জিবা চিৰাজী
জিবা চিৰাজী (ইংৰাজী: Ziba Shirazi) এগৰাকী ইৰাণী-আমেৰিকান লেখিকা, কবি, কণ্ঠশিল্পী, গীতিকাৰ, গল্পকাৰ আৰু ছদ্মনামধাৰী লেখিকা। এগৰাকী কবি আৰু সংগীত শিল্পী হিচাপে তেওঁ নিজৰ মৰ্মস্পৰ্শী গীত আৰু কবিতাৰ জৰিয়তে কৰা কাহিনী কথনৰ বাবে বিশেষভাৱে পৰিচিত। চিৰাজীৰ সংগীত ৰচনাসমূহত ফাৰ্চী সুৰৰ সৈতে বিশ্ব সংগীত আৰু জাজ সংগীতৰ সংমিশ্ৰণ দেখিবলৈ পোৱা যায়।[1]
প্ৰাৰম্ভিক জীৱন আৰু শিক্ষা
[সম্পাদনা কৰক]চিৰাজী ডাঙৰ-দীঘল হৈছিল ইৰানত, য’ত তেওঁ সংগীতজ্ঞ আৰু সংগীতপ্ৰেমী পৰিয়াল এটাৰ মাজত সংগীতৰ পৰিৱেশত ডাঙৰ হৈছিল। তেওঁ ১৫ বছৰ বয়সৰ পৰাই কবিতা লিখিবলৈ আৰম্ভ কৰে আৰু এদিন এগৰাকী কণ্ঠশিল্পী বা পৰিৱেশক হোৱাৰ সপোন দেখিছিল। কিশোৰ অৱস্থাত তেওঁ তেহৰানৰ চিনেমা হলসমূহত প্ৰদৰ্শিত হোৱা আমেৰিকান মিউজিকেল মাই ফেয়াৰ লেডী আৰু ফিডলাৰ অন দি ৰুফৰ প্ৰতি আকৰ্ষিত হৈছিল। পৰৱৰ্তী সময়ত ব্ৰডৱে মিউজিকেলসমূহ তেওঁৰ বাবে অনুপ্ৰেৰণাৰ এক ডাঙৰ উৎস হৈ পৰে।[1]
১৯৮৫ চনত চিৰাজীয়ে ইৰান এৰি আমেৰিকা যুক্তৰাষ্ট্ৰলৈ যায়। তাত তেওঁ ১৯৯১ চনত তেওঁৰ সাতটা এলবামৰ প্ৰথমটো এলবাম ৰেড এপল প্ৰযোজনা আৰু প্ৰচাৰ কৰে। অপৰম্পৰাগত গীতিকথা আৰু সুৰৰ বাবে ইৰানী সংগীত প্ৰযোজকসকলে নাকচ কৰা এই এলবামটো মুকলিৰ কিছু সময়ৰ পিছতে বিশেষ ভাৱে সফল হৈ পৰে।[2]
কৰ্মজীৱন
[সম্পাদনা কৰক]ইৰানী সমাজত নাৰীৰ কণ্ঠ হিচাপে পৰিচিত চিৰাজীৰ গীতৰ কথাবোৰত তীব্ৰ নাৰীবাদী সুৰ, প্ৰেম, কৰুণা আৰু সাৰ্বজনীন মানৱীয় কাহিনী প্ৰতিফলিত হয়। তেওঁৰ মতে, "মই এগৰাকী নিৰ্লজ্জ ৰোমাণ্টিক আৰু নিৰ্লজ্জভাৱে এগৰাকী নাৰী। মই দেখা সৌন্দৰ্য প্ৰচুৰ, আনন্দময় আৰু সদায় প্ৰেম, হেঁপাহ তথা অনুভূতিৰে ভৰা, কিয়নো এইবোৰেই মোৰ মুক্তি।"[উদ্ধৃতিৰ প্ৰয়োজন]
চিলিয়ান-আমেৰিকান জাজ পিয়ানোবাদক জোচে-মিগেল য়ামালৰ সৈতে তেওঁ কৰা সহযোগিতাই তেওঁৰ সংগীত পৰিৱেশনত জাজ আৰু লেটিন সংগীতৰ প্ৰভাৱ গভীৰ কৰি তোলে। ২০০৬ চনৰ পৰা এই দুয়োগৰাকীয়ে বিশ্বজুৰি একেলগে অনুষ্ঠান পৰিৱেশন কৰি আহিছে। চিবিচি ৰেডিঅ’ৰ মেথিউ ক্ৰচিয়াৰে কৈছিল, "আপুনি তেওঁৰ পৰা নিখুঁত কণ্ঠ আৰু এটা শীৰ্ষ পৰ্যায়ৰ বেণ্ড আশা কৰিব পাৰে।"