মালাইকা অৰোৰা

মালাইকা অৰোৰা
২০২৩ চনত অৰোৰা
জন্ম	২৩ অক্টোবৰ, ১৯৭৩ (৫২ বছৰ) থানে, মহাৰাষ্ট্ৰ, ভাৰত
অন্য নাম	মালাইকা অৰোৰা খান
পেচা	অভিনেত্ৰী, নৃত্যশিল্পী, মডেল, ভিজে, দূৰদৰ্শন উপস্থাপিকা
সক্ৰিয় হৈ থকা সময়	১৯৯৭–বৰ্তমান
দাম্পত্যসঙ্গী	আৰবাজ খান (বি. ১৯৯৮; বিবি. ২০১৭)
সন্তান	১
আত্মীয়-স্বজন	অমৃতা অৰোৰা (ভনী)

মালাইকা অৰোৰা (ইংৰাজী: Malaika Arora; জন্ম: ২৩ অক্টোবৰ ১৯৭৩) এগৰাকী ভাৰতীয় অভিনেত্ৰী, নৃত্যশিল্পী, মডেল, ভিডিঅ' জকী আৰু দূৰদৰ্শন ব্যক্তিত্ব যিয়ে হিন্দী ভাষাৰ ছবিত অভিনয় কৰে। তেওঁ ২০০৮ চনত তেওঁৰ প্ৰাক্তন স্বামী আৰবাজ খানৰ সৈতে চলচ্চিত্ৰ প্ৰযোজক হিচাপে আত্মপ্ৰকাশ কৰিছিল। তেওঁলোকে 'আৰবাজ খান প্ৰডাকচন' নামৰ সংস্থাটো প্ৰতিষ্ঠা কৰিছিল, যিয়ে দবাং চলচ্চিত্ৰ শৃংখলা নিৰ্মাণ কৰিছিল। এগৰাকী অভিনেত্ৰী হিচাপে তেওঁ কাঁটে (২০০২) আৰু ইএমআই (২০০৮) আদি ছবিত অভিনয় কৰিছে। ইয়াৰ উপৰি তেওঁ "চাইয়া চাইয়া" (১৯৯৮), "গুড় নাালো ইশ্ক মিঠা" (১৯৯৮), "মাহী ৱে" (২০০২), "কাল ধামাল" (২০০৫) আৰু "মুন্নী বদনাম হুয়ী" (২০১০) আদি গীতৰ মিউজিক ভিডিঅ'ত অভিনয় কৰিছে।

প্ৰাৰম্ভিক জীৱন আৰু পটভূমি

মালাইকা অৰোৰাৰ নামটো ছোৱাহিলী শব্দ মালাইকাৰপৰা ৰখা হৈছে যাৰ অৰ্থ হৈছে "দেৱদূত।" তেওঁৰ জন্ম মহাৰাষ্ট্ৰৰ থানেত হৈছিল। তেওঁৰ মাতৃ জয়েচ পলিকৰ্প এগৰাকী মালয়ালী খ্ৰীষ্টান আৰু পিতৃ অনিল অৰোৰা আছিল ভাৰতীয় সীমান্তৰ চহৰ ফাজিলকাৰ এজন পঞ্জাবী হিন্দু, যিয়ে 'ইণ্ডিয়ান মাৰ্চেণ্ট নেভী'ত কাম কৰিছিল। তেওঁৰ ১১ বছৰ বয়সত পিতৃ-মাতৃৰ বিবাহ বিচ্ছেদ হয় আৰু তেওঁ ভনীয়েক অমৃতা অৰোৰা আৰু মাতৃৰ সৈতে চেম্বুৰলৈ গুচি আহে। তেওঁলোকক এগৰাকী একক মাতৃ হিচাপে তেওঁৰ মাকে ডাঙৰ-দীঘল কৰিছিল। তেওঁৰ পিতৃৰ পৰিয়ালটোৰ সৈতে এক সন্মানীয় সম্পৰ্ক আছিল।

