টেংগলড

টেংগলড
পৰিচালক	নাথান গ্ৰেনো বায়ৰন হাৱাৰ্ড
চিত্ৰনাট্য	ডেন ফগেলমেন
ভিত্তি	ব্ৰাদাৰ্ছ গ্ৰিমৰ "ৰাপুঞ্জেল"
প্ৰযোজক	ৰয় কনলী
অভিনয়ত	মেণ্ডী মুৰ জেকাৰী লেভি ডোনা মাৰ্ফী
সম্পাদনা	টিম মাৰ্টিন্স
সংগীত পৰিচালক	এলান মেনকেন
প্ৰযোজনা কোম্পানী	ৱাল্ট ডিজনী এনিমেচন ষ্টুডিঅ’
পৰিবেশক	ৱাল্ট ডিজনী ষ্টুডিঅ’ মোচন পিকচাৰ্ছ
মুক্তি	১৪ নৱেম্বৰ, ২০১০ (এল কেপিটান থিয়েটাৰ) ২৪ নৱেম্বৰ, ২০১০ (আমেৰিকা যুক্তৰাষ্ট্ৰ)
দৈৰ্ঘ্য	১০০ মিনিট
দেশ	আমেৰিকা যুক্তৰাষ্ট্ৰ
ভাষা	ইংৰাজী
বাজেট	২৬০ নিযুত ডলাৰ
সৰ্বমুঠ আয়	৫৯২.৫ নিযুত ডলাৰ

টেংগলড (ইংৰাজী: Tangled; জন্ম: ২০১০) — ২০১০ চনত মুক্তিপ্ৰাপ্ত এখন আমেৰিকান এনিমেটেড সংগীতধৰ্মী মাহিমান্বিত দুঃসাহসিক কাল্পনিক হাস্যৰসাত্মক চলচ্চিত্ৰ। জাৰ্মান সাধুকথা "ৰাপুঞ্জেল"ৰ ওপৰত ভিত্তি কৰি নিৰ্মিত এই ছবিখন ৱাল্ট ডিজনী এনিমেচন ষ্টুডিঅ'ৰদ্বাৰা প্ৰযোজিত। নাথান গ্ৰেনো আৰু বায়ৰন হাৱাৰ্ডৰদ্বাৰা পৰিচালিত আৰু ডেন ফগেলমেনৰদ্বাৰা ৰচিত এই ছবিখনত মেণ্ডী মুৰ, জেকাৰী লেভি আৰু ডোনা মাৰ্ফীয়ে কণ্ঠদান কৰিছে। ছবিখনৰ কাহিনীভাগ যাদুকাৰী দীঘল সোণালী চুলি থকা এগৰাকী যুৱ ৰাজকুমাৰী ৰাপুঞ্জেলক কেন্দ্ৰ কৰি গঢ়ি উঠিছে, যিয়ে নিজৰ গোপন দুৰ্গটোৰপৰা বাহিৰলৈ ওলাই আহিবলৈ চেষ্টা কৰে। তাই এজন অনুপ্ৰৱেশকাৰী তথা দস্যু ফ্লিন ৰাইডাৰৰ সহায় গ্ৰহণ কৰি কেতিয়াও নেদেখা পৃথিৱীখন চাবলৈ ওলাই যায়।

