মেডেলিন ফ্ৰেঞ্চ-মালেন

মেডেলিন ফ্ৰেঞ্চ-মালেন
ব্যক্তিগত তথ্য
জন্ম	৩০ ডিচেম্বৰ ১৮৮০ মাল্টা
মৃত্যু	২৬ মে', ১৯৪৪ (৬৩ বছৰ) ডাবলিন, আয়াৰলেণ্ড
ৰাষ্ট্ৰীয়তা	আইৰিছ
পেচা	শ্ৰমিক আন্দোলনৰ কৰ্মী
সামৰিক সেৱা
আনুগত্য	আইৰিছ চিটিজেন আৰ্মী
ৰেঙ্ক	লেফটেনেণ্ট
যুদ্ধ	ইষ্টাৰ ৰাইজিং

মেডেলিন ফ্ৰেঞ্চ-মালেন (৩০ ডিচেম্বৰ ১৮৮০ – ২৬ মে' ১৯৪৪) এগৰাকী আইৰিছ বিপ্লৱী আৰু শ্ৰমিক আন্দোলনৰ কৰ্মী আছিল, যিয়ে ১৯১৬ চনত ডাবলিনত সংঘটিত ইষ্টাৰ ৰাইজিঙত অংশগ্ৰহণ কৰিছিল।

ফ্ৰেঞ্চ-মালেন ৰেডিকেল জাতীয়তাবাদী মহিলা সংগঠন ইনঘিনিধে না হেৰোনৰ সদস্যা আছিল। ১৯১৩ চনৰ ডাবলিন লক-আউটৰ সময়ত তেওঁ লিবাৰ্টি হলত ছুপ কিচেনত কাম কৰিছিল। পিছলৈ তেওঁ আইৰিছ চিটিজেন আৰ্মীত যোগদান কৰে। ইষ্টাৰ ৰাইজিঙৰ সময়ত তেওঁ প্ৰাথমিক চিকিৎসা শিবিৰত কাম কৰিছিল। বিদ্ৰোহৰ পিছত তেওঁ গ্ৰেপ্তাৰ হৈছিল যদিও পিছৰ মাহত মুক্তি লাভ কৰে। তেওঁ শিন ফেইনত যোগদান কৰি ১৯২০ চনত ৰাথমাইনছ জিলা পৰিষদলৈ নিৰ্বাচিত হৈছিল।

প্ৰাৰম্ভিক জীৱন

মেডেলিন ফ্ৰেঞ্চ-মালেন ৩০ ডিচেম্বৰ ১৮৮০ চনত মাল্টাত জন্মগ্ৰহণ কৰে। তেওঁৰ পিতৃ ছেণ্ট লৰেঞ্চ ফ্ৰেঞ্চ-মালেন ৰয়েল নেভিৰ এজন চিকিৎসক আছিল। তেওঁৰ দুজন কনিষ্ঠ ভাতৃ আছিল—ছেণ্ট লৰেঞ্চ পেট্ৰিক জ’জেফ (১৮৯০–১৮৯১) আৰু ডগলাছ (১৮৯৩–১৯৪৩)।

মহিলা অধিকাৰ আৰু ভোটাধিকাৰ আন্দোলন

ফ্ৰেঞ্চ-মালেনৰ ৰাজনৈতিক আগ্ৰহ কুমাৰীবয়সতেই আৰম্ভ হৈছিল। তেওঁৰ পিতৃ এজন প্ৰতিশ্ৰুতিবদ্ধ পাৰ্নেলপন্থী আছিল আৰু ডাণ্ড্ৰামস্থিত তেওঁলোকৰ ঘৰ ৰাজনৈতিক অভিযানৰ কেন্দ্ৰ আছিল। তেওঁ এগৰাকী ৰেডিকেল নাৰীবাদী আৰু গণৰাজ্যবাদী আছিল। তেওঁ মহিলাসকলৰ ভোটাধিকাৰক মৌলিক অধিকাৰ বুলি গণ্য কৰিছিল আৰু ভোটাধিকাৰ আন্দোলনত যোগদান কৰিছিল। এই আন্দোলন ডাবলিন মেট্ৰোপলিটান পুলিচৰ "মুভমেণ্ট অৱ এক্সট্ৰিমিষ্টছ" প্ৰতিৱেদনত অন্তৰ্ভুক্ত হৈছিল।

তেওঁ ইনঘিনিধে না হেৰোনত যোগদান কৰে, যাক ১৯০০ চনত মড গন প্ৰতিষ্ঠা কৰিছিল। ১৯১৩ চনত এই সংগঠন কুমান না বানলৈ ৰূপান্তৰিত হয়। কুমান না বানৰ লক্ষ্য আছিল আইৰিছ গণৰাজ্যৰ সংগ্ৰামত পুৰুষৰ কাষে কাষে থিয় দিয়া। ফ্ৰেঞ্চ-মালেন সমাজতান্ত্ৰিক ধাৰাৰ আছিল আৰু জেমছ কনলিৰ আদৰ্শত আস্থা ৰাখিছিল।

