সমললৈ যাওক

য়িলিন ঝং

অসমীয়া ৱিকিপিডিয়াৰ পৰা
য়িলিন ঝং

ইলিন, ২০১৪ চনত
জন্ম চীন
পেচা ঔপন্যাসিক, সাংবাদিক, চিত্ৰনাট্যকাৰ, স্তম্ভলেখক, ৰেডিঅ’ সঞ্চালক, কবি, সাহিত্য আৰু নাট্য সমালোচক
ভাষা চীনা (মাতৃভাষা), ইংৰাজী
শিক্ষা স্নাতকোত্তৰ (সাংস্কৃতিক অধ্যয়ন, যুক্তৰাজ্য) স্নাতক (নাটক, চীন)
মাতৃশিক্ষায়তন ইউনিভাৰ্ছিটি অৱ ৱাৰউইক চেণ্ট্ৰেল একাডেমী অৱ ড্ৰামা
সময় ১৯৮৪–বৰ্তমান
ধৰণ সাহিত্যিক উপন্যাস, সাহিত্য সমালোচনা, প্ৰবন্ধ, কবিতা, নাটক, চিত্ৰনাট্য
ৱেবছাইট

য়িলিন ঝং (চীনা: 钟宜霖 / 鍾宜霖) হৈছে এগৰাকী ব্ৰিটিছ-চীনা সাংবাদিক, চিত্ৰনাট্যকাৰ আৰু সৰ্বাধিক বিক্ৰী হোৱা ঔপন্যাসিক।[1] তেওঁ ওঠৰখন উপন্যাস, দুখন চলচ্চিত্ৰৰ চিত্ৰনাট্য, দহখন গ্ৰন্থ আৰু বহুতো কবিতা, সাহিত্য সমালোচনা আদি ৰচনা কৰিছে। তেওঁ বৰ্তমান লণ্ডনত বাস কৰে।[2]

প্ৰাৰম্ভিক জীৱন

[সম্পাদনা কৰক]

য়িলিন ঝঙৰ জন্ম চীনত হৈছিল। তেখেতৰ পিতৃ বেইজিঙস্থিত চাইনা ফেডাৰেচন অৱ লিটাৰেৰী এণ্ড আৰ্ট চাৰ্কলছৰ সাহিত্য সম্পাদক আছিল, যদিও সাংস্কৃতিক বিপ্লৱৰ সময়ছোৱাত তেওঁক দক্ষিণ-পশ্চিম চীনলৈ খনিকৰ হিচাপে নিৰ্বাসিত কৰা হৈছিল। ঝঙে পাঁচ বছৰ বয়সত প্ৰথম কবিতা লিখিছিল, যিটো সাত বছৰ বয়সত প্ৰকাশ পাইছিল,[3] আৰু বাৰ বছৰ বয়সত তেওঁৰ প্ৰথম চুটিগল্প ছাংহাই যুৱ সাহিত্যত প্ৰকাশ পাইছিল। তেৰ বছৰ বয়সত তেওঁ গৱেষণামূলক থিছিছ ‘Who broke up the wood-stone engagement?’ লিখিছিল আৰু ইয়াক ১৯৯৩ চনত এ ড্ৰিম অৱ ৰেড মেনশ্বনছ জাৰ্নেল[4] নামৰ একাডেমিক আলোচনীত প্ৰকাশ কৰা হৈছিল।

