জাভোখিৰ সিন্দাৰভ

জাভোখিৰ সিন্দাৰভ
সিন্দাৰভ, 2024
দেশ	উজবেকিস্তান
জন্ম	০৮ ডিচেম্বৰ, ২০০৫ (২০ বছৰ) তাছকেণ্ট, উজবেকিস্তান
খিতাপ	গ্ৰেণ্ডমাষ্টাৰ (2018)
ফিডে ৰেটিং	2700 (ফেব্ৰুৱাৰী 2025)
শীৰ্ষ ৰেটিং	2745 (March 2026)
ৰেংকিং	No. 31 (ফেব্ৰুৱাৰী 2025)
শীৰ্ষ ৰেংকিং	No. 11 (April 2026)

জাভোখিৰ সিন্দাৰভ (জন্ম: ৮ ডিচেম্বৰ ২০০৫) উজবেকিস্তানৰ এজন দবা গ্ৰেণ্ডমাষ্টাৰ আৰু দুবাৰ ৰাষ্ট্ৰীয় চেম্পিয়ন। এজন অসাধাৰণ দবা প্ৰতিভা হিচাপে তেওঁ মাত্ৰ ১২ বছৰ ১০ মাহ ৮ দিন বয়সত গ্ৰেণ্ডমাষ্টাৰ উপাধি লাভ কৰে। তেওঁ ৪৪তম দবা অলিম্পিয়াডত বিজয় সাব্যস্ত কৰা উজবেকিস্তান দলৰ সদস্য আছিল । ২০২৬ চনৰ প্ৰাৰ্থী নিৰ্বাচনৰ বাবে আয়োজিত টুৰ্ণামেণ্টত জয়ী হৈ তেওঁ বিশ্ব চেম্পিয়নৰ খিতাপৰ বাবে গুকেশ ডম্মাৰাজুৰ বিপক্ষে খেলাৰ যোগ্যতা অৰ্জন কৰে।

সিন্দাৰভৰ জন্ম হয় ২০০৫ চনৰ ৮ ডিচেম্বৰত উজবেকিস্তানৰ তাছকেণ্ট চহৰত ।

২০১০ দশক

জাভোখিৰ সিন্দাৰভে ২০১৭ চনৰ অক্টোবৰ মাহত ইণ্টাৰনেচনেল মাষ্টাৰ উপাধি লাভ কৰে। ২০১৮ চনৰ জুন মাহত অনুষ্ঠিত আলেখিন মেম’ৰিয়েল প্ৰতিযোগিতাত তেওঁ প্ৰথম গ্ৰেণ্ডমাষ্টাৰ (GM) নৰ্ম অৰ্জন কৰে। সেই বছৰৰ ছেপ্টেম্বৰ মাহত অনুষ্ঠিত ৱৰ্ল্ড জুনিয়ৰ দবা চেম্পিয়নশ্বিপত তেওঁ দ্বিতীয় নৰ্ম লাভ কৰে, আৰু ইয়াৰ ফলত তেওঁৰ ৰেটিং ২৫০০লৈ উন্নীত হয়।

২০১৮ চনৰ অক্টোবৰ মাহত ফাৰ্ষ্ট ছেটাৰডে টুৰ্নামেণ্টত তৃতীয় জিএম নৰ্ম লাভ কৰি তেওঁ সেই সময়ত ইতিহাসৰ দ্বিতীয় সৰ্বকনিষ্ঠ গ্ৰেণ্ডমাষ্টাৰ হৈ পৰে। পিছত ২০১৯ চনৰ মাৰ্চ মাহত FIDE-এ তেওঁক আনুষ্ঠানিকভাৱে গ্ৰেণ্ডমাষ্টাৰ উপাধি প্ৰদান কৰে।

২০২০ দশক

সিন্দাৰভে ২০২১ চনৰ দবা বিশ্ব কাপত অংশগ্ৰহণৰ যোগ্যতা অৰ্জন কৰে। ১২১ নম্বৰ স্থানত থাকিও তেওঁ দ্বিতীয় ৰাউণ্ডত টাইব্ৰেকত ৮ম স্থানধাৰী আলিৰেজা ফিৰৌজাক পৰাস্ত কৰি এক ডাঙৰ চমক সৃষ্টি কৰে। তেওঁ শেষৰ ৩২জনৰ মাজত স্থান লাভ কৰে যদিও চতুৰ্থ ৰাউণ্ডত কাচপাৰ পিওৰুণৰ হাতত পৰাজিত হয়।

২০২৩ চনৰ দবা বিশ্ব কাপত তেওঁ পুনৰ এক ডাঙৰ চমক দেখুৱাই তৃতীয় ৰাউণ্ডত ১০ম স্থানধাৰী মেক্সিম ভাচিয়ে-লাগ্ৰাভক পৰাস্ত কৰে। তাৰ পিছত তেওঁ অৰ্জুন এৰিগাইচিৰ হাতত পৰাজিত হয়।

