জেনেট মেককাৰ্ডি

জেনেট মেককাৰ্ডি
জেনেট মেককাৰ্ডি
	; ২০১২ চনৰ হল অৱ গেম এৱাৰ্ডত মেককাৰ্ডি
জন্ম	২৬ জুন, ১৯৯২ (৩৩ বছৰ); লং বিচ, কেলিফৰ্ণিয়া, আমেৰিকা যুক্তৰাষ্ট্ৰ
পেচা	লেখিকা, অভিনেত্ৰী, গায়িকা
সক্ৰিয় হৈ থকা সময়	২০০০–বৰ্তমান
	'সঙ্গীত যাত্ৰা'
সংগীতৰ ধৰণ	কাণ্ট্ৰী মিউজিক, কাণ্ট্ৰী পপ
বাদ্যযন্ত্ৰ	কণ্ঠ
লেবেল	কেপিটল নাশ্বভিল, ইএমআই
ৱেবছাইট
	jennettemccurdy.com

জেনেট মেককাৰ্ডি (জন্ম: ২৬ জুন, ১৯৯২) এগৰাকী আমেৰিকান লেখিকা আৰু প্ৰাক্তন অভিনেত্ৰী। নিকেলোডিয়ানৰ চিটকম 'আই কাৰ্লি' (২০০৭–২০১২)-ত চ্যাম পকেটৰ চৰিত্ৰত অভিনয় কৰি তেওঁ বিশেষ জনপ্ৰিয়তা অৰ্জন কৰে আৰু এই চৰিত্ৰটোৰ বাবে তেওঁ চাৰিটাকৈ নিকেলোডিয়ান কিডছ চয়েছ এৱাৰ্ড লাভ কৰে। নিকেলোডিয়ান ত্যাগ কৰাৰ আগতে তেওঁ 'চ্যাম এণ্ড কেট' (২০১৩–২০১৪) নামৰ ধাৰাবাহিকখনতো এই একেটা চৰিত্ৰতে অভিনয় কৰিছিল। ইয়াৰ উপৰি তেওঁ 'মেলকম ইন দা মিডল' (২০০৩–২০০৫), 'জোৱে ১০১' (২০০৫), 'লিংকন হাইটছ' (২০০৭), 'ট্ৰু জেকচন, ভি পি' (২০০৯–২০১০) আৰু 'ভিক্টোৰিয়াছ' (২০১২) আদি ধাৰাবাহিকত অভিনয় কৰিছে। তেওঁ 'হোটছ নেক্সট ফৰ ছাৰা?' (২০১৪) নামৰ ৱেব ছিৰিজটো প্ৰযোজনা আৰু ৰচনা কৰাৰ লগতে তাত অভিনয়ো কৰিছিল। ২০১৫-১৬ চনত তেওঁ বিজ্ঞান ভিত্তিক ধাৰাবাহিক 'বিটুইন'-ত মুখ্য চৰিত্ৰত অভিনয় কৰে।

মেককাৰ্ডিয়ে ২০০৯ চনত তেওঁৰ প্ৰথমটো একক গীত "সো ক্ল'জ" মুক্তি দিছিল। ২০১০ চনত তেওঁৰ প্ৰথমখন ই পি 'নট দ্যাট ফাৰ অ্যাৱে' মুক্তি পায় আৰু তাৰ পিছত ২০১২ চনত তেওঁৰ নামত এখন ই পি আৰু এখন ষ্টুডিঅ’ এলবাম মুক্তি পায়। তেওঁৰ একক গীত "জেনেৰেচন লাভ" বিলবোৰ্ডৰ হট কাণ্ট্ৰী চংছৰ ৪৪ নম্বৰ স্থানত আছিল।