চৈধ্য বছৰ বয়সত ঝঙে প্ৰথমখন পূৰ্ণদৈৰ্ঘ্যৰ উপন্যাস এমব্ৰেছিং দ্য চান লিখিছিল, যিখন প্ৰকাশ হোৱা নাছিল। ষোল্ল বছৰ বয়সত লিখা তেওঁৰ দ্বিতীয়খন উপন্যাস ছানশ্বাইন এণ্ড দ্য মনচুন ১৯৯৫ চনত প্ৰকাশ পাইছিল আৰু তেওঁ আটাইতকৈ কম বয়সীয়া প্ৰতিভাৱান লেখিকা হিচাপে ৰাষ্ট্ৰীয় খ্যাতি লাভ কৰিছিল; [5] তেখেতক চীন চেণ্ট্ৰেল টেলিভিছনৰ বুক ৰিভিউ[6] অনুষ্ঠানত সাক্ষাৎকাৰ লোৱা হৈছিল। ১৯৯২ চনত ছাংহাই যুৱ সাহিত্যত প্ৰকাশিত এটা চুটিগল্পৰ বাবে ৰাষ্ট্ৰীয় পাঠকে ভোট দি “বেষ্ট ৱাৰ্ক অৱ দ্য ইয়াৰ” বঁটা প্ৰদান কৰিছিল।[7]

ষোল্ল বছৰ বয়সত ঝঙক চীনৰ তিনিখন শীৰ্ষ কলা বিশ্ববিদ্যালয়ে নামভৰ্তিৰ প্ৰস্তাৱ আগবঢ়াইছিল। তেওঁ চেণ্ট্ৰেল একাডেমী অৱ ড্ৰামাত অধ্যয়ন কৰাৰ সিদ্ধান্ত লৈ নাট্য সাহিত্য আৰু নাটক লিখন বিষয়ত শিক্ষা গ্ৰহণ কৰে আৰু নাট্য সঞ্চালক বিভাগৰ পৰীক্ষাতো উত্তীৰ্ণ হয়।[1]

শিক্ষা

[সম্পাদনা কৰক]

ঝঙে চীনৰ বেইজিঙস্থিত চেণ্ট্ৰেল একাডেমী অৱ ড্ৰামাত অধ্যয়ন কৰি নাট্য সাহিত্য আৰু নাট্য ৰচনাত ডিষ্টিংচনসহ বি এ ডিগ্ৰী লাভ কৰে।

২০০২ চনত ঝঙে চীন এৰি ৱাৰউইক বিশ্ববিদ্যালয়ৰপৰা সাংস্কৃতিক অধ্যয়নত এম এ ডিগ্ৰী লাভ কৰে।[8] স্নাতকোত্তৰ ডিগ্ৰী লাভ কৰাৰ পাছত তেওঁ সম্পূৰ্ণৰূপে যুক্তৰাজ্যলৈ প্ৰব্ৰজন কৰে আৰু তেতিয়াৰপৰাই লণ্ডনত বাস কৰি আছে।[2]

কেৰিয়াৰ

[সম্পাদনা কৰক]

