ভেলিয়া আবদেল-হুদা

ৰাজকুমাৰী ভেলিয়া
দাম্পত্য সঙ্গী	ৰাজকুমাৰ ওসমান-ওগলু
বাসগৃহ	ওসমান ওগলু
পিতৃ	তৌফিক আবু আল-হুদা

ৰাজকুমাৰী ভেলিয়া ওছমান-অগ্লু (জন্ম ভেলিয়া আবদেল-হুদা ), সাধাৰণতে ৰাজকুমাৰী লুলি (২৬ জানুৱাৰী ১৯১৬ – ২৯ নৱেম্বৰ ২০১২) আছিল এগৰাকী ব্ৰিটিছ শিল্প ইতিহাসবিদ আৰু সমাজসেৱক। বিশেষকৈ অক্সফৰ্ড বিশ্ববিদ্যালয়ত অধ্যয়ন কৰা প্ৰথমগৰাকী মুছলমান মহিলা হিচাপে তেওঁ উল্লেখযোগ্য। তেওঁ আছিল ব্ৰিটেইনৰ প্ৰভাৱশালী অভিজাত শ্ৰেণীত প্ৰৱেশ কৰা প্ৰথমগৰাকী মুছলমান মহিলা।

প্ৰাৰম্ভিক জীৱন

আবদেল-হুদাৰ জন্ম মিচৰৰ কায়ৰোত হৈছিল। তেওঁৰ পৰিয়ালটো আছিল দীৰ্ঘদিন ধৰি উচমানীয় সাম্ৰাজ্যৰ সৈতে সম্পৰ্ক থকা এগৰাকী তুৰ্কী কূটনীতিবিদ পৰিয়াল। উচমানীয় সাম্ৰাজ্যৰ পতনৰ পিছত এই পৰিয়ালটো নিৰ্বাসিত হয়।

তেওঁৰ ককাদেউতা শেষ উচমানীয় চুলতানৰ এজন উপদেষ্টা আৰু জ্যোতিষী আছিল আৰু তেওঁৰ পিতৃ তৌফিক আবু আল-হুদা পিছলৈ ট্ৰান্সজৰ্ডানৰ প্ৰধানমন্ত্ৰী হৈছিল।

আবদেল-হুদাই লেডী মাৰ্গাৰেট হলত শিক্ষা গ্ৰহণ কৰে, য’ত তেওঁ আধুনিক ইতিহাস অধ্যয়ন কৰি ১৯৩৯ চনত স্নাতক ডিগ্ৰী লাভ কৰে। ফলস্বৰূপে, তেওঁ অক্সফ’ৰ্ড বিশ্ববিদ্যালয়ত অধ্যয়ন কৰা প্ৰথমগৰাকী মুছলমান মহিলা হিচাপে পৰিচিতি লাভ কৰে।

দ্বিতীয় বিশ্বযুদ্ধৰ সময়ত ব্ৰিটিছ তথ্য সেৱাই তেওঁক কৰ্মত নিয়োগ কৰিছিল। প্ৰথমতে তেওঁ কায়ৰোত কৰ্মৰত আছিল। ইয়াতেই তেওঁ লেখিকা আৰু অভিযাত্ৰী ফ্ৰেয়া ষ্টাৰ্কৰ সৈতে পৰিচিত হয় আৰু দুয়োগৰাকী আজীৱন বন্ধুত্বত আবদ্ধ হয়। পিছলৈ তেওঁক ফিলিস্তিনলৈ পঠিওৱা হয়। তাত তেওঁ ফিলিস্তিনি আন্দোলনৰ সৈতে জড়িত হৈ পৰে। আবদেল-হুদাই জীৱনজুৰি ফিলিস্তিনি স্বাধীনতাৰ সমৰ্থন কৰিছিল আৰু বিশ্বাস কৰিছিল যে ব্ৰিটিছে ফিলিস্তিনি জনসাধাৰণৰ সৈতে বিশ্বাসঘাতকতা কৰিছিল।

যুদ্ধ শেষ হোৱাৰ পিছত তেওঁ অ্যান্থনি ব্লাণ্টৰ তত্ত্বাৱধানত কোৰ্টোল্ড ইনষ্টিটিউটত শিল্পৰ ইতিহাস অধ্যয়ন কৰে আৰু লণ্ডনৰ চেলচীত বাস কৰিবলৈ লয়।

ব্যক্তিগত জীৱন

১৯৬৩ চনত আবদেল-হুদাই তেওঁৰ সম্পৰ্কীয় ভাই প্ৰিন্স ওসমান-ওগলুৰ সৈতে বিবাহ বন্ধনত আবদ্ধ হয়। তেওঁ ব্ৰিটিছ সংসদ সদস্য ছাৰ জন ফষ্টাৰৰ সৈতে প্ৰায় ত্ৰিছ বছৰ ধৰি সম্পৰ্কত আছিল। ১৯৮২ চনত ছাৰ জন ফষ্টাৰৰ মৃত্যুৰ পাছত তেওঁ গভীৰ বিষণ্ণতাত ভুগিছিল। ইয়াৰ পাছত তেওঁ চিত্ৰাংকন আৰম্ভ কৰে। এই ক্ষেত্ৰত তেওঁ নিজে প্ৰস্তুত কৰা এক কঠোৰ পাঠ্যসূচী অনুসৰি কাম কৰিছিল, য’ত মানুহৰ দেহৰ গঠন সঠিকভাৱে প্ৰকাশ কৰিবলৈ শৰীৰস্থান বিদ্যা অধ্যয়নো অন্তৰ্ভুক্ত আছিল। এই উদ্দেশ্যে তেওঁ নিজৰ ঘৰৰ বৈঠকখানাত মানুহৰ সমান আকাৰৰ এটা কংকাল ৰাখিছিল, যি কিছুমান অতিথিৰ বাবে আতংক আৰু অস্বস্তিৰ কাৰণ হৈছিল।

তেওঁ তেওঁৰ আড়ম্বৰতাৰে ভৰা নৈশভোজ অনুষ্ঠান আৰু উচ্ছল ব্যক্তিত্বৰ বাবে পৰিচিত আছিল।

২০১২ চনৰ ২৯ নৱেম্বৰত, লণ্ডনত ৯৬ বছৰ বয়সত আবদেল-হুদাৰ মৃত্যু হয়।