২০১৮ চনত মেককাৰ্ডিয়ে লিখন আৰু পৰিচালনাৰ কেৰিয়াৰ গঢ়িবলৈ অভিনয় জগত ত্যাগ কৰে। ২০২২ চনত তেওঁ 'আই এম গ্লেড মাই মম ডাইড' নামৰ এখন স্মৃতিগ্ৰন্থ প্ৰকাশ কৰে। এই গ্ৰন্থখনে দ্ৰুতগতিত সৰ্বাধিক বিক্ৰী হোৱা কিতাপৰ তালিকাত শীৰ্ষ স্থান দখল কৰে। কিতাপখনত তেওঁ এগৰাকী শিশু তাৰকা হিচাপে সন্মুখীন হোৱা চাপ আৰু তেওঁৰ প্ৰয়াত মাতৃৰ দুৰ্ব্যৱহাৰৰ বিষয়ে কৰা বৰ্ণনাৰ বাবে সমালোচকৰ প্ৰশংসা লাভ কৰে। ২০২৫ চনত মেককাৰ্ডিয়ে এই স্মৃতিগ্ৰন্থখনক লৈ এখন টেলিভিছন ধাৰাবাহিক নিৰ্মাণৰ কাম আৰম্ভ কৰে। ২০২৬ চনত তেওঁৰ দ্বিতীয়খন কিতাপ তথা প্ৰথমখন উপন্যাস 'হাফ হিজ এজ' প্ৰকাশ পায়।

প্ৰাৰম্ভিক জীৱন আৰু শিক্ষা

মেককাৰ্ডিৰ জন্ম ১৯৯২ চনৰ ২৬ জুনত কেলিফৰ্ণিয়াৰ লং বিচৰ লং বিচ মেমৰিয়েল মেডিকেল চেণ্টাৰত হৈছিল। তেওঁ ওচৰৰে গাৰ্ডেন গ্ৰোভৰ এটা মধ্যবিত্ত পৰিয়ালত ডাঙৰ-দীঘল হৈছিল। তেওঁৰ পৰিয়ালটো 'দ্য চাৰ্চ অৱ জিচাছ ক্ৰাইষ্ট অৱ লেটাৰ-ডে চেইণ্টছ'ৰ সদস্য আছিল, যদিও প্ৰাপ্তবয়স্ক অৱস্থাত তেওঁ এই ধৰ্ম ত্যাগ কৰে। তেওঁৰ মাতৃ ডেব্ৰা মেককাৰ্ডিয়ে (১৯৫৭–২০১৩) তেওঁক আৰু তেওঁৰ তিনিগৰাকী জ্যেষ্ঠ ভাতৃক ঘৰতে পঢ়ুৱাইছিল। মেককাৰ্ডিয়ে তেওঁৰ শৈশৱৰ আটাইতকৈ পুৰণি স্মৃতিবোৰ মাতৃৰ কৰ্কট ৰোগৰ বাবে "অতি শোকাৱহ" বুলি বৰ্ণনা কৰিছে। মেককাৰ্ডিৰ ককাক-আইতাকো তেওঁলোকৰ পৰিয়ালৰ সৈতে একেলগে বাস কৰিছিল।

মেককাৰ্ডিৰ মাতৃৰ কৰ্কট ৰোগ ধৰা পৰাৰ পিছৰেপৰা তেওঁ 'কম্পালছিভ হৰ্ডাৰ' (বস্তু জমা কৰি থোৱা এক মানসিক অৱস্থা) হৈ পৰিছিল। মেককাৰ্ডিয়ে জনোৱা মতে তেওঁলোকৰ ঘৰখন অলাগতিয়াল বস্তুৰে ভৰি আছিল আৰু তেওঁৰ শোৱা কোঠাকে ধৰি ঘৰটোৰ প্ৰতিটো অংশ ইমানেই ভৰি আছিল যে তেওঁ আৰু তেওঁৰ ভাতৃসকলে ড্ৰয়িং ৰূমৰ মজিয়াতে শুব লগা হৈছিল।

