সদস্য বাৰ্তা:Dr Barindra Das

ড০ বাৰীন্দ্ৰ দাস(Dr Barindra Das) ==

ড০ বাৰীন্দ্ৰ দাস (জন্ম ১৯৭৮ চন, ১৬ মাৰ্চ), (ইংৰাজীঃ Dr Barindra Das), নৱ প্ৰজন্মৰ এজন অসমীয়া লেখক, শিক্ষক, গৱেষক, সৰুৰে পৰাই অসমীয়া সাহিত্যৰ প্ৰতি প্ৰৱল ধাউতি থকা দাসে সৰুৰে পৰা লিখা মেলাত গুৰুত্ব দিলেও পিচলৈ একাডেমিক বিদ্যা শিক্ষাৰ লগতে গৱেষণাৰ কামত বেছি মনোযোগ দিয়ে। ডিব্ৰুগড় বিশ্ববিদ্যালয়ৰ পৰা অৰ্থনীতি বিষয়ত স্নাতোকোত্তৰ, শিলচৰ স্থিত কেন্দ্ৰীয় বিশ্ববিদ্যালয় অসম বিশ্ববিদ্যালয়ৰ পৰা এম. ফিল ডিগ্ৰী আৰু পুনৰ ডিব্ৰুগড় বিশ্ববিদ্যালয়ৰ পৰা পি এইচ ডিগ্ৰী লাভ কৰে। বৰ্তমান তেওঁ বৰহাট ভৱানী প্ৰসাদ বৰুৱা সোঁৱৰণী মহাবিদ্যালয়, চৰাইদেউত অৰ্থনীতি বিভাগৰ সহকাৰী অধ্যাপক ৰুপে কৰ্মৰত। 'প্ৰকাশিত গ্ৰন্থ (১)ডায়েৰী পাতৰ পৰা (২) বুদ্ধবৃক্ষ (৩) এইজিং পপোলেশ্বন ইন আসাম (ইংৰাজী) (৪) অনুকাশ (সম্পাদনা)

স্বীকৃতিঃ (১) অসম সাহিত্য সভাৰ সৃষ্টিশীল সাহিত্যৰ “ডায়েৰী পাতৰ পৰা“ গ্ৰন্থৰ বাবে ২০১২-১৩ বৰ্ষৰ ৰজনীকান্ত গগৈ বঁটা (২) সদৌ অসম কবি সন্মিলনৰ কাব্য গ্ৰন্থ বুদ্ধ বৃক্ষৰ বাবে ২০১৪-১৫ বৰ্ষৰ বাবে কাব্য প্ৰাণ চুজাউদ্দিন আহমদ বঁটা

#সাহিত্যৰ_সুবাস_বিলোৱা_এগৰাকী_প্ৰজ্ঞাৱান_সাহিত্যিক#-ড০_বাৰীন্দ্ৰ_দাস

ড০ বাৰীন্দ্ৰ দাস—এগৰাকী শিক্ষাবিদ, সু-লেখক, সাহিত্যসেৱী আৰু সমাজৰ প্ৰতি দায়বদ্ধ এগৰাকী সংবেদনশীল ব্যক্তি। বৰ্তমান চৰাইদেউ জিলাৰ বৰহাট ভৱানী প্ৰসাদ বৰুৱা সোঁৱৰণী মহাবিদ্যালয়ৰ সহকাৰী অধ্যাপক হিচাপে কৰ্মৰত ড০ দাস ডাঙৰীয়া মোৰ অতি শ্ৰদ্ধাৰ দাদা তথা এগৰাকী স্নেহশীল পৰামৰ্শদাতা। জীৱনৰ বিভিন্ন সময়ত তেখেতৰ পৰা লাভ কৰা মূল্যৱান পৰামৰ্শ, উৎসাহ আৰু দিক্‌নিৰ্দেশনাই মোক সদায় অনুপ্ৰাণিত কৰি আহিছে।

