দাৰিয়া কোৰ্ট খেল

অসমীয়া ৱিকিপিডিয়াৰ পৰা
Jump to navigation Jump to search
দাৰিয়া কোৰ্ট খেল

দাৰিয়া কোৰ্ট খেল সাধাৰণতে অসমৰ গাওঁ অঞ্চলত খেলা দেখা যায়। নামনি অসম আৰু উজনি অসমত খেলৰ বিধৰ প্ৰচলন তুলনামুলক ভাবে কম দেখা যায়। ঠাই বিশেষে খেলৰ নাম আৰু নিয়মবোৰো বেলেগ বেলেগ দেখা যায় ।

খেলৰ সামগ্ৰী[সম্পাদনা কৰক]

খেলৰ সামগ্ৰী বিশেষ একো প্ৰয়োজন নহয়, এই খেলৰ বাবে মাত্ৰ মুকলি পথাৰ বা সমতল মাটিৰহে প্ৰয়োজন হয়। খেলৰ বাবে তলত দিয়া নক্সাৰ দৰে মাটিত ৪টা বা ৬টা কোঠালী সন্নিবিষ্ট দাগ বা চিহ্ন দি লোৱা হয় ।

খেলুৱৈ সংখ্য[সম্পাদনা কৰক]

দাৰিয়া কোৰ্ট খেলত খেলুৱৈৰ সংখ্যা নূন্যতম ৬জন আৰু সৰ্বাধিক যুগ্ম সংখ্যক খেলুৱৈ ১০জন লৈকে হ’ব পাৰে।

খেলৰ নিয়ম[সম্পাদনা কৰক]

