যোৱাটো বছৰলৈকে ৱিকিমেনিয়া সম্পৰ্কত মোৰ জ্ঞান শূন্য আছিল। ২০২৪ চনৰ ৱিকিমেনিয়া অনুষ্ঠানৰ জাননী এখন অসমীয়া ৱিকিৰ বেটুপাতত লাগি থকা দেখি বিষয়টোৱে মোৰ দৃষ্টি আকৰ্ষণ কৰিলে আৰু এনেকৈয়ে "খাইনে সোণা, কানতে পিন্ধা" বুলি চুৰ্চুৰীয়া অনুমান এটা হ'ল।
ৱিকিৰ সৈতে এসাগৰ অভিধা জড়িত হৈ আছে। ইয়াৰে ‘ৱিকিমেনিয়া’ অভিধাটো ‘ৱিকি’ আৰু ‘মেনিয়া’ শব্দদুটাৰ মধুলগনত সৃষ্ট। আজি আঠটা বছৰে অৱশ্যে আমাৰ বহুতৰে বাবে ৱিকি একপ্ৰকাৰৰ মেনিয়া ধৰণৰেই হৈ পৰিছে।
২০২৪ চনৰ এই অনুষ্ঠানটোৰ প্ৰতি কিয় জানো বৰকৈ আগ্ৰহ বাঢ়িল, মোৰ মায়ে কয়- "সেয়া তোৰ কপালতে লিখা আছিল।" অৱশ্যে কপালৰ লিখন সম্পৰ্কত মই মাকৰে পুতেক হ'ব পৰাগৈ নাই। বাৰু, আন কথা বাদ। আৱেদন কৰিলোঁ, মূল কমিটিৰ পৰা নাকচ কৰাৰ মেইল পাই মোৰ ৱিকিমেনিয়াৰ হেঁপাহৰ টোপোলাটো সিমানতে বান্ধিলোঁ। আকৌ সেই মায়ে কোৱাৰ দৰেই কপালতেই আছিলনে কি হ'বলা! CIS-A2Kৰ কৰ্মকৰ্তা পৱনজীৰ এটা ফোনকলে মোৰ আনন্দৰ সীমনা ভেদিলে। এই অনুষ্ঠানটোৰ সহযোগত মোৰ মন-দেহ-আত্মা সদলবলে ইউৰোপ মহাদেশৰ পোলেণ্ডলৈ বুলি জীৱনৰ প্ৰথমখন আন্তৰ্জাতিক বিমানেৰে উৰা মাৰিলে। এই অভিজ্ঞতাৰ উমনিকাল আছিল এই যাত্ৰাৰ বাবে প্ৰয়োজনীয় নথি-পত্ৰকে আদিকৰি কাপোৰ আৰু অন্যান্য সামগ্ৰীৰ যোগাৰ কৰাৰ সময়। বিশেষকৈ ভিচাৰ ক্ষেত্ৰত হোৱা অভিজ্ঞতা মোৰ বাবে আছিল অনন্য। এইখিনিতে মোক সহায়ৰ হাত আগবাঢ়োৱা প্ৰতিজনলৈ কৃতজ্ঞতা প্ৰকাশ কৰিছোঁ।
মোৰ কল্পনাৰ পৰিধি ভাঙি বিদেশৰ সেই সকলো আয়োজনেই আছিল একো একোটা চমৎকাৰ! মানুহে কিয় আৰু কেনেকৈ নিজৰ মুখৰ মাতষাৰৰ বাবে সংগ্ৰাম কৰে, কেনেকৈ গৌৰৱৰ একাঁজলি স্ফূলিংগৰে জিলিকি থাকে, কেনেকৈ আত্মপ্ৰত্যয়েৰে দুখোজ দিয়ে সেয়া যেন মই একোটা কাহিনীৰ দৰে চকুৰ সমুখতে দেখিবলৈ পাইছিলোঁ। আমাৰ নিজৰ বুলিবলৈ ইয়াতকৈনো বেলেগ আৰু কি আছে?
