৰ আত্মাৰ সৈতে সংযোগ স্থাপনৰ এক মাধ্যম আৰু মায়ান পৌৰাণিক কাহিনীৰ পূৰ্বপুৰুষ তথা দেৱ-দেৱতাসকলক শ্ৰদ্ধা জনোৱাৰ এক উপায় হিচাপে গণ্য কৰা হয়।[1]
সাজ-পোছাক আৰু প্ৰদৰ্শন
[সম্পাদনা কৰক]মায়ান হৰিণা নৃত্যৰ প্ৰদৰ্শনকাৰীসকলে পৰিধান কৰা সাজ-পোছাক এই নৃত্যৰ এক গুৰুত্বপূৰ্ণ উপাদান। ইয়াক হৰিণাৰ প্ৰতিনিধিত্ব কৰাকৈ প্ৰস্তুত কৰা হয়, যি মায়ান সংস্কৃতিত এক পৱিত্ৰ জন্তু। নৃত্যশিল্পীয়ে মূৰত পিন্ধা টুপী বা মুখাভাগ প্ৰায়ে সাজ-পোছাকৰ আটাইতকৈ জটিল অংশ। ইয়াক হৰিণাৰ মূৰৰ সৈতে সাদৃশ্য থকাকৈ ডিজাইন কৰা হয় আৰু সাধাৰণতে চামৰা, নোম আৰু কাপোৰৰ সংমিশ্ৰণেৰে তৈয়াৰ কৰা হয়। এই মুখাভাগত গছৰ ডাল বা অন্যান্য প্ৰাকৃতিক সামগ্ৰীৰে নিৰ্মিত শিং থাকিব পাৰে আৰু ইয়াক প্ৰায়ে পাখি আৰু মণিৰে সজোৱা হয়।
বাকী সাজ-পোছাকত সাধাৰণতে কপাহ বা লিনেনৰ দৰে পাতল আৰু বতাহ চলাচল কৰিব পৰা কাপোৰেৰে তৈয়াৰী এটা চোলা (tunic) থাকে। এই চোলাটোত জটিল এম্ব্ৰইডাৰী বা অন্যান্য আলংকাৰিক উপাদান, যেনে ৰঙীন আৰ্হি বা জন্তুৰ ছবিৰে সজোৱা হ'ব পাৰে। নৃত্যশিল্পীয়ে কঁকালত বেল্ট বা চৰা পিন্ধিব পাৰে, যিবোৰ প্ৰায়ে ঘণ্টা বা অন্যান্য টুংটুঙীয়া অলংকাৰেৰে সজোৱা হয়। নৃত্যশিল্পীজনে লৰচৰ কৰাৰ লগে লগে এইবোৰে শব্দ কৰে।
চোলাটোৰ উপৰি প্ৰদৰ্শনকাৰীসকলে একে ধৰণৰ পাতল কাপোৰেৰে তৈয়াৰী পেণ্ট বা লেগিংছ পিন্ধিব পাৰে। এই পেণ্টবোৰ সাধাৰণতে ঢিলা হয় যাতে নৃত্যশিল্পীজনে নাচি থকাৰ সময়ত সহজতে লৰচৰ কৰিব পাৰে। পেণ্টবোৰতো এম্ব্ৰইডাৰী বা অন্যান্য কাৰুকাৰ্য থাকিব পাৰে।
নৃত্যশিল্পীসকলে পিন্ধা জোতা সাধাৰণতে সৰল আৰু কাৰ্যক্ষম হয়। তেওঁলোকে চেণ্ডেল বা পাতল জোতা পিন্ধিব পাৰে যাৰ সহায়ত মজিয়া বা অন্যান্য ঠাইত সহজতে খোজ দিব পাৰি।
এই নৃত্য নিজেই এক ধৰ্মীয় অনুষ্ঠানমূলক প্ৰদৰ্শন, য’ত নৃত্যশিল্পীসকলে হৰিণাৰ গতি-বিধিৰ অনুকৰণ কৰি এক নিৰ্দিষ্ট শৈলীৰে লৰচৰ কৰে। এই নৃত্য প্ৰায়ে দলীয়ভাৱে পৰিৱেশন কৰা হয়, য’ত প্ৰতিগৰাকী নৃত্যশিল্পীয়ে প্ৰাকৃতিক জগতৰ একো একোটা দিশ যেনে সূৰ্য, চন্দ্ৰ বা তৰাক প্ৰতিনিধিত্ব কৰে। মাৰাকাছ, ঢোল আৰু বাঁহীৰ দৰে বাদ্যযন্ত্ৰৰে পৰিৱেশন কৰা পৰম্পৰাগত সংগীতৰ তালে তালে এই নৃত্য পৰিৱেশন কৰা হয়।[2]
আধুনিক ব্যাখ্যা
