আদেশ শ্ৰীবাস্তৱ

আদেশ শ্ৰীবাস্তৱ
জন্ম	৪ ছেপ্টেম্বৰ, ১৯৬৬ জবলপুৰ, মধ্য প্ৰদেশ, ভাৰত
মৃত্যু	৫ ছেপ্টেম্বৰ, ২০১৫ (৫১ বছৰ) মুম্বাই, মহাৰাষ্ট্ৰ, ভাৰত
ৰাষ্ট্ৰীয়তা	ভাৰতীয়
পেচা	সংগীত পৰিচালক, সুৰকাৰ, গায়ক
সক্ৰিয় হৈ থকা সময়	১৯৮৮-২০১৫
দাম্পত্যসঙ্গী	বিজেতা পণ্ডিত (১৯৯০-২০১৫; তেওঁৰ মৃত্যুৰ সময়লৈ)
সন্তান	২

আদেশ শ্ৰীবাস্তৱ (৪ ছেপ্টেম্বৰ ১৯৬৬ – ৫ ছেপ্টেম্বৰ ২০১৫) এজন ভাৰতীয় সংগীত পৰিচালক আৰু গায়ক আছিল। সমগ্ৰ কৰ্মজীৱনত তেওঁ এশখনতকৈও বেছি হিন্দী বোলছবিত সংগীত দিছিল।

জবলপুৰৰ এক কায়স্থ হিন্দু পৰিয়ালত জন্মলাভ কৰা শ্ৰীবাস্তৱে ১৯৯৩ চনত কন্যাদান ছবিত সংগীত পৰিচালনা কৰাৰ সুযোগ লাভ কৰে। এই ছবিত লতা মংগেশকাৰৰো এটা গীত আছিল। কিন্তু বোলছবিখনে মুক্তি লাভ নকৰাত গীতবোৰেও বিশেষ প্ৰচাৰ নাপালে। জানে তমন্নাৰ ক্ষেত্ৰতো একে কথা হোৱাৰ পাছত আঅ' প্যাৰ কৰে বোলছবিৰে তেওঁ খ্যাতি লাভ কৰে। শ্ৰীবাস্তৱে "চ'না চ'না", "শ্বাৱা শ্বাৱা", "গুস্তাখিয়া" আদি কেইবাটাও হিট্‌ গানতো কণ্ঠদান কৰিছিল। ২০০৫ আৰু ২০০৯ চনত তেওঁ টেলিভিছনৰ চা ৰে গা মা পা চেলেঞ্জ অনুষ্ঠানত এজন বিচাৰক হিচাপে কাম কৰে। ২০০৬ চনত তেওঁ শিশু যৌনকৰ্মীৰ বিষয়ে এখন চুটি কথাছবি "Sanaa" নিৰ্মাণ কৰে। আন্তঃৰাষ্ট্ৰীয় ক্ষেত্ৰত তেওঁ এক'ন, জুলিয়া ফ'ৰ্ডহাম আৰু ৱাইক্লিফ জিনৰ সৈতে কাম কৰিছে।

১৯৯০ চনত তেওঁ সংগীত পৰিচালক যতীন ললিতৰ ভগ্নী বিজেতা পণ্ডিতৰ সৈতে বিবাহপাশত আবদ্ধ হয়। ২০১০ চনত শ্ৰীবাস্তৱৰ দেহত মাল্টিপল মায়েল'মা নামৰ কৰ্কট ৰোগ ধৰা পৰে। ৪৯ বছৰ বয়স সম্পূৰ্ণ কৰাৰ এদিন পাছতে ২০১৫ চনৰ ৫ ছেপ্টেম্বৰৰ নিশা প্ৰায় ১২:৩০ বজাত মুম্বাইৰ ককিলাবেন চিকিৎসালয়ত শ্ৰীবাস্তৱৰ মৃত্যু ঘটে।

বাহ্যিক সংযোগ

• আধিকাৰিক ৱেবছাইট
• আদেশ শ্ৰীবাস্তৱ সম্পৰ্কে ইণ্টাৰনেট মুভি ডাটাবেছত থকা তথ্য।