মাৰ্ক মেককাৰ্ডি, ডেব্ৰাৰ স্বামী যাক মেককাৰ্ডিয়ে নিজৰ জৈৱিক পিতৃ বুলি বিশ্বাস কৰি ডাঙৰ হৈছিল, তেওঁ পৰিয়ালটোক পোহপাল দিবলৈ দুটাকৈ চাকৰি কৰিছিল। মাতৃৰ মৃত্যুৰ পাছতহে মেককাৰ্ডিয়ে জানিব পাৰে যে তেওঁ মাৰ্কৰ জৈৱিক সন্তান নাছিল।

ব্যক্তিগত জীৱন

সম্পৰ্ক

মেককাৰ্ডিয়ে ২০১৩ চনত আমেৰিকান বাস্কেটবল খেলুৱৈ আন্দ্ৰে ড্ৰামণ্ডৰ সৈতে ডেটিং কৰিছিল।^[2]

পিতৃ-মাতৃৰ সৈতে সম্পৰ্ক

মেককাৰ্ডিয়ে তেওঁৰ মাতৃৰ সৈতে থকা নিবিড় সম্পৰ্কক "নিৰ্যাতনমূলক" আৰু "মোৰ জীৱনৰ স্পন্দন" বুলি বৰ্ণনা কৰিছে।^[3] তেওঁৰ দুই-তিনি বছৰ বয়সতে মাতৃৰ স্তনৰ কৰ্কট ৰোগ ধৰা পৰিছিল আৰু ইয়াৰ বাবে তেওঁ কেইবাবাৰো অস্ত্ৰোপচাৰ, কেমোথেৰাপী আৰু অস্থি মজ্জা সংৰোপণ কৰিবলগীয়া হৈছিল। ২০১০ চনত তেওঁৰ মাতৃৰ কৰ্কট ৰোগ পুনৰ ঘূৰি আহে আৰু ২০১৩ চনত, যেতিয়া মেককাৰ্ডিৰ বয়স ২১ বছৰ আছিল, তেওঁৰ মাতৃৰ মৃত্যু হয়।

মেককাৰ্ডিয়ে প্ৰকাশ কৰিছে যে তেওঁ মাতৃৰদ্বাৰা মানসিক আৰু যৌন নিৰ্যাতনৰ বলি হৈছিল। 'পিপল' আলোচনীক দিয়া এক সাক্ষাৎকাৰত তেওঁ কৈছিল, "মোৰ মাকৰ আৱেগবোৰ ইমানেই অস্থিৰ আছিল যে প্ৰতিটো দিনেই যেন এখন তজবজীয়া ৰছীৰ ওপৰেৰে খোজ কঢ়াৰ দৰে আছিল।" মেককাৰ্ডিৰ মতে, তেওঁৰ মাতৃয়েই তেওঁক ছয় বছৰ বয়সতে অভিনয়ৰ পৃথিৱীখনলৈ ঠেলি দিছিল, যাতে তেওঁ পৰিয়ালটোক আৰ্থিকভাৱে সহায় কৰিব পাৰে আৰু লগতে তেওঁৰ মাতৃয়ে নিজেও এগৰাকী অভিনয় শিল্পী হ’বলৈ ইচ্ছা কৰিছিল। তেওঁ উল্লেখ কৰে যে তেওঁৰ মাতৃয়ে তেওঁক এগৰাকী তাৰকা বনাবলৈ "বলিয়া" হৈ পৰিছিল আৰু কেনেকৈ ১১ বছৰ বয়সতে তেওঁক কেলৰি নিয়ন্ত্ৰণৰ সৈতে পৰিচয় কৰাই দি তেওঁৰ খোৱা-বোৱাৰ বিকাৰ সৃষ্টিত ইন্ধন যোগাইছিল।

