হোমেন বৰগোহাঞি

অসমীয়া ৱিকিপিডিয়াৰ পৰা
নেভিগেশ্যনলৈ যাওক সন্ধানলৈ যাওক
হোমেন বৰগোহাঞি
জন্ম ৭ ডিচেম্বৰ, ১৯৩২
ঢকুৱাখনা, লখিমপুৰ জিলা, অসম
মৃত্যু ১২ মে', ২০২১ (৮৮ বছৰ)
জিএনআৰচি হস্পিতাল, গুৱাহাটী
পেচা
  • সাহিত্যিক
  • সাংবাদিক
  • সমালোচক
  • কবি
  • গল্পকাৰ
ভাষা অসমীয়া
ৰাষ্ট্ৰীয়তা ভাৰতীয়
নাগৰিকত্ব ভাৰতীয়
উল্লেখনীয় কৰ্মৰাজি
  • পিতা-পুত্ৰ
  • অস্তৰাগ
  • হালধীয়া চৰায়ে বাওধান খায়
  • আত্মানুসন্ধান
  • সুবালা
  • মৎস্যগন্ধা
উল্লেখযোগ্য বঁটা
দাম্পত্যসংগী নিৰুপমা বৰগোহাঞি (বি. ১৯৫৮; বিবি. ১৯৭৭)
সন্তান ২ (অনিন্দ্য বৰগোহাঞি, প্ৰদীপ্ত বৰগোহাঞি)

হোমেন বৰগোহাঞি (ইংৰাজী: Homen Borgohain; ১৯৩২ – ২০২১) অসমৰ এগৰাকী বিশিষ্ট সাহিত্যিক, সাংবাদিক, সমালোচক, কবি আৰু গল্পকাৰ। তেওঁৰ সাহিত্যিক অৱদানৰ বাবে অসম চৰকাৰে তেওঁলৈ শ্ৰীমন্ত শংকৰদেৱ বঁটা আগবঢ়োৱাৰ উপৰিও অসম উপত্যকা সাহিত্য বঁটাকে ধৰি অসংখ্য বঁটা-বাহনেৰে তেওঁৰ অৱদানক স্বীকৃতি জনোৱা হৈছিল। 'পিতা-পুত্ৰ' গ্ৰন্থখনৰ বাবে বৰগোহাঞিক ১৯৭৮ চনত অসমীয়া ভাষাৰ সাহিত্য অকাডেমি বঁটা প্ৰদান কৰা হৈছিল[1] যদিও তেওঁ ভাৰতীয় সমাজত সৃষ্টি হোৱা সহনশীলতাৰ অভাৱৰ বিৰুদ্ধে প্ৰতিবাদ স্বৰূপে, ২০১৫ চনত, এই বঁটা আৰু ইয়াৰ সৈতে প্ৰাপ্ত নগদ ধন ঘূৰাই দিছিল।[2][3] হোমেন বৰগোহাঞিয়ে ২০০১ আৰু ২০০২ চনত দুবাৰকৈ অসম সাহিত্য সভাৰ সভাপতিৰ আসন অলংকৃত কৰিছিল।

বিবাহসূত্ৰে তেখেত অসমৰ আন এগৰাকী প্ৰখ্যাত সাহিত্যিক নিৰুপমা বৰগোহাঞিৰ স্বামী আছিল আৰু দুয়ো একেলগে 'পুৱাৰ পূৰৱী সন্ধ্যাৰ বিভাস' নামৰ উপন্যাসখন লিখি উলিয়াইছিল। বৰগোহাঞিয়ে 'সাউদৰ পুতেকে নাও মেলি যায়', 'হালধীয়া চৰায়ে বাওধান খায়', 'অস্তৰাগ' আদি বহুকেইখন উপন্যাসৰ উপৰি আত্মজীৱনী, স্মৃতি-কথা, প্ৰবন্ধ-সংকলন, গল্প-সংকলনৰ উপৰি যথেষ্ট সংখ্যক কবিতা লিখিছে। বৰগোহাঞিৰ উপন্যাস 'হালধীয়া চৰায়ে বাওধান খায়'ৰ কাহিনীভিত্তিক জাহ্নু বৰুৱাৰ দ্বাৰা নিৰ্মিত একে নামৰ ছবিখনে ১৯৮৮ চনত শ্ৰেষ্ঠ ছবিৰ ৰাষ্ট্ৰীয় চলচ্চিত্ৰ বঁটা লাভ কৰাৰ লগতে আন আন্তঃৰাষ্ট্ৰীয় পৰ্যায়ৰ বঁটাও লাভ কৰিছিল।[4]