য়িলিন ঝঙে পাঁচ বছৰ বয়সৰপৰাই নিজৰ সৃষ্টিশীল সাহিত্য ৰচনা আৰম্ভ কৰিছিল। ১৯৯৫ চনত তেওঁৰ প্ৰথম উপন্যাস ছানশ্বাইন এণ্ড দ্য মনচুন প্ৰকাশ পায়।[5] ১৯৯৫ চনৰপৰা ২০০২ চনলৈকে ঝং বেইজিংত থকাৰ সময়ত বেইজিং টিভি ষ্টেচন, বেইজিং ব্ৰডকাষ্টিং ষ্টেচন আৰু বিভিন্ন আলোচনী আৰু বাতৰি কাকতত কাম কৰিছিল,[5] তিনিখন উপন্যাস, এখন ৰচনা আৰু এখন চুটিগল্প সংকলনকে ধৰি পাঁচখন গ্ৰন্থ প্ৰকাশ কৰিছিল।[5] ইফালে, তেওঁ এগৰাকী সফল সাংবাদিকও হৈ পৰে আৰু চীনত ফুলি উঠা আই টি প্ৰযুক্তিৰ বাতৰি প্ৰকাশৰ ক্ষেত্ৰত তেওঁৰ ব্যতিক্ৰমী অৱদানৰ বাবে ৰাষ্ট্ৰীয় বঁটা লাভ কৰে।[5] ঝঙে ঊনৈছ বছৰ বয়সত ছানশ্বাইন এণ্ড দ্য মনচুন (নিজৰ উপন্যাসৰপৰা সংকলিত) এখন চলচ্চিত্ৰৰ চিত্ৰনাট্য লিখিছিল আৰু ১৯৯৬ চনত চীনা যুৱ চলচ্চিত্ৰ চিত্ৰনাট্যৰ বাবে উৎকৃষ্টতা বঁটা লাভ কৰিছিল।[5] সম্পাদকলৈ তেওঁৰ পত্ৰখন সমসাময়িক চীনা সাহিত্যৰ অন্যতম লেখকৰ তথ্যচিত্ৰ হিচাপে ‘এক ব্যক্তিৰ সাহিত্যিক ইতিহাস’ (হাৰ্ভেষ্ট লিটাৰেৰী মেগাজিনৰ মুখ্য সম্পাদক চেং ইয়ংছিনৰদ্বাৰা)ত প্ৰকাশ পায়।[6] ব্ৰিটেইনলৈ প্ৰব্ৰজন কৰাৰ আগতে ঝং চীনৰ অন্যতম উল্লেখযোগ্য সমসাময়িক মহিলা লেখিকা আছিল,[1] আৰু তেওঁ ‘৭০ৰ দশকৰ পিছৰ প্ৰজন্ম’ লেখিকা সম্প্ৰদায়ৰ অন্তৰ্গত আছিল।[1]

২০০২ চনত ব্ৰিটেইনলৈ প্ৰব্ৰজন কৰাৰ পাছত ঝঙে বেনামীভাৱে লণ্ডনত বাস কৰি আহিছে আৰু চীনা ভাষাত কল্পকাহিনী আৰু ৰচনা লিখা অব্যাহত ৰাখিছে। লণ্ডন চিংগল ডায়েৰী (২০০৯) ব্ৰিটেইনত লিখা আৰু চীনত প্ৰকাশিত তেওঁৰ প্ৰথম ধাৰাবাহিক।[6] লণ্ডন লাভ ষ্ট’ৰি ২০১০ চনত প্ৰকাশ পাইছিল আৰু অনলাইন বিক্ৰীৰ ক্ষেত্ৰত বেষ্টচেলাৰ হিচাপে স্থান লাভ কৰিছিল।[6] তেওঁৰ উপন্যাস চাইনাটাউন (২০০৫ চনত লণ্ডনত লিখা) ২০১১ চনত ‘হাৰ্ভেষ্ট’ত মুক্তি পাইছিল, য’ত হা জিন, য়িলিন ঝং আৰু কি বাং ইউয়ানৰ ৰচনাসমূহ ‘অভাৰচি-চাইনিজ ৰাইটাৰ্ছৰ বিশেষ বিষয়’ হিচাপে একত্ৰিত হৈছিল।[6] ২০১২ চনত লণ্ডন গ্ৰন্থমেলাত অংশগ্ৰহণ কৰা ঝঙে বেইজিঙৰ বহু লেখক বন্ধুক লগ পাইছিল।[1] ঝঙে বাতৰি কাকত আৰু নেচনেল ড্ৰামা ষ্টাডিৰ বাবেও লণ্ডনৰ নাট্য সমালোচনা লিখিছিল।[1]

২০১৩ চনত তেওঁৰ উপন্যাস ব্যক্তিগত বিবৃতি (২০০০ চনত বেইজিংত লিখা) ছাংহাইত প্ৰকাশ পায়।[6] ২০১৩ চনত ঝঙে চেনেল ৪ ৰ ৰিয়েলিটি ডেটিং টিভি শ্ব’ ফাষ্ট ডেটচত অংশগ্ৰহণ কৰি নিজৰ চৰিত্ৰত অভিনয় কৰে।[1] ২০১৪ চনত ‘হাৰ্ভেষ্ট’য়ে চাইনাটাউনৰ কিণ্ডল সংস্কৰণ প্ৰকাশ কৰে; [6] ২০১৫ চনত পেপাৰবেক সংস্কৰণটো প্ৰকাশ পায়।[6]