তেওঁ কৈছিল যে ১৭ বছৰ বয়স পৰ্যন্ত তেওঁৰ মাতৃয়ে তেওঁৰ শৰীৰৰ গোপন অংগসমূহ পৰীক্ষা কৰিছিল আৰু কেতিয়াও তেওঁক অকলে গা ধুবলৈ দিয়া নাছিল। মেককাৰ্ডিয়ে কৈছে যে তেওঁৰ কিতাপখনত "এই অংশটো লিখাটোৱেই আছিল আটাইতকৈ কঠিন কাম।" মেককাৰ্ডিয়ে জনোৱা মতে, তেওঁ 'আই কাৰ্লি'ৰ নতুন সংস্কৰণত অভিনয় কৰিবলৈ অস্বীকাৰ কৰিছিল কাৰণ ই তেওঁক পূৰ্বৰ ধাৰাবাহিকখনৰ সময়ত হোৱা মাতৃৰ নিৰ্যাতনৰ কথা মনত পেলাই দিয়ে। কেৱল মাতৃক সুখী কৰিবলৈহে তেওঁ 'চ্যাম এণ্ড কেট' ধাৰাবাহিকত অভিনয় কৰিছিল। মেককাৰ্ডিয়ে এক সাক্ষাৎকাৰত কয় যে শিশু শিল্পী হিচাপে কাম কৰা তেওঁৰ সকলো পাৰিশ্ৰমিক তেওঁ লাভ কৰা নাছিল কাৰণ তেওঁৰ 'কুগান একাউণ্ট'‌ সঠিকভাৱে পঞ্জীয়ন কৰা হোৱা নাছিল।

২০২২ চনৰ স্মৃতিগ্ৰন্থ 'আই এম গ্লেড মাই মম ডাইড'-ত মেককাৰ্ডিয়ে মাতৃৰ নিৰ্যাতনমূলক আৰু নিয়ন্ত্ৰণকাৰী প্ৰভাৱৰ বিষয়ে অধিক সবিস্তাৰে বৰ্ণনা কৰিছে। কিতাপখনৰ বেটুপাতত মেককাৰ্ডিক ওপৰলৈ চাই এটা গুলপীয়া কলহ (urn) ধৰি থকা দেখা গৈছে যৰপৰা কনফেটি ওলাই আহিছে।

মাতৃৰ মৃত্যুৰ পাছতহে মেককাৰ্ডিয়ে জানিব পাৰে যে ডেব্ৰাৰ স্বামী তেওঁৰ জৈৱিক পিতৃ নাছিল। তেওঁৰ স্মৃতিগ্ৰন্থত মেককাৰ্ডিয়ে এণ্ড্ৰিউ নামৰ এজন জাজ সংগীতজ্ঞক তেওঁৰ জৈৱিক পিতৃ হিচাপে চিনাক্ত কৰিছে। তেওঁলোক অন্ততঃ এবাৰ ব্যক্তিগতভাৱে মুখা-মুখি হৈছে।

