জগদ্দিপেন্দ্ৰ নাৰায়ণ

জগদ্দিপেন্দ্ৰ নাৰায়ণ(১৯১৫ চনৰ ১৫ ডিচেম্বৰ – ১৯৭০ চনৰ ১১ এপ্ৰিল) ভাৰতৰ কোচবিহাৰৰ মহাৰাজ আছিল। দ্বিতীয় বিশ্বযুদ্ধৰ সময়ত তেওঁ ব্ৰিটিছ বাহিনীত সেৱা আগবঢ়াই ১৯৪৯ চনত ভাৰত চৰকাৰক সম্পূৰ্ণ শাসক ক্ষমতা প্ৰদান কৰে।

প্ৰাৰম্ভিক জীৱন

কোচবিহাৰ প্ৰাসাদত কোচবিহাৰৰ মহাৰাজ মহাৰাজ জিতেন্দ্ৰ নাৰায়ণ ভূপ বাহাদুৰ আৰু পত্নী মহাৰাণী ইন্দিৰা দেৱীৰ জ্যেষ্ঠ পুত্ৰ হিচাপে জন্মগ্ৰহণ কৰিছিল। তেওঁ অনানুষ্ঠানিকভাৱে 'ভাইয়া' নামেৰে জনাজাত আছিল আৰু তেওঁ গায়ত্ৰী দেৱীৰ ভাতৃ আছিল।^[1]

তেওঁ কেম্ব্ৰিজৰ ইষ্টবৰ্ণৰ ছেইণ্ট চাইপ্ৰিয়ান স্কুল, হেৰ’ এণ্ড ট্ৰিনিটি কলেজ আৰু ডেৰাডুনৰ প্ৰিন্স অৱ ৱেলছ ৰয়েল ইণ্ডিয়ান মিলিটাৰী কলেজত অধ্যয়ন কৰে। ১৯২২ চনৰ ২০ ডিচেম্বৰত পিতৃৰ মৃত্যুৰ পিছত তেওঁ কুচ বেহাৰৰ সাত বছৰ বয়সত মহাৰাজ হয় আৰু ১৯২২ চনৰ ২৪ ডিচেম্বৰত সিংহাসনত আৰোহণ কৰে। তেওঁৰ ঘনিষ্ঠ আত্মীয়সকলে জয়পুৰ, বৰোদা, দেৱাছ, কোটা, এলাহাবাদ আৰু কলিকতাত থাকিছিল।

ব্যক্তিগত জীৱন

১৯৪৯ চনত কোচবিহাৰত তেওঁৰ প্ৰথম বিবাহ ব্যক্তিগতভাৱে নিউয়ৰ্কৰ নেন্সি ভেলেণ্টাইনৰ সৈতে হয়, যিগৰাকী পূৰ্বে পৰ্দাৰ অভিনেত্ৰী আছিল।^[2]^[3] ১৯৫৬ চনত লণ্ডনত তেওঁৰ দ্বিতীয় বিবাহ ব্যক্তিগতভাৱে কেম্ব্ৰিজ বিশ্ববিদ্যালয়ত অধ্যয়ন কৰা জৰ্জিয়ানা মে ইগানৰ সৈতে হয়। এই বিবাহ ১৯৬০ চনত ৰাজহুৱা হয় আৰু ১৯৬০ চনৰ জানুৱাৰী মাহত তেওঁৰ পত্নীক 'হাৰ হাইনেছ' উপাধি প্ৰদান কৰা হয়। ১৯৮০ চনৰ পিছত স্পেইনত বসতি স্থাপন কৰে মহাৰাণী জিনা নাৰায়ণে।২০১৩ চনত তাতেই তেওঁৰ মৃত্যু হয়।^[4]^[5]

সামৰিক কৰ্মজীৱন

তেওঁ দ্বিতীয় বিশ্বযুদ্ধৰ সময়ত উত্তৰ আফ্ৰিকা, অসম, বাৰ্মা, দক্ষিণ-পূব এছিয়াত ব্ৰিটিছ ভাৰতীয় সেনাবাহিনীৰ সৈতে সেৱা আগবঢ়াইছিল। ১৯৪৫ চনত ছিংগাপুৰত জাপানৰ আত্মসমৰ্পণৰ সময়ত তেওঁ উপস্থিত আছিল।১৯৪৩ চনৰ পৰা ১৯৪৯ চনলৈকে কুচবিহাৰ সামৰিক বাহিনীৰ মুখ্য অধিনায়ক, আৰু জয়পুৰ ৰাজ্যিক বাহিনীৰ ১ম কোচবিহাৰ পদাতিক বাহিনী আৰু ৰাজেন্দ্ৰ হাজাৰী গাৰ্ডৰ কৰ্ণেল ইন চিফ আছিল।

ৰাজনৈতিক কৰ্মজীৱন

তেওঁ চেম্বাৰ অৱ প্ৰিন্সেছ (নৰেন্দ্ৰ মণ্ডল)ৰ স্থায়ী সমিতিৰ সদস্য আছিল।

১৯৪৭ চনৰ আগষ্ট মাহত তেওঁ ডমিনিয়ন অৱ ইণ্ডিয়া যোগদানৰ চুক্তিপত্ৰত স্বাক্ষৰ কৰে আৰু ১৯৪৯ চনৰ ১২ ছেপ্টেম্বৰত ভাৰত চৰকাৰক সম্পূৰ্ণ শাসক ক্ষমতা প্ৰদান কৰে, ১৯৫০ চনৰ ১ জানুৱাৰীত তেওঁৰ ৰাজ্য পশ্চিম বংগৰ সৈতে একত্ৰীকৰণৰ তদাৰক কৰে।

কলকাতাত তেওঁৰ মৃত্যু হয় আৰু তেওঁৰ পিছত তেওঁৰ ভতিজা বিজেন্দ্ৰ নাৰায়ণক পুত্ৰ হিচাপে দত্তক লয়।