২০১৫ চনত ঝঙে নিউয়ৰ্কলৈ ভ্ৰমণ কৰি ইংৰাজীত প্ৰথমখন উপন্যাস ডিয়াৰ নিউয়ৰ্ক লিখিবলৈ আৰম্ভ কৰে। ২০০৫ চনত লণ্ডনত লিখা ইন লণ্ডন উপন্যাসখন ২০১৮ চনৰ ফেব্ৰুৱাৰী মাহত চীনত প্ৰকাশ পাইছিল।[6] ২০১৭–১৮ চনত ঝঙে চীনৰ সংবাদ মাধ্যম ‘চাউদাৰ্ণ উইকেণ্ড’ কাকতৰ বাবে ‘দ্য লণ্ডন দৃশ্য’ শীৰ্ষক স্তম্ভ লিখিছিল।[1]

২০২০ চনলৈকে ঝঙে আঠখন উপন্যাসকে ধৰি দহখন কিতাপ প্ৰকাশ কৰিছিল।[1] কিন্তু চীনত তেওঁৰ সকলো ছ’চিয়েল মিডিয়া একাউণ্ট বন্ধ হৈ থকাৰ বাবে ২০২০ চনৰ পিছত তেওঁ নতুন উপন্যাস প্ৰকাশ কৰিবলৈ প্ৰকাশক বিচাৰি পোৱা কঠিন হয়। ২০২৫ চনত তেওঁ চীনৰ বাহিৰত নিজৰ অপ্ৰকাশিত উপন্যাসসমূহ স্ব-প্ৰকাশ কৰিবলৈ লুলু প্লেটফৰ্ম ব্যৱহাৰ আৰম্ভ কৰে। তেওঁৰ শেহতীয়া উপন্যাস ৭-মিনিট লাভ ২০২৪ চনৰ শেষৰফালে আৰু ২০২৫ চনত লিখা হয়।

ভাষণ নিষেধাজ্ঞা

[সম্পাদনা কৰক]

৬ ফেব্ৰুৱাৰী ২০২০ তাৰিখে ৱুহানত ক'ভিড-১৯ৰ 'আঠজন ভদ্ৰলোক'ৰ ভিতৰত এজন ড° লি ৱেনলিয়াঙৰ মৃত্যুৰ ঠিক পিছতেই য়িলিন ঝঙে ডা° লিৰ মৃত্যুক সন্দেহজনক বুলি প্ৰশ্ন কৰি এটা ৱেইবো পোষ্ট কৰিছিল। তেওঁ সন্দেহ প্ৰকাশ কৰিছিল যে ডা° লিৰ মৃত্যু প্ৰাকৃতিক কাৰণত হোৱা নাছিল, বৰং ডিচেম্বৰ ২০১৯ৰপৰা জানুৱাৰী ২০২০লৈ ক'ভিড-১৯ সংক্ৰমণৰ সময়ছোৱাত ৱুহানৰ কিছুমান দুৰ্নীতিগ্ৰস্ত বিষয়াৰ দুৰ্নীতিৰ প্ৰমাণ নষ্ট কৰিবলৈ তেওঁক হত্যা কৰা হৈছিল। তেওঁৰ পোষ্টটো তৎক্ষণাত ছিনা ৱেইবোত ডিলিট কৰা হয় আৰু তেওঁক এসপ্তাহৰ বাবে পোষ্ট কৰিবলৈ নিষেধাজ্ঞা আৰোপ কৰা হয়। তাৰ পিছত চীনৰ বহু চৰকাৰী সংবাদ মাধ্যমে তেওঁক সমালোচনা কৰে, লগতে চিএনএনেও ডা° লি ৱেনলিয়াঙৰ মৃত্যুক সন্দেহজনকভাৱে প্ৰশ্ন উত্থাপন কৰে।[9]