২০১৫ চনৰ পৰা মৃত্যুৰ আগমুহূৰ্তলৈকে তেওঁ অসমীয়া দৈনিক কাকত নিয়মীয়া বাৰ্তাৰ মুখ্য সম্পাদকৰূপে কাৰ্যনিৰ্বাহ কৰি আছিল।[5] তেওঁ নীলাচল, সাতসৰী, আমাৰ অসম, অসম বাণী, সূত্ৰধাৰ আদিকে ধৰি ভালেকেইখন কাকত-আলোচনীৰ সম্পাদক ৰূপে কাৰ্যনিৰ্বাহ কৰিছিল।

জন্ম আৰু শিক্ষা[সম্পাদনা কৰক]

১৯৩২ চনৰ ৭ ডিচেম্বৰত, অসমৰ অবিভক্ত লখিমপুৰ জিলাঢকুৱাখনাত এটা আহোম পৰিয়ালত হোমেন বৰগোহাঞিৰ জন্ম হয়।[6] পিতৃ ইন্দ্ৰধৰ বৰগোহাঞি আৰু মাতৃ আইতা বৰগোহাঞি।[7] ডিব্ৰুগড় চৰকাৰী উচ্চতৰ মাধ্যমিক বালক বিদ্যালয়ৰ পৰা ১৯৫০ চনত তেওঁ মেট্ৰিক পাছ কৰি কটন কলেজত ভৰ্তি হয়। ১৯৫২ চনত কটন কলেজৰপৰা আই.এছ.ছি.[8] পৰীক্ষাত[9] উৰ্ত্তীণ হয় আৰু ১৯৫৪ চনত ইংৰাজী বিষয়ত অনাৰ্ছসহ[5] স্নাতক ডিগ্ৰী লাভ কৰে।[7] তেখেতে কটন কলেজৰ ছেকেণ্ড মেছ (বৰ্তমানৰ শ্বহীদ ৰঞ্জিত বৰপূজাৰী ছাত্ৰাৱাস)-ত আছিল।[10]

হোমেন বৰগোহাঞিয়ে তেখেতৰ আত্মজীৱনীত নিজৰ ইচ্ছাৰ বিৰুদ্ধে বিজ্ঞানৰ শ্ৰেণীত ভৰ্তি হোৱা বুলি উল্লেখ কৰিছে। তেখেতে কৈছে, “নিজৰ ইচ্ছাৰ বিৰুদ্ধে মই বিজ্ঞানৰ শ্ৰেণীত ভৰ্তি হৈছিলো। তাৰো কাৰণ আছিল একেটাই-জেদ।”[10] কলেজীয়া শিক্ষা গ্ৰহণ কৰাৰ আগতে অৱতীৰ্ণ হোৱা প্ৰৱেশিকা পৰীক্ষাত তেখেতৰ ফলাফল আশানুৰূপ হোৱা নাছিল। তেখেতে প্ৰথম বিভাগতহে উত্তীৰ্ণ হৈছিল। পৰীক্ষাৰ ফলাফল ঘোষণা হোৱাৰ দিনা সংস্কৃত শিক্ষক লক্ষ্মীনাথ ফুকনে তেওঁক কলা শাখাত পঢ়িবলৈহে নিৰ্দেশ দিছিল। অৱশ্যে হোমেন বৰগোহাঞিয়ে মনে মনে কলা শাখাতে পঢ়িম বুলিয়েই ঠিক কৰি থৈছিল। কিন্তু শিক্ষকগৰাকীৰ কথা শুনি তেওঁ জেদতে বিজ্ঞান শাখাত পঢ়িবলৈ থিৰাং কৰিলে। তেখেতৰ ইণ্টাৰমিডিয়েট (আইএছচি) পৰীক্ষা ভাল হৈছিল। কিন্তু তেওঁ কৈছে, “…কিন্তু তাৰ কাৰণে কিছু মূল্য দিবলগীয়া হ'ল। কলেজৰ প্ৰথম দুটা বছৰ মোৰ কাৰণে খুব নিৰানন্দময় হৈ ৰ'ল।”[10] ইয়াৰ পিছত তেখেতে তৃতীয় বাৰ্ষিকত নাম লগাওঁতে ইংৰাজীত অনাৰ্ছ ল'লে আৰু বিজ্ঞান শাখাৰ পৰা কলা শাখালৈ আহিল। তেখেতে আত্মজীৱনী 'আত্মানুসন্ধান'ত কৈছে, “আৰ্টছলৈ আহি ঘৰৰ ল'ৰা ঘৰলৈ ঘূৰি অহাৰ নিচিনা বিৰাট স্বস্তি অনুভৱ কৰিলো।”[10]

কৰ্মজীৱন[সম্পাদনা কৰক]

আৰম্ভণিৰ কালছোৱা[সম্পাদনা কৰক]

