Wikiconference NYC 2025
উত্তৰ আমেৰিকাৰ ২০২৫ৰ ৱিকিঅধিবেশন আৰু মোৰ অভিজ্ঞতা-২
১৬ অক্টোবৰ ২০২৫
অধিৱেশনৰ দ্বিতীয় দিনা পুৱা আমি হোটেলৰ পৰা ২০ মিনিটমান খোজকাঢ়ি ‘চিভিক হল’, য'ত সকলো গোট খাব সেই ঠাইখিনি পালোঁগৈ। ৰেজিষ্ট্ৰেচন হোৱাৰ পাছত আমি সকলোৱে এটা হ'লত প্ৰায় তিনিশ মান মানুহ বহিলোঁ। মই আৰু জোনালী দ্বিতীয় লাইনতে ষ্টেজৰ ওচৰতে বহিলোঁ। প্ৰথমে নিউয়ৰ্ক ৱিকিমিডিয়াৰ এক্সিকিউটিভ দাইৰেক্টৰ পেকিটা ৰূডাৰে (Pacita Rudder)দিনটোৰ আৰম্ভণিতে কেইষাৰমান কোৱাৰ পাছত, ৱিকি ফাউণ্ডেশ্যনৰ চি ই ও মেৰিয়ানা ইচকান্দাৰে (Maryana Iskander) তেওঁৰ বক্তব্য আৰম্ভ কৰিলে। এওঁ কথা কৈ থাকোঁতেই হঠাৎ এজন মানুহ আমাৰ কাষৰে গৈ ষ্টেজৰ ওপৰত উঠিল। মানুহজনৰ পিঠিত আছিল এখন ৰংবিৰঙী পতাকা আৰু হাতত এটা বন্দুক। তেওঁ নিজকে পেড’ফিলিয়া (Pedophilia) বুলি চিনাকী দি তাতেই আত্মহত্যা কৰিব বুলি সকলোকে ভাবুকি দিলে। মই কথাৰ গম ধৰিব পৰালৈকে অসংখ্য লোক ইতিমধ্যে হলটোৰ পৰা ওলাই গৈছিল। ময়ো আনক দেখি ততাতৈয়াকৈ বস্তু বাহিনী এৰি বাহিৰলৈ ওলাই গলোঁ। হঠাৎ দেখিলোঁ যে এজন সাহসী স্বেচ্ছাসেৱকে এই বন্দুকধাৰী লোকজনক গবা মাৰি ধৰি বন্দুকটো ল'বলৈ যত্ন কৰিছে। মই আৰু কিছু লোক কাষৰে নিউয়ৰ্ক বিশ্ববিদ্যালয়ৰ এটা বিল্ডিঙত সোমালোঁগৈ আৰু কিছুমান লোক বিল্ডিঙৰ সন্মুখৰ পথটোৰ আনফালে থিয় হ'লগৈ। অলপ সময়ৰ পাছত পুলিচ আহি সেই মানুহজনক ধৰি লৈ গ'ল। এই ঘটনাৰ বাবে এই দিনটোত হ'ব লগীয়া সকলো অনুষ্ঠান বাতিল কৰিলে। মই প্ৰথমবাৰ এনে পৰিস্থিতিৰ সন্মুখীন হোৱা বাবে মনটোত অত্যন্ত দুখ পালোঁ আৰু গোটেই দিনটো মনৰ খেলিমেলি লাগিল।
ৱিকিমিডিয়াৰ শিশু শোষণ আৰু নিৰ্যাতনৰ ক্ষেত্ৰত শূন্য সহনশীলতা নীতি আছে, যিটো এই বন্দুকধাৰী লোকজনে বিৰোধীতা কৰিবলৈ অধিবেশনলৈ অহাঅ’ (Ohio) ৰ পৰা আহিছিল।