এসপ্তাহৰ পিছত, ১৪ ফেব্ৰুৱাৰীত, কথা ক'বলৈ ‘অনুমতি’ পোৱাৰ দিনটোত, য়িলিন ঝঙে তেওঁৰ ৱেইবো একাউণ্টত কেচ কৰা ফটোৰ সৈতে ৫,০০০ শব্দৰ এটা অনুমানমূলক প্ৰবন্ধ ‘লি ৱেনলিয়াঙচ লাইফ এণ্ড ডেথ লাইন’ প্ৰকাশ কৰে। সেই প্ৰবন্ধটোত ডা° লি ৱেনলিয়াঙ সংক্ৰমিত হোৱাৰ দিনৰপৰা পৃথকে ২১ দিন চিকিৎসালয়ত ভৰ্তি হৈ থাকি অৱশেষত ৰোগ নিৰ্ণয় হোৱালৈকে, আৰু ২৬ দিন চিকিৎসালয়ত ভৰ্তি হৈ থকাৰ পিছত আনুষ্ঠানিকভাৱে ‘মৃত ঘোষণা’ কৰা হোৱালৈকে সম্পূৰ্ণ ঘটনাক্ৰম বিশ্লেষণ কৰা হৈছিল।[10] ইয়াৰ লগে লগে তেওঁক পুনৰ ৱেইবোত কথা কোৱাত নিষেধাজ্ঞা আৰোপ কৰা হয় আৰু ৭৮,৫০০ অনুগামী থকা তেওঁৰ ৱেইবো একাউণ্ট এবছৰৰ বাবে বন্ধ কৰা হয়।[11]

১৩ ফেব্ৰুৱাৰীত, চীনৰ কেন্দ্ৰীয় চৰকাৰে হুবেইত থকা দুজন পাৰ্টি কমিটিৰ সম্পাদকক অপসাৰণ কৰাৰ ঠিক পিছতেই, য়িলিন ঝঙে তেওঁৰ লণ্ডনৰ ঘৰৰ ব্ৰডবেণ্ড সংযোগ হঠাতে হেকাৰৰদ্বাৰা কাটি পেলোৱা বুলি দাবী কৰে।[12][10]

২০২০ চনৰ এপ্ৰিল মাহত, চীনত জিমিয়ান নিউজে য়িলিন ঝংক সাক্ষাৎকাৰ লোৱাৰ সময়ত, তেওঁ ৬ ফেব্ৰুৱাৰীৰপৰা এপ্ৰিললৈকে ক’ভিড-১৯ বিষয়টো পৰ্যালোচনা কৰি মহামাৰীৰ পৰিসংখ্যা লুকুৱাই ৰখা, লি ৱেনলিয়াঙৰ চিকিৎসাত পলম কৰা আৰু মৃত্যুৰ মুখলৈ ঠেলি দিয়া আদিকে ধৰি হুবেই চৰকাৰৰ একাধিক সিদ্ধান্তৰ সমালোচনা কৰে। কিন্তু সংবেদনশীল বিষয়-বস্তুৰ বাবে সংবাদ প্ৰতিৱেদনত তেওঁ উত্থাপন কৰা কিছুমান কথাহে সীমিতভাৱে প্ৰকাশ কৰা হয়।[13][14] ফলতঃ তেওঁ নিজৰ সম্পূৰ্ণ ভাষণৰ বিষয়-বস্তু ইউটিউবত প্ৰকাশ কৰে।[15]