চাবুৱাৰ ঐতিহ্যমণ্ডিত আলহী গাঁৱত জন্মগ্ৰহণ কৰা ড০ বাৰীন্দ্ৰ দাসে শৈশৱৰ পৰাই অসমৰ মাটি, মানুহ আৰু সমাজ জীৱনৰ সৈতে এক গভীৰ আত্মিক সম্পৰ্ক গঢ়ি তুলিছে। গাঁৱৰ মাটিৰ গোন্ধ, মানুহৰ সহজ-সৰল জীৱন, সমাজৰ সুখ-দুখ আৰু অসমৰ চহকী সাংস্কৃতিক পৰম্পৰাই তেখেতৰ মননশীল সত্তাক গভীৰভাৱে প্ৰভাৱিত কৰিছে। সেইবাবেই হয়তো তেখেতৰ সাহিত্যৰ প্ৰতিটো সৃষ্টিত অসমৰ সমাজ জীৱনৰ এক জীৱন্ত প্ৰতিচ্ছবি প্ৰতিফলিত হোৱা দেখা যায়।

অসমৰ সমাজ-সংস্কৃতি, মানুহৰ আশা-আকাংক্ষা, সুখ-দুখ, প্ৰেম-বিৰহ আৰু জীৱন-সংগ্ৰামক অন্তৰৰ গভীৰতাৰে অনুভৱ কৰি তেখেতে সাহিত্যৰ মাধ্যমেৰে সেই অনুভৱৰ প্ৰকাশ ঘটাই আহিছে। সমাজৰ প্ৰতি থকা দায়বদ্ধতা আৰু মানুহৰ প্ৰতি থকা আন্তৰিকতাই তেখেতৰ ব্যক্তিত্বক এক সুকীয়া মৰ্যাদা প্ৰদান কৰিছে।

সাহিত্যৰ বিশাল পৃথিৱীত ড০ দাসে নিজৰ সৃষ্টিশীল প্ৰতিভা, অধ্যৱসায় আৰু গভীৰ অধ্যয়নৰ জৰিয়তে ইতিমধ্যে এক সুকীয়া পৰিচয় গঢ়ি তুলিবলৈ সক্ষম হৈছে। তেখেতৰ কলমত কেৱল শব্দৰ সমাহাৰ নাই; আছে জীৱনৰ স্পন্দন, সমাজৰ প্ৰতিচ্ছবি আৰু মানুহৰ মনৰ অনুৰণন। তেখেতৰ কেইবাখনো গ্ৰন্থ আৰু কাব্যপুথিয়ে অসমীয়া সাহিত্যৰ ভঁৰাল সমৃদ্ধ কৰাৰ লগতে পাঠকৰ মাজতো তেখেতৰ এক সুকীয়া স্থান গঢ়ি তুলিছে।

মানুহৰ জীৱনৰ ডায়েৰী যেন সাহিত্যৰ এক উৎকৃষ্ট দলিল। ড০ বাৰীন্দ্ৰ দাসৰ ‘ডায়েৰী পাতৰ পৰা’ গ্ৰন্থখন ইয়াৰ এক উজ্জ্বল নিদৰ্শন। ডায়েৰীকো এক সৃষ্টিশীল সাহিত্যৰ মৰ্যাদা প্ৰদান কৰি ২০১২ চনতে অসম সাহিত্য সভাই এই গ্ৰন্থখনৰ বাবে তেখেতক ‘ৰজনীকান্ত গগৈ বঁটা’ প্ৰদান কৰে। অসমৰ আগশাৰীৰ প্ৰকাশন গোষ্ঠী বনলতা প্ৰকাশনে গ্ৰন্থখন প্ৰকাশ কৰে।