১৯৫৫ চনত হোমেন বৰগোহাঞিয়ে প্ৰশাসনিক সেৱাৰ পৰীক্ষাত অৱতীৰ্ণ হয় আৰু মাজুলীত উপ-প্ৰতি সমাহৰ্তা হিচাপে কৰ্মজীৱন আৰম্ভ কৰে। ১৯৫৮ চনৰ পৰা ১৯৬০ চনলৈকে তেখেতে ছয়গাঁৱত উপ-প্ৰতি সমাহৰ্তাৰ দায়িত্বত থাকে। ১৯৬০-৬২ চনত তেখেতে গোৱালপাৰা মহকুমাৰ পৰিকল্পনা বিষয়া হিচাপে কৰ্মনিৰ্বাহ কৰে। ১৯৬৩-৬৫ চনত উত্তৰ লখিমপুৰত পৰিকল্পনা বিষয়া আৰু ১৯৬৫-৬৮ চনত যোৰহাটৰ পৰিকল্পনা বিষয়াৰ দায়িত্বত থাকে। ১৯৬৮ চনত চৰকাৰী চাকৰি পৰিত্যাগ কৰে আৰু সাপ্তাহিক নীলাচল কাকতত সম্পাদক হিচাপে সাংবাদিক জীৱন আৰম্ভ কৰে।[11]

আত্মজীৱনী 'ধুমুহা আৰু ৰামধেনু (দ্বিতীয় খণ্ড)'ত হোমেন বৰগোহাঞিয়ে লেখক জীৱন কবিতাৰ জৰিয়তে আৰম্ভ কৰা বুলি মন্তব্য কৰিছে। পঞ্চম-সপ্তম শ্ৰেণীত পঢ়ি থকাৰ কালতে মাধৱ বেজবৰুৱা সম্পাদিত বাঁহী আলোচনীত তেখেতৰ কবিতা প্ৰকাশ পাইছিল। ডিব্ৰুগড় চৰকাৰী হাইস্কুলত দশম শ্ৰেণীৰ ছাত্ৰ হৈ থকাৰ কালত হেম বৰুৱাৰ সম্পাদনাত 'পছোৱা' নামৰ অসমীয়া আলোচনী এখন ওলাইছিল। সেইখন আলোচনীলৈ তেখেতে 'কুশল কোঁৱৰ' নামৰ কবিতা এটা লিখি প্ৰেৰণ কৰিছিল। কবিতাটো প্ৰকাশ হৈছিল।[12]

অসমৰ কবি নৱকান্ত বৰুৱাই সীমা দত্ত ছদ্মনামেৰে মাধৱ বেজবৰুৱা সম্পাদিত বাঁহীত লিখা কবিতাই হোমেন বৰগোহাঞিক প্ৰভাৱিত কৰিছিল বুলি তেখেতে আত্মজীৱনীত মন্তব্য কৰিছে। তেখেতে লিখিছে, “…একমাত্ৰ সীমা দত্তৰ কবিতাবোৰ মই উৰাই-ঘূৰাই বহুবাৰ পঢ়িছিলো, আৰু সেই কবিতাবোৰৰ মাজতে অসমীয়া কবিতাৰ ঋতু-পৰিৱৰ্তনৰ প্ৰথম পূৰ্বাভাস মই পাইছিলো।” নৱকান্ত বৰুৱাৰ উপৰি অসমীয়া কবি অজিৎ বৰুৱাৰ কাব্যই বৰগোহাঞিক প্ৰভাৱিত কৰিছিল।[13] ১৯৫৭ চনত বৰগোহাঞিৰ প্ৰথমটি গল্প সংকলন 'বিভিন্ন কোৰাছ' প্ৰকাশ হয়।[7]

সাহিত্য-সংবাদ জীৱন[সম্পাদনা কৰক]

