সুজাতা পৰমনাদন

সুজাতা পৰমনাদন සුජාතා පරමනාදන්
জন্ম	সুজাতা চন্দ্ৰদাসা ১৩ নৱেম্বৰ, ১৯৩৭ (৮৮ বছৰ) মাটালে, শ্ৰীলংকা
শিক্ষা	চেইণ্ট এগ্নেছ কনভেণ্ট, মাটালে
পেচা	অভিনেত্ৰী, মডেল, সৌন্দৰ্য ৰাণী, ৰাজনীতিবিদ
সক্ৰিয় হৈ থকা সময়	১৯৭৫–বৰ্তমান
দাম্পত্যসঙ্গী	বাৰ্নাৰ্ড পৰমনাদন (বি. ১৯৫৪)
সন্তান	৯

সুজাতা চন্দ্ৰদাসা পৰমনাদন (জন্ম: ১৩ নৱেম্বৰ ১৯৩৭) শ্ৰীলংকাৰ এগৰাকী প্ৰাক্তন সৌন্দৰ্য ৰাণী আৰু শ্ৰীলংকান চলচ্চিত্ৰ, মঞ্চ তথা দূৰদৰ্শনৰ অভিনেত্ৰী। তেওঁ ৰাজনীতিৰ সৈতে জড়িত হোৱা শ্ৰীলংকাৰ প্ৰথমগৰাকী অভিনেত্ৰী, যিয়ে ১৯৬০ চনত মাটালে জিলাৰ য়াটাৱাট্টা গাম সভা পৰিষদৰ নিৰ্বাচনত জয়লাভ কৰিছিল।

ব্যক্তিগত জীৱন

১৯৩৭ চনৰ ১৩ নৱেম্বৰত শ্ৰীলংকাৰ মাটালেৰ হুলাংগামুৱা ৱালাৱাত তেওঁৰ জন্ম হৈছিল। তেওঁৰ পিতৃ শিক্ষা বিভাগত কৰ্মৰত আছিল। তেওঁ মাটালেৰ চেইণ্ট এগ্নেছ কনভেণ্টৰ (বৰ্তমান চেইণ্ট থমাছ গাৰ্লছ কলেজ নামেৰে পৰিচিত) পৰা শিক্ষা সম্পূৰ্ণ কৰিছিল।

১৬ বছৰ বয়সত সুজাতাই বাৰ্নাৰ্ড পৰমনাদনৰ সৈতে বিবাহপাশত আবদ্ধ হয়। তেওঁলোকৰ ছজন পুত্ৰ আৰু তিনিগৰাকী কন্যা সন্তান আছে। ১৯৮০ চনত তেওঁৰ স্বামী বাৰ্নাৰ্ডৰ হৃদৰোগত আক্ৰান্ত হৈ মৃত্যু হয়।

কেৰিয়াৰ

বিবাহৰ পিছত তেওঁ বহুতো সৌন্দৰ্য প্ৰতিযোগিতাত অংশগ্ৰহণ কৰিছিল। ১৯৫৫ চনত সুজাতাই 'টাইমছ' সৌন্দৰ্য প্ৰতিযোগিতাৰ ফাইনেলত প্ৰৱেশ কৰে। ইয়াৰ পিছত ১৯৫৬ চনত তেওঁ 'লংকাদ্বীপ পঞ্চ কল্যাণী' প্ৰতিযোগিতাত তৃতীয় স্থান লাভ কৰে। ১৯৫৭ চনত তেওঁ 'অবজাৰ্ভাৰ মিছ লংকা' প্ৰতিযোগিতাৰ ফাইনেলত প্ৰতিদ্বন্দ্বিতা কৰে। ১৯৬১ চনত তেওঁ 'বেল অফ দ্য য়েৰ' প্ৰতিযোগিতাত তৃতীয় স্থান লাভ কৰে। পৰৱৰ্তী সময়ত ১৯৮৫ চনত তেওঁ 'চাৰ্মিং গ্ৰেণ্ডমাদাৰ' প্ৰতিযোগিতাত প্ৰথম স্থান লাভ কৰে।