প্ৰায় একে সময়তে, ৱুহানৰ লেখিকা ফাং ফাংঙে তেওঁৰ ৱুহান ডায়েৰী আমেৰিকা আৰু জাৰ্মানীত প্ৰকাশ কৰাৰ সময়ছোৱাত, এমাজনে য়িলিন ঝংক এটা আনুষ্ঠানিক জাননী প্ৰেৰণ কৰি জনায় যে তেওঁলোকৰ কিণ্ডল ডাইৰেক্ট পাব্লিছিং (KDP) লেখক একাউণ্ট বন্ধ কৰি দিয়া হৈছে আৰু তেওঁৰ সকলো কিণ্ডল কিতাপ কিণ্ডল ষ্ট'ৰৰপৰা আঁতৰোৱা হৈছে, যদিও তেওঁৰ সকলো কিণ্ডল কিতাপ কল্পকাহিনী আৰু তিনি বছৰতকৈও অধিক পূৰ্বে KDPৰ জৰিয়তে প্ৰকাশ কৰা হৈছিল।[16]

৬ ডিচেম্বৰত, এবছৰৰ নিষেধাজ্ঞাৰ পিছত পুনৰুদ্ধাৰ হোৱা তেওঁৰ ৱেইবো একাউণ্টটো পুনৰ স্থায়ীভাৱে বন্ধ কৰা হয়। ৱেইবোৱে ঘোষণা কৰে যে ৮৩,৮০৮ জন অনুগামী থকা য়িলিন ঝংৰ একাউণ্টটো ক’ভিড-১৯ আৰু অন্যান্য ৰাজনৈতিক পৰ্যালোচনাসম্পৰ্কীয় ‘ক্ষতিকাৰক ভাষণ’ৰ বাবে স্থায়ীভাৱে বন্ধ কৰা হৈছে আৰু সকলো বিষয়-বস্তু অদৃশ্য কৰা হৈছে।[17]

৭ ডিচেম্বৰ ২০২১ তাৰিখে, তেওঁৰ ৱেচাট অফিচিয়েল একাউণ্ট ‘য়িলিন ঝং আন লণ্ডন’ বন্ধ কৰি দিয়া হয় আৰু সকলো প্ৰবন্ধ মচি পেলোৱা হয়, যাৰ ফলত তেওঁ চীনত জনসন্মুখত সম্পূৰ্ণৰূপে নিষিদ্ধ হয়।

গ্ৰন্থপঞ্জী

[সম্পাদনা কৰক]

উপন্যাস

[সম্পাদনা কৰক]
  1. ছানশ্বাইন এণ্ড দ্য মনচুন 《阳光雨季》(উপন্যাস, জানুৱাৰী ১৯৯৫)
  2. ছে লাভ 《言情》(উপন্যাস, ছেপ্টেম্বৰ ১৯৯৮)
  3. এ লাভ ফিকশন 《非一般爱情小说》(উপন্যাস, ছেপ্টেম্বৰ ২০০১)
  4. লণ্ডন চিংগল ডায়েৰী 《伦敦单身日记》(আত্মকল্পক উপন্যাস, আগষ্ট ২০০৯)
  5. লণ্ডন লাভ ষ্ট’ৰি 《伦敦爱情故事》(উপন্যাস, মে’ ২০১০)
  6. ব্যক্তিগত বিবৃতি 《北京北京》（মূল নাম《个人现状》）(আত্মকল্পক উপন্যাস, জুন ২০১৩)
  7. চাইনাটাউন 《唐人街》(উপন্যাস, জানুৱাৰী ২০১৫)
  8. ইন লণ্ডন 《在伦敦》（মূল নাম《文本生活》）(আত্মকল্পক উপন্যাস, ফেব্ৰুৱাৰী ২০১৮)

লণ্ডন চিংগল লেডী ছিৰিজ 《伦敦单身女郎》 (আত্মকল্পক, ছিজন ১–৫)