১৯৬৮ চনত চৰকাৰী চাকৰিৰপৰা ইস্তফা দি 'নীলাচল' নামে এখন সাপ্তাহিক কাকত আৰম্ভ কৰে আৰু কাকতখনৰ সম্পাদকৰ দায়িত্ব লয়। ১৯৭৭ চনলৈকে নীলাচলৰ সম্পাদকৰ দায়িত্ব লোৱাৰ লগতে ১৯৮০ চনত 'লোকায়ত' কাকতৰো সম্পাদকৰ দায়িত্ব লয়। ১৯৮১ চনত কলকাতাৰপৰা প্ৰকাশিত বঙালী ভাষাৰ কাকত 'আজকাল'ৰ তেওঁ আছিল উত্তৰ-পূৰ্বাঞ্চলৰ বিশেষ প্ৰতিনিধি। ইয়াৰ পাছতে তেওঁ 'সমকাল' আৰু 'সূত্ৰধাৰ' আলোচনীৰ প্ৰতিষ্ঠাপক সম্পাদক ৰূপে কাৰ্যনিৰ্বাহ কৰে আৰু ১৯৯১ চনত কিশোৰ-কিশোৰীৰ বাবে প্ৰকাশিত 'কিশোৰ' আলোচনীৰ প্ৰতিষ্ঠাপক সম্পাদকৰ দায়িত্ব লয়। ১৯৯৩ চনত তেওঁ সাপ্তাহিক কাকত 'অসম বাণী' সম্পাদনাৰ দায়িত্ব লয় আৰু ১৯৯৩ চনত 'আমাৰ অসম' কাকতৰ সম্পাদকৰূপে দায়িত্ব ভাৰ গ্ৰহণ কৰে। ২০০৪ চনত আমাৰ অসম এৰি 'দৈনিক বাতৰি' কাকতৰ প্ৰতিষ্ঠাপক সম্পাদকৰ দায়িত্ব লয়। ২০০৫ চনৰপৰা তেওঁ বৌদ্ধিক আলোচনী 'সাতসৰী'ৰো সম্পাদক আছিল। ২০১৫ চনত তেওঁ নিয়মীয়া বাৰ্তা কাকতৰ মুখ্য সম্পাদকৰ দায়িত্ব লয় আৰু মৃত্যু পৰ্যন্ত নিয়াৰিকৈ এই কাকতখন চলায়। বৰগোহাঞি আছিল অসমীয়া প্ৰতিদিন কাকতৰো স্তম্ভলেখক।[7]

হোমেন বৰগোহাঞিয়ে মুঠ চুটিগল্প লিখিছে ৩৫ টা।[14] উল্লেখযোগ্য যে প্ৰতিটো গল্পৰ পৰিস্থিতি, পৰিৱেশ আৰু বিষয়বস্তু সম্পূৰ্ণ বেলেগ।[14]

আনন্দৰাম বৰুৱা ভাষা-কলা-সংস্কৃতি সংস্থাৰ উদ্যোগত ৬টা খণ্ডত অসমীয়া সাহিত্যৰ বুৰঞ্জী প্ৰকাশৰ প্ৰকল্প লোৱা হৈছিল। ইয়াৰে ৬ষ্ঠ অৰ্থাৎ অন্তিম খণ্ডটোৰ সম্পাদক আছিল হোমেন বৰগোহাঞি। লক্ষণীয় যে সেই ৬টা খণ্ডৰ ৬ষ্ঠ খণ্ডটোহে প্ৰথমে প্ৰকাশ হৈছিল যিটোৱে বৰগোহাঞিৰ কৰ্মতৎপৰতাক সূচায়।[14]

ষ্টুডেণ্টছ ষ্ট'ৰ্‌ছৰ সৈতে সম্পৰ্ক[সম্পাদনা কৰক]

১৯৮৭ চনত ষ্টুডেণ্টছ ষ্ট'ৰ্‌ছ প্ৰকাশনৰ সৈতে হোমেন বৰগোহাঞিৰ প্ৰথম সম্পৰ্ক হৈছিল। এই সম্পৰ্কৰ শুভাৰম্ভ হৈছিল সাউদৰ পুতেকে নাও মেলি যায় শীৰ্ষক উপন্যাসখনিৰে। তেতিয়াৰে পৰা জীৱনৰ অন্তিম সময়লৈকে বৰ্তি থকা সুদীৰ্ঘ ৩৪ বছৰজোৰা সম্পৰ্কৰ কথা সুঁৱৰি প্ৰকাশনৰ প্ৰধান সদস্য অজয় কুমাৰ দত্ত আৰু মৃত্যুঞ্জয় কুমাৰ দত্তই তেখেতৰ মৃত্যুৰ পাছত এনেদৰে লিখিছিল, “ইখনৰ পিছত সিখনকৈ প্ৰতিবছৰে নতুন নতুন কিতাপৰ পাণ্ডুলিপি আমাক দি যাবলৈ ধৰিলে। লাহে লাহে তেখেতৰ লগত আমাৰ সম্পৰ্ক গাঢ় হৈ আহিল। কঠোৰ ব্যক্তিত্বৰ আঁৰত থকা কোমল অন্তৰৰ মানুহজনক আমি ভালদৰে বুজি উঠিলোঁ। তেখেতৰ ওপৰত আমাৰ তাগিদা দিনকদিনে বাঢ়ি গ'ল। পাঠক সমাজেও প্ৰতিবছৰতেই বিচৰা হ'ল হোমেন বৰগোহাঞিৰ এখন নতুন কিতাপ।… এটা কথা উল্লেখ কৰিব খুজিছোঁ যে মানুহে সততে কোৱা ‘হোমেন বৰগোহাঞি মানেই ষ্টুডেণ্টছ ষ্ট'ৰ্‌ছ’ শীৰ্ষক মন্তব্যষাৰ শুনিলেই আমি অজান পুলক আৰু গৌৰৱত আহ্লাদিত হওঁ, নিজকে পৰম ধন্য যেন অনুভৱ কৰোঁ।”[15]

