ললিতা শ্ৰীনিবাসন
| ললিতা শ্ৰীনিবাসন | |
|---|---|
| জন্ম | ২৪ আগষ্ট, ১৯৪৩ (৮৩ বছৰ) শিৱসমুদ্ৰ, ব্ৰিটিছ ভাৰত |
| পেচা | নৃত্যশিল্পী, নৃত্য নিৰ্দেশক, নৃত্য শিক্ষয়িত্ৰী |
| জনা যায় | ভাৰতনাট্যম |
| বঁটা, সন্মান, পুৰস্কাৰ আদি | সংগীত নাটক একাডেমি অমৃত বঁটা, ৰাজ্যোৎসৱ প্ৰশস্তি, কৰ্ণাটক সংগীত নৃত্য একাডেমি বঁটা, শান্তলা নৃত্য শ্ৰী বঁটা |
ললিতা শ্ৰীনিবাসন এজন ভাৰতীয় ভাৰতনাট্যম নৃত্যশিল্পী, নৃত্য নিৰ্দেশক আৰু শিক্ষয়িত্ৰী। ভৰতনাট্যমত তেওঁৰ অৱদানৰ বাবে তেওঁ ২০২৩ চনত সংগীত নাটক একাডেমিৰপৰা সংগীত নাটক একাডেমি অমৃত বঁটা লাভ কৰে।[1] তেওঁ লগতে কৰ্ণাটক সংগীত নৃত্য একাডেমিৰপৰা কৰ্ণাটক কালাতিলক, ৰাজ্যোৎসৱ প্ৰশস্তি আৰু শান্তলা নৃত্য শ্ৰী বঁটা লাভ কৰিছে।[1]
জীৱনী
[সম্পাদনা কৰক]ললিতা শ্ৰীনিবাসনৰ জন্ম ২৪ আগষ্ট ১৯৪৩ চনত বৰ্তমান ভাৰতৰ কৰ্ণাটক ৰাজ্যৰ শিৱসমুদ্ৰত হৈছিল।[1] পিতৃৰ চাকৰিৰ বাবে সৰু বয়সত তেওঁ কৰ্ণাটকৰ বিভিন্ন সৰু চহৰত বাস কৰিছিল।[2]
সৰু বয়সতেই পৰিয়ালে তেওঁৰ নৃত্যৰ প্ৰতি আগ্ৰহ লক্ষ্য কৰি দশ বছৰ বয়সত গুৰু এইচ. আৰ. কেশৱ মূৰ্তিৰ অধীনত বেংগালুৰুত ভাৰতনাট্যমৰ প্ৰশিক্ষণৰ ব্যৱস্থা কৰে।[3] বিবাহৰ পিছত ১৯ বছৰ বয়সত তেওঁ সম্পূৰ্ণৰূপে নৃত্য ত্যাগ কৰিছিল।[3] যদিও নৃত্য তত্ত্বৰ প্ৰতি আগ্ৰহ বজাই ৰাখি তেওঁ অধ্যয়ন অব্যাহত ৰাখে আৰু দক্ষতা পৰীক্ষাত প্ৰথম স্থান লাভ কৰে।[3] ১৯৬৬ চনত তেওঁ ভাৰতনাট্যমত প্ৰথম আনুষ্ঠানিক মঞ্চাভিষেক কৰে।[3] পিছলৈ তেওঁ মাইছুৰ দৰবাৰৰ প্ৰসিদ্ধ নৃত্যশিল্পী আৰু মাইছুৰ শৈলীৰ ভাৰতনাট্যমৰ প্ৰতিনিধি কে. বেংকটালক্ষ্মাম্মাৰ অধীনত উন্নত প্ৰশিক্ষণ লাভ কৰে।[3]
ইয়াৰ উপৰি তেওঁ সংগীত, বীণা, চিত্ৰকলা আৰু ইণ্টেৰিয়ৰ ডিজাইনিং শিকিছে।[1] তেওঁ ইতিহাস বিষয়ত স্নাতকোত্তৰ ডিগ্ৰী আৰু ডি.লিট ডিগ্ৰী লাভ কৰিছে।[1]
বৰ্তমান তেওঁ বেংগালুৰুৰ মল্লেশ্বৰমত বাস কৰে।[2]
কৰ্মজীৱন
[সম্পাদনা কৰক]ললিতা শ্ৰীনিবাসন মাইছুৰ শৈলীৰ ভাৰতনাট্যমৰ এজন বিশিষ্ট প্ৰতিনিধি আৰু অভিনয় ক্ষেত্ৰত বিশেষভাৱে পৰিচিত। তেওঁ ভাৰতৰ বিভিন্ন ৰাজ্য আৰু বিদেশতো অনুষ্ঠান পৰিৱেশন কৰিছে। লগতে দেশৰ বিভিন্ন স্থানত লেকচাৰ-ডেম’ (বক্তৃতা-প্ৰদৰ্শন) আগবঢ়াইছে। তেওঁ চিত্ৰাঙ্গদা, শ্ৰী কৃষ্ণ পৰিজাতা, লাস্যোৎসৱ, প্ৰেম ভক্তি মুক্তি, কৌশিকা সুকৃতম, গৌডৰা মল্লি, দেৱ কান্নিকা আৰু নিশা বিভ্ৰম আদি নৃত্য-নাট্য নিৰ্মাণৰ নৃত্য নিৰ্দেশনা দিছে।[1] ১৯৭৮ চনত তেওঁ বেংগালুৰুত “নূপূৰা স্কুল অৱ ভাৰতনাট্যম” প্ৰতিষ্ঠা কৰে, য’ত মাইছুৰ শৈলীৰ ভাৰতনাট্যম শিক্ষা আৰু প্ৰচাৰৰ ওপৰত গুৰুত্ব দিয়া হয়।[1] তেওঁ ত্ৰিছ বছৰৰো অধিক সময় ধৰি বেংগালুৰুত অনুষ্ঠিত ৰাষ্ট্ৰীয় পৰ্যায়ৰ নৃত্য উৎসৱ “নিত্য নৃত্য”ৰ পৰিচালনা কৰি আহিছে।[4]