পোনপ্ৰথমে ২০০১ চনত ডিজনীৰ এনিমেটৰ গ্লেন কেনে এই ছবিখনৰ পৰিকল্পনা কৰিছিল। টেংগলড নিৰ্মাণ কৰিবলৈ ছয় বছৰ সময় লাগিছিল আৰু ইয়াৰ নিৰ্মাণ ব্যয় আছিল প্ৰায় ২৬০ নিযুত ডলাৰ। যদি এই তথ্য সঠিক হয়, তেন্তে ই এতিয়ালৈকে নিৰ্মিত আটাইতকৈ ব্যয়-বহুল এনিমেটেড ছবি আৰু সৰ্বকালৰ অন্যতম ব্যয়-বহুল চলচ্চিত্ৰ হিচাপে পৰিগণিত হ’ব। এই ছবিখনত কম্পিউটাৰ-জেনাৰেটেড ইমেজৰী (CGI) আৰু পৰম্পৰাগত এনিমেচনৰ এক অনন্য সংমিশ্ৰণ ঘটোৱা হৈছে। সুৰকাৰ এলান মেনকেনে ছবিখনৰ সংগীত পৰিচালনা কৰিছে আৰু গীতৰ কথা লিখিছে গ্লেন শ্লেটাৰে। মুক্তিৰ পূৰ্বে ছবিখনৰ নাম ৰাপুঞ্জেলৰপৰা সলাই টেংগলড কৰা হৈছিল।

২০১০ চনৰ ১৪ নৱেম্বৰত লছ এঞ্জেলছৰ এল কেপিটান থিয়েটাৰত টেংগলডৰ প্ৰিমিয়াৰ অনুষ্ঠিত হয় আৰু ২৪ নৱেম্বৰত ৱাল্ট ডিজনী পিকচাৰ্ছে ইয়াক মুক্তি দিয়ে। ছবিখনে ৫৯২ নিযুত ডলাৰ উপাৰ্জন কৰাৰ লগতে ২০১০ চনৰ অষ্টম সৰ্বাধিক উপাৰ্জনকাৰী ছবি হিচাপে পৰিগণিত হয়। ছবিখনে সমালোচকৰপৰা ইতিবাচক সঁহাৰি লাভ কৰে আৰু ৮৩সংখ্যক একাডেমী বঁটাত শ্ৰেষ্ঠ মৌলিক গীতৰ বাবে মনোনীত হয়। ২০১৪ চনত মৃত্যুৰ পূৰ্বে এয়া আছিল অভিনেতা ৰিচাৰ্ড কিলৰ শেষ চলচ্চিত্ৰ ভূমিকা।

টেংগলডৰ সফলতাৰ পিছত এখন চুটি ছবি টেংগলড এভাৰ আফটাৰ (২০১২), এটা ভিডিঅ' গেম, এখন মঞ্চ সংগীত আৰু ২০১৭ চনত এখন টেলিভিছন ধাৰাবাহিক আৰম্ভ কৰা হয়। বৰ্তমান ইয়াৰ এখন লাইভ-একচন সংস্কৰণ নিৰ্মাণৰ কাম চলি আছে।

কাহিনী

আকাশৰপৰা পৰা এটা সূৰ্যৰ পোহৰৰ টোপালৰপৰা ঔষধি গুণযুক্ত এজোপা যাদুকৰী ফুলৰ সৃষ্টি হয়। শতিকাজুৰি মাদাৰ গথেলে নিজৰ যৌৱন ধৰি ৰাখিবলৈ এই ফুলজোপা ব্যৱহাৰ কৰিছিল। অৱশেষত ক'ৰোনা ৰাজ্যৰ সৈন্যসকলে তেওঁলোকৰ অসুস্থ গৰ্ভৱতী ৰাণীক ৰক্ষা কৰিবলৈ ফুলজোপা লৈ যায়। ৰাণীয়ে ৰাপুঞ্জেল নামৰ এজনী কন্যা সন্তান জন্ম দিয়ে, যাৰ সোণালী চুলিত ফুলজোপাৰ যাদু সোমাই থাকে। এদিন নিশা গথেলে মনে মনে ৰাজপ্ৰাসাদত সোমাই ৰাপুঞ্জেলৰ চুলিৰ একোছা কাটি নিয়ে, কিন্তু লগে লগে চুলিখিনি মুগা ৰঙৰ হৈ পৰে আৰু ইয়াৰ যাদুকৰী শক্তি হেৰুৱাই পেলায়। তাৰ পিছত গথেলে ৰাপুঞ্জেলক অপহৰণ কৰে আৰু হাবিত থকা এটা গোপন দুৰ্গত ডাঙৰ-দীঘল কৰে, যাতে তাই ৰাপুঞ্জেলৰ যাদু কেৱল নিজৰ বাবে ব্যৱহাৰ কৰিব পাৰে। প্ৰতি বছৰে ৰাপুঞ্জেলৰ জন্মদিনত ৰজা-ৰাণীয়ে আকাশলৈ লণ্ঠন (sky lanterns) এৰি দিয়ে, এই আশাত যে এই পোহৰে এদিন ৰাপুঞ্জেলক ঘৰলৈ পথ দেখুৱাই আনিব। নিজৰ ৰাজকীয় পৰিচয়ৰ বিষয়ে অজ্ঞাত ৰাপুঞ্জলে ৰাজ্যৰপৰা বিচ্ছিন্ন হৈ ডাঙৰ হয় আৰু সেই দুৰ্গটোকে তাইৰ একমাত্ৰ সুৰক্ষিত ঘৰ বুলি বিশ্বাস কৰে।

