ৱিকিপিডিয়া:ৱিকিপত্ৰিকা/জুন-২০২১/মুখবন্ধ
প্ৰজ্ঞাৰ সাধনাৰে আত্মানুসন্ধানৰ বাট কাটি অসমীয়া সমাজত যিজন সাহিত্যিকে নিজস্ব গদ্যশৈলীৰে এক সুকীয়া ধাৰাৰে সমাজলৈ কিতাপ পঢ়াৰ আনন্দ বোৱাই আনিলে, অসমীয়াক মানুহ হোৱাৰ গৌৰৱ ন কৈ শিকালে, কেৱল কলম-কিতাপতে সীমাবদ্ধ নাথাকি কৰুণাধাৰাৰে সিঁচি দিলে মানৱতাৰ বীজ, যি শিপাই গ'ল অসম, ভাৰত পাৰ হৈ সুদূৰ বিদেশলৈ, নৱসৃষ্টিৰ জোৱাৰত নতুন প্ৰজন্মক উৎসাহ-পৰামৰ্শেৰে নিৰন্তৰ দেখুৱালে প্ৰগতিৰ বাট, মুখামুখি অথবা কথা-বাৰ্তাৰে চিনাকি কৰালে সমাজৰ বহু সত্তাক, দিলে মঞ্চ, দিলে পৰিচয়, দিলে সাহস, দিলে সময়, সেইজনেই অসমৰ অন্যতম যুগদ্ৰষ্টা হোমেন বৰগোহাঞি। এইজনা মহীৰূহলৈ অসমীয়া ৱিকিমিডিয়া সমাজে আগবঢ়াইছে সশ্ৰদ্ধ প্ৰণিপাত। তাৰেই এক প্ৰতিফলনৰূপে এই মাহৰ ৱিকিপত্ৰিকা।
- “মানুহে যেতিয়া কেৱল জ্ঞানলাভৰ আনন্দৰ কাৰণেই জ্ঞান বিচাৰে আৰু তাৰ বিনিময়ত একো পাৰ্থিৱ প্ৰতিদান নিবিচাৰে, তেতিয়া মানুহে জ্ঞানৰ অন্বেষণৰ পথত কেতিয়াও থমকি ৰ’বলগা নহয়।”
- “মানুহে সকলো সময়তে কিবা নহয় কিবা এটা কামত ব্যস্ত হৈ থাকিব লাগে- কাৰণ একমাত্ৰ কামেইহে মানুহৰ জীৱনটোক অৰ্থপূৰ্ণ কৰি ৰাখিব পাৰে।”
- “নৈৰ সোঁতে যেনেকৈ তাৰ বুকুত পৰি থকা শিলবোৰক অকণ অকণকৈ মিহি কৰে বা সেইবোৰক নতুন ৰূপ দিয়ে, সেইদৰে চামে চামে মানুহে অবিৰাম ব্যৱহাৰৰ দ্বাৰা তেওঁলোকৰ ভাষাৰ শব্দবোৰক মিহি কৰে বা সেইবোৰক ন ন ৰূপ দিয়ে।”