পেণ্ডোৰা
পেণ্ডোৰা (ইংৰাজী: Pandora)[1] গ্ৰীক পৌৰাণিক কাহিনী অনুসৰি জ্যুছৰ নিৰ্দেশত হেফেষ্টাছে সৃষ্টি কৰা প্ৰথমগৰাকী মানৱ নাৰী।[2][3] হেচিঅ’ডৰ লেখনি মতে প্ৰতিজন দেৱতাই তেওঁক অনন্য উপহাৰ দি সহযোগিতা কৰিছিল। তেওঁৰ অন্য এটা নাম এনেছিড′ৰা (Anesidora) অৰ্থাৎ "তেওঁ যালৈ উপহাৰ পঠোৱা হৈছে"[4] (পৃথিৱীৰ "গৰ্ভৰ পৰা" বুজাইছে) ব্ৰিটিছ সংগ্ৰহালয়ৰ[5] বগা মাটিৰ কাইলিক্সত তেওঁৰ মূৰ্তিৰ বিপৰীতে লিখা আছে।
পেণ্ডোৰা শ্ৰুতিকথা এক প্ৰকাৰৰ থিয়ডিচি, যিয়ে পৃথিৱীত বেয়াবোৰ কিয় আছে সেই প্ৰশ্নটোৰ উত্তৰ দিবলৈ চেষ্টা কৰে৷ এই সূত্ৰ মতে, পেণ্ডোৰাই মানৱতাৰ সকলো বেয়া কাম বন্ধ কৰি থোৱা এটা বাকচ (পিথ'ছ; সাধাৰণতে "পেণ্ডোৰাৰ বাকচ" বুলি কোৱা হয়) খুলি দিছিল। যুক্তি অনুসৰি পেণ্ডোৰাৰ কাহিনীৰ হেচিঅ’ডে কৰা ব্যাখ্যাই ইহুদী আৰু খ্ৰীষ্টান ধৰ্মতত্ত্ব উভয়কে প্ৰভাৱিত কৰিছিল আৰু সেয়েহে ৰেনেছাঁৰ যুগলৈকে তেওঁৰ বেয়া খ্যাতিক স্থায়ী কৰি ৰাখিছিল। পিছলৈ কবি, নাট্যকাৰ, চিত্ৰশিল্পী আৰু ভাস্কৰ্য শিল্পীয়ে তেওঁক বিষয়বস্তু হিচাপে লৈ শিল্প-সাহিত্য সৃষ্টি কৰিবলৈ লৈছিল।
কিংবদন্তি
[সম্পাদনা কৰক]হেচিঅডৰ মহাকাব্য থিঅ′গনিত নাম উল্লেখ নকৰাকৈ পেণ্ডোৰাৰ কথা লিখা হৈছে। মানুহে প্ৰমিথিউছৰ পৰা চুৰি হোৱা জুইৰ উপহাৰ পোৱাৰ পিছত জ্যুছৰ খং উঠে আৰু মানৱতাক দিয়া বৰদানৰ ক্ষতিপূৰণ দিবলৈ এটা শাস্তিমূলক উপহাৰ দিয়াৰ সিদ্ধান্ত লয়। তেওঁ হেফেষ্টাছক পৃথিৱীৰ প্ৰথম নাৰীক গঢ়িবলৈ আদেশ দিয়ে, যিগৰাকী "সুন্দৰ দানৱী" হ’ব আৰু যাৰ বংশধৰসকলে মানৱ জাতিক যন্ত্ৰণা দিব। হেফেষ্টাছে তেনে কৰাৰ পিছত এথেনাই তেওঁক ৰূপালী গাউন, এম্ব্ৰয়ডাৰী কৰা ওৰণি, মালা আৰু ৰূপৰ অলংকৃত মুকুট পিন্ধাই দিয়ে। এই মহিলাগৰাকীৰ নাম থিওগনিত উল্লেখ কৰা হোৱা নাই, কিন্তু তেওঁক পেণ্ডোৰা বুলি অনুমান কৰা হৈছে৷ এই শ্ৰুতিকথাটো হেচিঅডে “ৱৰ্কছ এণ্ড ডেইজ”ত পুনৰ উল্লেখ কৰিছিল।
