ডিগবৈ যুদ্ধ সমাধিক্ষেত্ৰ

অসমীয়া ৱিকিপিডিয়াৰ পৰা
(ডিগবৈ ৱাৰ চিমেট্ৰীৰ পৰা পুনঃনিৰ্দেশিত)
Jump to navigation Jump to search
ডিগবৈ যুদ্ধ সমাধিক্ষেত্ৰ

ডিগবৈ যুদ্ধ সমাধিক্ষেত্ৰ বা ডিগবৈ ৱাৰ চিমেট্ৰী অসমতিনিচুকীয়া জিলাডিগবৈত অৱস্থিত এক সমাধিক্ষেত্ৰ।[1] এই সমাধিক্ষেত্ৰ দ্বিতীয় বিশ্বযুদ্ধৰ সময়ৰ আৰু বৰ্তমান ইয়াত ২০০টা সমাধি আছে। ইয়াৰে ১৯৪টা সমাধি চিনাক্ত আৰু ৬টা অচিনাক্ত। চিনাক্ত সমাধি সমূহৰ ১৯৭ জন সৈনিক কমনৱেলথ ৰাষ্ট্ৰসমূহৰ আৰু আমেৰিকা যুক্তৰাষ্ট্ৰ, ইটালী আৰু বেলজিয়ামৰ এজনকৈ সৈনিক আছে।[2]

অৱস্থান[সম্পাদনা কৰক]

ডিগবৈ যুদ্ধ সমাধিক্ষেত্ৰ অসমৰ তিনিচুকীয়া জিলাৰ ডিগবৈত অৱস্থিত। ই ম্যানমাৰৰ সীমাৰ নিচেই কাষৰ লিডু পথত অৱস্থিত। ডিগবৈ যুদ্ধ সমাধিক্ষেত্ৰ ডিগবৈ তৈল নগৰীৰ প্ৰায় ১.৫ কিঃমিঃ নিলগত পেঙেৰী চাহ বাগিচাত অৱস্থিত।[2][3]

ইতিহাস[সম্পাদনা কৰক]

ইয়াণ্ডাবু সন্ধিৰ পিছত ১৮২৬ চনৰ পৰা অসম ব্ৰিটিছৰ অধীনলৈ গৈছিল। দ্বিতীয় বিশ্বযুদ্ধৰ সময়ত ভাৰত ব্ৰিটিছ কমনৱেলথৰ অংশ আছিল। সেইসময়ত অসমত ব্ৰিটিছ ভাৰতীয় সন্যৰ পূব প্ৰান্তীয় কমাণ্ড হিচাপে বাৰ্মা অঞ্চলত কাৰ্যকৰী আছিল। উত্তৰ পূৰ্বাঞ্চলৰ পূব প্ৰান্তত অৱস্থিত ডিগবৈ চহৰ বাৰ্মা সীমাৰ নিচেই কাষত অৱস্থিত হোৱা বাবে এই দুই অঞ্চলৰ যুগসূত্ৰত পৰিগণিত হৈছিল। সেয়ে ব্ৰিটিছ সকলে লিডু পথত অৱস্থিত ডিগবৈত এখন সন্য চিকিৎসালয় স্থাপন কৰিছিল। পিছলৈ চিকিৎসালয় খনৰ কাষতে এখন সমাধিক্ষেত্ৰ গঢ় লৈ উঠে। যুদ্ধৰ সময়ত চিকিৎসালয় খনত মৃত ঘোষিত সন্য সকলক ইয়াতেই সমাধিস্থ কৰা হৈছিল। দ্বিতীয় বিশ্বযুদ্ধৰ শেষলৈকে ইয়াত ৭০টা সমাধি আছিল। পিছলৈ সন্য সমাধি সেৱাৰ বিষয়া সকলে ইয়ালৈ পানীতোলা, যোৰহাট, মাৰ্ঘেৰিটা, তিনিচুকীয়া, লিডু আদি অঞ্চলৰ পৰা কেইবাটাও সমাধি আনে। স্থায়ী সংৰক্ষণৰ অভাৱৰ বাবে এই সমাধি সমূহ ডিগবৈলৈ স্থানান্তৰ কৰা হৈছিল। সেইদৰে বাৰ্মাৰ শ্বিংভৌয়াংত অৱস্থিত আমেৰিকা যুক্তৰাষ্ট্ৰ সন্য সমাধিক্ষেত্ৰৰ পৰাও এজন সৈনিকৰ সমাধি ইয়ালৈ অনা হৈছিল।[2]