ইয়াৰ পাছৰ দিনাটো ১৮ অক্টোবৰত, ৰাতিপুৱা একে ধৰণেৰেই সকলোবোৰ আৰম্ভ হ'ল। কিন্তু এইদিনা সুৰক্ষা ব্যৱস্থা বেছি কটকটীয়া কৰিলে। আমি একেদৰেই প্ৰথম মহলাৰ হলটোত সকলো গোট খালো। আজিৰ কিন’ট স্পিকাৰ জন হ'ল ক্ৰেগ নিউমাৰ্ক(Craig Newmark)। তেওঁ হৈছে দ্যা ক্ৰেগলিষ্টৰ চেয়াৰমেন আৰু এজন বিলিয়নাৰ। নৰ্থ আমেৰিকাৰ ৱিকিমিডিয়া ফাউণ্ডেশ্যনলৈ তেখেতে বহুতো ধন দান কৰিছে। ইমান সহজ সৰল মানুহজনৰ কথা শুনি বৰ ভাল লাগিল। তেখেত প্ৰকৃতি আৰু জীৱ-জন্তু প্ৰেমীও। তেখেতে ক'লে মানুহে জানিব লাগে ইনাফ ইজ এনাফ, মানে মানুহৰ আৱশ্যকতাৰ কেতিয়া শেষ হয় তাক জনাটো দৰকাৰী। তেওঁ কোৱা এইষাৰ কথা মোৰ শুনি বৰ ভাল লাগিল।
ইয়াৰ পাছত মই এটা প্ৰশিক্ষণ ৰূমলৈ গ'লোঁ। তাতেই ৱিকিমিডিয়ানৰ মাজত হোৱা মতানৈক্য কেনেকৈ কম কৰিব পাৰি তাৰ বৰ্ণনা কৰিলে। আজিকালি ই এটা বহুত চৰ্চিত বিষয়। কেইবাজনো স্বেচ্ছাসেৱকে একেলগে কাম কৰিলে এনে মতানৈক্য উদ্ভৱ হোৱাটো স্বাভাৱিক। ইয়াৰ পাছত মই ৱিকিৰ ভাষা আৰু ইয়াৰ জন্মৰ প্ৰতিটো ষ্টেজৰ বিষয়ে ক'লে কেলিফৰ্ণিয়াৰ সৃষ্টি চেথীয়ে। ভাষাবোৰ কিদৰে এটা ইনকুবেটৰত থাকি গঢ় লৈ লাহে লাহে প্ৰচলিত হয় তাক আমাক বুজালে। বহুতো ভাষা ইনকুবেটৰতে মৃত্যু হৈ নোহোৱা হয়। গতিকে ৱিকিমিডিয়াই কিদৰে ভাষা ৰক্ষা কৰি আহিছে, সেই বিষয়ে ক'লে।
ইয়াৰ পাছত ৱিকিৰ মহিলাসকলৰ এখন সভা হৈছিল। তাত উপস্থিত থাকি সকলোবোৰ মহিলা কোন কোন চহৰ বা দেশৰ পৰা আহিছে আৰু কিহৰ বাবে ৱিকিমিডিয়াৰ স্বেচ্ছাসেৱী হ'ল তাক আমি সকলোৱে নিজৰ নিজৰ পৰিচয় দি বৰ্ণনা কৰিলোঁ। মই কানাডা নিৱাসী অসমীয়া ভাষাৰ ৱিকিপিডিয়াৰ পৰা অহা বুলি কলত সকলোৱে মোৰ নামৰ টেগ্ টোৰ লগত ‘অসমীয়া ৱিকি’ বুলি লিখাটো ওচৰৰ পৰা চাই এই ভাষাৰ ৱিকিৰ লগত আৰু কিমান মানুহে কাম কৰে কোন দেশ, কোন ৰাজ্য ইত্যাদিবোৰ শুধিবলৈ ধৰিলে। এনেইয়ো অসমৰ কথা আৰু অসমীয়া ৱিকিৰ বিষয়ে কবলৈ ভালেই পাওঁ বাবে সুযোগ এৰি নিদিলোঁ। সকলোয়ে শুনি অতি আনন্দ পালে। পাছত মেপ খনত তেওঁলোকক দেখুওৱাই দিলোঁ। আমাৰ মাজৰ আটাইতকৈ বয়সীয়াল গৰাকীৰ বয়স ৮০ বা তাৰ উৰ্ধত। তেওঁ নিজে সৰুৰে পৰাই ফিগাৰ স্কেটিং(Figure skating) কৰে বাবে ২০০৬ চনৰ পৰা ৱিকিপিডিয়াত ফিগাৰ স্কেটিঙৰ বিষয়ে প্ৰবন্ধ লিখিবলৈ আৰম্ভ কৰিছিল।