ডাঙৰ হোৱাৰ লগে লগে ৰাপুঞ্জেল সেই বাৰ্ষিক পোহৰবোৰৰ প্ৰতি আকৰ্ষিত হয়। তাইৰ ১৮ বছৰ সম্পূৰ্ণ হোৱাত তাই দুৰ্গটোৰপৰা বাহিৰলৈ গৈ সেই পোহৰবোৰ চাব বিচাৰে, কিন্তু গথেলে অস্বীকাৰ কৰে আৰু বাহিৰৰ পৃথিৱীখন অতি বিপজ্জনক বুলি কয়। ইফালে, ফ্লিন ৰাইডাৰে ৰাজপ্ৰাসাদৰপৰা হেৰুৱা ৰাজকুমাৰীৰ মুকুটটো চুৰ কৰে আৰু নিজৰ সহযোগী ষ্টেবিংটন ভাতৃদ্বয়ক প্ৰতাৰণা কৰি ৰাজকীয় ঘোঁৰা মেক্সিমাছৰপৰা বাচিবলৈ পলায়ন কৰে। ফ্লিনে ৰাপুঞ্জেলৰ দুৰ্গটো বিচাৰি পায় আৰু তাত আশ্ৰয় লয়, য’ত ৰাপুঞ্জলে তাক অচেতন কৰি লুকুৱাই থয়। যেতিয়া গথেলে লণ্ঠনৰ কথা কোৱা বাবে ৰাপুঞ্জেলক গালি পাৰে আৰু কেতিয়াও দুৰ্গৰপৰা বাহিৰলৈ যাবলৈ নিদিয়ে বুলি কয়, তেতিয়া ৰাপুঞ্জলে এটা নতুন পৰিকল্পনা কৰে। তাই গথেলক উপহাৰ হিচাপে নতুন ৰং (paint) আনিবলৈ কয়, যাৰ বাবে গথেলে তিনিদিনীয়া যাত্ৰাত ওলাই যাবলগীয়া হয়। ফ্লিনৰ মুকুট থকা মোনাটো লুকুৱাই থোৱাৰ পাছত, ৰাপুঞ্জলে ফ্লিনৰ সৈতে এটা চুক্তি কৰে যে যদি ফ্লিনে তাইক লণ্ঠনবোৰ চাবলৈ লৈ যায়, তেন্তে তাই তাক মুকুটটো ওভতাই দিব।