প্ৰথমতে ডিগবৈ সমাধিক্ষেত্ৰ মুখ্য পথৰ পৰা উঠি যোৱা টিলা এটাত স্থাপন কৰা হৈছিল। পিছলৈ ১৯৫০ চনৰ প্ৰবল অসম ভূমিকম্পত ই বেয়াকৈ ক্ষতিগ্ৰস্ত হয়। ১৯৫৩ চনৰ বৃষ্টিপাত আৰু ভূমিস্খলনৰ বাবে ইয়াক সেই ঠাইৰ পৰা স্থানান্তৰ কৰি বৰ্তমান স্থানলৈ অনা হৈছিল। বৰ্তমান ইয়াত দ্বিতীয় বিশ্বযুদ্ধৰ সময়ৰ ১৯৭ জন কমনৱেলথ ৰাষ্ট্ৰসমূহৰ সৈনিক আৰু আমেৰিকা যুক্তৰাষ্ট্ৰ, ইটালী আৰু বেলজিয়ামৰ এজনকৈ সৈনিকৰ সমাধি আছে।[2]

যাতায়ত[সম্পাদনা কৰক]

ডিগবৈৰ পৰা যুদ্ধ সমাধিক্ষেত্ৰলৈ অতি সহজে যাব পাৰি। ডিগবৈ স্থল পথেৰে তিনিচুকীয়া, দুলিয়াজান, মাৰ্ঘেৰিটা আদি উল্লেখযোগ্য চহৰৰ লগত সংযোগিত। ই ডিগবৈ ৰে'ল ষ্টেচনৰ পৰা ৩ কিঃমিঃ নিলগত। ইয়াৰ নিকটৱৰ্তী বিমানবন্দৰ হৈছে ডিব্ৰুগড় বিমানবন্দৰ। ই সমাধিক্ষেত্ৰৰ পৰা ৭৮ কিঃমিঃ নিলগত অৱস্থিত।

পৰ্যটন[সম্পাদনা কৰক]

তিনিচুকীয়া জিলাৰ ডিগবৈ সমাধিক্ষেত্ৰ এক উল্লেখযোগ্য পৰ্যটন স্থল। বিশ্বযুদ্ধৰ সময়ৰ এই সমাধিক্ষেত্ৰ খনে অতীতত স্বাক্ষৰ বহন কৰিছে। সমাধিক্ষেত্ৰখন গ্ৰীষ্মকালত পুৱা ৮ বজাৰ পৰা আবেলি ৫ বজালৈ আৰু শীতকালত পুৱা ৮ বজাৰ পৰা আবেলি ৪ বজালৈ খোলা থাকে। প্ৰতি বছৰে নৱেম্বৰ মাহৰ দ্বিতীয় শনিবাৰে ইয়াত সৰ্বধৰ্ম প্ৰাৰ্থনা সভা অনুষ্ঠিত হয়। এই সভাত বিদেহী সাহসী আত্মাৰ সদগতিৰ বাবে পৱিত্ৰ বাইবেল, শ্ৰীমদ্ভগৱতগীতা, গুৰু গ্ৰন্থ চাহিব আৰু কোৰানৰ পাঠ কৰা হয়।[4]

তথ্য উৎস[সম্পাদনা কৰক]