অসম অভিধান (গ্ৰন্থ)
 |
| অসম অভিধান | |
|---|---|
| লেখক | শান্তনু কৌশিক বৰুৱা |
| দেশ | ভাৰত |
| ভাষা | অসমীয়া |
| প্ৰকাৰ | তথ্যধৰ্মী গ্ৰন্থ |
| প্ৰকাশক | বনলতা প্ৰকাশন |
| মিডিয়া প্ৰকাৰ | মুদ্ৰণ |
অসম অভিধান গ্ৰন্থখন সংকলন কৰিছে লেখক– শান্তনু কৌশিক বৰুৱাই৷ গ্ৰন্থখনত অসমৰ ভৌগোলিক বিৱৰণ, জাতি-জনজাতিসমূহৰ পৰিচয়, অসমৰ বুৰঞ্জী, সমাজ ব্যৱস্থা, খাদ্যাভ্যাস, সাজ-পাৰ, গহনা-গাঁঠৰি, উৎসৱ-অনুষ্ঠান, ভাষা-সাহিত্য-সংবাদপত্ৰ, কলা-সংস্কৃতি, মঞ্চ-চলচ্ছিত্ৰ, অৰ্থনীতি, পৌৰাণিক স্মৃতিচিহ্ন, স্থাপত্য-ভাস্কৰ্য, প্ৰসিদ্ধ ব্যক্তি আদি কেইবাওশ প্ৰসংগৰ বৰ্ণানুক্ৰমিক বিৱৰণ থকাৰ লগতে বিভিন্ন বিষয়ৰ প্ৰয়োজনীয় ছবি, আলোকচিত্ৰ, ক্ৰছ ৰেফাৰেন্স আদিও সংযোগ কৰা হৈছে৷ [1]
বিৱৰণ[সম্পাদনা কৰক]
অসম সম্পৰ্কে প্ৰতিটো বিষয়ৰে পৰিচয়মূলক টোকাৰ লগতে বিষয়টোৰ সামগ্ৰিক ধাৰণা এটা দিব পৰাকৈ গ্ৰন্থখনৰ লিখনিবোৰ প্ৰস্তুত কৰা হৈছে৷ বৰ্ণনাৰ ভাষাবোৰ অতি সহজ-সৰল৷ গ্ৰন্থখনত মুঠ ১০০০ টা বিভিন্ন প্ৰসংগৰ বিৱৰণ আছে৷ অসম সম্পৰ্কে একত্ৰভাৱে তথ্য সংকলিত হৈ থকা গ্ৰন্থসমূহৰ ভিতৰত ‘অসম অভিধান’খন এখন উল্লেখযোগ্য সংকলন৷ গ্ৰন্থখনৰ শেষৰফাল ‘অসম বুৰঞ্জীৰ উল্লেখযোগ্য ঘটনাৱলী’– শীৰ্ষক শিৰোনামেৰে অসমৰ বুৰঞ্জীৰ গুৰুত্ব ঘটনাৱলীবোৰ একাদিক্ৰমত সজোৱা হৈছে৷ এই তালিকাখনত ৩৫০ চনৰ পৰা ২০১০ চনলৈকে অসমৰ গুৰুত্বপূৰ্ণ ঘটনাবোৰ শৃৃংখলিতভাৱে সজোৱা হৈছে৷ মূলতঃ শিক্ষাৰ্থী আৰু ভাষা-সাহিত্য-সংস্কৃতিৰ গৱেষকসকলৰ বাবে এই গ্ৰন্থখন অধিক উপযোগীকৈ প্ৰস্তুত কৰা হৈছে আৰু অসম সম্পৰ্কে জানিব খোজা প্ৰত্যেকজন ব্যক্তিৰ বাবেই গ্ৰন্থখন এখন হাতপুথিৰ দৰে প্ৰাসংগিক হ’ব৷ বনলতা প্ৰকাশনে প্ৰকাশ কৰা গ্ৰন্থখনৰ প্ৰথম প্ৰকাশ হৈছিল ২০০১ চনৰ ফেব্ৰুৱাৰী মাহত৷ ২০১৪ চনলৈকে এই গ্ৰন্থখনে পাঁচটা সংস্কৰণ প্ৰকাশ কৰিছে৷ গ্ৰন্থখনৰ পঞ্চম সংস্কৰণৰ মূল্য- ২৫০ টকা৷ মুঠ পৃষ্ঠা- ২৭৬৷ [1]
তথ্য সংগ্ৰহ[সম্পাদনা কৰক]
- ↑ 1.0 1.1 অৰবিন্দ ৰাজখোৱা, ভাস্কৰ ভূঞা (২০২০). অসমীয়া শিশু সাহিত্য কোষ, প্ৰস্তাৱনা খণ্ড. কৃষ্ণকান্ত সন্দিকৈ ৰাজ্যিক মুক্ত বিশ্ববিদ্যালয়. পৃষ্ঠা. ৫৬৮.