শৈশৱৰ পিছত প্ৰথমবাৰৰ বাবে বাহিৰলৈ ওলাই আহি ৰাপুঞ্জলে একেলগে উত্তেজনা আৰু দোষবোধ অনুভৱ কৰে। ফ্লিনে ৰাপুঞ্জেলক 'স্নাগলী ডাকলিং' নামৰ এটা পান্থশালালৈ (pub) লৈ যায়, য’ত অপৰাধীসকলে ফ্লিনক ধৰিবলৈ চেষ্টা কৰে। কিন্তু ৰাপুঞ্জলে তেওঁলোকক ইমান মৰমেৰে কথা কয় যে তেওঁলোকেও নিজৰ কোমল হৃদয়খন খুলি ধৰে। যেতিয়া ৰাজকীয় প্ৰহৰীসকল তাত উপস্থিত হয়, সেই অপৰাধীসকলে ৰাপুঞ্জেল আৰু ফ্লিনক পলাবলৈ সহায় কৰে। এসময়ত ফ্লিন আৰু ৰাপুঞ্জেল পানীৰে উপচি পৰা এটা গুহাত আবদ্ধ হৈ পৰে। মৃত্যু নিশ্চিত বুলি ভাবি ফ্লিনে নিজৰ আচল নাম ইউজিন ফিটজহাৰ্বাৰ্ট বুলি প্ৰকাশ কৰে। ৰাপুঞ্জলে তাইৰ চুলিৰ যাদুকৰী পোহৰ ব্যৱহাৰ কৰি পানীৰ তলৰ এটা গোপন পথ বিচাৰি উলিয়ায় আৰু তেওঁলোক ৰক্ষা পৰে। ইফালে, গথেলে খালী দুৰ্গটোলৈ ঘূৰি আহি মুকুট থকা মোনাটো আৰু ইউজিনৰ এখন 'ৱাণ্টেড' পোষ্টাৰ বিচাৰি পায়। গথেলে ষ্টেবিংটন ভাতৃদ্বয়ক বিচাৰি উলিয়ায় আৰু ৰাপুঞ্জেলক বিচাৰি পাবলৈ তেওঁলোকৰ সৈতে এক চুক্তি কৰে। সেই নিশা গথেলে ৰাপুঞ্জেলক অকলে লগ পায় আৰু তাইক মোনাটো দি ইউজিনৰ আনুগত্য পৰীক্ষা কৰিবলৈ কয়।

পাছদিনা পুৱা মেক্সিমাছে ইউজিনক বিচাৰি পায় আৰু তাক গ্ৰেপ্তাৰ কৰিবলৈ চেষ্টা কৰে, কিন্তু ৰাপুঞ্জলে তেওঁলোকক বুজাই-বঢ়াই শান্ত কৰে। ৰাপুঞ্জেল আৰু ইউজিনে ৰাজ্যত প্ৰৱেশ কৰে আৰু "হেৰুৱা ৰাজকুমাৰী"ৰ সন্মানত আয়োজিত উৎসৱত অংশগ্ৰহণ কৰে। দিনটো উদ্‌যাপন কৰাৰ পাছত তেওঁলোকে হ্ৰদত নাও চলাই লণ্ঠনবোৰ উৰুৱাই থকা দৃশ্য উপভোগ কৰে। ৰাপুঞ্জলে ইউজিনক মুকুটটো দিয়ে আৰু তেওঁলোকে পৰস্পৰে পৰস্পৰৰ প্ৰতি থকা প্ৰেম স্বীকাৰ কৰে। যেতিয়া ইউজিনে পাৰত ষ্টেবিংটন ভাতৃদ্বয়ক দেখে, তেওঁ ক্ষমা খুজিবলৈ আৰু মুকুটটো দিবলৈ তেওঁলোকৰ ওচৰলৈ যায়। কিন্তু ভাতৃদ্বয়ে তাক বান্ধি থয় আৰু ৰাপুঞ্জেলক এনেদৰে প্ৰতাৰণা কৰে যাতে তাই ভাবে যে ইউজিনে তাইক এৰি থৈ পলাইছে। তেওঁলোকে ৰাপুঞ্জেলক ধৰিবলৈ চেষ্টা কৰে, কিন্তু গথেলে তেওঁলোকক অচেতন কৰি ৰাপুঞ্জেলক ৰক্ষা কৰাৰ ভাও ধৰে আৰু তাইক পুনৰ দুৰ্গটোলৈ লৈ যায়।

