জম্মু এণ্ড কাশ্মীৰ একাডেমী অৱ আৰ্ট, কালচাৰ এণ্ড লেংগুৱেজ

জম্মু এণ্ড কাশ্মীৰ একাডেমী অৱ আৰ্ট, কালচাৰ এণ্ড লেংগুৱেজ
চমু  নাম	JKAACL
প্ৰতিষ্ঠা	১৯৫৮ (1958)
প্ৰধান  কাৰ্যালয়	কেনেল ৰোড, জম্মু – লালমণ্ডি, শ্ৰীনগৰ
অঞ্চল	জম্মু আৰু শ্ৰীনগৰ, ভাৰত
সেৱা  ক্ষেত্ৰ	ভাৰত
ৱেবছাইট	art.uok.edu.in

জম্মু এণ্ড কাশ্মীৰ একাডেমী অৱ আৰ্ট, কালচাৰ এণ্ড লেংগুৱেজ (JKAACL) হৈছে জম্মু আৰু কাশ্মীৰৰ আঞ্চলিক ভাষা, কলা আৰু সংস্কৃতিৰ উন্নয়ন আৰু প্ৰচাৰৰ উদ্দেশ্যে গঠিত এটা সাংস্কৃতিক সংগঠন। এই একাডেমীখন জম্মু আৰু কাশ্মীৰ চৰকাৰৰ অধীনত পঞ্জীয়নভুক্ত এটা সমাজ।

একাডেমীখন ১৯৫৮ চনত জম্মু আৰু কাশ্মীৰৰ সংবিধানৰ ধাৰা ১৪৬ৰ অধীনত চৰকাৰৰ উদ্যোগত প্ৰতিষ্ঠা কৰা হৈছিল। ২০১৯ চনলৈকে ই এটা স্বায়ত্তশাসিত সংস্থা হিচাপে কাৰ্যনিৰ্বাহ কৰিছিল। পিছলৈ জম্মু আৰু কাশ্মীৰ ৰাজ্য পুনৰ্গঠন হৈ কেন্দ্ৰশাসিত অঞ্চল ৰূপে গঠিত হোৱাৰ পিছত একাডেমীখনৰ গাঁথনি আৰু পৰিচালনাত পৰিবৰ্তন আনা হয়।

২০২১ চনত একাডেমীখনক সমাজ পঞ্জীয়ন আইন, ১৮৬০ অনুসৰি আনুষ্ঠানিকভাৱে এটা “সমাজ” হিচাপে পঞ্জীয়ন কৰা হয়। এই পদক্ষেপৰ উদ্দেশ্য আছিল সংস্থাটোক অধিক স্বাধীনতা আৰু কাৰ্যক্ষমতা প্ৰদান কৰা। বৰ্তমান একাডেমীখন সাধাৰণ পৰিষদ, কেন্দ্ৰীয় সমিতি আৰু বিত্তীয় সমিতিৰ জৰিয়তে পৰিচালিত হয়।

এই সমাজৰ মুখ্য উদ্দেশ্যসমূহৰ ভিতৰত কলা আৰু সংস্কৃতি ক্ষেত্ৰত সহযোগিতা আৰু সাংস্কৃতিক আদান–প্ৰদান বৃদ্ধি কৰা, অনুবাদ কাৰ্য্য সম্পাদন কৰা, বিশ্বকোষসহ কলা আৰু সংস্কৃতি বিষয়ক গ্ৰন্থ প্ৰকাশ কৰা, আৰু বিভিন্ন সাংস্কৃতিক অনুষ্ঠান, সন্মান আৰু বঁটা প্ৰদান কৰা অন্তৰ্ভুক্ত।

মুখ্য ব্যক্তিত্ব

একাডেমীখনৰ বিকাশত উল্লেখযোগ্য ভূমিকা লোৱা ব্যক্তিসকলৰ ভিতৰত মহম্মদ ইউছুফ টাইং, বলৱন্ত ঠাকুৰ, জাভেইদ ৰাহী আৰু জাফৰ ইকবাল মানহাছ অন্যতম।

কাৰ্যক্ষেত্ৰ

একাডেমীখনৰ কাৰ্যক্ষেত্ৰ সমগ্ৰ জম্মু আৰু কাশ্মীৰ জুৰি বিস্তৃত। ই কেন্দ্ৰীয় আৰু অন্যান্য ৰাজ্যিক একাডেমীসমূহৰ সৈতে সমন্বয় আৰু সহযোগিতাৰ বাবে মুখ্য সংস্থা হিচাপে কাম কৰে। একাডেমীৰ কাৰ্যকলাপৰ ক্ষেত্ৰসমূহ হ’ল—

1. ভাষা আৰু সাহিত্য
2. সংগীত, নৃত্য, নাট্যকলাসহ পৰিবেশন কলা
3. দৃশ্য কলা, সৃজনশীল আৰু ফাইন আৰ্ট

একাডেমীখনৰ দুটা বিভাগীয় কাৰ্যালয় আছে—এটা জম্মু প্ৰদেশত আৰু আনটো কাশ্মীৰ প্ৰদেশত। এই কাৰ্যালয়সমূহে অঞ্চলটোৰ বহুভাষিক আৰু সাংস্কৃতিক ঐতিহ্য সংৰক্ষণ আৰু প্ৰচাৰত গুৰুত্বপূৰ্ণ ভূমিকা পালন কৰে।

জম্মু বিভাগীয় কাৰ্যালয়ে হিন্দী, ডোগ্ৰী, গুজৰি, পঞ্জাবী আৰু ভাদৰৱাহী ভাষাৰ উন্নয়নত গুৰুত্ব দিয়ে। কাশ্মীৰ বিভাগীয় কাৰ্যালয়ে উৰ্দু, কাশ্মীৰী, পাহাৰী, ইংৰাজী আৰু শিনা ভাষাৰ উন্নয়নত মনোনিৱেশ কৰে।

অৱস্থান আৰু পৰিচালনা

একাডেমীখনৰ মুখ্য কাৰ্যালয় কেনেল ৰোড, জম্মুত অৱস্থিত। ইয়াৰ উপকাৰ্যালয়সমূহ শ্ৰীনগৰ, ৰাজৌৰি, কাঠুৱা আৰু ডোডাত অৱস্থিত।