প্ৰত্যুষা বেনাৰ্জী

প্ৰত্যুষা বেনাৰ্জী
২০১৪ চনত বেনাৰ্জী
জন্ম	১০ আগষ্ট, ১৯৯১ জামছেদপুৰ, বিহাৰ (বৰ্তমানৰ ঝাৰখণ্ড), ভাৰত
মৃত্যু	১ এপ্ৰিল, ২০১৬ (২৪ বছৰ) মুম্বাই, মহাৰাষ্ট্ৰ, ভাৰত
পেচা	অভিনেত্ৰী
সক্ৰিয় হৈ থকা সময়	২০১০–২০১৬
জনা যায়	* বালিকা বধূ বিগ বছ ৭ হাম হ্যায় না ঝলক দিখলা যা ৫

প্ৰত্যুষা বেনাৰ্জী (ইংৰাজী: Pratyusha Banerjee; ১০ আগষ্ট ১৯৯১ — ১ এপ্ৰিল ২০১৬) এগৰাকী ভাৰতীয় টেলিভিছন অভিনেত্ৰী আছিল। তেওঁ বহুতো ধাৰাবাহিক আৰু ৰিয়েলিটি শ্ব’ত অভিনয় কৰিছিল।

বেনাৰ্জীয়ে প্ৰথমবাৰৰ বাবে ২০১০ চনত টেলিভিছন শ্ব’ বালিকা বধূৰ জৰিয়তে স্বীকৃতি লাভ কৰিছিল। টেলিভিছন ধাৰাবাহিকত এইটোৱেই তেওঁৰ প্ৰথম মুখ্য চৰিত্ৰ আছিল, য’ত তেওঁ "আনন্দী" চৰিত্ৰটোৰ জৰিয়তে ঘৰে ঘৰে পৰিচিত হৈ পৰিছিল। তেওঁ ৰিয়েলিটি শ্ব’ বিগ বছ ৭ত (২০১৩) অংশগ্ৰহণ কৰিছিল।

কৰ্মজীৱন

তেওঁ ৰক্ত সম্বন্ধ ধাৰাবাহিকত এটা সহযোগী চৰিত্ৰৰ জৰিয়তে নিজৰ কেৰিয়াৰ আৰম্ভ কৰিছিল। ইয়াৰ পিছত তেওঁ ষ্টাৰ প্লাছৰ ধাৰাবাহিক য়ে ৰিস্তা ক্যা কেহলাতা হ্যায়ত বাণীৰ (অক্ষৰাৰ এজনী ভাল বন্ধু) চৰিত্ৰত অভিনয় কৰে।

২০১০ চনত ভাৰতীয় টেলিভিছন ধাৰাবাহিক বালিকা বধূত অবিকা গৌৰৰ ঠাইত আনন্দীৰ প্ৰাপ্তবয়স্ক সংস্কৰণৰ মুখ্য চৰিত্ৰৰ বাবে তেওঁ নিৰ্বাচিত হয়। অভিনেত্ৰীগৰাকীৰ মতে, তেওঁক এটা টেলেণ্ট হাণ্টৰ জৰিয়তে বাছনি কৰা হৈছিল, য’ত তেওঁ লক্ষ্ণৌৰ নিবেদিতা তিৱাৰী আৰু মুম্বাইৰ কেতকী চিতালুক অতিক্ৰম কৰিছিল। এই ধাৰাবাহিকখনৰ সফলতাৰ পিছত বেনাৰ্জীয়ে ঝলক দিখলা যাত (ছিজন ৫) অংশগ্ৰহণ কৰে। অৱশ্যে, নৃত্যৰ আখৰাৰ সময়ত তেওঁ সহজ অনুভৱ নকৰা বুলি উল্লেখ কৰি অনুষ্ঠানটো ত্যাগ কৰে।