উল্লেখযোগ্য যে সুদীৰ্ঘ ৩৪ বছৰত হোমেন বৰগোহাঞিৰ সৰ্বমুঠ ৯৩খন গ্ৰন্থ ষ্টুডেণ্টছ ষ্ট'ৰ্‌ছ প্ৰকাশনৰ পৰাই প্ৰকাশ পাইছে।[15] ইয়াৰে মৌলিক গল্প, উপন্যাস, কবিতা, প্ৰবন্ধ আৰু জীৱনী গ্ৰন্থৰ সংখ্যা ৭৮খন, যুটীয়াভাৱে সম্পাদিত গ্ৰন্থ ১৪খন আৰু এখন অনূদিত জাৰ্মান গল্পৰ সংকলন। ইয়াৰে আটাইতকৈ শেষত প্ৰকাশ কৰা গ্ৰন্থখন হৈছে 'অসম্ভৱক সম্ভৱ কৰাৰ সাধনা', যিখন বৰগোহাঞিয়ে লিখি শেষ কৰিছিল ২০২০ চনৰ ক'ভিড-১৯ বৈশ্বিক মহামাৰীৰ লকডাউনৰ সময়ত। কিতাপখন প্ৰকাশ হৈছিল লকডাউনৰ অন্তত।[15]

১৯৯১ চনত তেওঁ ষ্টুডেণ্টছ ষ্ট'ৰ্‌ছক বিভিন্ন বিষয়ৰ কিতাপ-পত্ৰ প্ৰকাশ কৰাৰ লগতে জ্ঞান-বিজ্ঞানৰ নিত্যনতুন বতৰাৰে বিশেষকৈ কিশোৰসকলৰ বাবে এখন মাহেকীয়া আলোচনীৰ পৰামৰ্শ আগবঢ়ায়। ফলস্বৰূপে সেই বছৰেই ছেপ্টেম্বৰত তেখেতৰ অবৈতনিক সম্পাদনাত আলোচনীখনৰ প্ৰথম বছৰ প্ৰথম সংখ্যা প্ৰকাশ পায়। কিশোৰচামক জ্ঞানদানৰ উদ্দেশ্য কৰি উলিওৱাৰ বাবে বৰগোহাঞিয়ে আলোচনীখনৰ নাম দিছিল 'কিশোৰ'। সবিতা লহকৰ, বিপুলজ্যোতি শইকীয়া আৰু ৰবীন বৰুৱাই ইয়াত সহকাৰী সম্পাদকৰূপে কাম কৰিছিল। ব্যৱস্থাপনাৰ অসুবিধাত কেইমাহমান চলাৰ পিছতে আলোচনীখনৰ ছপা বন্ধ হয়।[15]

দূৰদৰ্শন[সম্পাদনা কৰক]

ব্যক্তিগত বাতৰি চেনেল নিউজ লাইভৰ জৰিয়তে পৰিচালনা কৰা সাক্ষাৎকাৰ ভিত্তিক অনুষ্ঠান 'হোমেন বৰগোহাঞিৰ সৈতে মুখামুখি'ৰ বৰগোহাঞি আছিল আঁত-ধৰোঁতা। উল্লেখযোগ্য যে এই অনুষ্ঠানটোৰ প্ৰায় সকলো আলোচনা সন্নিৱিষ্ট কৰি 'মুখামুখি' নামেৰে এখন কিতাপো প্ৰকাশ পাইছে। নিউজ লাইভৰ 'কথা-বাৰ্তা' অনুষ্ঠানৰো মুখ্য আকৰ্ষণ আছিল বৰগোহাঞি।[5]

নিজৰ উপন্যাস সম্পৰ্কে অভিমত[সম্পাদনা কৰক]

১৯৯২-৯৩ চনত যোৰহাট মহাবিদ্যালয়ৰ আলোচনীৰ লগত হোৱা এক সাক্ষাৎকাৰত হোমেন বৰগোহাঞিক তেখেতৰ জীৱনৰ শ্ৰেষ্ঠ সৃষ্টি সম্পৰ্কে এটা প্ৰশ্ন সোধা হৈছিল।[16] উত্তৰত প্ৰসংগক্ৰমে তেখেতে উল্লেখ কৰে যে,

…উপন্যাসৰ ভিতৰত ৰচনা শৈলীৰ ফালৰ পৰা মই 'মৎস্যগন্ধা'খন লিখি অলপ সন্তুষ্টি লাভ কৰিছিলো। 'অস্তৰাগ' নামৰ উপন্যাস লিখিও লেখক হিচাপে মই কিছু সন্তুষ্টি লাভ কৰিছিলো।…

ব্যক্তিগত জীৱন[সম্পাদনা কৰক]

