ডোজা কেট

ডোজা কেট
ডোজা কেট, ২০২১ চনত
জন্ম	আমালা ৰত্না জাণ্ডিলে ড্লামিনি ২১ অক্টোবৰ, ১৯৯৫ (৩০ বছৰ) লছ এঞ্জেলেছ, কেলিফৰ্ণিয়া, যুক্তৰাষ্ট্ৰ
পেচা	ৰেপাৰ গায়িকা গীতিকাৰ ৰেকৰ্ড প্ৰযোজক
সক্ৰিয় হৈ থকা সময়	২০১২–বৰ্তমান
'সঙ্গীত যাত্ৰা'
সংগীতৰ ধৰণ	হিপ-হপ পপ আৰ এণ্ড বি
লেবেল	কেমোছাবে আৰচিএ
স্বাক্ষৰ
ৱেবছাইট
dojacat.com

আমালা ৰত্না জাণ্ডিলে ড্লামিনি (জন্ম ২১ অক্টোবৰ, ১৯৯৫), পেছাগতভাৱে ডোজা কেট (/ˈdoʊdʒə/) নামে জনাজাত, এগৰাকী আমেৰিকান ৰেপাৰ, গায়িকা, গীতিকাৰ আৰু ৰেকৰ্ড প্ৰযোজক। তেওঁক বহু প্ৰকাশনীৰ দ্বাৰা "পপ-ৰেপৰ ৰাণী" বুলি অভিহিত কৰা হৈছে। তেওঁ নিজৰ বহুমুখী সংগীত শৈলী, লাইভ প্ৰদৰ্শন দক্ষতা, ইণ্টাৰনেট ব্যক্তিত্ব আৰু মঞ্চ উপস্থিতিৰ বাবে পৰিচিত। বিলব'ৰ্ড-এ তেওঁক "বিশ্বৰ অন্যতম ডাঙৰ পপ তাৰকা" আৰু "এই যুগৰ সংজ্ঞা নিৰ্ধাৰণ কৰা পপ তাৰকাসকলৰ অন্যতম" বুলি উল্লেখ কৰিছে। টাইম আলোচনীয়ে ২০২৩ চনত তেওঁক বিশ্বৰ ১০০ জন প্ৰভাৱশালী লোকৰ তালিকাত অন্তৰ্ভুক্ত কৰিছিল।

ডোজা কেটে কৈশোৰ অৱস্থাত চাউণ্ডক্লাউডত সংগীত সৃষ্টি আৰু প্ৰকাশ আৰম্ভ কৰে। তেওঁৰ গীত "ছ' হাই"-এ কেমোছাবে ৰেকৰ্ডছ আৰু আৰচিএ ৰেকৰ্ডছৰ দৃষ্টি আকৰ্ষণ কৰে, যাৰ সৈতে তেওঁ চুক্তিবদ্ধ হয় আৰু তাৰ পাছত তেওঁৰ প্ৰথম এক্সটেণ্ডেড প্লে Purrr! (২০১৪) প্ৰকাশ পায়। ২০১৮ চনত প্ৰকাশিত তেওঁৰ প্ৰথম ষ্টুডিঅ' এলবাম আমালা আৰম্ভণিতে বিশেষ সফল নহ’লেও একেটা বছৰত প্ৰকাশিত তেওঁৰ গীত "Mooo!" ইণ্টাৰনেট মিম হিচাপে ভাইৰেল হৈ তেওঁক ব্যাপক জনপ্ৰিয়তা দিয়ে। তাৰ পিছত ২০১৯ চনত তেওঁ দ্বিতীয় ষ্টুডিঅ' এলবাম হট পিংক প্ৰকাশ কৰে, যি আমেৰিকাৰ বিলব'ৰ্ড ২০০ তালিকাৰ শীৰ্ষ দহৰ ভিতৰত স্থান লাভ কৰে। এই এলবামৰ গীত "ছে ছ'" (নিকি মিনাজৰ সৈতে ৰিমিক্স) বিলব'ৰ্ড বট ১০০-ত প্ৰথম স্থান দখল কৰে।

তেওঁৰ তৃতীয় ষ্টুডিঅ' এলবাম প্লেনেট হাৰ (২০২১) বিলব'ৰ্ড ২০০-ৰ শীৰ্ষ ১০ত ৪১ সপ্তাহ অতিবাহিত কৰে আৰু ২০২১ চনৰ বিশ্বব্যাপী দহম শ্ৰেষ্ঠ বিক্ৰী হোৱা এলবাম হয়। চতুৰ্থ এলবাম স্কাৰ্লেট (২০২৩) হিপ-হপ কেন্দ্ৰিক ধ্বনি গ্ৰহণ কৰে আৰু বিলব'ৰ্ড ২০০-ৰ শীৰ্ষ পাঁচত স্থান লাভ কৰে। ইয়াৰ মুখ্য গীত "পেইণ্ট দ্য টাউন ৰেড" বহু দেশৰ সংগীত তালিকাৰ শীৰ্ষত উপনীত হয়। পঞ্চম এলবাম Vie (২০২৫)ত তেওঁ পুনৰ পপ সংগীতলৈ উভতি আহে।