দাৰিয়া খেলৰ নক্সা

দাৰিয়া খেলৰ বাবে এখন মুকলি সমতল ঠাইত ৮ ফুটমান দীঘলকৈ ৬ টা বা ৮ টা কোঠালীৰে মাটিত দাগ দি লোৱা হয়। দেখাত ঠিক অসম আৰ্হিৰ ঘৰৰ ভেটীটো সাজিবলৈ তৈয়াৰ কৰা আৰ্হিৰ দৰেই একেই কোঠালীবোৰ, মাথো অসম আৰ্হিৰ ঘৰৰ ভেটিটোত আগফালে, পাছফালে দুখন বাৰাণ্ডা আৰু মাজেদি এটি অহাযোৱা কৰা বাট ৰাখিলে যি নক্সা হব, সাইলাখ তেনেকুৱা নক্সাই মাটিত অংকন কৰি লোৱা হয়। খেলুৱৈ সকলক দুটা সমান সংখ্যক দলত ভাগ কৰি লোৱা হয়। দুই দলৰ দলপতিয়ে টচ কৰি কোন দলে খেলৰ কোৰ্টত ৰখীয়া হৱ আৰু কোন দলে কোৰ্টত প্ৰবেশ কৰিব সেইটো নিৰূপন কৰে। যদি খেলুৱৈৰ সংখ্যা ৬ জন হয় তেনেহলে ৩ জনকৈ দুটা দলত বিভক্ত হৈ এটা নক্সাৰ বাহিৰত ৰৈ সাজু হোৱালৈ অপেক্ষা কৰিব আৰু আনটো দলৰ তিনিজনে কোৰ্টৰ বা নক্সাৰ ভিতৰত ৩টা স্থানত পহৰা দিৱ। ১ নম্বৰ খেলুৱৈ জনে সীমাৰ ভিতৰেৰে প্ৰথম চিন ডালৰ সোঁ আৰু বাঁও ফাললৈকে লগতে ৩নম্বৰ খেলুৱৈ জনৰ স্থালৈকে পহৰা দিৱ পাৰিব। ২ নং খেলুৱৈ জনে প্ৰথম কোঠালীৰ দ্বিতীয় চিনডালেৰে সোঁ আৰু বাওঁফাললৈকে পহৰা দিব পাৰিব। আৰু ৩ নম্বৰ খেলুৱৈ জনে নিজৰ সোঁ আৰু বাওঁ ফালে সীমাৰ ভিতৰত দ্বিতীয় কোঠালীৰ তৃতীয় চিনডালেৰে পহৰা দিব পাৰিব। কিন্তু পহৰাদাৰি খেলুৱৈ সকলে বহি বা চাপৰি বা আঠু ভাঙি কোনো খেলুৱৈক হাতেৰে চুব নোৱাৰিব। এতিয়া এই তিনি স্থানত তিনি জন খেলুৱৈ সাজু হোৱাৰ পাছত বিপৰীত দলৰ তিনিজনৰ এজন এজনকৈ যিকোনো প্ৰকাৰে ১ নং খেলুৱৈজনে হাতেৰে তেওঁক চুৱ নোৱাৰাকৈ ১নং খেলুৱৈ জনৰ সোঁ অথবা বাঁও ফালে প্ৰবেশ কৰিবলৈ চেষ্টা কৰিব। তেনেকৈ দ্বিতীয় জনেও কোৰ্টত প্ৰবেশ কৰিবলৈ চেষ্টা কৰিব। ইজনে সিজনক বাগি দি যিকোনো এজন প্ৰথম কোঠালীত প্ৰবেশ কৰিব পাৰিলেই তেওঁ এটা নিদিষ্ট স্থান ৰৈ থাকিব যাতে তেওঁক ১নং বা ২নং পহৰাদাৰি কোনো এজন খেলুৱৈয়ে হাতেৰে চুৱ নোৱাৰে আৰু তেওঁলোকৰ শৰীৰ যাতে খেলৰ নক্সাৰ বাহিৰ হৈ নাযায়। এনেকৈ পাছৰ জনেও প্ৰবেশ কৰিব, এতিয়া এটা এটাকৈ দ্বিতীয় কোঠালীত প্ৰবেশ কৰিবলৈ চেষ্টা কৰি থাকিব। এনেকৈ যিজন ১নং খেলুৱৈজনৰ সোঁহাতে প্ৰথম কোঠাত প্ৰবেশ কৰিছিল তেওঁ সেই সোঁ ফালৰ কোঠালীবোৰ এটা এটাকৈ পাৰ হৈ যদিহে একেবাৰে বাহিৰ ওলাবলৈ সক্ষম হয়, তেনেহলে প্ৰথমে তেওঁ কেঁচা হৈ পৰিল বুলি কোৱা হয়, তেনেকৈ দ্বিতীয়জনো কেঁচা হৱলৈ চেষ্টা কৰিব। এতিয়া কেঁচা হৈ পৰাৰ পাছত তেওঁ বাঁও ফালৰ কোঠালীবোৰ এটা এটাকৈ ৰখীয়া খেলুৱৈয়ে চুৱ নোৱাৰাকৈ পাৰ হৱলৈ চেষ্টা কৰিব, এনেকৈ যদি তেওঁ আটাইকেইটা কোঠালী পাৰ হৈ যাব পাৰে তেনেহলে তেওঁক পকা হৈ পৰিল বুলি কোৱা হয়। এইদৰে সোঁফালে সোমাই বাওঁফালহৈ পকা হৈ যোৱাৰ সময়চোৱাত যদি পহৰাদাৰি কোনো খেলুৱৈয়ে কোনোৱা এজনক হাতেৰে বেগেত মেলি চুব পাৰে তেনেহলে তেওঁৰ কাৰণেই গোটেই দলটো বাহিৰহৈ যাব লাগিব। এতিয়া পহৰাদাৰিৰ দলটোৱে খেল কোৰ্টত সোমাৱ আৰু হাৰা দলটোৱে পহৰাদাৰিৰ কাম কৰিব। ঠাই বিশেষে খেলৰ নিয়ম সাল-সালনি হব পাৰে।


টোকা[সম্পাদনা কৰক]

অসমৰ পৰম্পৰাগত খেল-ধেমালিত অন্তৰ্ভুক্ত হৈ থকা দাৰিয়া কোৰ্ট আৰু ৰছী টনা খেল দুবিধ লেখক নিতুল বৰাৰ সৰ্ম্পূন নিজস্ব শৈশৱৰ স্মৃতি সমৃদ্ধ।