২০২৩ চনৰ অক্টোবৰ মাহত অনুষ্ঠিত এছিয়ান গেমছত সিন্দাৰভে অংশগ্ৰহণ কৰে। ব্যক্তিগত শাখাত তেওঁ ব্ৰঞ্জ পদক লাভ কৰে আৰু দলীয় প্ৰতিযোগিতাত উজবেকিস্তানৰ হৈ দ্বিতীয় ব’ৰ্ডত খেলি ৮খন খেলত ৬ পইণ্ট সংগ্ৰহ কৰে। দলটোৱে ভাৰত আৰু ইৰানৰ পিছত ব্ৰঞ্জ পদক লাভ কৰে। ইয়াৰ পিছত তেওঁ কাতাৰ মাস্টাৰ্ছ ওপেন টুৰ্নামেণ্টত অংশগ্ৰহণ কৰি ৯খন খেলত ৬.৫ পইণ্ট লাভ কৰে আৰু অপৰাজিত হৈ ৰয় ; এই দুখন টুৰ্নামেণ্টৰ পৰা তেওঁ ২২ ৰেটিং পইণ্ট লাভ কৰে। নবেম্বৰ মাহত সিন্দাৰভে ফিদে গ্ৰেণ্ড ছুইছ টুৰ্নামেণ্ট ২০২৩ত অংশগ্ৰহণ কৰি ৭/১১ স্কোৰেৰে অষ্টম স্থান লাভ কৰে। সপ্তম ৰাউণ্ডলৈকে তেওঁ শীৰ্ষত আছিল, কিন্তু শেষত বিজয়ী হোৱা বিদিত গুজৰাথীৰ হাতত পৰাজিত হয়—এইটোৱেই আছিল তেওঁৰ একমাত্ৰ পৰাজয়। তথাপিও তেওঁ চাৰিখন খেল জয় কৰে, যাৰ ভিতৰত এখন জয় আছিল প্ৰাক্তন বিশ্ব নম্বৰ দুই লেভন আৰোনিয়ানৰ বিৰুদ্ধে। এই টুৰ্নামেণ্টৰ পিছত সিন্দাৰভে নিজৰ জীৱনত প্ৰথমবাৰৰ বাবে ২৭০০ ইল' ৰেটিং অতিক্ৰম কৰে। ২০২৪ চনৰ জুন মাহত তেওঁ UzChess Cup Mastersত অংশগ্ৰহণ কৰি সামগ্ৰিকভাৱে পঞ্চম স্থান লাভ কৰে, আৰু সহদেশীয় তথা বিশ্বৰ পঞ্চম স্থানধাৰী নদিৰবেক আব্দুসাত্তোৰভৰ বিৰুদ্ধে এক উল্লেখযোগ্য জয় লাভ কৰে।

২০২৫ চনৰ দবা বিশ্ব কাপত ১৬ নম্বৰ স্থানৰ খেলুৱৈ হিচাপে অংশগ্ৰহণ কৰি সিন্দাৰভে ইউ ইয়াংই, ফ্ৰেডেৰিক সভানে আৰু জোছে মাৰ্টিনেজ আলকান্তাৰা আদি খেলুৱৈক পৰাস্ত কৰি ছেমিফাইনেলত প্ৰৱেশ কৰে আৰু স্বদেশৰ নদিৰবেক ইয়াকুব্বোৱেভৰ সমুখীন হয়। টাইব্ৰেকত জয়ী হৈ তেওঁ ফাইনেলত ৱেই ইৰ বিৰুদ্ধে খেলিবলৈ আগবাঢ়ে আৰু লগতে ২০২৬ চনৰ কেণ্ডিডেটছ টুৰ্ণামেণ্টৰ বাবে যোগ্যতা অৰ্জন কৰে। ফাইনেলত তেওঁ প্ৰথম দুটা ক্লাছিকেল খেল ড্ৰ কৰে, লগতে টাইব্ৰেকৰ প্ৰথম খেলো ড্ৰ হয়। কিন্তু দ্বিতীয় টাইব্ৰেক খেলত ৱেই ইক পৰাস্ত কৰি তেওঁ ১৯ বছৰ ১১ মাহ ১৮ দিন বয়সত ইতিহাসৰ প্ৰথম উজবেক আৰু সৰ্বকনিষ্ঠ বিশ্ব কাপ বিজয়ী হয়।

কেণ্ডিডেটছ টুৰ্নামেণ্ট ২০২৬

এই টুৰ্নামেণ্টত সিন্দাৰভে অসাধাৰণ প্ৰদৰ্শন কৰি অপৰাজিতভাৱে ১৩ ৰাউণ্ডত ৯.৫ পইণ্ট সংগ্ৰহ কৰে আৰু এটা ৰাউণ্ড বাকী থাকোঁতেই জয় নিশ্চিত কৰে। ইয়াৰ ফলত তেওঁ গুকেশ ডম্মাৰাজুৰ বিৰুদ্ধে বিশ্ব দবা চেম্পিয়নশ্বিপৰ খিতাপৰ বাবে প্ৰতিদ্বন্দ্বিতা কৰাৰ অধিকাৰ লাভ কৰে।