ঠিক তেনেদৰে আধ্যাত্মিক বিষয়বস্তুক কবিতাৰ মূল উপজীব্য হিচাপে লৈ ৰচনা কৰা তেখেতৰ কাব্যগ্ৰন্থ *‘বুদ্ধবৃক্ষ’*য়েও অসমীয়া সাহিত্যত এক সুকীয়া স্থান লাভ কৰিছে। এই গ্ৰন্থখনৰ বাবে সদৌ অসম কবি সন্মিলনে ‘কাব্যপ্ৰাণ চুজাউদ্দিন বঁটা’ প্ৰদান কৰে। গ্ৰন্থখন অসমৰ আন এক আগশাৰীৰ প্ৰকাশন প্ৰতিষ্ঠান ‘কথা প্ৰকাশনে’ প্ৰকাশ কৰিছে। ইয়াৰ উপৰি প্ৰায় দহখনতকৈও অধিক গ্ৰন্থ সম্পাদনা কৰি ড০ বাৰীন্দ্ৰ দাসে অসমীয়া ভাষা-সাহিত্যৰ ভঁৰাললৈ এক উল্লেখযোগ্য আৰু অনবদ্য অৱদান আগবঢ়াই আহিছে।

তেখেতৰ সাহিত্যচৰ্চা কেৱল শব্দৰ বিন্যাস নহয়; ই যেন জীৱনক গভীৰভাৱে উপলব্ধি কৰাৰ এক নিৰন্তৰ সাধনা। তেখেতৰ সৃষ্টিৰ মাজেৰে সমাজৰ প্ৰতি থকা দায়িত্ববোধ, মানুহৰ প্ৰতি থকা মমত্ববোধ আৰু অসমৰ মাটি-পানী, ভাষা-সংস্কৃতিৰ প্ৰতি থকা গভীৰ টান স্পষ্ট হৈ উঠে।

এজন শিক্ষক হিচাপে তেখেতে ছাত্ৰ-ছাত্ৰীৰ মাজত জ্ঞানৰ পোহৰ বিলাই আহিছে; আনহাতে এজন সাহিত্যিক হিচাপে মননশীল আৰু সংবেদনশীল সমাজ গঢ়াৰ ক্ষেত্ৰতো নিজৰ অৱদান আগবঢ়াই আহিছে।

শিক্ষা আৰু সাহিত্যৰ ক্ষেত্ৰতে সীমাবদ্ধ নাথাকি ড০ বাৰীন্দ্ৰ দাসে সাংবাদিকতা আৰু সংবাদ মাধ্যমৰ ক্ষেত্ৰখনৰ সৈতেও সক্ৰিয়ভাৱে জড়িত হৈ আহিছে। তেখেতে অল ইণ্ডিয়া জাৰ্নেলিষ্ট ইউনিয়নৰ ডিব্ৰুগড় জিলা সমিতিৰ মুখ্য উপদেষ্টা হিচাপে কাৰ্যনিৰ্বাহ কৰি আছে। সাংবাদিকসকলৰ পেছাগত দায়িত্ব, সংবাদ মাধ্যমৰ স্বাধীনতা, নৈতিকতা আৰু সমাজৰ প্ৰতি গণমাধ্যমৰ দায়বদ্ধতাৰ বিষয়ত তেখেতৰ অভিজ্ঞতা আৰু পৰামৰ্শই গুৰুত্বপূৰ্ণ ভূমিকা পালন কৰি আহিছে। শিক্ষা, সাহিত্য আৰু সাংবাদিকতা—এই তিনিওটা ক্ষেত্ৰৰ সৈতে তেখেতৰ সম্পৰ্কই তেখেতৰ বহুমুখী প্ৰতিভা আৰু সমাজমনস্ক চিন্তাৰ পৰিচয় বহন কৰে।

ড০ বাৰীন্দ্ৰ দাসৰ ব্যক্তিত্বৰ অন্যতম উল্লেখযোগ্য দিশ হৈছে তেখেতৰ সৰলতা, নম্ৰতা আৰু মানুহৰ প্ৰতি থকা আন্তৰিকতা। জ্ঞান আৰু প্ৰজ্ঞাৰ অধিকাৰী হোৱাৰ পাছতো তেখেতৰ আচৰণত কোনো অহংকাৰৰ লেশমাত্ৰ দেখা নাযায়। সৰু-বৰ সকলোৰে সৈতে সহজভাৱে মিলি যাব পৰা তেখেতৰ এই সৰল মানসিকতাই তেখেতক অধিক আপোন কৰি তোলে। তেখেতৰ সৈতে হোৱা প্ৰতিটো আলাপ যেন একোটা নতুন শিক্ষা; প্ৰতিটো পৰামৰ্শ যেন আগুৱাই যোৱাৰ একোটা নতুন বাট।