১৯৫৮ চনত তেওঁ নিৰুপমা তামুলীৰে সৈতে বিবাহপাশত আবদ্ধ হয়।[7] নিৰুপমা তামুলী, পাছলৈ নিৰুপমা বৰগোহাঞি, এগৰাকী জনপ্ৰিয় লেখিকা। তেওঁ নাৰীবাদী লেখাৰ বাবে বিখ্যাত।[17] তেওঁলোকৰ দুটি সন্তান অনিন্দ্য বৰগোহাঞি আৰু প্ৰদীপ্ত বৰগোহাঞি। ১৯৭৭ চনৰপৰা বৰগোহাঞি দম্পতী পৃথকে থাকিবলৈ লয়।[7][18] প্ৰদীপ্ত বৰগোহাঞি হৈছে গুৱাহাটী বিশ্ববিদ্যালয়ৰ ইংৰাজী বিভাগৰ প্ৰবক্তা আৰু তেওঁ তেওঁৰ পিতৃৰ কেইবাখনো ৰচনাৰাজী ইংৰাজী ভাষালৈ অনুবাদ কৰিছে। সেইসমূহৰ ভিতৰত উল্লেখযোগ্য হৈছে ২০১৭ চনত প্ৰকাশিত 'দ্য কালেক্টেড ৱৰ্কছ্‌ অফ হোমেন বৰগোহাঞি', য'ত সন্নিবিষ্ট হৈছে বৰগোহাঞিৰ কেইবাটাও ছুটিগল্প আৰু উপন্যাস।[19]

হোমেন বৰগোহাঞিয়ে এটা সাক্ষাৎকাৰত গণতন্ত্ৰত বিশ্বাসী বুলি জানিবলৈ দিয়ে। তেওঁ লগতে কয় যে, “প্ৰত্যেকটো ৰাজনৈতিক দৰ্শনতে কিছু ভাল কথা থাকে বুলি মই অনুভৱ কৰোঁ। মই সেই ভালখিনি আহৰণ কৰি এটা Synthetic Philosophy গঢ়াৰ ওপৰত বিশ্বাস কৰোঁ।”

মৃত্যু[সম্পাদনা কৰক]

২০২১ চনৰ ক'ভিড-১৯ বৈশ্বিক মহামাৰীৰ দ্বিতীয় ঢৌত তেওঁ আক্ৰান্ত হৈ চিকিৎসালয়ত ভৰ্তি হয় আৰু ৭ মে' তাৰিখে চিকিৎসালয়ৰপৰা ক'ভিড মুক্ত হৈ স্বগৃহলৈ ওভতে যদিও ১২ মে'ৰ পুৱতি নিশা ৩ বজাত তেওঁ বিছনাৰ পৰা ঢলি পৰে। স্বাস্থ্যৰ অৱনতি ঘটাত তেওঁক ৬:১৫ বজাত গুৱাহাটীৰ জিএনআৰচি হস্পিতালত ভৰ্তি কৰোৱা হয় আৰু তাতে ৬:৫৮ বজাত তেওঁ শেষ নিশ্বাস ত্যাগ কৰে। মৃত্যুৰ আগমুহূৰ্তলৈকে তেওঁ জনপ্ৰিয় অসমীয়া বাতৰি কাকত 'নিয়মীয়া বাৰ্তা'ৰ মুখ্য সম্পাদক হিচাপে কাৰ্যনিৰ্বাহ কৰি আছিল।[20][21] মৃত্যুৰ সময়ত তেওঁৰ বয়স আছিল ৮৯ বছৰ।[22]

সাহিত্যিক অৱদান[সম্পাদনা কৰক]

উপন্যাস
কবিতা পুথি
  • হৈমন্তী
গল্প
প্ৰবন্ধ সংকলন
জীৱনীমূলক গ্ৰন্থ
আত্মজীৱনীমূলক
অন্যান্য
সম্পাদিত আলোচনী আৰু কাকত

উল্লেখযোগ্য বঁটা আৰু স্বীকৃতি[সম্পাদনা কৰক]

সাংবাদিকতাৰ লগতে সাহিত্য ক্ষেত্ৰত আগবঢ়োৱা অসামান্য অৱদানৰ বাবে বৰগোহাঞিয়ে তেওঁৰ জীৱনকালতে অলেখ বঁটা-বাহন আৰু স্বীকৃতি লাভ কৰিছিল।

২০২১ চনৰ পৰা প্ৰতি বছৰে ৭ ডিচেম্বৰ তাৰিখে হোমেন বৰগোহাঞিৰ জন্মদিনত অসম চৰকাৰে তেওঁৰ নামত সাহিত্যিক পেঞ্চন প্ৰদান কৰাৰ কথা ঘোষণা কৰে।[26] বৰগোহাঞিৰ গৃহ চহৰ ঢকুৱাখানাৰ 'হোমেন বৰগোহাঞি ট্ৰাষ্টে' প্ৰতিবছৰে বৰগোহাঞিৰ নামত 'হোমেন বৰগোহাঞি সাহিত্য বঁটা' প্ৰদান কৰে। ২০১৯ চনত জীৱনীকাৰ, অনুবাদক আৰু ঔপন্যাসিক শৰ্মিষ্ঠা প্ৰীতমে এই বঁটা লাভ কৰিছে।[27]

