পূজা বেনাৰ্জী

পূজা বেনাৰ্জী
২০২৩ চনত ২৯তম কলকাতা আন্তঃৰাষ্ট্ৰীয় চলচ্চিত্ৰ মহোৎসৱত বেনাৰ্জী
জন্ম	০৬ ফেব্ৰুৱাৰী, ১৯৮৭ (৩৯ বছৰ) কলকাতা, পশ্চিমবংগ, ভাৰত
অন্য নাম	পূজা বোস
পেচা	অভিনেত্ৰী
দাম্পত্যসঙ্গী	কুনাল ভাৰ্মা (বি. ২০২০)
সন্তান	১

পূজা বেনাৰ্জী (জন্ম ৬ ফেব্ৰুৱাৰী ১৯৮৭), যাক কেতিয়াবা পূজা বোস বা সৰলভাৱে পূজা বুলিও ক্ৰেডিট দিয়া হয়, এগৰাকী ভাৰতীয় অভিনেত্ৰী। তেওঁ প্ৰধানকৈ বাংলা চলচ্চিত্ৰ আৰু হিন্দী দূৰদৰ্শন ধাৰাবাহিকত অভিনয় কৰিছে। ষ্টাৰ প্লাছত সম্প্ৰচাৰিত ধাৰাবাহিক তুঝ সংগ প্ৰীত লগাই সজনাত বৃন্দা চৰিত্ৰত অভিনয় কৰাৰ বাবে তেওঁ বিশেষভাৱে পৰিচিত। তেওঁ ঝলক দিখলা যা (২০১৪) আৰু কমেডি নাইটছ বচাও (২০১৫)ত অংশগ্ৰহণ কৰিছিল।

কেৰিয়াৰ

২০০৮ চনত দূৰদৰ্শন ধাৰাবাহিক 'কাহানী আমাৰায় মহাভাৰত কি'ৰ জৰিয়তে পূজা বেনাৰ্জীয়ে নিজৰ অভিনয় জীৱন আৰম্ভ কৰে। ইয়াৰ পিছত তেওঁ ৰোমাণ্টিক ধাৰাবাহিক 'তুঝ সংগ প্ৰীত লগাই সজনা'ত এগৰাকী সহজ-সৰল পাঞ্জাবী ছোৱালী বৃন্দাৰ চৰিত্ৰত অভিনয় কৰি জনপ্ৰিয়তা লাভ কৰে।

তেওঁ তেলেগু চলচ্চিত্ৰ 'ভিডু থেদা'ৰ জৰিয়তে চলচ্চিত্ৰ জগতত আত্মপ্ৰকাশ কৰে। ইয়াৰ উপৰিও তেওঁ 'মাচো মুস্তানা' চলচ্চিত্ৰত অভিনয় কৰে (প্ৰথমতে নাম আছিল 'মাচো মুস্তাফা'), কিন্তু “মুস্তাফা” শব্দ ব্যৱহাৰ সন্দৰ্ভত আপত্তিৰ বাবে নাম সলনি কৰা হয়।

পূজা বেনাৰ্জীয়ে ৰাজা চান্দাৰ 'চেলেঞ্জ ২' আৰু সুজিত মণ্ডল পৰিচালিত 'ৰকি' চলচ্চিত্ৰতো অভিনয় কৰে। তেওঁ 'ঝলক দিখলা যা ৭'ত পূজা বোস নামত অংশগ্ৰহণ কৰিছিল, য’ত তেওঁৰ নৃত্য পৰিচালক আছিল ৰাজিত দেৱ।

২০১৫ চনৰ পৰা ২০১৭ চনলৈ তেওঁ 'কমেডি নাইটছ বচাও' ধাৰাবাহিকত নিয়মিতভাৱে দেখা গৈছিল। তাৰ পিছত তেওঁ জী টিভিৰ 'কুবুল হে'ত আফ্ৰিন চৰিত্ৰত অভিনয় কৰে। লগতে তেওঁ &টিভিত সম্প্ৰচাৰিত 'ৰাজিয়া চুলতান'ত ইয়াছমিন চৰিত্ৰত অভিনয় কৰে।

২০১৬ চনত তেওঁ 'বিগ বস বাংলা' আৰু 'কমেডি নাইটছ লাইভ'ত অংশগ্ৰহণ কৰে। ২০১৭ চনত তেওঁ 'দেৱ' ধাৰাবাহিকত মেহক চৰিত্ৰত অভিনয় কৰে আৰু ২০১৮ চনত ইয়াৰ দ্বিতীয় ছিজনত পুনৰ উপস্থিত হয়।

২০১৯ চনত তেওঁ 'কিচেন চেম্পিয়ন ৫' আৰু 'খতৰা খতৰা খতৰা'ত অংশগ্ৰহণ কৰে আৰু 'বিশ' ধাৰাবাহিকত মাকদিনা চৰিত্ৰত অভিনয় কৰে। ২০২০ চনত তেওঁ 'জগ জননী মা বৈষ্ণো দেৱী – কাহিনী মাতা ৰাণী কি' ধাৰাবাহিকত বৈষ্ণো দেৱীৰ চৰিত্ৰত অভিনয় কৰে।

দুটা বছৰ বিৰতিৰ পিছত ২০২২ চনত তেওঁ ষ্টাৰ প্লাছৰ ৱেব ধাৰাবাহিক 'অনুপমা: নমস্তে আমেৰিকা'ত ঋতিকা চৰিত্ৰত অভিনয় কৰি পুনৰ অভিনয় জগতলৈ উভতি আহে।

ব্যক্তিগত জীৱন

২০২০ চনত পূজা বেনাৰ্জীয়ে তেওঁৰ সহ-অভিনেতা কুনাল ভাৰ্মাৰ সৈতে বিবাহপাশত আবদ্ধ হয়। এই দম্পতীৰ এটা পুত্ৰ সন্তান আছে।

বিবাদ

২০২৫ চনৰ জুন মাহত বাংলা চলচ্চিত্ৰ প্ৰযোজক শ্যাম সুন্দৰ দে’ৰ অপহৰণ আৰু ধন দাবীৰ অভিযোগত পূজা বেনাৰ্জী আৰু তেওঁৰ স্বামী কুনাল ভাৰ্মাৰ বিৰুদ্ধে অভিযোগ দাখিল কৰা হয়। ভাৰতীয় ন্যায় সংহিতা, ২০২৩ৰ বিভিন্ন ধাৰাত তেওঁলোকৰ বিৰুদ্ধে এফ আই আৰ ৰুজু কৰা হয়।

বাহ্যিক সংযোগ

• পূজা বেনাৰ্জী সম্পৰ্কে ইণ্টাৰনেট মুভি ডাটাবেছত থকা তথ্য।
• ইনষ্টাগ্ৰামত পূজা বেনাৰ্জী