'ইণ্ডিক অৰেল কালচাৰ' হৈছে ৱিকিমিডিয়া ফাউণ্ডেচনৰ অধীনত ভাৰত তথা ভাৰতীয় উপমহাদেশৰ বিভিন্ন ভাষা সম্প্ৰদায় সমূহৰ চহকী আৰু বৈচিত্ৰ্যময় মৌখিক পৰম্পৰা সংৰক্ষণৰ ওপৰত গুৰুত্ব আৰোপ কৰা এক প্ৰকল্প। ৱিকিমিডিয়া কমন্সৰ দৰে মুকলি মঞ্চৰ জৰিয়তে বিৰল আৰু বিপন্ন মৌখিক সংস্কৃতিক বিশ্ববাসীৰ বাবে সুলভ কৰি তোলাৰ ক্ষেত্ৰত এই পদক্ষেপে গুৰুত্বপূৰ্ণ ভূমিকা পালন কৰিছে।
এই প্ৰচেষ্টাৰ গুৰুত্বলৈ চাই অসমীয়া ৱিকিমিডিয়া সমাজৰ পৰা বিকাশ দিহিঙীয়া আৰু মই এই প্ৰকল্পৰ অধীনত অসমীয়া মৌখিক পৰম্পৰাৰ সংৰক্ষণৰ বাবে এটা দল গঠন কৰাৰ সিদ্ধান্ত লৈছিলোঁ। আমি দুয়োজনে মিলি বৃহত্তৰ অসমীয়া জনগোষ্ঠী সমূহৰ ভিতৰত প্ৰাথমিক পৰ্যায়ত মিচিং আৰু সোণোৱাল কছাৰী জনগোষ্ঠীৰ মৌখিক পৰম্পৰাৰ নথিভুক্তকৰণ আৰু সংৰক্ষণৰ উদ্যোগ লৈছিলোঁ।
৪–৫টা ক্ষেত্ৰ ভ্ৰমণৰ সময়ছোৱাত আমি এই মৌখিক সংস্কৃতিৰ বিভিন্ন দিশ প্ৰদৰ্শন কৰা প্ৰায় ১০টা ভিডিঅ’ সফলতাৰে ৰেকৰ্ড কৰিবলৈ সক্ষম হওঁ। এই ৰেকৰ্ডিংসমূহ ৱিকিমিডিয়া কমন্সত ইতিমধ্যে সফলতাৰে আপলোড কৰা হৈছে। এইসমূহে বিনামূলীয়া আৰু মুক্ত সাংস্কৃতিক জ্ঞানৰ বিশ্বব্যাপী ভঁৰালত অৰিহণা যোগাইছে বুলি আশা কৰিব পাৰি।
আমাৰ অৱদানৰ ভিত্তিত এই প্ৰকল্পৰ উদ্যোগত যোৱা ২২ আৰু ২৩ মাৰ্চ তাৰিখে বাংগালুৰুত অনুষ্ঠিত হোৱা অফলাইন অনুষ্ঠানত অংশগ্ৰহণ কৰিবলৈ আমাক নিৰ্বাচিত কৰা হৈছিল। এই সমাৱেশত সমগ্ৰ ভাৰতৰ বিভিন্ন ভাষা-সংস্কৃতিৰহৈ এই প্ৰকল্পৰ অধীনত কাম কৰা অৱদানকাৰীসকলক একত্ৰিত কৰা হৈছিল। সহযোগী অংশগ্ৰহণকাৰীসকলক লগ পোৱা, তেওঁলোকৰ অবিশ্বাস্য কামৰ বিষয়ে জানিব পৰা, আৰু দেশৰ বিভিন্ন কোণৰ পৰা মৌখিক পৰম্পৰাৰ সৌন্দৰ্য্যৰ সাক্ষী হোৱাটো আছিল এক আনন্দদায়ক অভিজ্ঞতা।
অনুষ্ঠানটোৱে আমাক মূল্যৱান কাৰিকৰী প্ৰশিক্ষণ, ডকুমেণ্টেচন আৰু আপলোডিঙৰ বাবে উত্তম পদ্ধতিৰ বিষয়ে অন্তৰ্দৃষ্টিও প্ৰদান কৰে। তাতোকৈ গুৰুত্বপূৰ্ণ কথাটো হ’ল, ই আমাৰ এই কাম অব্যাহত ৰখাৰ সংকল্পক শক্তিশালী কৰি তুলিলে লগতে ৱিকিমিডিয়া কমন্সৰ দৰে মিডিয়া ফাইলৰ মুকলি মঞ্চত ভাৰতীয় মৌখিক ঐতিহ্যৰ প্ৰতিনিধিত্ব আৰু অধিক সমৃদ্ধ কৰিলে।
ক'বলৈ গ'লে এই প্ৰকল্পটো এটা দীৰ্ঘম্যাদী প্ৰক্ৰিয়া—ইয়াৰ জৰিয়তে বিশ্বব্যাপী স্বীকৃতিৰ যোগ্য লগতে আত্ম পৰিচয় হেৰুৱাবলৈ ধৰা সম্প্ৰদায়সমূহৰ কণ্ঠ, কাহিনী আৰু পৰম্পৰাক উদযাপন তথা সংৰক্ষণৰ সপোন দেখে। পৰৱৰ্তী সময়ত ইয়াক আৰু অধিক বহল পৰিসৰত আগুৱাই নিয়াৰ আশা কৰা হৈছে। -Nayan j Nath (বাৰ্তা)
.jpeg)
.svg){kind=icon}
_-_The_Noun_Project.svg){kind=small}
