ৱিকিপিডিয়া:ভাল প্ৰবন্ধ/১০

অসমীয়া ৱিকিপিডিয়াৰ পৰা
Jump to navigation Jump to search
ভূপেন হাজৰিকাৰ স্থিৰচিত্ৰ, আলোকচিত্ৰ সৌজন্য: উত্‍পল বৰুৱা, ইউ বি ফটো।

ড° ভূপেন হাজৰিকা (হিন্দী: भूपेन हाजोरिका, ইংৰাজী: Bhupen Hazarika) (১৯২৬-২০১১), অসম তথা ভাৰতৰ এজন বহুমুখী প্ৰতিভাসম্পন্ন শিল্পী। তেওঁ জীৱনকালতেই অসমৰ সংগীত জগতত কিম্বদন্তিস্বৰূপ সৰ্বপৰিচিত। ওৰে জীৱন গান গাই গাই বিশ্বখনকে মন্ত্ৰমুগ্ধ কৰি ৰখা ভূপেন হাজৰিকাৰ একমাত্ৰ পৰিচয় এজন গীতিকাৰ বুলিয়েই নহয়, তেখেত আছিল এজন সুৰকাৰ, চিত্ৰকৰ, কবি, প্ৰবন্ধলেখক, শিক্ষক, ৰাজনীতিবিদ, বোলছবি পৰিচালক, সংগীত পৰিচালক, আলোচনীৰ সম্পাদকো। কিছু সময়ৰ কাৰণে তেখেতে সংসদীয় ৰাজনীতিতো যোগদান কৰিছিল। অসম, পশ্চিমবংগ তথা ভাৰতৰ বাহিৰেও চুবুৰীয়া দেশ বাংলাদেশতো তেখেত এজন অত্যন্ত জনপ্ৰিয় শিল্পী। উৎকৃষ্ট বিশ্বমানৰ অৱদানেৰে কলা-সংস্কৃতিৰ জগত চহকী কৰা ড° ভূপেন হাজৰিকা আছিল এজন বিশ্ব-নাগৰিক আৰু মানৱতাবাদী শিল্পী। অসমীয়া, বাংলা, হিন্দী, ইংৰাজী আদি বিভিন্ন ভাষাত তেখেতে সংগীত ৰচনা কৰিছিল আৰু কণ্ঠদান কৰিছিল। তেখেতৰ গানত সমসাময়িক সমাজ, সংস্কৃতি, ৰাজনীতি, দুৰ্নীতি আদি স্পষ্টভাবে প্ৰতিফলিত হোৱা দেখা যায়। তেখেতৰ কৰ্মৰাজীয়ে অসমৰ কলা-সংস্কৃতি জগতৰ প্ৰভূত উন্নয়ন সাধনৰ উপৰিও ভাৰত তথা বিশ্বদৰবাৰত প্ৰতিষ্ঠিত কৰাটো অৱদান আগবঢ়াই আহিছে। সাহিত্য আৰু সংস্কৃতি ক্ষেত্ৰত অক্লান্ত কৰ্মী ভূপেন হাজৰিকা কেৱল অসম ৰাজ্যতে নহয় দেশ-বিদেশত বহুলভাৱে সমাদৃত আৰু সন্মানিত হৈছে। অসম চৰকাৰৰ সৰ্বোচ্চ সন্মান শংকৰদেৱ বঁটা, ভাৰতৰ সাংস্কৃতিক জগতৰ উল্লেখনীয় বঁটা ‘সংগীত নাটক একাডেমী বঁটা’ উপৰি ১৯৯২ চনত ভাৰতৰ চলচ্চিত্ৰৰ সৰ্ব্বোচ্চ সন্মান দাদা চাহেব ফাল্কে বঁটাৰে সন্মানিত হৈছে। (বিতং ভাৱে পঢ়ক............)