দীপানী ছিলভা

দীপানী ছিলভা
স্থানীয় নাম	දීපානි සිල්වා
অন্য নাম	দীপানী ডি ছিলভা
পেচা	অভিনেত্ৰী
সক্ৰিয় হৈ থকা সময়	১৯৭৫–বৰ্তমান

দীপানী ছিলভা (সিংহল: දීපානි සිල්වා), যাৰ আন এটা নাম হৈছে দীপানী ডি ছিলভা (সিংহল: දීපානි ධී සිල්වා), এগৰাকী শ্ৰীলংকান জনপ্ৰিয় প্ৰবীণ চলচ্চিত্ৰ আৰু টেলিড্ৰামা অভিনেত্ৰী। কেইবাখনো বাটৰ নাট আৰু নাটকত অভিনয় কৰাৰ পাছত তেওঁ চলচ্চিত্ৰ জগতত প্ৰৱেশ কৰে। ২০১৮ চনৰ ২৮ মে'ত বান্দৰাগামাত সংঘটিত এটা দুৰ্ঘটনাৰ লগত জড়িত থকাৰ অভিযোগত দীপানী ছিলভাক গ্ৰেপ্তাৰ কৰা হৈছিল আৰু পিছলৈ জামিনত মুকলি কৰি দিয়া হৈছিল।

জীৱনী

দীপানী ছিলভা তেওঁৰ পৰিয়ালৰ একমাত্ৰ চলচ্চিত্ৰ শিল্পী। তেওঁৰ পিতৃ ডি. পিটাৰ ছিলভা এজন ট্ৰেড ইউনিয়ন নেতা আছিল। তেওঁ কলম্বোত অৱস্থিত বুদ্ধিষ্ট লেডীজ কলেজৰপৰা উচ্চ শিক্ষা সমাপ্ত কৰে।

কেৰিয়াৰ

১৯৭৫ চনত বাটৰ নাটত অভিনয় কৰি তেওঁ অভিনয় জীৱন আৰম্ভ কৰিছিল। অভিনয় শিকিবলৈ দীপানীয়ে প্ৰবীণ নাট্য অভিনেতা ধম্ম জাগোডাৰ নাট্য বিদ্যালয় 'লায়নেল ৱেণ্ড কাল কেন্দ্ৰ ৰংগ শিল্প শালিকা'ত যোগদান কৰে, যিখন ধম্ম জাগোডাই শ্ৰীলংকাৰ প্ৰথমখন নাট্য বিদ্যালয় হিচাপে উদ্বোধন কৰিছিল। তেওঁ ৰংগ শিল্প শালিকাত প্ৰয়াত গামিনী হাথথোতুৱেগামাৰ ওচৰত অভিনয় শিকিছিল, যিজনক আজিও শ্ৰীলংকাৰ বাটৰ নাটৰ পিতৃ বুলি গণ্য কৰা হয়।

নব্বৈৰ দশকৰ আৰম্ভণিতে সিংহলী চলচ্চিত্ৰ জগতত ভৰি দিয়াৰ সুযোগ পোৱাৰ আগতে তেওঁ দু দাৰুৱো, আম্মাই থাথথাই, হাথপানা, লোকে মামা, আবুদ্দাস কোলামা, থানৰাদেৱী আদিকে ধৰি কেইবাখনো টেলিড্ৰামা ধাৰাবাহিকত অভিনয় কৰিছিল। ১৯৯৪ চনত মী হাৰাকাৰ জৰিয়তে দীপানী ছিলভাই চলচ্চিত্ৰত অভিষেক ঘটায়।

দীপানীয়ে তেওঁৰ কেৰিয়াৰত বহুতো সহযোগী চৰিত্ৰত অভিনয় কৰিছে, তাৰ ভিতৰত ২০০৮ চনৰ সফল ছবি মাচানত এজন নষ্ট হোৱা পুত্ৰৰ মাতৃৰ চৰিত্ৰটো অন্যতম। এই ছবিখনত শ্ৰীলংকাৰ হেণ্ডবল দলটোৰ সত্য কাহিনী বৰ্ণনা কৰা হৈছে যি ২০০৪ চনত জাৰ্মানীত নিৰুদ্দেশ হৈছিল। তেওঁ ২০১৮ চনৰ হৰৰ ছবি চেয়াতো অভিনয় কৰিছিল, যিখন শ্ৰীলংকাৰ চলচ্চিত্ৰ ইতিহাসৰ প্ৰথমখন কেৱল মহিলা কলা-কুশলীৰদ্বাৰা নিৰ্মিত চলচ্চিত্ৰ।

বাহ্যিক সংযোগ

• Deepani Silva সম্পৰ্কে ইণ্টাৰনেট মুভি ডাটাবেছত থকা তথ্য।