বিশেষকৈ চাবুৱাৰ সমাজ জীৱনৰ সৈতে ড০ বাৰীন্দ্ৰ দাসৰ সম্পৰ্ক অতি নিবিড়। জন্মভূমিৰ প্ৰতি থকা গভীৰ টান আৰু সামাজিক দায়বদ্ধতাৰ বাবে তেখেতে চাবুৱাৰ সামাজিক, শৈক্ষিক আৰু সাংস্কৃতিক পৰিৱেশৰ সৈতে ওতঃপ্ৰোতভাৱে জড়িত হৈ আছে। চাবুৱাৰ সমাজ জীৱনৰ বিভিন্ন দিশ, মানুহৰ সমস্যা-সম্ভাৱনা আৰু সামাজিক-সাংস্কৃতিক পৰিৱৰ্তনক তেখেতে এগৰাকী সচেতন বুদ্ধিজীৱী হিচাপে অনুভৱ কৰি আহিছে।

মোৰ বাবে ড০ বাৰীন্দ্ৰ দাস কেৱল এগৰাকী সাহিত্যিক বা শিক্ষক নহয়; তেখেত এগৰাকী শ্ৰদ্ধাৰ দাদা, স্নেহশীল অভিভাৱকসুলভ ব্যক্তি আৰু মূল্যৱান পৰামৰ্শদাতা। জীৱনৰ বিভিন্ন সময়ত তেখেতে আগবঢ়োৱা উৎসাহ, পৰামৰ্শ আৰু দিক্‌নিৰ্দেশনা মোৰ বাবে সদায় অমূল্য সম্পদ হৈ থাকিব। তেখেতৰ সান্নিধ্যই মোক শিকাইছে—জ্ঞানৰ সৈতে বিনয়, সৃষ্টিশীলতাৰ সৈতে দায়বদ্ধতা আৰু সফলতাৰ সৈতে মানৱীয়তা সংযোগ কৰাটোৱেই প্ৰকৃত ব্যক্তিত্বৰ পৰিচয়।

চাবুৱাৰ আলহী গাঁৱৰ পৰা যাত্ৰা আৰম্ভ কৰি শিক্ষাৰ জগতত নিজৰ স্থান সুদৃঢ় কৰাৰ লগতে সাহিত্যৰ সুবাসেৰে অসমৰ সমাজ জীৱনক সমৃদ্ধ কৰি অহা ড০ বাৰীন্দ্ৰ দাসৰ কলম আগলৈও অধিক শক্তিশালী হওক। তেখেতৰ সৃষ্টিৰ পথত নিত্য নতুন ভাবনাৰ ফুল ফুলক, সাহিত্যৰ আকাশত তেখেতৰ সৃষ্টিৰ জোনাক আৰু অধিক উজলি উঠক—এয়াই মোৰ আন্তৰিক কামনা।

তেখেতৰ সাহিত্যযাত্ৰা হওক দীঘলীয়া, সৃষ্টিশীলতা হওক অবিৰত। তেখেতৰ কলমৰ প্ৰতিটো আঁচোৰে সমাজৰ হৃদয়ত জগাই তোলক নতুন চিন্তা, নতুন চেতনা আৰু নতুন আশাৰ পোহৰ। জন্মভূমি চাবুৱাৰ মাটি আৰু মানুহৰ সৈতে তেখেতৰ আত্মিক সম্পৰ্ক অধিক গভীৰ হওক; শিক্ষা, সাহিত্য, সাংবাদিকতা আৰু সমাজসেৱাৰ ক্ষেত্ৰত তেখেতৰ অৱদান আগন্তুক দিনবোৰতো অধিক বিস্তৃত হওক—এয়াই এগৰাকী শ্ৰদ্ধাৰ দাদাৰ প্ৰতি মোৰ আন্তৰিক শুভকামনা জনালো।

লেখক-তপন কুমাৰ শইকীয়া সাংবাদিক (তেখেতৰ ফেচবুক ৱালৰ পৰা)