ভিভিমাৰী ভেণ্ডাৰপুৰ্টেন

ভিভিমাৰী ভেণ্ডাৰপুৰ্টেন
জন্ম	কেণ্ডী, শ্ৰীলংকা
পেচা	কবি‍, ইংৰাজী বিষয়ৰ বিশ্ববিদ্যালয়ৰ অধ্যাপক
সময়	২০০৭ - বৰ্তমান
ধৰণ	কবিতা
উল্লেখনীয় কৰ্মৰাজি	নথিঙ প্ৰিপেয়াৰ্ছ ইউ, ষ্টিচ ইয়ৰ আইলিডছ শ্বাট, "বৰ'ইড ডাষ্ট"
উল্লেখযোগ্য বঁটা	গ্ৰেটিয়ান বঁটা
ৱেবছাইট	vivimariev.blogspot.com

ভিভিমাৰী ভেণ্ডাৰপুৰ্টেন (ইংৰাজী: Vivimarie Vanderpoorten) হৈছে‍ শ্ৰীলংকাৰ এগৰাকী কবি। ২০০৭ চনত তেওঁৰ নথিঙ প্ৰিপেয়াৰ্ছ ইউ নামৰ গ্ৰন্থখনে গ্ৰেটিয়ান বঁটা লাভ কৰিছিল। ২০০৯ চনত তেওঁক দিল্লীত ছাৰ্ক কাব্য বঁটাও প্ৰদান কৰা হৈছিল।

প্ৰাৰম্ভিক জীৱন আৰু শিক্ষা

শ্ৰীলংকাৰ কেণ্ডীত জন্মগ্ৰহণ কৰা বেলজিয়াম আৰু সিংহলী বংশধৰৰ ভেণ্ডাৰপুৰ্টেনে কুৰুনেগালাত ডাঙৰ-দীঘল হৈছিল। তেওঁ কেলানিয়া বিশ্ববিদ্যালয়ৰ পৰা বি.এ., ইউকেৰ আলষ্টাৰ বিশ্ববিদ্যালয়ৰ পৰা এম.এ. আৰু পিএইচ.ডি লাভ কৰিছে।

কেৰিয়াৰ

ভেণ্ডাৰপুৰ্টেন বৰ্তমান শ্ৰীলংকাৰ মুক্ত বিশ্ববিদ্যালয়ৰ ইংৰাজী ভাষা, সাহিত্য আৰু ভাষাতত্ত্বৰ জ্যেষ্ঠ অধ্যাপক।

২০০৭ চনত ভেণ্ডাৰপুৰ্টেনৰ নাথিং প্ৰিপেয়াৰ্ছ ইউ নামৰ প্ৰথমখন গ্ৰন্থ জিউছ পাব্লিচাৰ্ছৰ দ্বাৰা প্ৰকাশিত হৈছিল। তেওঁৰ দ্বিতীয় কবিতা সংকলন ষ্টিচ ইয়ৰ আইলিডছ শ্বাট (২০১০)ত নাৰীবাদ আৰু শ্ৰীলংকাৰ অসামৰিক যুদ্ধৰ পৰিণতিৰ দৰে‍ বিষয়বস্তুক সম্বোধন কৰিছে। ২০১৭ চনত বৰ'ইড ডাষ্ট নামৰ তেওঁৰ তৃতীয়খন কাব্য সংকলন কলম্বোৰ সৰসাৱীয়ে প্ৰকাশ কৰিছিল। ২০১১ চনৰ গালে সাহিত্য মহোৎসৱত ভিভিমাৰি উপস্থিত আছিল। সেই সাহিত্য উৎসৱত তেওঁ লাছান্থা ৱিক্ৰেমাটুঙ্গেৰ হত্যা বিষয়ত তেওঁৰ প্ৰতিক্ৰিয়া প্ৰকাশ কৰি‍ কবিতা পাঠ কৰিছিল।

সিংহলী, স্পেনিছ, নেপালী, আৰু চুইডিছ ভাষালৈ তেওঁৰ সাহিত্য-কৰ্ম অনূদিত হৈছে। আৰম্ভণীতে ভাৰত, বাংলাদেশ, মেক্সিকো, ছুইডেন, আমেৰিকা যুক্তৰাষ্ট্ৰৰ লগতে চুগাৰ মুলে আৰু প্ৰ'পোষ্টক'লনিয়েল টেক্সট'ৰ দৰে মুক্ত প্ৰৱেশাধিকাৰ থকা অনলাইন আলোচনীত প্ৰকাশিত হৈছিল।

কমলা দাস, মাৰ্গাৰেট এটউড, মায়া এঞ্জেলো এনি চেক্সটন, আৰু শ্বেৰন অ'ল্ডছক তেওঁ তেওঁক প্ৰভাৱিত কৰা লেখকসকলৰ ভিতৰত তালিকাভুক্ত কৰিছে‍। আনহাতে‍ তেওঁ পঢ়া সমসাময়িক লেখক হিচাপে মোশ্বিন হামিদ, খালেদ হোছিনি চিমামাণ্ডা এনগোজি আদিচি আৰু জেনেট ৱিণ্টাৰছন নাম উল্লেখ কৰিছে‍।

