অসমীয়া: কথিত আছে যে, ছেলা নামৰ পাহাৰীয়া ছোৱালী এজনীয়ে সৈন্যবাহিনীৰ ৰাইফল মেন যশৱন্ত সিং ৰাৱতক ভাল পাইছিল আৰু ১৯৬২ চনৰ ভাৰত- চীন যুদ্ধৰ সময়ত প্ৰতিদিনে খোৱা বস্তু লৈ যশৱন্ত সিঙক দিবলৈ গৈছিল আৰু তেওঁক যুঁজিবলৈ প্ৰেৰণা দিছিল। এদিন যুদ্ধত যশৱন্ত সিঙৰ মৃত্যু হয় আৰু তেওঁৰ মৃত্যুৰ কথা শুনি ছেলাই আত্মহত্যা কৰে। দুয়ো জনৰ মৃত্যুৰ পিছত যি ঠাইৰ পৰা যশৱন্ত সিঙে চীনা সৈন্যৰ বিৰুদ্ধে যুঁজিছিল সেই গড়টো যশৱন্ত গড় আৰু যি ৰাস্তাৰে ছেলা অহা-যোৱা কৰিছিল সেই ৰাস্তা ছেলা পাছ নামে বিখ্যাত হৈ পৰে। ছেলা পাছত থকা মনোমোহা হ্ৰদটোৱেই হৈছে ছেলা হ্ৰদ। তিব্বতীয় বৌদ্ধ ধৰ্মমতে, এই হ্ৰদটো হৈছে প্ৰায় ১০১টা পবিত্ৰ হ্ৰদৰ ভিতৰত এটা। ছেলা হ্ৰদটো ৪১৭০ মিটাৰ অৰ্থাৎ ১৩,৭০০ ফুট উচ্চতাত অৱস্থিত। ইয়াক পেৰেডাইজ লেক নামেৰেও জনা যায়।