শালিনী পাণ্ডে

শালিনী পাণ্ডে
২০২৩ চনত পাণ্ডে
জন্ম	২৩ ছেপ্টেম্বৰ, ১৯৯৩ (৩২ বছৰ) জবলপুৰ, মধ্যপ্ৰদেশ, ভাৰত
পেচা	অভিনেত্ৰী
সক্ৰিয় হৈ থকা সময়	২০১৬–বৰ্তমান

শালিনী পাণ্ডে (ইংৰাজী: Shalini Pandey; জন্ম: ২৩ ছেপ্টেম্বৰ ১৯৯৩) এগৰাকী ভাৰতীয় অভিনেত্ৰী যিয়ে তেলুগু, হিন্দী আৰু তামিল ছবিত অভিনয় কৰে। পাণ্ডেই তেলুগু ছবি অৰ্জুন ৰেড্ডী (২০১৭)ৰ জৰিয়তে পৰ্দাত আত্মপ্ৰকাশ কৰিছিল। তাৰ পিছৰেপৰা তেওঁ তামিল ছবি ১০০% কাধল (২০১৯), তেলেগু ছবি মহানন্দী (২০১৮) আৰু ১১৮ (২০১৯), আৰু হিন্দী ছবি জয়েশভাই জোৰ্দাৰ (২০২২) তথা মহাৰাজ (২০২৪)ত অভিনয় কৰিছে।

প্ৰাৰম্ভিক জীৱন

পাণ্ডেৰ জন্ম ১৯৯৩ চনৰ ২৩ ছেপ্টেম্বৰত মধ্যপ্ৰদেশৰ জবলপুৰত হৈছিল। অভিনয়ত আত্মপ্ৰকাশ কৰাৰ পূৰ্বে পাণ্ডেই জবলপুৰত এগৰাকী থিয়েটাৰ শিল্পী হিচাপে কাম কৰিছিল।

কেৰিয়াৰ

সাফল্য (২০১৭–২০১৯)

পাণ্ডেই ২০১৭ চনত তেলেগু ছবি অৰ্জুন ৰেড্ডীৰ জৰিয়তে পৰ্দাত আত্মপ্ৰকাশ কৰে, য’ত তেওঁ বিজয় দেৱৰাকোণ্ডাৰ বিপৰীতে এগৰাকী চিকিৎসা বিজ্ঞানৰ ছাত্ৰীৰ চৰিত্ৰত অভিনয় কৰিছিল। এক বৃহৎ ব্যাৱসায়িক সফলতা লাভ কৰা এই ছবিখনে তেওঁক শ্ৰেষ্ঠ মহিলা অভিষেককাৰীৰ এছ.আই.আই.এম.এ. বঁটাৰ মনোনয়ন লাভত সহায় কৰে। ফাৰ্ষ্টপোষ্টৰ হেমন্ত কুমাৰে লিখিছে, "প্ৰীতিৰ চৰিত্ৰত শালিনী ভাল হৈছে আৰু তেওঁ ফুটাই তোলা আৱেগিক দিশটোৱেই প্ৰেম কাহিনীটোক ইমান তীব্ৰ কৰি তুলিছে।" ২০১৮ চনৰ প্ৰথমখন ছবিত পাণ্ডেই মেৰী নিম্মোত এটা কেমিঅ' চৰিত্ৰৰ জৰিয়তে হিন্দী ছবিত আত্মপ্ৰকাশ কৰে। একে বছৰতে তেওঁ তেলেগু ছবি মহানন্দীত এটা সহযোগী চৰিত্ৰত অভিনয় কৰে, যিখন ছবি বক্স অফিচত বৃহৎ সফল হিচাপে পৰিগণিত হয়।

২০১৯ চনত ১০০% কাধল ছবিৰ শুভাৰম্ভণিত পাণ্ডে

২০১৯ চনত পাণ্ডেৰ পাঁচখন ছবি মুক্তি পাইছিল। তেওঁ প্ৰথমে তেলেগু ছবি এনটিআৰ: কথানায়কুডুত ছৌকাৰ জানকীৰ চৰিত্ৰত অভিনয় কৰিছিল। ইয়াৰ পিছত তেওঁ নন্দমুৰী কল্যাণ ৰামৰ বিপৰীতে তেলেগু ছবি ১১৮ত মুখ্য চৰিত্ৰত অভিনয় কৰে। ছবিখন ব্যাৱসায়িকভাৱে সফল হৈছিল। দ্য টাইমছ অৱ ইণ্ডিয়াৰ নীশিতা ন্যায়পতিয়ে চৰিত্ৰটোত তেওঁৰ অভিনয় পৰ্যাপ্ত বুলি গণ্য কৰিছিল যদিও ৰামৰ সৈতে তেওঁৰ ৰসায়নক (কেমিষ্ট্ৰী) অধিক প্ৰশংসা কৰিছিল। সেই বছৰৰ শেষৰফালে পাণ্ডেই ১০০% কাধলৰ জৰিয়তে তামিল ছবিত আত্মপ্ৰকাশ কৰে, য’ত তেওঁ জি. ভি. প্ৰকাশ কুমাৰৰ বিপৰীতে এগৰাকী কলেজীয়া ছাত্ৰীৰ চৰিত্ৰত অভিনয় কৰিছিল। বক্স অফিচত এই ছবিখন বিফল বুলি প্ৰমাণিত হয়। তেওঁৰ পৰৱৰ্তী তামিল ছবি গোৰিলাত জীৱাৰ বিপৰীতে মুখ্য চৰিত্ৰত অভিনয় কৰে। বছৰটোৰ অন্তিমখন ছবিত তেওঁ ৰাজ তৰুণৰ বিপৰীতে তেলেগু ছবি ইদ্দাৰী লোকম ওকেটেত এগৰাকী কলেজীয়া ছাত্ৰীৰ চৰিত্ৰত অভিনয় কৰে, যিখন ছবি বক্স অফিচত গড় হিচাপত সফল হয়।