[উদ্ধৃতিৰ প্ৰয়োজন] ২০০৯ চনত চিৰাজীয়ে ষ্টৰী এণ্ড চং নামৰ এটা গীতৰ মাধ্যমেৰে কাহিনী কোৱা অনুষ্ঠানৰ সৃষ্টি কৰে। ইয়াত লাইভ মিউজিক আৰু ভিডিঅ’ প্ৰজেকচনৰ সহায়ত ইৰানী প্ৰব্ৰজনকাৰীসকলৰ কাহিনী আৰু ইছলামিক বিপ্লৱৰ পিছৰ পৰা তেওঁলোকৰ সংগ্ৰামসমূহ দেখুওৱা হৈছিল। এই প্ৰকল্পটো লছ এঞ্জেলছৰ কেলিফৰ্ণিয়া ষ্টেট ইউনিভাৰ্চিটীত পৰিৱেশন আৰু যোগাযোগ বিষয়ত জিবাৰ স্নাতকোত্তৰ ডিগ্ৰীৰ গৱেষণা পত্ৰৰ বিষয়ো আছিল। এই অনুষ্ঠানটো আমেৰিকা আৰু কানাডাত প্ৰদৰ্শন কৰা হৈছে।[3][4]
কামৰান আফায়ৰ সৈতে মিলি জিবাৰ এই গৱেষণা পত্ৰখন ২০২০ চনত ৰোমেন এণ্ড লিটলফিল্ডে ইৰানিয়ান ডায়েচপ’ৰ আইডেণ্টিটিজ: ষ্টৰীজ এণ্ড চংছ নামেৰে এখন কিতাপ হিচাপে প্ৰকাশ কৰে। কিতাপখনত ২০০৯-২০১৯ চনৰ ভিতৰত চিৰাজীয়ে থিয়েটাৰ, লাইব্ৰেৰী, বিশ্ববিদ্যালয়ৰ চৌহদ আৰু অন্যান্য স্থানত পৰিৱেশন কৰা ১৮টা প্ৰব্ৰজন যাত্ৰাৰ কাহিনী আৰু একক অভিনয় অন্তৰ্ভুক্ত কৰা হৈছে। কাহিনীসমূহক দুটা অধ্যায়ত প্ৰসংগবদ্ধ কৰা হৈছে য’ত ইৰানী প্ৰব্ৰজনকাৰীসকলৰ সমসাময়িক সাহিত্য আৰু পৰিৱেশনৰ সৈতে ইয়াক তুলনা কৰা হৈছে। লগতে এটা সামাজিক নাটকৰ আৰ্হিৰ ওপৰত ভিত্তি কৰি কাহিনীসমূহৰ কিছুমান বিষয়বস্তু বিশ্লেষণ কৰা হৈছে।[3]
২০১৪ চনত চিৰাজীয়ে লছ এঞ্জেলছ কাউণ্টি মিউজিয়াম অৱ আৰ্টত তেওঁৰ প্ৰথমটো মিউজিকেল প্ৰযোজনা স্প্ৰিং লাভ মঞ্চস্থ কৰে। স্প্ৰিং লাভত প্ৰথম দেখাতেই প্ৰেমত পৰা তিনিটা প্ৰজন্মৰ কাহিনীৰ জৰিয়তে নৱৰুজৰ গতিশীল পৰম্পৰা উদযাপন কৰা হৈছে। ২০১৫ চনৰ ফেব্ৰুৱাৰী মাহত চ’কা পাৰফৰ্মিং আৰ্ট চেণ্টাৰত ইয়াৰ প্ৰথম মঞ্চ প্ৰদৰ্শন হৈছিল।[1]
ডিস্ক’গ্ৰাফী
[সম্পাদনা কৰক]তথ্যসূত্ৰ
[সম্পাদনা কৰক]- 1 2 3 "Meet Ziba Shirazi" (en ভাষাত). CanvasRebel. https://canvasrebel.com/meet-ziba-shirazi/.[সংযোগবিহীন উৎস]
- 1 2 3 4 5 6 7 8 9 10 "Ziba Shirazi" (en ভাষাত). Spotify. https://open.spotify.com/artist/2CMTv2W9mKOoDSBDcdyfse.
- 1 2 Shirazi, Ziba; Afary, Kamran (2020). Iranian Diaspora Identities: Stories and Songs. Rowman & Littlefield. ISBN 978-1793607880.
- ↑ "Ziba Shirazi" (en ভাষাত). Santa Monica College. https://www.smc.edu/directory/shirazi-ziba.php.