  1. ছিজন ১: দ্য মে’ফেয়াৰ এফেয়াৰ 《伦敦恋爱物语》(উপন্যাস)
  2. ছিজন ২: লণ্ডন মেপ অৱ ৰোমাঞ্চ 《伦敦爱情地图》(উপন্যাস)
  3. ছিজন ৩: লণ্ডন চিংগল লেডিজ 《伦敦单身女郎》(উপন্যাস)
  4. ছিজন ৪: চিংগল গাৰ্লছ ডায়েৰী 《单身女郎日记》(উপন্যাস)
  5. ছিজন ৪ অতিৰিক্ত: এ ৩৬-আৱাৰ ফিল্ম 《一场36小时的电影》(নভেলা)
  6. ছিজন ৫: লণ্ডন চিংগল ফেয়াৰী-টেল 《伦敦单身童话》(উপন্যাস)

ৰচনা আৰু চুটিগল্প

[সম্পাদনা কৰক]
  1. আইজ ইন ছাবৱে 《地铁里的眼睛》(সংকলিত ৰচনা, জানুৱাৰী ২০০১)
  2. গোৱিং টু টিবেট 《去往拉萨》(চুটিগল্প সংকলন, জানুৱাৰী ২০০৫)
  3. লণ্ডন চিংগল ডায়েৰী 《伦敦单身日记》 শৃংখলা (জীৱনলেখা শৃংখলা, ছিজন ১–৪)

অন্যান্য ৰচনা

[সম্পাদনা কৰক]
  1. দ্য পোষ্টমডাৰ্ণ ইউ 《后现代的你》(উপন্যাস)
  2. প'ষ্টমডাৰ্ণিজম এণ্ড দ্য থাৰ্ড ৱৰ্ল্ড 《后现代主义与第三世界研究》(গৱেষণা প্ৰবন্ধ, ইংৰাজীত)
  3. ছানশ্বাইন এণ্ড দ্য মনচুন 《阳光雨季》 চলচ্চিত্ৰ চিত্ৰনাট্য (১৯৯৬ চনত চীনা যুৱ চলচ্চিত্ৰ চিত্ৰনাট্য উৎকৃষ্টতা বঁটা বিজয়ী)
  4. লণ্ডন লাভ ষ্ট’ৰি 《伦敦爱情故事》 চলচ্চিত্ৰ চিত্ৰনাট্য (প্ৰকাশিত উপন্যাসৰ আধাৰত)
  5. ডিয়াৰ নিউয়ৰ্ক 《亲爱的纽约》(খণ্ড ১–৪, উপন্যাস, ইংৰাজীত)
  6. প’এমছ ৰিটেন ইন লণ্ডন 《伦敦诗篇》(কবিতা সংকলন, ইংৰাজীত)
  7. প্ৰাইভেট ছিনছ 《私人场景》(উপন্যাস)
  8. দ্য লণ্ডন ছিন 《伦敦场景》(চুটিগল্প সংকলন)
  9. ৭-মিনিট লাভ 《七分钟爱情》(উপন্যাস)

