বৰ্ষা ভোঁচলে

বৰ্ষা ভোঁচলে
জন্ম	১৯৫৬ নাগপুৰ, ভাৰত
মৃত্যু	৮ অক্টোবৰ, ২০১২ (৫৬ বছৰ) মুম্বাই, মহাৰাষ্ট্ৰ, ভাৰত
শিক্ষানুষ্ঠান	এলফিনষ্টোন মহাবিদ্যালয়
পেচা	গায়িকা স্তম্ভলেখক
দাম্পত্যসঙ্গী	হেমন্ত কেংক্ৰে (বি. ১৯৯৮)
পিতৃ-মাতৃ	আশা ভোঁচলে (মাতৃ) আৰ. ডি. বৰ্মন (সতীয়া পিতৃ)

বৰ্ষা ভোঁচলে (ইংৰাজী: Varsha Bhosle) (জন্ম, ১৯৫৬ –মৃত্যু,৮ অক্টোবৰ ২০১২) মুম্বাইৰ আবাসী ভাৰতীয় গায়িকা, সাংবাদিক আৰু লেখিকা আছিল। তেওঁ গায়িকা আশা ভোঁসলেৰ জীয়ৰী আছিল।

কৰ্মজীৱন

বৰ্ষা ভোঁচলে এগৰাকী পেছাদাৰী হিন্দী আৰু ভোজপুৰী নেপথ্য গায়িকা আছিল আৰু নিজা মাতৃ আশা ভোঁচলেৰ সৈতে সংগীতানুষ্ঠানত উপস্থিত হৈছিল। বৰ্ষাই ১৯৭৩ চনত মুম্বাইৰ পেড্ডাৰ ৰোডৰ হিল গ্ৰেঞ্জ হাই স্কুলৰ পৰা আইএছচি ৰ সৈতে বিদ্যালয় সমাপ্ত কৰিছিল। তেওঁ মুম্বাইৰ বোম্বাই বিশ্ববিদ্যালয়ৰ অন্তৰ্গত এলফিনষ্টোন মহাবিদ্যালয়ত ৰাজনীতি বিজ্ঞান অধ্যয়ন কৰিছিল। তেওঁ ভাৰতীয় ৱেব পৰ্টেলত ৰেডিফত ১৯৯৭-২০০৩ চনলৈ স্তম্ভ লিখিছিল। ১৯৯৪ - ১৯৯৮ চনলৈ 'দ্য চানডে অবজাৰ্ভাৰ'ৰ বাবে স্তম্ভ আৰু ১৯৯৩ চনত 'জেণ্টলমেন' আলোচনীৰ বাবে স্তম্ভ লিখিছিল। তেওঁ 'টাইমছ অৱ ইণ্ডিয়া' আৰু 'ৰক্ষক – দ্য প্ৰটেক্টৰ পুলিচ' আলোচনীৰ বাবে কেইটামান প্ৰবন্ধও লিখিছিল।

ব্যক্তিগত জীৱন

বৰ্ষা নিজ মাতৃৰ সৈতে মুম্বাইত বাস কৰিছিল। পাছত তেওঁ এগৰাকী ক্ৰীড়া লেখক আৰু জনসম্পৰ্ক পেছাদাৰী লোক হেমন্ত কেংক্ৰেক বিয়া কৰাইছিল যদিও দম্পতীহালে ১৯৯৮ চনত বিবাহ বিচ্ছেদ কৰিছিল। তেওঁ পাছলৈ হতাশাত ভুগিছিল। এজন ঘনিষ্ঠ বন্ধুৰ মৃত্যুৰ ফলত মানসিকভাৱে ভাগি পৰিছিল আৰু মানসিক চিকিৎসা কৰাইছিল। খবৰ অনুসৰি ২০০৮ চনৰ ৯ ছেপ্টেম্বৰত তেওঁ নিৰ্ধাৰিত ঔষধতকৈ অত্যধিক পৰিমাণ গ্ৰহণ কৰি আত্মহত্যাৰ চেষ্টা কৰিছিল। যাৰ ফলত তেওঁক মুম্বাইৰ জচলোক চিকিৎসালয়ত ভৰ্তি কৰোৱা হৈছিল। ২০১২ চনৰ ৮ অক্টোবৰত বৰ্ষা ভোঁচলে মুম্বাইস্থিত নিজৰ প্ৰভু কুঞ্জৰ বাসগৃহত আত্মহত্যা কৰিছিল। বৰ্ষাৰ মৃতদেহটো মাকৰ চালক আৰু দাসীয়ে তাইৰ ঘৰৰ চোফাত তেজৰে তুমুৰলি অৱস্থাত আৱিষ্কাৰ কৰিছিল। মুম্বাই আৰক্ষীয়ে পিছত আত্মহত্যাৰ কথা নিশ্চিত কৰিছিল আৰু কৈছিল যে বৰ্ষাই নিজৰ অনুজ্ঞাপ্ৰাপ্ত অস্ত্ৰৰে নিজৰ মূৰত গুলীয়াই আত্মহত্যা কৰিছিল।