প্ৰকাশিত গ্ৰন্থ
[সম্পাদনা কৰক]কৰ্ণাটক সংগীত নৃত্য একাডেমীয়ে তেওঁৰ দুটা গ্ৰন্থ প্ৰকাশ কৰিছে — ‘‘কৰ্ণাটকত নৃত্য আৰু কৰ্ণাটকৰ নৃত্য মূৰ্তি’’ আৰু কে. বেংকটালক্ষ্মাম্মাৰ জীৱনী।[3]
বঁটা আৰু সন্মান
[সম্পাদনা কৰক]ললিতা শ্ৰীনিবাসনে ভৰতনাট্যমত অৱদানৰ বাবে ২০২৩ চনত সংগীত নাটক একাডেমি অমৃত বঁটা লাভ কৰে।[1] তেওঁ লগতে ৰাষ্ট্ৰীয় পৰ্যায়ত শিৰোমণি আৰু প্ৰিয়দৰ্শিনী বঁটা লাভ কৰিছে। কৰ্ণাটক সংগীত নৃত্য একাডেমীৰপৰা কৰ্ণাটক কালাতিলক সন্মান, ৰাজ্যোৎসৱ প্ৰশস্তি আৰু কৰ্ণাটক চৰকাৰৰপৰা শান্তলা নৃত্য শ্ৰী বঁটা লাভ কৰিছে।[1]
নূপূৰা স্কুল অৱ ভাৰতনাট্যম
[সম্পাদনা কৰক]১৯৭৮ চনত ললিতা শ্ৰীনিবাসনে কৰ্ণাটকৰ বেংগালুৰুৰ মল্লেশ্বৰমত “নূপূৰা স্কুল অৱ ভাৰতনাট্যম” প্ৰতিষ্ঠা কৰে। এই প্ৰতিষ্ঠানখনত মাইছুৰ শৈলীৰ ভাৰতনাট্যম শিক্ষা আৰু প্ৰচাৰৰ ওপৰত বিশেষ গুৰুত্ব দিয়া হয়।[1][5] প্ৰতিষ্ঠালগ্নৰপৰা এতিয়ালৈকে এই বিদ্যালয়খনত ৫০০ৰো অধিক ছাত্ৰ-ছাত্ৰী প্ৰশিক্ষণ লাভ কৰিছে।[6] বৰ্তমান ললিতা শ্ৰীনিবাসনৰ কন্যা মনু শ্ৰীনিবাসন, যি নিজেও এগৰাকী নৃত্যশিল্পী, নূপূৰা বিদ্যালয়ৰ সম্পাদক হিচাপে দায়িত্ব পালন কৰি আছে।[7]
তথ্যসূত্ৰ
[সম্পাদনা কৰক]- 1 2 3 4 5 6 7 8 9 10 "Lalitha Srinivasan". সংগীত নাটক একাডেমি, ভাৰত চৰকাৰ. https://www.sangeetnatak.gov.in/public/uploads/awardees/docs/1722839083_Amrit%20Award%20Citation%202023_%20%2821%29.pdf.
- 1 2 Krishna, Srilatha (September 2018). "Cover Story-Lalitha Srinivasan". Sruti. https://www.sruti.com/printeditions/sruti-back-issues-individual/lalitha-srinivasanvak-ranga-raomannargudi-easwara.
- 1 2 3 4 5 6 Kothari, Sunil. "Profile - Lalitha Srinivasan celebrates 40 years of Nupura". narthaki.com. https://narthaki.com/info/profiles/profl215.html.
- ↑ "Mahabharathanatyam". Sruti. https://www.sruti.com/articles/newsnotes/mahabharathanatyam.
- ↑ Rao, Bindu Gopal (28 December 2018). "An Ode to Dance" (en ভাষাত). Deccan Chronicle. https://www.deccanchronicle.com/lifestyle/books-and-art/281218/an-ode-to-dance.html.
- ↑ Krishnamurthy, Akhila (5 February 2021). "Dancing In the City" (en ভাষাত). Open Magazine. https://openthemagazine.com/features/dancing-in-the-city.
- ↑ Sebastian, Shilpa (28 April 2020). "Stepping into the virtual world" (en-IN ভাষাত). The Hindu. https://www.thehindu.com/entertainment/dance/nupura-school-of-bharatanatyam-celebrates-international-dance-day-virtually/article31451925.ece.