কেৰিয়াৰৰ সম্প্ৰসাৰণ (২০২০–বৰ্তমান)

২০২০ চনত পাণ্ডেই বামফাড় নামৰ এখন ৰোমাণ্টিক একচন ছবিত অভিনয় কৰে, য’ত তেওঁ এগৰাকী হিন্দু ছোৱালীৰ চৰিত্ৰত অভিনয় কৰিছিল যি এজন মুছলমান ল’ৰাৰ (আদিত্য ৰাৱাল) সৈতে প্ৰেমৰ সম্পৰ্কত আবদ্ধ হয়। ফাৰ্ষ্টপোষ্টৰ আন্না এম. এম. ভেটিকাদে তেওঁৰ অভিনয়ক "দক্ষ" বুলি অভিহিত কৰিছিল যদিও লগতে কৈছিল যে তেওঁৰ মাজত "উদ্যম"ৰ অভাৱ। সেই বছৰতে তেওঁ তেলেগু ছবি নৈঃশব্দ্যমত অভিনয় কৰে। দ্য নিউজ মিনিটৰ সৌম্য ৰাজেন্দ্ৰনে লিখিছিল যে তেওঁ "অধিকাৰী সোণালীৰ চৰিত্ৰত এক আশ্চৰ্য আছিল। তেওঁ বিৰক্তিকৰ হ’ব লাগে অথচ মৰম লগা হোৱা উচিত। ই এটা কঠিন কাম আছিল, কিন্তু পাণ্ডেই ইয়াক সুন্দৰকৈ ফুটাই তুলিছে।"

পাণ্ডেই ২০২২ চনৰ হিন্দী ছবি জয়েশভাই জোৰ্দাৰত ৰণবীৰ সিঙৰ বিপৰীতে এগৰাকী গুজৰাটী গৃহিনীৰ চৰিত্ৰত অভিনয় কৰিছিল, যিখন আছিল কন্যা শিশু হত্যাৰ ওপৰত নিৰ্মিত এখন কমেডী ছবি। এই ছবিখনে বক্স অফিচত শোচনীয়ভাৱে বিফল হয়। ছবিখনৰ এক নেতিবাচক পৰ্যালোচনাত ৰেডিফ ডট কমৰ সুকন্যা ভাৰ্মাই লিখিছিল যে পাণ্ডেই "কোনো প্ৰভাৱ পেলাবলৈ সম্পূৰ্ণৰূপে ৰণবীৰ সিঙৰ নাৰীবাদৰ ওপৰত নিৰ্ভৰ কৰিছে।" দুবছৰৰ বিৰতিৰ পিছত তেওঁ ২০২৪ চনৰ হিন্দী ছবি মহাৰাজত জুনেইদ খানৰ বিপৰীতে এটা চমু চৰিত্ৰত অভিনয় কৰে, যিখন পোনপটীয়াকৈ নেটফ্লিক্সত মুক্তি পাইছিল। দ্য কুইণ্টৰ প্ৰতীক্ষা মিশ্ৰই মত প্ৰকাশ কৰিছিল যে তেওঁ চুটি কিন্তু গুৰুত্বপূৰ্ণ চৰিত্ৰটোত "নিজৰ দায়িত্ব সঠিকভাৱে পালন কৰিছে।"

২০২৫ চনত পাণ্ডেই নেটফ্লিক্সৰ ধাৰাবাহিক ডাব্বা কাৰ্টেলত অভিনয় কৰে, যিখনত খাদ্য বিতৰণ কোম্পানীৰ ছদ্মবেশত ড্ৰাগছ কাৰ্টেল চলোৱা এদল মহিলাৰ কাহিনী বৰ্ণনা কৰা হৈছে। হিন্দুস্তান টাইমছৰ অভিমন্যু মাথুৰে লিখিছিল যে তেওঁৰ আন্তৰিক প্ৰচেষ্টা সত্ত্বেও পাণ্ডে এনে এটা চৰিত্ৰত আবদ্ধ আছিল যিয়ে "তেওঁক অসহায় দেখাৰ বাহিৰে কৰিবলৈ বৰ কম সুবিধা দিছিল।" তেওঁক পৰৱৰ্তী সময়ত ধনুশৰ সৈতে ইডলি কাডাইত দেখা যাব।

বাহ্যিক সংযোগ

• শালিনী পাণ্ডে সম্পৰ্কে ইণ্টাৰনেট মুভি ডাটাবেছত থকা তথ্য।
• ইনষ্টাগ্ৰামত শালিনী পাণ্ডে