অভিযোজন[সম্পাদনা কৰক]

হোমেন বৰগোহাঞিৰ কেইবাখনো উপন্যাস চলচ্চিত্ৰায়ণ তথা মঞ্চস্থ কৰা হৈছে। ইয়াৰ ভিতৰত উল্লেখযোগ্য হৈছে 'হালধীয়া চৰায়ে বাওধান খায়'ৰ ভিত্তিত জাহ্নু বৰুৱাৰ পৰিচালনা কৰা একে নামৰ চলচ্চিত্ৰখনইন্দ্ৰ বণিয়া অভিনীত এই চলচ্চিত্ৰখনে ১৯৮৮ চনৰ ৰাষ্ট্ৰীয় চলচ্চিত্ৰ বঁটাত শ্ৰেষ্ঠ ছবিৰ বঁটা লাভ কৰাৰ লগতে আন আন্তঃৰাষ্ট্ৰীয় পৰ্যায়ৰ বঁটাও লাভ কৰিছিল।[4] ২০০০ চনত 'মৎস্যগন্ধা'ৰ আধাৰত সঞ্জীৱ হাজৰিকাই নিৰ্মাণ কৰা একে নামৰ ছবিখনে ৰাজ্যিক চলচ্চিত্ৰ বঁটা লাভ কৰিব সক্ষম হৈছিল।[19] 'মৎস্যগন্ধা'ৰ মঞ্চ অভিযোজনও কৰা হৈছে।[19] ২০১৯ চনৰ অসমীয়া ভাষাৰ এন্থলজী ছবি 'যি গল্পৰ শেষ নাই'ৰ এটা খণ্ডৰ ভিত্তি আছিল বৰগোহাঞিৰ 'এপিটাফ' নামৰ চুটিগল্পটো; পৰিচালনা কৰিছিল প্ৰশান্ত শইকীয়াই।[28] ২০২০ চনত মুন্না আহমেদে 'সুবালা' উপন্যাসৰ ভিত্তিত নিৰ্মাণ কৰে উৰ্মিলা মহন্ত অভিনীত একে নামৰ চলচ্চিত্ৰখন।[29]

তথ্য সংগ্ৰহ[সম্পাদনা কৰক]