সমালোচনা

গ্ৰেটিয়ান বঁটা প্ৰদান কৰা বিচাৰক পেনেলৰ অধ্যক্ষ ড° সিংহাৰাজা তম্মিতা-ডেলগোডাই তেওঁৰ কবিতাক কোমলতা প্ৰতিফলিত ন্যূনতমতাবাদ যিয়ে‍ আত্মাক স্পৰ্শ কৰে বুলি অভিহিত কৰিছে। নেলৌফাৰ ডি মেলে তেওঁৰ প্ৰথমখন গ্ৰন্থৰ বিষয়ে এনেদৰে কৈছে‍, "একোৱেই আপোনাক প্ৰস্তুত নকৰে, ইংৰাজী ভাষাত ৰচিত প্ৰথমখন কিতাপেৰে‍ শ্ৰীলংকাৰ সৃষ্টিশীল লিখনিৰ মঞ্চত এজন অতি প্ৰতিভাশালী কবিৰ উল্লেখযোগ্য প্ৰৱেশৰ কথা ঘোষণা কৰিছে‍। ভেণ্ডাৰপুৰ্টেনৰ কবিতাবোৰত ব্যক্তিগতৰ পৰা ৰাজনৈতিক বিষয়লৈ এক আকৰ্ষণীয় পৰিসৰ আছে আৰু ই লিংগ, জাতি আৰু শ্ৰেণীৰ বিষয়সমূহক গুৰুত্বপূৰ্ণভাৱে প্ৰতিফলিত কৰে আৰু লগতে আমাৰ সমুখত প্ৰেম, ক্ষতি, হিংসা আৰু আনন্দৰ স্পষ্ট প্ৰসংগ দাঙি ধৰে‍। তেওঁ পদ্য আৰু ছন্দত থকা তেওঁৰ ভাল দখলৰ উদাহৰণ দাঙি ধৰিছে আৰু উচ্চাৰণৰ অৰ্থনীতিত এক সক্ষমতা প্ৰদান কৰিছে‍ যাৰ মাজত কবি আৰু পাঠক লগ হ'ব পাৰে আৰু পাঠককো তেনেদৰেই স্মৰণ কৰিবলৈ সুযোগ দিয়ে‍।"

বঁটা আৰু সন্মান

প্ৰথমখন গ্ৰন্থ নাথিং প্ৰিপেয়াৰ্ছ ইউৰ বাবে তেওঁক ২০০৭ চনৰ গ্ৰেটিয়ান বঁটা আৰু ২০০৯ চনৰ ছাৰ্ক কাব্য বঁটা প্ৰদান কৰা হৈছিল। তেওঁ ইংৰাজী কবিতাৰ বাবে ৰাজ্যিক সাহিত্য বঁটা লাভ কৰিছিল (২০১১ চনৰ অক্টোবৰ মাহত শ্ৰীলংকাৰ আন এগৰাকী কবি ৰাম্যা চামালি জিৰাসিংহেৰ সৈতে এই বঁটা লাভ কৰৰিছিল)। ২০১৬ চনৰ গ্ৰেটিয়ান বঁটাৰ বাবে তেওঁৰ তৃতীয়খন কাব্য সংকলন বৰ'ইড ডাষ্ট (পাণ্ডুলিপিৰ ৰূপত) তালিকাভুক্ত কৰা হৈছিল আৰু প্ৰকাশৰ পিছত ইংৰাজী কবিতাৰ বাবে গোডাজ বঁটা লাভ কৰিছিল। তেওঁৰ কবিতা কেইবাখনো বিশ্ববিদ্যালয়ৰ পাঠ্যক্ৰমত অন্তৰ্ভুক্ত হৈছে‍ আৰু তেওঁৰ প্ৰথম সংকলনৰ এটা কবিতা বৰ্তমান শ্ৰীলংকাৰ জিচিই (এডভান্সড লেভেল)ৰ ইংৰাজী পাঠ্যক্ৰমত আছে। চতুৰ্থখন কবিতা সংকলন ৰিচিডিভিষ্ট হাৰ্ট (নিউ এণ্ড সিলেক্টেড পোয়েমছ বাই টেনজেৰিন প্ৰেছ, লণ্ডন) চ্যাপবুক হিচাপে প্ৰকাশ পাইছিল। তেওঁ সিংহলীৰ পৰা দুখন কাব্য সংকলন অনুবাদ কৰিছে; উপেকলা আথুকোৰালাৰ ইৰ্থু আগা শেশা পথ-খন স্পীচলেস ইজ দ্য ৰিভাৰ (সৰসাৱীৰ দ্বাৰা প্ৰকাশিত, ২০২৩) আৰু কুশল কুৰুৱিতাৰ অস্পৰ্শনীয়া ৱেথা-খন টু আনটচেবল নামেৰে‍ অনুবাদ কৰিছে, যিদুখনক ২০২৪ চনত ইংৰাজীলৈ অনুবাদৰ উদ্বোধনী বিদৰ্শন সাহিত্য বঁটাৰ বাবে তালিকাভুক্ত কৰা হৈছিল।