ইউজিনক গ্ৰেপ্তাৰ কৰা হয়, কিন্তু মেক্সিমাছ আৰু পান্থশালাৰ বন্ধুসকলে তাক পলাবলৈ সহায় কৰে। ইফালে, ৰাপুঞ্জলে অনুভৱ কৰে যে তাই অজানিতে তাইৰ সকলো চিত্ৰকৰ্মত ৰাজ্যৰ ৰাজকীয় প্ৰতীক 'সোণালী সূৰ্য'টো ব্যৱহাৰ কৰি আহিছে। তাই উপলব্ধি কৰে যে তায়েই সেই "হেৰুৱা ৰাজকুমাৰী।" ৰাপুঞ্জলে গথেলক সকলো কথা কৈ তাইৰ সৈতে সম্পৰ্ক ত্যাগ কৰে। যেতিয়া গথেলে বুজি পায় যে তাই আৰু ৰাপুঞ্জেলক মৰমেৰে ধৰি ৰাখিব নোৱাৰিব, তেতিয়া তাই নিজৰ নিষ্ঠুৰ ৰূপটো প্ৰকাশ কৰে। ইউজিন দুৰ্গটোত উপস্থিত হয়, কিন্তু গথেলে তাক চুৰিৰে আঘাত কৰে। গথেলে শিকলিৰে বান্ধি থোৱা ৰাপুঞ্জেলক জোৰকৈ লৈ যাবলৈ চেষ্টা কৰে, কিন্তু ৰাপুঞ্জলে প্ৰতিজ্ঞা কৰে যে যদি গথেলে তাইক মৃত্যুশয্যাত থকা ইউজিনক সুস্থ কৰিবলৈ দিয়ে, তেন্তে তাই কেতিয়াও পলাই যাবলৈ চেষ্টা নকৰে। গথেলে অনিচ্ছাসত্ত্বেও সন্মত হয়, কিন্তু ইউজিনে উপলব্ধি কৰে যে ৰাপুঞ্জলে তাইৰ গোটেই জীৱনটো বন্দী হৈ কটাব লাগিব। সেয়েহে তাই সুস্থ কৰাৰ আগতেই ইউজিনে ৰাপুঞ্জেলৰ দীঘল চুলিখিনি কাটি পেলায়। লগে লগে ৰাপুঞ্জেলৰ চুলি মুগা হৈ পৰে আৰু গথেলৰ যাদু শেষ হৈ তাই অতি সোনকালে বুঢ়ী হৈ পৰে আৰু দুৰ্গৰপৰা পৰি মৃত্যু মুখত পৰে। ইউজিনৰ মৃত্যু হয়, কিন্তু ৰাপুঞ্জেলৰ চকুলোৰ এটোপাল (য’ত এতিয়াও অলপ যাদু আছিল) ইউজিনৰ গাত পৰাত সি পুনৰ জীৱন লাভ কৰে।

ৰাপুঞ্জেল আৰু ইউজিন ক'ৰোনালৈ ঘূৰি আহে, য’ত ৰাপুঞ্জেল তাইৰ মাক-দেউতাকৰ সৈতে পুনৰ মিলিত হয়। ইউজিনক তাৰ অপৰাধৰ বাবে ক্ষমা কৰি দিয়া হয় আৰু সমগ্ৰ ৰাজ্যই আনন্দ উদ্‌যাপন কৰে। শেষত ৰাপুঞ্জেল আৰু ইউজিন বিবাহপাশত আবদ্ধ হয়।

বাহ্যিক সংযোগ

• আধিকাৰিক ৱেবছাইট
• টেংগলড সম্পৰ্কে ইণ্টাৰনেট মুভি ডাটাবেছত থকা তথ্য।
• ৰ'টেন টমাট'জ ৱেবছাইটত টেংগলড।
• টেংগলড Box Office Mojo’ত;