১৪৩খন দেশৰ হাজাৰৰো অধিক অংশগ্ৰহণকাৰীৰ প্ৰতিগৰাকীৰ সৈতে কথা পতা আৰু প্ৰায় প্ৰতিটো অনুষ্ঠানত অংশগ্ৰহণ কৰা মোৰ বাবে মুঠেও সম্ভৱ নাছিল যদিও পাৰ্যমানে এই অচিন ব্যক্তিত্বসমূহেৰে এমোকোৰা হাঁহিৰে পৰিচয় হৈছিলোঁ আৰু ভাললগা বিষয়ৰ আলোচনাসত্ৰসমূহতো অংশগ্ৰহণ কৰি বুজিবলৈ চেষ্টা কৰিছিলোঁ। এই কথাতে অভিভূত হৈ পৰিছিলোঁ যে সমগ্ৰ বিশ্বত ৱিকিৰ বাবে এক আন্দোলন চলি আছে, সকলোৱে নিজৰ দক্ষতাক ৱিকিৰে সাঙুৰি আগবাঢ়িছে। কোলাত ন-মহীয়া কেঁচুৱা লৈ, মুখত ৭৫ বছৰীয়া অভিজ্ঞতাৰ বলিৰেখা লৈ, এডাল লাখুটিকে সাৰথি কৰি দুচকুৰ সিটোপাৰে অমানিশাৰ আন্ধাৰ লৈ, একোখন চলন্ত চকীতে সমস্ত সপি দি সাত সাগৰ তেৰ নদী পাৰ হৈ অহা এই ৱিকিমিডিয়ান সকলক দেখি ভাৱ হ'ল, আমাৰ হে কত অজুহাত! ইমানবোৰ বিভিন্নতাৰ মাজত আমি সকলোৱে সকলোৰে মাজত বিচাৰি পোৱা সমন্বয়ৰ বিষয়টোৱেই আছিল- ‘মাতৃভাষা’। ডিজিটেল ক্ষেত্ৰত নিজৰ ভাষাটোক সু-প্ৰতিষ্ঠিত কৰি গৌৰৱবোধ কৰা। এই যাত্ৰাৰ বিষয়ে মোৰ অভিজ্ঞতা কিছু পৃথককৈ ইতিমধ্যেই ৱিকিব্লগ ‘ডিফ’ত লিখা এটা পোষ্ট প্ৰকাশ পাইছে।
পোলেণ্ডৰ কাটৱিজ চহৰত হোৱা ৱিকিমেনিয়া সন্মিলনখনৰ চাৰিদিনীয়া কাৰ্যসূচীৰ মাজে-মাজে নতুন ঠাই ফুৰা, নতুন খাদ্যৰ সোৱাদ লোৱা আৰু নতুন নতুন মানুহৰ সৈতে কথা-বতৰা হোৱা ইত্যাদিবোৰো চলি থাকিছিল। অৱশ্যে ঘৰৰ ভাতকেইটালৈ বৰকৈ মনত পৰিছিল। পেটৰ ভাত মুঠি, মুখৰ মাতষাৰ কেনেকৈ আমাৰ জীৱনটোৰে সংপৃক্ত হৈ থাকে সেই অনুভৱ পোলেণ্ডত বাৰুকৈয়ে হৈছিল। অৱশ্যে ইণ্ডিক ৱিকি পৰিয়ালৰ সৰহীয়া অংশগ্ৰহণে বিদেশতো ভাৰতভূমিৰে সংযুক্ত কৰি ৰাখিলে। গোটেই যাত্ৰাটোত মোৰ ব্যক্তিগতভাৱে মুঠেই ৮০০০ মান টকা এটাহে খৰচ হ'ল। অন্যান্য সকলোবোৰ খৰচৰ ক্ষেত্ৰত CIS-A2kয়ে কৰা সহযোগত বিদেশলৈ যোৱাৰ এই সময়খিনিৰ স্মৃতি আজীৱন বুকুতে থাকিব। -Nayan j Nath (বাৰ্তা) 09:09, 30 September 2024 (ইউ.টি.চি.)[উত্তৰ দিয়ক]
.jpg)
.svg){kind=icon}
_-_The_Noun_Project.svg){kind=small}