স্বাস্থ্যজনিত সমস্যা

২০১৯ চনৰ মাৰ্চ মাহত মেককাৰ্ডিয়ে 'হাফপোষ্ট'ৰ এটা প্ৰবন্ধত প্ৰকাশ কৰিছিল যে ১১ বছৰ বয়সৰপৰাই তেওঁ এন’ৰেক্সিয়া আৰু পিছলৈ বুলিমিয়া নামৰ খোৱা-বোৱাৰ বিকাৰত আক্ৰান্ত আছিল। প্ৰবন্ধটোত মেককাৰ্ডিয়ে তেওঁৰ এই বিকাৰৰ বাবে তেওঁৰ মাতৃ আৰু মনোৰঞ্জন উদ্যোগৰ ভূমিকাক দায়ী কৰিছে। তেওঁ উল্লেখ কৰিছে যে তেওঁৰ নবৌৱেকে এই সমস্যাটো লক্ষ্য কৰাৰ পাছতহে তেওঁ সহায় বিচাৰিছিল। তেওঁ কেইবাটাও স্বাস্থ্যজনিত সংকটৰ কথা সোঁৱৰণ কৰিছে, যিবোৰৰ ভিতৰত আছিল বাৰে বাৰে বমি কৰাৰ ফলত পেটৰ এচিডে দাঁতৰ এনামেল নষ্ট কৰা বাবে এটা দাঁত হেৰুওৱা আৰু ডিহাইড্ৰেচনৰ বাবে মিৰাণ্ডা কছগ্ৰোভৰ বাথৰুমৰ মজিয়াত অচেতন হৈ পৰা। মেককাৰ্ডিয়ে বৰ্ণনা কৰিছিল যে এই বিকাৰে তেওঁৰ জীৱনৰ আনন্দ কাঢ়ি লৈছিল। ২০২২ চনলৈ মেককাৰ্ডিয়ে নিজকে এই খোৱা-বোৱাৰ বিকাৰৰপৰা "সম্পূৰ্ণৰূপে আৰোগ্য" বুলি গণ্য কৰিছে। ইয়াৰ উপৰি মেককাৰ্ডি এগৰাকী মদ্যপানৰপৰা আৰোগ্য লাভ কৰা ব্যক্তি; মাতৃৰ মৃত্যুৰ কিছুকাল আগৰেপৰা তেওঁ অত্যধিক মদ্যপান আৰম্ভ কৰিছিল।^[4]

তথ্যসূত্ৰ

↑ "On This Day in History – June 26th". United Press International. June 26, 2018. https://www.upi.com/Top_News/2018/06/26/UPI-Almanac-for-Tuesday-June-26-2018/4711529856421/.
↑ Mustafa, Filiz (2022-06-23). "iCarly star Jennette McCurdy and NBA star Andre Drummond briefly dated in 2013" (en-GB ভাষাত). HITC. Archived from the original on 2022-10-26. https://web.archive.org/web/20221026192744/https://www.hitc.com/en-gb/2022/06/23/jennette-mccurdy-andre-drummond/। আহৰণ কৰা হৈছে: 2022-10-26.
↑ Itzkoff, David (August 3, 2022). "Jennette McCurdy Is Ready to Move Forward, and to Look Back". The New York Times. https://www.nytimes.com/2022/08/03/books/jennette-mccurdy-memoir-mother.html.
↑ McCurdy, Jennette (September 2, 2020). "alcoholism". Empty Inside. https://open.spotify.com/episode/5ZGANNjCuKPQ3tp0XV1MDS। আহৰণ কৰা হৈছে: November 16, 2020.

বাহ্যিক সংযোগ

আধিকাৰিক ৱেবছাইট
জেনেট মেককাৰ্ডি সম্পৰ্কে ইণ্টাৰনেট মুভি ডাটাবেছত থকা তথ্য।
জেনেট মেককাৰ্ডি at AllMusic
Jennette McCurdy on YouTube

[1] "On This Day in History – June 26th". United Press International. June 26, 2018. https://www.upi.com/Top_News/2018/06/26/UPI-Almanac-for-Tuesday-June-26-2018/4711529856421/.

[2] Mustafa, Filiz (2022-06-23). "iCarly star Jennette McCurdy and NBA star Andre Drummond briefly dated in 2013" (en-GB ভাষাত). HITC. Archived from the original on 2022-10-26. https://web.archive.org/web/20221026192744/https://www.hitc.com/en-gb/2022/06/23/jennette-mccurdy-andre-drummond/। আহৰণ কৰা হৈছে: 2022-10-26.

[Itzkoff-3] Itzkoff, David (August 3, 2022). "Jennette McCurdy Is Ready to Move Forward, and to Look Back". The New York Times. https://www.nytimes.com/2022/08/03/books/jennette-mccurdy-memoir-mother.html.

[4] McCurdy, Jennette (September 2, 2020). "alcoholism". Empty Inside. https://open.spotify.com/episode/5ZGANNjCuKPQ3tp0XV1MDS। আহৰণ কৰা হৈছে: November 16, 2020.

[1]

[2]

[3]

[4]