মোৰেনা চেলৰী

মোৰেনা চেলৰী
জন্ম	২০ এপ্ৰিল, ১৯২২ চান ছেলভাডৰ
মৃত্যু	২২ এপ্ৰিল, ১৯৭২ (৫০ বছৰ) পুৱেৰ্টা ডেল ডায়বলো, পাঞ্চিমালকো
ৰাষ্ট্ৰীয়তা	এল ছেলভাডৰ
পেচা	লোক-নৃত্যশিল্পী

মোৰেনা চেলৰী (২০ এপ্ৰিল ১৯২২ – ২২ এপ্ৰিল ১৯৭২) এগৰাকী এল ছেলভাডৰৰ লোক-নৃত্যশিল্পী আছিল। তেওঁ চান ছেলভাডৰত জন্মগ্ৰহণ কৰিছিল আৰু অতি কম বয়সৰ পৰাই নৃত্য জীৱন আৰম্ভ কৰিছিল। চেলৰীয়ে সমগ্ৰ পশ্চিমীয়া বিশ্বত অনুষ্ঠান পৰিৱেশন কৰিছিল আৰু নিজৰ দেশত এখন লোক-নৃত্যৰ বিদ্যালয় স্থাপন কৰিছিল। ভৰিৰ পক্ষাঘাতৰ পৰা পৰিত্ৰাণ পোৱাৰ পিছত তেওঁ মৃত্যুৰ লৈকে কেৱল বগা সাজহে পৰিধান কৰিছিল।

জীৱনী

১৯২২ চনৰ ২০ এপ্ৰিলত এল ছেলভাডৰৰ চান ছেলভাডৰৰ চান জোছ চুবুৰীত মোৰেনা চেলৰীৰ জন্ম হৈছিল। চাৰি বছৰ বয়সৰ পৰাই তেওঁ নৃত্য আৰম্ভ কৰিছিল। এজনীয়া কালত লুই মাৰ্নে নামৰ এজন ব্যক্তিয়ে চান ছেলভাডৰৰ এখন ফাৰ্মত চেলৰীৰ নৃত্যৰ দৃশ্যগ্ৰহণ কৰিছিল, যিটো আমেৰিকা যুক্তৰাষ্ট্ৰত প্ৰদৰ্শিত হৈছিল আৰু নেচনেল জিঅ’গ্ৰাফিকৰ প্ৰবন্ধত নথিভুক্ত কৰা হৈছিল। তেওঁৰ ৰাজহুৱা অনুষ্ঠানসমূহলৈ বহু বিশিষ্ট লোকৰ আগমন ঘটিছিল। লেখক এডিলবেৰ্টো টৰেছে তেওঁৰ বিষয়ে লিখিছিল যে তেওঁ "এল ছেলভাডৰৰ বাবে বহু ৰাষ্ট্ৰদূততকৈ বেছি কাম কৰিছে।"

চেলৰীয়ে মেক্সিকো চিটিৰ পালাচিঅ' ডি বেলাছ আৰ্টেছত অধ্যয়ন কৰিবলৈ জলপানি লাভ কৰিছিল। ১৯৬১ চনত চেলৰীয়ে নিজৰ নামত এটা নৃত্য দল গঠন কৰিছিল। তেওঁ এল ছেলভাডৰৰ পৰ্যটন মন্ত্ৰালয়ৰ দ্বাৰা আয়োজিত অনুষ্ঠানসমূহৰ দায়িত্বত আছিল। কৰ্মজীৱনৰ সময়ত তেওঁ সমগ্ৰ মধ্য আমেৰিকা, নিউয়ৰ্ক চিটি আৰু বনত অনুষ্ঠান পৰিৱেশন কৰিছিল। কষ্টা ৰিকাত তেওঁ "মোৰেনা ডি কুচকাটলান" উপনাম লাভ কৰিছিল। চান ছেলভাডৰলৈ ঘূৰি অহাৰ পিছত তেওঁ ফোক ডান্স একাডেমী প্ৰতিষ্ঠা কৰে আৰু বিদ্যালয় তথা পুনৰ্সংস্থাপন কেন্দ্ৰসমূহৰ বাবে বিনামূলীয়া প্ৰদৰ্শনৰ আয়োজন কৰিছিল।

মৃত্যু

পঞ্চাশ বছৰীয়া জন্মদিনৰ পুৱা মোৰেনা চেলৰী নিৰুদ্দেশ হৈছিল। পাঞ্চিমালকো গাঁৱৰ ওচৰৰ পুৱেৰ্টা ডেল ডায়বলো পাহাৰৰ তলত তেওঁৰ মৃতদেহ পোৱা গৈছিল। স্থানীয় আৰক্ষীয়ে তেওঁক পাহাৰৰ ওপৰৰ পৰা পেলাই দিয়া বুলি সিদ্ধান্ত লৈছিল, যদিও তেওঁৰ আত্মীয়সকলে কৈছিল যে নিজৰ নৃত্য দলটো চলাই নিবলৈ কৰা বিনিয়োগত লোকচান হোৱাৰ বাবে তেওঁ হতাশাত ভুগি আছিল।