১৯১৬ চনৰ ইষ্টাৰ ৰাইজিং

১৯১৬ চনৰ ইষ্টাৰ ৰাইজিঙৰ সময়ত ফ্ৰেঞ্চ-মালেন আইৰিছ চিটিজেন আৰ্মীৰ লেফটেনেণ্ট হিচাপে সেৱা আগবঢ়াইছিল। তেওঁ ছেণ্ট ষ্টিফেনছ গ্ৰীণ আৰু ৰয়েল কলেজ অৱ ছাৰ্জনছ গেৰিছনত কৰ্মৰত আছিল।

ছেণ্ট ষ্টিফেনছ গ্ৰীণত তেওঁ ১৫ গৰাকী মহিলা সদস্যাৰ নেতৃত্ব দি চিকিৎসা কেন্দ্ৰ আৰু ফিল্ড কিচেন স্থাপন কৰিছিল। তেওঁলোক শেলবৰ্ণ হোটেল আৰু আশেপাশৰ অট্টালিকাৰপৰা গুলীচালনাৰ সন্মুখীন হৈছিল। কলেজ অৱ ছাৰ্জনছ আত্মসমৰ্পণ কৰাৰ পাছত তেওঁ ৭৭ গৰাকী মহিলাৰ সৈতে বন্দী হৈছিল, যাৰ ভিতৰত তেওঁৰ জীৱনসঙ্গিনী ক্যাথলিন লিনো আছিল। তেওঁ ৰিচমণ্ড বেৰেকছ, কিলমেইনহাম জেইল আৰু মাউণ্টজয় জেইলত বন্দী আছিল। ৫ জুন ১৯১৬ চনত তেওঁ মুক্তি লাভ কৰে।

ফ্ৰেঞ্চ-মালেন আৰু ক্যাথলিন লিন

ফ্ৰেঞ্চ-মালেন ইনঘিনিধে না হেৰোনৰ জৰিয়তে ক্যাথলিন লিনক চিনিছিল। ১৯১৫ চনত তেওঁ ৰাথমাইনছৰ বেলগ্ৰেভ ৰ’ডত লিনৰ ঘৰলৈ উঠি যায় আৰু দুয়ো ৩০ বছৰ একেলগে বাস কৰে, ১৯৪৪ চনত ফ্ৰেঞ্চ-মালেনৰ মৃত্যুৰ আগলৈকে।

কাৰাগাৰত থকা সময়ত তেওঁ নিজৰ ডায়েৰীত লিখিছিল যে লিনৰ সৈতে থাকিলে তেওঁ কাৰাগাৰৰ ভয় নাপায়। তেওঁলোক আইৰিছ বিপ্লৱৰ কুইয়াৰ মহিলা কৰ্মীসকলৰ ভিতৰত অন্যতম বুলি গণ্য কৰা হয়।

ঐতিহ্য: ছেইণ্ট আল্টানছ

ফ্ৰেঞ্চ-মালেন আৰু ক্যাথলিন লিনে ১৯১৯ চনত ছেইণ্ট আল্টানছ শিশু চিকিৎসালয় প্ৰতিষ্ঠা কৰে। এইখন মহিলা-চালিত শিশু চিকিৎসালয় আছিল। প্ৰথম বিশ্বযুদ্ধৰ পিছত বহু শিশু জন্মগত ছিফিলিছ আৰু ক্ষয়ৰোগত আক্ৰান্ত হৈছিল।

ৰাষ্ট্ৰ আৰু কেথলিক গীৰ্জাৰ বাধাৰ সত্বেও তেওঁলোকে টীকাকৰণ কাৰ্যসূচী আৰম্ভ কৰে। তেওঁলোকৰ প্ৰচেষ্টাই আয়াৰলেণ্ডত বিচিজি টীকাকৰণ কাৰ্যসূচীৰ ভিত্তি স্থাপন কৰে।

মৃত্যু

মেডেলিন ফ্ৰেঞ্চ-মালেন ২৬ মে' ১৯৪৪ চনত ডাবলিনৰ এখন নাৰ্চিং হোমত ৬৩ বছৰ বয়সত মৃত্যুবৰণ কৰে। তেওঁক গ্লাছনেভিন সমাধিক্ষেত্ৰত সমাধিস্থ কৰা হয়।

তেওঁৰ অন্ত্যেষ্টিক্ৰিয়া ১৯৪৪ চনৰ আইৰিছ সাধাৰণ নিৰ্বাচনৰদিনাই অনুষ্ঠিত হৈছিল।