তথ্যসূত্ৰ

[সম্পাদনা কৰক]
  1. 1 2 3 4 5 6 7 8 9 "Interview with Yilin Zhong". BBC.
  2. 1 2 "Chinatown's Invisible Residents". Shanghai Daily. 30 August 2015. http://www.shanghaidaily.com/sunday/book/Chinatowns-invisible-residents/shdaily.shtml.
  3. ↑ "Zhongkun_news_society-hot/钟鲲-资讯-资讯热点" (Zh ভাষাত). Hanwang Book City/汉王书城. 22 Nov 2010. Archived from the original on 2 April 2015. https://web.archive.org/web/20150402101528/http://news.hwebook.cn/news/society-hot/3106.html। আহৰণ কৰা হৈছে: 28 February 2015.
  4. ↑ "A Dream of Red Mansions Journal/红楼梦学刊" (Zh ভাষাত). 1993. http://www.cnki.com.cn/Journal/F-F2-HLMX-1993-03.htm। আহৰণ কৰা হৈছে: 28 February 2015.
  5. 1 2 3 4 5 6 "Writing the memory of youth_China Book News/书写青春记忆_中华读书报" (Zh ভাষাত). Guangming Net/光明网. 11 April 2001. http://www.gmw.cn/01ds/2001-04/11/GB/2001%5E346%5E0%5EDS1405.htm। আহৰণ কৰা হৈছে: 1 March 2015.
  6. 1 2 3 4 5 6 7 8 9 "The Postmodern Chinese living in their imagination-'Chinatown' Introduction and Book Review/《唐人街》：在伦敦的中国人" (Zh ভাষাত). China Writer Net/中国作家网. 2 March 2015. http://www.chinawriter.com.cn/book/2015-03-02/4631.html। আহৰণ কৰা হৈছে: 10 March 2015.
  7. ↑ "Youth Literature" (Zh ভাষাত). 1992. http://snwy.juqk.net/introduce/। আহৰণ কৰা হৈছে: 27 April 2025.
  8. ↑ "Warwick Classnotes". Warwick. https://www2.warwick.ac.uk/alumni/ouralumni/classnotes/00s/। আহৰণ কৰা হৈছে: 10 Feb 2016.
  9. ↑ 都护, 西域 (8 February 2020). "警惕！有些人在用李文亮医生之死"带节奏"". Guancha.cn. https://user.guancha.cn/main/content?id=239557&s=fwtjgzwz। আহৰণ কৰা হৈছে: 18 February 2020.
  10. 1 2 Zhong, Yilin. "李文亮的生死线/Dr. Li Wenliang' life and death line". blogspot.comyilinzhong.blogspot.com. https://yilinzhong.blogspot.com/2020/02/blog-post_7.html। আহৰণ কৰা হৈছে: 18 February 2020.
  11. ↑ Zhong, Yilin. "Zhong's weibo". WeiboWeibo.com. https://www.weibo.com/1232115570/Iu7ioxpl9?from=page_1035051232115570_profile&wvr=6&mod=weibotime&type=comment। আহৰণ কৰা হৈছে: 18 February 2020.
  12. ↑ Zhong, Yilin (8 February 2020). "Zhong's comment". YouTube. https://www.youtube.com/watch?v=_mBAwdEGIVs&list=FLcBJRCas9j2qQhSd7h1NphQ&index=2। আহৰণ কৰা হৈছে: 18 February 2020.
  13. ↑ 王磬、古典 (8 April 2020). "Under the lockdown: Oversea writers". Jiemian. sina (Jiemian). https://news.sina.cn/sh/2020-04-08/detail-iimxyqwa5665009.d.html। আহৰণ কৰা হৈছে: 14 April 2020.
  14. ↑ 王磬, 古典 (8 April 2020). "【特写】疫情下的海外华人作家". Jiemian. https://www.jiemian.com/article/4223348.html। আহৰণ কৰা হৈছে: 14 April 2020.
  15. ↑ Yilin, Zhong (8 April 2020). "Yilin Zhong's review on Covid-19". youtube. https://www.youtube.com/watch?v=lO_IqXC0ww4&list=FLcBJRCas9j2qQhSd7h1NphQ&index=7&t=0s। আহৰণ কৰা হৈছে: 14 April 2020.
  16. ↑ Yilin, Zhong. "Amazon closed my author's account". weixin blogweixin.com. https://mp.weixin.qq.com/s/ly46Vul_Q2w0-PxBA-CrKA। আহৰণ কৰা হৈছে: 14 April 2020.
  17. ↑ Yilin, Zhong. "Weibo closed 31 accounts". dayoo.com. https://news.dayoo.com/finance/202112/06/139999_54133202.htm। আহৰণ কৰা হৈছে: 12 December 2021.
"https://as.wikipedia.org/w/index.php?title=য়িলিন_ঝং&oldid=583315"ৰ পৰা অনা হৈছে