গাং‍মৌ থান

গাং‍মৌ থান হৈছে মহাপুৰুষ শ্ৰীমন্ত শংকৰদেৱে প্ৰতিষ্ঠা কৰা এখন থান। এই থান অসমৰ বিহালীৰ বৰগাং আৰু ব্ৰহ্মপুত্ৰ নদীৰ সংগমস্থলীত অৱস্থিত।

ইতিহাস

মহাপুৰুষ শংকৰদেৱৰ তীৰ্থভ্ৰমণ সময়ত অসমৰ বিভিন্ন ঠাইত থাকি বৈষ্ণৱ ধৰ্ম প্ৰচাৰ কৰিছিল। সেই স্থানবোৰত কালক্ৰমত কিছুমান সত্ৰ, মঠ-মন্দিৰ ইত্যাদিৰ গঢ় লৈ উঠিছিল। এনে এখন থান হ’ল গাংমৌ থান।

শংকৰদেৱ গাং‍মৌ থানলৈ প্ৰকৃততে কিমান চনত আহিছিল, সেই বিষয়ে কোনো তথ্য পোৱা নাযায়। বৰদোৱা গুৰু চৰিতৰ মতে তেওঁ আনুমানিক ১৪৩৮ শক অৰ্থাৎ ১৫১৬ চনত গাংমৌ থানলৈ আহিছিল। লক্ষ্মীনাথ বেজবৰুৱাৰ মহাপুৰুষ শ্ৰী শংকৰদেৱ আৰু মাধৱদেৱ নামৰ গ্ৰন্থখনত উল্লেখ কৰিছে যে, শংকৰদেৱ গাংমৌত ৭ বছৰ ৬ মাহ আছিল। স্থানীয় মৌখিক কিংবদন্তীৱ মতেও শংকৰদেৱ গাংমৌত ৭ বছৰ ৬ মাহ কাল আছিল। কথা গুৰু চৰিতৰ মতে, গাংমৌত শংকৰদেৱ চাৰে পাঁচ বছৰ আছিল। কিন্তু কায়স্থ সমাজৰ ইতিবৃত্তত শংকৰদেৱে ১৪৩২ শক অৰ্থাৎ ১৫১০ চনত গাংমৌ এৰা বুলি পোৱা যায়। গতিকে শংকৰদেৱ গাংমৌলৈ অহা আৰু গাংমৌ এৰাৰ সঠিক সময়ৰ বিষয়ে এতিয়াও ভালকৈ জনা নাযায়।

গাংমৌ থানৰ নিৰ্মাণ

শংকৰদেৱে প্ৰতিষ্ঠা কৰা গাংমৌ থানখন আনুমানিক ১৯২৭-২৮ চনমানতে খহনীয়াৰ ফলত ব্ৰহ্মপুত্ৰৰ বুকুত জাহ যায়। এই থানখন প্ৰথমতে খেৰৰে নিৰ্মাণ কৰা হৈছিল। পিছত এই খেৰৰ থানখন স্থানীয় ৰঘূবী ছেত্ৰী নামৰ এজন নেপালী বৈষ্ণৱ গো-পালকে তেজপুৰৰ পৰা টিনপাত আনি নতুনকৈ নিৰ্মাণ কৰি দিছিল বুলি শুনা যায়।

সাম্প্ৰতিক কালৰ গাংমৌ থান

শংকৰদেৱৰ বাসগৃহ বুলি প্ৰবাদ থকা ওখ ঠাইখিনিত বৰ্তমান প্ৰায় একলাখতকৈও অধিক টকা ব্যয় কৰি গাংমৌ থানখন নতুনকৈ নিৰ্মাণ কৰা হয়। ১৯৮১ চনৰ ১৬ জুলাইত এই নৱনিৰ্মিত গাংমৌথানখন প্ৰতিষ্ঠা কৰা হয়। এতিয়া শংকৰদেৱৰ স্মৃতি জড়িত থকা কোনো বস্তু নাই। স্থানীয়ভাৱে পোৱা এটা শিলৰ মূৰ্তিকে শংকৰদেৱৰ সময়ৰ বুলি ভাবি ৰাইজে ইয়াত সংৰক্ষণ কৰি ৰাখিছে।

বাহ্যিক সংযোগ

• গাংমৌ থানৰ বিষয়ে বিতংকৈ পঢ়ক