তেওঁ চেম্বুৰৰ স্বামী বিবেকানন্দ স্কুলত মাধ্যমিক শিক্ষা সম্পূৰ্ণ কৰে। মডেলিঙৰ কেৰিয়াৰ আৰম্ভ কৰাৰ আগতে তেওঁ চেম্বুৰৰ সিন্ধী চছাইটিৰ বৰলাত বাস কৰিছিল।

ব্যক্তিগত জীৱন

সংগী ডিনো মৰিয়াৰ সৈতে অৰোৰা

এটা কফিৰ বিজ্ঞাপনৰ দৃশ্যগ্ৰহণৰ সময়ত হোৱা চিনাকিৰ সূত্ৰে ১৯৯৮ চনত অৰোৰাই বলীউডৰ অভিনেতা-পৰিচালক-প্ৰযোজক আৰবাজ খানৰ সৈতে বিবাহপাশত আবদ্ধ হয়। বিবাহৰপৰা বিবাহ বিচ্ছেদ নোহোৱালৈকে তেওঁ মালাইকা অৰোৰা খান নামেৰে পৰিচিত আছিল। ২০১৬ চনৰ ২৮ মাৰ্চত তেওঁলোকে পাৰস্পৰিক বুজা-বুজিৰ অভাৱৰ দোহাই দি বিচ্ছেদৰ কথা ঘোষণা কৰে। ২০১৭ চনৰ ১১ মে'ত তেওঁলোকৰ আনুষ্ঠানিকভাৱে বিবাহ বিচ্ছেদ হয়। তেওঁলোকৰ আৰ্হান খান (জন্ম: ৯ নৱেম্বৰ ২০০২) নামৰ এজন পুত্ৰ সন্তান আছে। বান্দ্ৰা ফেমিলি ক’ৰ্টৰ নিষ্পত্তি অনুসৰি, বিবাহ বিচ্ছেদৰ পিছত অৰোৰাই পুত্ৰৰ মূল তত্ত্বাৱধানৰ দায়িত্ব লাভ কৰে আৰু খানে সাক্ষাৎ কৰাৰ অধিকাৰ পায়। বলীউডৰ অভিনেতা ছলমান খান আৰু অভিনেতা-পৰিচালক-প্ৰযোজক সোহেল খান তেওঁৰ প্ৰাক্তন দেৱৰ। চিত্ৰনাট্যকাৰ চেলিম খান আছিল তেওঁৰ প্ৰাক্তন শহুৰেক।

২০১৬ চনত অৰোৰাই অভিনেতা অৰ্জুন কাপুৰৰ সৈতে প্ৰেমৰ সম্পৰ্কত আবদ্ধ হয়। ২০২৪ চনত অৰোৰা আৰু কাপুৰৰ বিচ্ছেদ হয়। ২০২৫ চনৰ আৰম্ভণিতে অৰোৰাই ডিনো মৰিয়াৰ সৈতে সম্পৰ্ক আৰম্ভ কৰে। তেওঁ ২০২০ চনত এগৰাকী সম্পূৰ্ণ নিৰামিষভোজী (Vegan) হৈ পৰে।

২০২২ চনৰ এপ্ৰিল মাহত মুম্বাই-পুনে এক্সপ্ৰেছৱেত এটা অনুষ্ঠানৰপৰা ঘৰলৈ উভতি অহাৰ সময়ত তিনিখন গাড়ীৰ মাজত হোৱা সংঘৰ্ষত তেওঁ এক দুৰ্ঘটনাত পতিত হয়। তেওঁক নৱী মুম্বাইৰ এপল’ হাস্পতাললৈ লৈ যোৱা হয় আৰু তাত তেওঁৰ কটা অংশত চিলাই কৰা হয়। ২০২৪ চনত তেওঁৰ সতীয়া পিতৃ অনিল মেহতাৰ আত্মহননৰ ফলত মৃত্যু হয়।

বাহ্যিক সংযোগ

• ইনষ্টাগ্ৰামত মালাইকা অৰোৰা
• Malaika Arora সম্পৰ্কে বলিউড হাংগামাত থকা তথ্য
• Malaika Arora সম্পৰ্কে ইণ্টাৰনেট মুভি ডাটাবেছত থকা তথ্য।