হেচিঅডে তেওঁৰ সৃষ্টিৰ বিষয়ে বিস্তাৰিত বিৱৰণ লিখিছে। হেফেষ্টাছে সৃষ্টি কৰাৰ পিছত তেওঁৰ সম্পূৰ্ণতাত অধিক দেৱতাই অৰিহণা যোগাইছে: এথেনাই তেওঁক বেজীৰ কাম আৰু বয়ন শিকাইছিল; এফ্ৰ'ডাইটে সৌন্দৰ্য্য, আকাংক্ষা আৰু যত্ন; হাৰ্মিছে "নিৰ্লজ্জ মন আৰু প্ৰতাৰক স্বভাৱ"; হাৰ্মিছে তেওঁক বাক শক্তিও প্ৰদান কৰিছিল, তেওঁক "মিছা আৰু কৌশলী শব্দ" শিকাইছিল; তাৰ পিছত এথেনাই তেওঁক কাপোৰ পিন্ধাই দিছিল; তাৰ পিছত পাৰ্ছুৱেছন আৰু চাৰিতসকলে তেওঁক হাৰ আৰু অন্যান্য সজ্জাৰে সজাইছিল; হোৰাই তেওঁক মালাৰ মুকুটেৰে পিন্ধাইছিল। শেষত হাৰ্মিছে এই মহিলাগৰাকীক “পেণ্ডোৰা” নাম প্ৰদান কৰে, কাৰণ অলিম্পাছত বাস কৰা সকলোৱে তেওঁক উপহাৰ দিছিল আৰু তেওঁ মানৱ পুৰুষ সকলৰ বাবে ভৱিষ্যতৰ মহামাৰী স্বৰূপ আছিল৷
পেণ্ডোৰা পৃথিৱীলৈ লগত এটা জাৰ (ষোড়শ শতিকাত পাঠ্যত বাকচ বুলি কোৱা হয়) লৈ আহে য'ত সোমাই আছিল "অগণন মহামাৰী"। প্ৰমিথিউছে নিজৰ ভাতৃ এপিমিথিয়াছক জ্যুছৰ পৰা কোনো উপহাৰ গ্ৰহণ নকৰিবলৈ সকীয়াই দিছিল। কিন্তু এপিমিথিউছে নুশুনিলে; তেওঁ পেণ্ডোৰাক গ্ৰহণ কৰিলে৷ পেণ্ডোৰা তৎক্ষণাত নিজৰ জাৰটোৰ ভিতৰৰ বস্তুবোৰ পৃথিৱীত মুকলি কৰি দিলে। ফলত পৃথিৱী আৰু সাগৰ "দুষ্টতাৰে" ভৰি পৰিল।
তথ্য সংগ্ৰহ
[সম্পাদনা কৰক]- ↑ πᾶν, δῶρον. Liddell, Henry George; Scott, Robert; A Greek–English Lexicon at the Perseus Project; Evelyn-White, note to Hesiod, Works and Days Schlegel and Weinfield, "Introduction to Hesiod" p. 6; Meagher, p. 148; Samuel Tobias Lachs, "The Pandora-Eve Motif in Rabbinic Literature", The Harvard Theological Review, Vol. 67, No. 3 (July 1974), pp. 341–345.
- ↑ "Scatter-brained [of Zeus the woman, the maiden whom he had formed." (Hesiod, Theogony 510 ff. (Hugh G. White, translator)
- ↑ Kershaw, Stephen, ed (1990). "Pandora". A concise dictionary of Classical Mythology. A. R. Maxwell-Hyslop (translator). প্ৰকাশক Oxford: Basil Blackwell Ltd. ISBN 0-631-16696-3. https://archive.org/details/concisedictionar00grim.
- ↑ Harrison, Prolegomena to the Study of Greek Religion 3rd ed., 1922:281. If Anesidora/Pandora were already "all-gifted", this would be an instance of mythic inversion.
- ↑ B.M. 1881,0528.1: white-ground cup from Nola, painted by the Tarquinia painter, c. 470–460 BC (British Museum on-line catalogue entry)