മലയാളം: കേരളത്തിൽ വളരെക്കാലം മുൻപ് തന്നെ പ്രചാരത്തിലുണ്ടായിരുന്ന ഒരു പ്രത്യേകതരം വിളക്കാണ് നിലവിളക്ക്. നൂലുകൊണ്ട് തിരികളുണ്ടാക്കി എണ്ണയൊഴിച്ച് തെളിയിക്കുന്ന ഭാഗം ഒരു നിലപോലെ കാണുന്നതുകൊണ്ടാകാം നിലവിളക്കെന്ന പേര് വന്നത്. പല നിലകളിലായി തിരികൾ തെളിയിക്കുന്ന ഭാഗം ഉണ്ടാകാറുണ്ട്. അതുകൊണ്ടാണ് നിലവിളക്കെന്ന് വിളിക്കപ്പെട്ടതെന്നും പറയപ്പെടുന്നു.

നിലവിളക്ക് കേരളീയ സംസ്കാരത്തിന്റെ ഭാഗമായതിനാൽ ഇപ്പോൾ സർവ്വസാധാരണയായി പൊതു ചടങ്ങുകളും മറ്റും നിലവിളക്ക് കൊളുത്തിയാണ് ആരംഭിക്കുന്നത്. ചിലപ്പോൾ നിലവിളക്ക് കൊളുത്തി ഉത്ഘാടനവും നടത്താറുണ്ട്.

ഹിന്ദുമത വിശ്വാസികൾ വീടുകളിലും ക്ഷേത്രങ്ങളിലും പ്രാർത്ഥന / ആരാധനയുടെ ഭാഗമായി വ്യാപകമായി ഈ വിളക്ക് ഉപയോഗിക്കാറുണ്ട്. ഹൈന്ദവ വിശ്വാസപ്രകാരം നിലവിളക്ക് കൊളുത്തുന്നതിനും ഉപയോഗിക്കുന്നതിനും ചില പ്രത്യേക ചിട്ടകൾ പരിപാലിക്കാറുണ്ട്.

കേരളത്തിൽ സർവ്വസാധാരണയായി കണ്ടുവരുന്ന നിലവിളക്ക് അതേ മാതൃകയിലും ചിലപ്പോൾ നിലവിളക്കിന്റെ മുകൾ ഭാഗം കുരിശിന്റെ ആകൃതിയിൽ രൂപമാറ്റം വരുത്തിയും, മറ്റു ചിലപ്പോൾ അതിനുമുകളിൽ പ്രാവിന്റെ രൂപവും ചേർത്ത് കൃസ്ത്യൻ പള്ളികളിലും വീടുകളിലും നിലവിളക്ക് ഉപയോഗിക്കാറുണ്ട്. ഇപ്പോൾ പലയിടങ്ങളിലും നിലവിളക്കിൽ എണ്ണയൊഴിക്കുന്നതും വിവാഹം പോലെയുള്ള അവസരങ്ങളിൽ വധുവരന്മാർ നിലവിളക്ക് കൊളുത്തുന്നതും ആചാരമായി കണ്ടുവരുന്നു.

കേരളത്തിലെ ഒരു കൃസ്ത്യൻ പള്ളിയിൽ ഉപയോഗിക്കുന്ന നിലവിളക്കിന്റെ മാതൃകയാണിവിടെ ചേർത്തിരിക്കുന്നത്.