আমি বিভিন্ন স্বেচ্ছাসেৱকৰ পৰা জানিব পাৰিলোঁ যে তেওঁলোকে যি বিষয়ৰ ওপৰত আগ্ৰহী সেইটো বিষয়ৰ ওপৰত লিখে। কোনোবাই যদি খেল ভাল পায়, তেওঁ খেলৰ ওপৰত লিখে, কোনোবাজনে আকৌ পৃথিৱীৰ হিন্দু মন্দিৰবোৰৰ ওপৰত লিখিছে, কোনোবাজনে ভিডিঅ' গেমৰ ওপৰত লিখে ইত্যাদি বিভিন্ন স্বেচ্ছাসেৱী লগ পালোঁ।
এজন ১৮ বছৰীয়া যুৱকক লগ পাই শুধিলো তেওঁ কেনেকৈ আৰু কেতিয়া পৰা ৱিকিপিডিয়াত প্ৰবন্ধ লিখে। মোক আচৰিত কৰি তেওঁ ক'লে যে তেওঁ ৮ বছৰ বয়সৰ পৰা ৱিকিপিডিয়াত পৃথিৱীত হোৱা ফুটবল (soccer ) খেলবোৰৰ ওপৰত প্ৰবন্ধ সৃষ্টি কৰিছে। দেউতাকে প্ৰথমে তেওঁৰ একাউণ্ট খুলি দিছিল যদিও শিক্ষকৰ পৰাহে প্ৰেৰণা পাই ৱিকিপিডিয়াত প্ৰবন্ধ লিখিবলৈ আৰম্ভ কৰিলে। মোৰ শুনি অত্যন্ত ভাল লাগিল কিয়নো আমাৰ অসমীয়া অনলাইন বিদ্যালয় পি জি আই বিদ্যালয়তো আমি ৮-৯ বছৰীয়া ছাত্ৰ ছাত্ৰীক ৱিকিউৎসত কিদৰে সম্পাদনা কৰিব লাগে ইয়াক শিকাইছিলোঁ।
নিউয়ৰ্কৰ ৱিকিপিডিয়ান সকলে প্ৰায়েই লাইব্ৰেৰীৰ পৰা খবৰ কাগজ আৰু কিতাপ সংগ্ৰহ কৰি একগোট হৈ একেলগে প্ৰবন্ধ লিখে।
একেদিনাই এটা কোঠাত কানাডাৰ পৰা যোৱা স্বেচ্ছাসেৱক সকলৰ এখন সভা আছিল। সেই সভাত মাত্ৰ কেইজনমানহে উপস্থিত আছিল। এই বছৰ আমেৰিকা যুক্তৰাষ্ট্ৰৰ ৰাষ্ট্ৰপতি ডনাল্ড ট্ৰাম্পে কানাডাৰ পৰা অহা বস্তুৰ ওপৰত লগোৱা কৰৰ নীতিৰ বিৰোধিতা কৰি কানাডাৰ পৰা আনুস্থানিক ভাৱে কাকো পঠিওৱা নাছিল। বৃত্তি পাই অহাৰ ভিতৰত দেশখনৰ মাত্ৰ আমি তিনি গৰাকীহে আছিলোঁ। কেইজনমান নিজৰ খৰচেৰে আহিছে বুলি জানিব পাৰিলোঁ। এই সভাখন ২০২৬ ত এডমণ্টনত হ'ব লগীয়া ৱিকি সন্মিলনৰ বাবে সভা আছিল। ২০২৬ ৰ উত্তৰ আমেৰিকাৰ ৱিকি সন্মিলনখন কানাডাৰ এডমণ্টনত হ'ব বুলি জানি অত্যন্ত সুখী হলোঁ, যিহেতু এডমণ্টন আমাৰ ৰাজ্যৰ এখন চহৰ আৰু ই আমাৰ চহৰৰ পৰা মাত্ৰ ৩১৭ কি: মি: দূৰত্বত অৱস্থিত। আমি সভাখনত নিজৰ নিজৰ পৰিচয় ডাঙি ধৰিলোঁ আৰু অহা বছৰ ছেপ্টেম্বৰ মাহত ২৪ তাৰিখে আমি সকলোৱে আহিম বুলি কথা দি সভাৰ অন্ত পেলালোঁ।
.jpg)
.svg){kind=icon}
_-_The_Noun_Project.svg){kind=small}