[সম্পাদনা কৰক]বৰ্তমান সময়তো মায়ান হৰিণা নৃত্য মায়ান সংস্কৃতি আৰু পৰম্পৰাৰ এক গুৰুত্বপূৰ্ণ অংশ হৈ আছে আৰু বিভিন্ন উৎসৱ, ধৰ্মীয় অনুষ্ঠান তথা অন্যান্য গুৰুত্বপূৰ্ণ অনুষ্ঠানত ই পৰিৱেশন কৰা হয়। শেহতীয়া বছৰবোৰত এই নৃত্যক আধুনিক কলা আৰু প্ৰদৰ্শনৰ লগতো জড়িত কৰা হৈছে। সমসাময়িক শিল্পীসকলে পৰিচয়, পৰম্পৰা আৰু আধ্যাত্মিকতাৰ দৰে বিষয়সমূহ অন্বেষণ কৰাৰ মাধ্যম হিচাপে এই নৃত্যক ব্যৱহাৰ কৰিছে।
এগৰাকী তেনে শিল্পী হ’ল এঞ্জেলিকা চিনচিলা, যি এগৰাকী গুৱাটেমালান-আমেৰিকান শিল্পী। তেওঁ মায়ান হৰিণা নৃত্যৰদ্বাৰা অনুপ্ৰাণিত হৈ এলানি মাল্টিমিডিয়া ইনষ্টলেচন সৃষ্টি কৰিছে। চিনচিলাৰ কামে পৰম্পৰাগত মায়ান সংস্কৃতি সমসাময়িক জীৱনৰ সৈতে কেনেদৰে একত্ৰিত হয় তাক অন্বেষণ কৰে। তেওঁ খিলঞ্জীয়া লোক আৰু তেওঁলোকৰ সংস্কৃতিক লৈ থকা পুৰণি ধাৰণা তথা ভুল ধাৰণাবোৰক প্ৰত্যাহ্বান জনাবলৈ চেষ্টা কৰিছে। চিনচিলাৰ এই সৃষ্টিসমূহত প্ৰদৰ্শন, ভাস্কৰ্য আৰু ভিডিঅ’ৰ উপাদানসমূহ অন্তৰ্ভুক্ত কৰা হৈছে, যাৰ জৰিয়তে কলাত্মক প্ৰকাশৰ পৰম্পৰাগত আৰু সমসাময়িক ৰূপৰ মাজত এক সংলাপ সৃষ্টি কৰিবলৈ চেষ্টা কৰা হৈছে।[3]
মায়ান হৰিণা নৃত্যৰ আধুনিক ব্যাখ্যাৰ আন এটা উদাহৰণ হ’ল গুৱাটেমালান শিল্পী কাৰ্লোছ মেৰিডাৰ কৰ্মৰাজি। মেৰিডা ২০ শতিকাৰ আৰম্ভণিৰ মেক্সিকান মুৰালিষ্ট আন্দোলনৰ এজন বিশিষ্ট ব্যক্তি আছিল আৰু মায়ান সংস্কৃতি তথা পৰম্পৰাৰ ৰঙীন আৰু গতিশীল চিত্ৰণৰ বাবে তেওঁ পৰিচিত আছিল। তেওঁৰ আটাইতকৈ বিখ্যাত কামবোৰৰ ভিতৰত অন্যতম "দ্য মেজিক ৱৰ্ল্ড অৱ দ্য মায়াছ" নামৰ দেৱালচিত্ৰখনত মায়ান হৰিণা নৃত্যৰ লগতে অন্যান্য পৰম্পৰাগত মায়ান ৰীতি-নীতি আৰু অনুষ্ঠানৰ দৃশ্য অংকন কৰা হৈছে।[4]
তথ্যসূত্ৰ
[সম্পাদনা কৰক]- ↑ "Mayan Deer Dance: A Traditional Guatemalan Ritual." Mayan Discovery Tours, 28 May 2018". https://mayandiscovery.com/mayan-deer-dance-a-traditional-guatemalan-ritual/.
- ↑ "Mayan Deer Dance: A Celebration of Life and the Natural World." Mimoa Travel, 22 Aug. 2020". https://mimoa.eu/blog/mayan-deer-dance-a-celebration-of-life-and-the-natural-world/.[সংযোগবিহীন উৎস]
- ↑ Chinchilla, Angelica. ""Angelica Chinchilla." The Granary Art Center". https://granaryarts.org/angelica-chinchilla.[সংযোগবিহীন উৎস]
- ↑ Mérida, Carlos. ""Carlos Mérida: The Magic World of the Mayas." National Museum of Mexican Art". https://nationalmuseumofmexicanart.org/exhibition/carlos-merida-magic-world-mayas..[সংযোগবিহীন উৎস]