স্কুলত পঢ়ি থকা অৱস্থাতে তেওঁ অভিনেত্ৰী ৰুক্মণি দেৱী আৰু পৰিচালক বি. এ. ডব্লিউ. জয়মান্নেক লগ পোৱাৰ সুযোগ পাইছিল। ৰুক্মণিয়ে সুজাতাক দৈৱয়োগায়া বোলছবিত নিজৰ সৰু ভনীয়েকৰ চৰিত্ৰত অভিনয় কৰিবলৈ লৈছিল যদিও ছবিখন পলম হোৱা বাবে তেওঁ সেই সুযোগ হেৰুৱাইছিল। ইয়াৰ পিছত তেওঁ টি. আৰ. সুন্দৰম আৰু এ. আৰ. ৰাওৰ নিৰ্দেশনাত নিৰ্মিত বৰদা কাগেদা বোলছবিত ৰীতা ৰত্নায়কৰ বান্ধৱীৰ চৰিত্ৰত অভিনয় কৰাৰ সুযোগ পায়।

পৰৱৰ্তী সময়ত তেওঁ কৰুণাদেৱী চিৰিৱৰ্ধনাৰ মঞ্চ নাটক কুণ্ডলকেশীত 'কুণ্ডলকেশী'ৰ চৰিত্ৰত অভিনয় কৰে। ইয়াৰ পিছত ১৯৬৬ চনৰ ছবি দেলোভাক আথাৰা আৰু ১৯৬৭ চনৰ ছবি ৰাণ চ্যালুত অভিনয় কৰিবলৈ তেওঁ আমন্ত্ৰিত হয়। তেওঁৰ প্ৰথম টেলিড্ৰামা আছিল এইচ. ডি. প্ৰেমৰত্নৰ নিৰ্দেশনাত নিৰ্মিত চান্দুংগিৰা গিনিগানিয়ী। ইয়াৰ পিছত তেওঁ আৰু ২৪খন টেলিড্ৰামাত অভিনয় কৰে। ১৯৬৮ চনত তিষা লিয়ানাসূৰ্যৰ নিৰ্দেশনাত নিৰ্মিত পুঞ্চি বাবা ছবিৰ বাবে নিৰ্বাচিত হয় যদিও শেষত ছবিখনত এটা সৰু চৰিত্ৰতহে অভিনয় কৰিবলগীয়া হয়।

১৯৬০ চনত ২২ বছৰ বয়সত সুজাতাই শ্ৰীলংকা ফ্ৰীডম পাৰ্টীৰপৰা মাটালে জিলাৰ য়াটাৱাট্টা গাঁও পৰিষদৰ নিৰ্বাচনত প্ৰতিদ্বন্দ্বিতা কৰে। তেওঁ নিৰ্বাচনত জয়লাভ কৰি শ্ৰীলংকাৰ কনিষ্ঠতম গাম সভা সদস্য হোৱাৰ লগতে নিৰ্বাচনত জনপ্ৰিয় ভোটত জয়ী হোৱা শ্ৰীলংকাৰ প্ৰথমগৰাকী অভিনেত্ৰী হিচাপে পৰিগণিত হয়। ১৯৯৭ চনত তেওঁ পুনৰ মহাজন একসাথ পেৰামুনাৰপৰা মাটালে পৌৰসভা নিৰ্বাচনত প্ৰতিদ্বন্দ্বিতা কৰিছিল যদিও এইবাৰ তেওঁ বিফল হয়।

২০১৪ চনত তেওঁ ধাৰাবাহিক থুং মান থেন্না আৰু দুৰা গামনাকত অভিনয় কৰে। ২০০০ চনৰপৰা তেওঁ কেইবাটাও ব্যাৱসায়িক বিজ্ঞাপনত অভিনয় কৰিছে। ২০২১ চনত তেওঁক শ্ৰীলংকান চিনেমাৰ আদি দশক কেইটাত আগবঢ়োৱা অনৱদ্য অৱদানৰ বাবে জীৱনজোৰা সাধনা বঁটাৰে সন্মানিত কৰা হয়।

বাহ্যিক সংযোগ

• সুজাতা পৰমনাদন সম্পৰ্কে ইণ্টাৰনেট মুভি ডাটাবেছত থকা তথ্য।
• সুজাতা পৰমনাদন সম্পৰ্কে ইণ্টাৰনেট মুভি ডাটাবেছত থকা তথ্য।