যোগেশ চন্দ্ৰ চট্টোপাধ্যায়
যোগেশ চন্দ্ৰ চট্টোপাধ্যায় (১৮৯৫ – ২ এপ্ৰিল ১৯৬০) এজন ভাৰতীয় স্বাধীনতা সংগ্ৰামী, বিপ্লৱী আৰু সংসদ সদস্য আছিল। তেওঁ হিন্দুস্তান ৰিপাব্লিকান এছ’চিয়েশ্যন (HRA)-ৰ এজন প্ৰতিষ্ঠাপক সদস্য আছিল, যিটো পৰৱৰ্তী সময়ত হিন্দুস্তান ছচিয়েলিষ্ট ৰিপাব্লিকান এছ’চিয়েশ্যন (HSRA) নামেৰে জনাজাত হৈছিল। তেওঁ ভাৰতৰ স্বাধীনতা আন্দোলনত এক গুৰুত্বপূৰ্ণ ভূমিকা পালন কৰিছিল। অনুশীলন সমিতিত সক্ৰিয় ভূমিকা লোৱা চট্টোপাধ্যায়ে কাকোৰী ষড়যন্ত্ৰ গোচৰত জড়িত থকাৰ বাবে যাৱজ্জীৱন কাৰাদণ্ডৰ শাস্তি লাভ কৰিছিল। এজন ৰাজনৈতিক চিন্তাবিদ হিচাপে তেওঁ ইণ্ডিয়ান ৰিভলিউশ্বনেৰীজ ইন কনফাৰেন্স আৰু ইন চাৰ্ছ অৱ ফ্ৰীডম নামৰ দুখন গ্ৰন্থ ৰচনা কৰিছিল। স্বাধীনতাৰ পিছত তেওঁ ৰাজ্য সভাৰ সদস্য (১৯৫৬–১৯৬০) হিচাপে কাৰ্যনিৰ্বাহ কৰিছিল আৰু ৰিভলিউশ্বনেৰী ছচিয়েলিষ্ট পাৰ্টি ৰ প্ৰতিষ্ঠাপক সাধাৰণ সম্পাদক আছিল। তেওঁ সশস্ত্ৰ প্ৰতিৰোধ আৰু সমাজতান্ত্ৰিক আদৰ্শৰ এক প্ৰতীক হিচাপে আজিও পৰিচিত।
চমু জীৱনী
[সম্পাদনা কৰক]তেওঁ এজন বাঙালী হিন্দু আছিল। যোগেশ চন্দ্ৰই অনুশীলন সমিতিৰ সদস্য হৈছিল। তেওঁ ১৯২৪ চনত প্ৰতিষ্ঠা হোৱা হিন্দুস্তান ৰিপাব্লিকান এছ’চিয়েশ্যন (HRA)-ৰ অন্যতম প্ৰতিষ্ঠাপক সদস্য আছিল, যিটো পৰৱৰ্তী সময়ত হিন্দুস্তান ছচিয়েলিষ্ট ৰিপাব্লিকান এছ’চিয়েশ্যনলৈ ৰূপান্তৰিত হৈছিল।[1] বৈপ্লৱিক কাৰ্যকলাপৰ বাবে তেওঁ কেইবাবাৰো গ্ৰেপ্তাৰ হৈছিল। ১৯২৬ চনত তেওঁৰ বিৰুদ্ধে কাকোৰী ষড়যন্ত্ৰ গোচৰৰ বিচাৰ চলোৱা হয় আৰু তেওঁক যাৱজ্জীৱন সশ্ৰম কাৰাদণ্ড বিহা হয়।
তেওঁ দুখন কিতাপ লিখিছিল:
- ইণ্ডিয়ান ৰিভলিউশ্বনেৰীজ ইন কনফাৰেন্স
- ইন চাৰ্ছ অৱ ফ্ৰীডম (আত্মজীৱনী হিচাপে)
১৯৩৭ চনত যোগেশ চন্দ্ৰই কংগ্ৰেছ ছচিয়েলিষ্ট পাৰ্টি ত যোগদান কৰে যদিও অতি কম সময়ৰ ভিতৰতে সেই দল ত্যাগ কৰে আৰু ১৯৪০ চনত ৰিভলিউশ্বনেৰী ছচিয়েলিষ্ট পাৰ্টি (RSP) নামেৰে এটা নতুন দল গঠন কৰে। ১৯৪০ চনৰ পৰা ১৯৫৩ চনলৈকে তেওঁ এই দলৰ সাধাৰণ সম্পাদক আছিল। তেওঁ ১৯৪৯ চনৰ পৰা ১৯৫৩ চনলৈ আৰ.এছ.পি.-ৰ ট্ৰেড ইউনিয়ন শাখা ইউনাইটেড ট্ৰেড ইউনিয়ন কংগ্ৰেছৰ উপ-সভাপতি আছিল আৰু কেৱল ১৯৪৯ চনৰ বাবে ইউনাইটেড ছচিয়েলিষ্ট অৰ্গেনাইজেশ্যনৰ উপ-সভাপতি হিচাপে কাৰ্যনিৰ্বাহ কৰিছিল।[2]
ভাৰতৰ স্বাধীনতাৰ পিছত অৱশ্যে তেওঁ পুনৰ কংগ্ৰেছ দললৈ ঘূৰি আহে আৰু ১৯৫৬ চনত উত্তৰ প্ৰদেশৰ পৰা ৰাজ্য সভাৰ সদস্য নিৰ্বাচিত হয়। ১৯৬০ চনৰ ২ এপ্ৰিলত তেওঁৰ মৃত্যুৰ সময়লৈকে তেওঁ এই সদনৰ সদস্য হৈ আছিল।[3]
টোকা
[সম্পাদনা কৰক]- ↑ Gateway of India article [usurped]
- ↑ "Rajyasabha Who's Who". http://rajyasabha.nic.in/kiosk/whoswho/prev90c.htm। আহৰণ কৰা হৈছে: 5 March 2006.
- ↑ "List of Rajyasabha members". http://164.100.24.167:8080/members/alphabeticallist_all_terms.asp?alphabet=C। আহৰণ কৰা হৈছে: 5 March 2006.