ডোজা কেট ইতিহাসৰ অন্যতম অধিক বিক্ৰী হোৱা মহিলা ৰেপাৰ, ২০১৮ ৰ পৰা ২০২২ চনৰ ভিতৰত ৩৪ মিলিয়নৰো অধিক ৰেকৰ্ড বিক্ৰী কৰিছে। ২০২৪ চনত বিলব'ৰ্ড-এ তেওঁক ২১ শতিকাৰ ২৪তম শ্ৰেষ্ঠ মহিলা শিল্পী আৰু দ্বিতীয় শ্ৰেষ্ঠ মহিলা ৰেপাৰ হিচাপে স্থান দিয়ে। ২০২০ চনৰ পৰা তেওঁ বহু বঁটা লাভ কৰিছে, যাৰ ভিতৰত আছে এটা গ্ৰেমী বঁটা, ছয়টা বিলব'ৰ্ড সংগীত বঁটা, পাঁচটা আমেৰিকান সংগীত বঁটা, ছয়টা এমটিভি ভিডিঅ' সংগীত বঁটা আৰু আঠটা আই-হাৰ্ট-ৰেডিঅ' সংগীত বঁটা।

প্ৰাৰম্ভিক জীৱন আৰু শিক্ষা

আমালা ৰত্না জাণ্ডিলে ড্লামিনি ১৯৯৫ চনৰ ২১ অক্টোবৰ তাৰিখে লছ এঞ্জেলেছৰ কেলিফৰ্ণিয়া ৰাজ্যৰ তাৰজানা অঞ্চলত জন্মগ্ৰহণ কৰে। তেওঁৰ মাতৃ ডেবোৰাহ ছয়াৰ এগৰাকী আমেৰিকান গ্ৰাফিক ডিজাইনাৰ আৰু ইহুদী বংশোদ্ভৱ। তেওঁৰ পিতৃ ডুমিছানি ড্লামিনি দক্ষিণ আফ্ৰিকাৰ জুলু বংশোদ্ভৱ শিল্পী, যি ব্ৰডৱেৰ মিউজিকেল Sarafina!-ৰ মূল মঞ্চায়ন আৰু ১৯৯২ চনৰ চলচ্চিত্ৰ ৰূপান্তৰত অভিনয়ৰ বাবে পৰিচিত।

জন্মৰ কিছুদিন পিছতে ড্লামিনি ৰাই, নিউ ইয়ৰ্কলৈ স্থানান্তৰিত হয়, য'ত তেওঁ পাঁচ বছৰলৈ আইতাকৰ সৈতে বাস কৰে। আঠ বছৰ বয়সত তেওঁ পুনৰ কেলিফৰ্ণিয়ালৈ উভতি আহি আগৌৰা হিলছস্থিত ছাই অনন্তম আশ্ৰমত বাস কৰে। ইয়াত তেওঁ আৰু তেওঁৰ পৰিয়ালে চাৰি বছৰ ধৰি হিন্দুধৰ্ম অনুশীলন কৰে। সেই সময়ছোৱাত তেওঁ মন্দিৰত ভজন গাইছিল আৰু মূৰত ওৰণি লৈছিল।

পৰৱৰ্তী সময়ত পৰিয়ালটো অ’ক পাৰ্কলৈ স্থানান্তৰিত হয়। তাত তেওঁ নৃত্য শিক্ষা গ্ৰহণ আৰম্ভ কৰে আৰু স্কেটবৰ্ডিং আৰু মালিবুৰ ছাৰ্ফ শিবিৰত অংশ লৈ এক সক্ৰিয় শৈশৱ অতিবাহিত কৰে। অঞ্চলটোত অল্পসংখ্যক মিশ্ৰ বংশোদ্ভৱ শিশু আছিল, যাৰ ফলত তেওঁ আৰু তেওঁৰ ভাতৃয়ে কেতবোৰ সময়ত বৰ্ণবাদী আচৰণৰ সন্মুখীন হৈছিল।

বয়স বঢ়াৰ লগে লগে তেওঁ ব্ৰেকডান্স শিকিবলৈ আৰম্ভ কৰে আৰু এটা পেছাদাৰী পপলকিং দলে যোগ দিয়ে। তেওঁ লছ এঞ্জেলেছত বিভিন্ন নৃত্য প্ৰতিযোগিতাত অংশগ্ৰহণ কৰে। তেওঁৰ পেহীয়েকে (এগৰাকী ভোকেল প্ৰশিক্ষক) তেওঁক গায়নৰ পাঠ দিয়ে যাতে তেওঁ চেণ্ট্ৰেল লছ এঞ্জেলেছ এলাকা নিউ হাই স্কুল নং ৯ত ভৰ্তিৰ বাবে অডিচন দিব পাৰে।

কিন্তু তেওঁ প্ৰায়ে বিদ্যালয় এৰি অনলাইন চেটৰুমত সময় কটাইছিল। একাদশ শ্ৰেণীত অধ্যয়নৰ সময়ত তেওঁ উপলব্ধি কৰে যে অভিনয় আৰু সংগীতেই তেওঁৰ মূল আগ্ৰহ। ১৬ বছৰ বয়সত তেওঁ বিদ্যালয় এৰি দিয়ে। তেওঁ এই সিদ্ধান্তৰ কাৰণ হিচাপে দুৰ্বল মনোযোগ আৰু অতিসক্ৰিয়তা বিকাৰ (ADHD)ৰ সৈতে সংগ্ৰাম কৰাৰ কথা উল্লেখ কৰি কয় যে তেওঁ নিজকে একে ঠাইত আবদ্ধ যেন অনুভৱ কৰিছিল।

বাহ্যিক সংযোগ

• ডোজা কেট at AllMusic
• ডোজা কেট সম্পৰ্কে ইণ্টাৰনেট মুভি ডাটাবেছত থকা তথ্য।