২০১৩ চনত তেওঁ বিগ বছ ৭ৰ এগৰাকী অন্যতম প্ৰতিযোগী আছিল। তেওঁ তেওঁৰ সংগী ৰাহুল ৰাজ সিঙৰ সৈতে পাৱাৰ কাপলত অংশ লৈছিল। ইয়াৰ উপৰি তেওঁ হাম হ্যায় না, চশুৰাল চিমৰ কা আৰু গুলমোহৰ গ্ৰেণ্ডত গুৰুত্বপূৰ্ণ চৰিত্ৰত অভিনয় কৰিছিল।

তেওঁৰ আটাইতকৈ উল্লেখযোগ্য কাম আছিল ধাৰাবাহিক বালিকা বধূত আৰু তেওঁ আনন্দী হিচাপে ব্যাপক জনপ্ৰিয়তা লাভ কৰিছিল।

ব্যক্তিগত জীৱন

প্ৰত্যুষাৰ জন্ম হৈছিল ঝাৰখণ্ডৰ জামছেদপুৰ চহৰৰ এটা বঙালী পৰিয়ালত। তেওঁৰ পিতৃৰ নাম আছিল শংকৰ বেনাৰ্জী আৰু মাতৃৰ নাম সোমা বেনাৰ্জী। তেওঁৰ পিতৃ এগৰাকী জনাজাত সমাজকৰ্মী আৰু তেওঁলোকৰ নিজা এটা বেচৰকাৰী সংস্থা পৰিচালনা কৰে। ২০১০ চনত তেওঁ জামছেদপুৰ এৰি মুম্বাইলৈ কাম কৰিবলৈ আহে।

মৃত্যু

২০১৬ চনৰ ১ এপ্ৰিলত বেনাৰ্জীক তেওঁৰ মুম্বাইৰ এপ্ৰেটমেণ্টত ডিঙিত ফাঁচ লগা অৱস্থাত উদ্ধাৰ কৰা হয়। মৃত্যুৰ সময়ত তেওঁৰ বয়স আছিল ২৪ বছৰ। মৰণোত্তৰ পৰীক্ষাৰ প্ৰতিৱেদন অনুসৰি মৃত্যুৰ কাৰণ আছিল উশাহ বন্ধ হোৱা বা শ্বাসৰোধ।

অৱশ্যে তেওঁৰ পিতৃ-মাতৃয়ে অভিযোগ কৰে যে তেওঁক প্ৰেমিক তথা অভিনেতা-প্ৰযোজক ৰাহুল ৰাজ সিঙেহে হত্যা কৰি আত্মহত্যাৰ ৰূপ দিছে। তেওঁলোকে ৰাহুলৰ বিৰুদ্ধে গোচৰ তৰিছিল। ২০১৮ চনত ৰাহুল ৰাজ সিঙে মুম্বাইৰ ডিণ্ডোছি অধিৱেশন আদালতত এক আবেদন দাখিল কৰি তেওঁক এই গোচৰৰপৰা অব্যাহতি দিবলৈ অনুৰোধ জনায়। আবেদনখনত প্ৰয়াত অভিনেত্ৰীগৰাকীৰ পিতৃ-মাতৃৰ ওপৰত দোষ জাপি দি ৰাহুলে কয় যে তেওঁৰ পিতৃ-মাতৃয়ে তেওঁৰ নামত গধুৰ ঋণ লৈছিল আৰু ঋণ পৰিশোধ কৰিব নোৱাৰি অভিনেত্ৰীগৰাকী হতাশাত ভুগিছিল আৰু সেয়েহে তেওঁ এই চৰম পদক্ষেপ গ্ৰহণ কৰিছিল।

বাহ্যিক সংযোগ

• ৱিকিমিডিয়া কমন্সত প্ৰত্যুষা বেনাৰ্জী সম্পৰ্কীয় মিডিয়া ফাইল।
• প্ৰত্যুষা বেনাৰ্জী সম্পৰ্কে ইণ্টাৰনেট মুভি ডাটাবেছত থকা তথ্য।