  1. Assamese Awards 1955–2007 Sahitya Akademi Official website.
  2. "Assam's Homen Borgohain to Return Sahitya Akademi Award". NDTV.com. http://www.ndtv.com/india-news/assams-homen-borgohain-to-return-sahitya-akademi-award-1231607। আহৰণ কৰা হৈছে: 13 October 2015. 
  3. "Punjab to Assam: Writer returns her Padma Shri, another his Akademi". The Indian Express. 13 October 2015. http://indianexpress.com/article/india/india-news-india/punjabi-author-dalip-kaur-tiwana-to-return-padma-shri-more-writers-protest/। আহৰণ কৰা হৈছে: 13 October 2015. 
  4. 4.0 4.1 "35th National Film Awards". Directorate of Film Festivals. পৃষ্ঠাসমূহ: 12–13. http://dff.nic.in/2011/35th_nff_1988.pdf। আহৰণ কৰা হৈছে: 9 January 2012. 
  5. 5.0 5.1 5.2 "জাতীয় জীৱনৰ অপূৰণীয় ক্ষতি". নিয়মীয়া বাৰ্তা. ১৩ মে', ২০২১. পৃষ্ঠা ৬. https://niyomiyabarta.com/epaper/13052021/page6.php। আহৰণ কৰা হৈছে: 13 মে' 2021. 
  6. http://indilens.com/?s=homen+borgohain! Homen Borgohain
  7. 7.0 7.1 7.2 7.3 7.4 7.5 7.6 7.7 7.8 7.9 ষ্টাফ ৰিপৰ্টাৰ (১৩ মে', ২০২১). "মহাজীৱনৰ অস্তৰাগ". 
  8. "মহীৰূহৰ মহাপ্ৰয়াণ". দৈনিক জনমভূমি. ১৩ মে' ২০২‌১. পৃষ্ঠা ১,৮. https://dainikjanambhumi.co.in/13052021/details.php?date=14-05-2014&page=1-8&article=1.jpg&cid=28664। আহৰণ কৰা হৈছে: 18 মে' 2021. 
  9. "হোমেন বৰগোহাঞিৰ জীৱন পৰিক্ৰমা". অসমীয়া খবৰ. ১৩ মে' ২০২১. পৃষ্ঠা ৬. https://www.assamiyakhabor.com/publishfinal/asset/guwahati/13052021/6.html। আহৰণ কৰা হৈছে: 18 মে' 2021. 
  10. 10.0 10.1 10.2 10.3 বৰগোহাঞি, হোমেন (২০০১, অক্টোবৰ). আত্মানুসন্ধান. প্ৰকাশক গুৱাহাটী: ষ্টুডেণ্টছ ষ্টৰছ. পৃষ্ঠা. ১৩, ১৪. ISBN ৮১-৮৫৯০৫-২৭-৪. 
  11. "মহীৰূহৰ মহাপ্ৰয়াণ". দৈনিক জনমভূমি. ১৩ মে', ২০২১. পৃষ্ঠা ১,৮. https://dainikjanambhumi.co.in/13052021/page8.php। আহৰণ কৰা হৈছে: 13 মে' 2021. 
  12. বৰগোহাঞি, হোমেন (মে', ২০১৩). হেম বৰুৱা. ষ্টুডেণ্টছ ষ্টৰছ. পৃষ্ঠা. ২৭৯. ISBN ৮১-৮৬৪৯৪-৯৯-৫. 
  13. বৰগোহাঞি, হোমেন (মে', ২০১৩). ধুমুহা আৰু ৰামধেনু. ষ্টুডেণ্টছ ষ্টৰছ. পৃষ্ঠা. ১৩৯. ISBN ৮১-৮৬৪৯৪-৯৯-৫. 
  14. 14.0 14.1 14.2 ড॰ চুলতান আলী আহমেদ (১৮ মে',২০২১). "অসমৰ সমাজ জীৱনলৈ হোমেন বৰগোহাঞিৰ বহুমুখী অৱদান". নিয়মীয়া বাৰ্তা. নিয়মীয়া বাৰ্তা: পৃষ্ঠা ৭. https://niyomiyabarta.com/epaper/18052021/page7.php। আহৰণ কৰা হৈছে: 20 মে' 2021. 
  15. 15.0 15.1 15.2 15.3 অজয় কুমাৰ দত্ত, মৃত্যঞ্জয় কুমাৰ দত্ত (২১ মে', ২০২১). "মহীৰূহৰ ছত্ৰছায়াত ষ্টুডেণ্টছ ষ্ট'ৰ্‌ছ, সুদীৰ্ঘ ৩৪ বছৰজোৰা সান্নিধ্যৰ সোঁৱৰণ". নিয়মীয়া বাৰ্তা: পৃষ্ঠা ৭. https://niyomiyabarta.com/epaper/21052021/page7.php। আহৰণ কৰা হৈছে: 24 মে' 2021. 
  16. বৰগোহাঞি, হোমেন (মে', ২০১৩). যোৰহাট মহাবিদ্যালয় আলোচনীৰ লগত হোৱা সাক্ষাৎকাৰ (১৯৯২-৯৩). ষ্টুডেণ্টছ্ ষ্ট'ৰছ. পৃষ্ঠা. ২৫৮-২৭৪. ISBN ৮১-৮৬৪৯৪-৯৯-৫. 
  17. "Nirupama Bargohain". vedanti.com. 22nd Aug 2011. http://www.vedanti.com/Legends/nirupama_bargohain.htm। আহৰণ কৰা হৈছে: February 24, 2013. 
  18. Gogoi 2003.
  19. 19.0 19.1 19.2 "‘I Draw All My Characters From the Real World’: How Homen Borgohain Documents Assamese Life". The Wire. 21 October 2017. https://thewire.in/books/i-draw-characters-real-world-writer-homen-borgohain-documents-assamese-life-tribes। আহৰণ কৰা হৈছে: 19 May 2021. 
  20. "EMINENT LITTERATEUR, JOURNALIST HOMEN BORGOHAIN NO MORE". News Live tv. https://newslivetv.com/breaking-eminent-litterateur-journalist-homen-borgohain-no-more/। আহৰণ কৰা হৈছে: 12 মে' 2021. 
  21. "Veteran journalist and eminent litterateur Homen Borgohain no more". Nenow.in. https://nenow.in/north-east-news/assam/assam-veteran-journalist-and-eminent-litterateur-homen-borgohain-no-more.html। আহৰণ কৰা হৈছে: 12 মে' 2021. 
  22. "Eminent Litterateur Homen Borgohain Passes Away At 89". Pratidintime.com. https://www.pratidintime.com/eminent-litterateur-homen-borgohain-passes-away-at-89/। আহৰণ কৰা হৈছে: 12 মে' 2021. 
  23. "সাহিত্য অকাডেমি বঁটা বিজয়ী অসমীয়াসকলৰ তথ্য". সাহিত্য অকাডেমি. http://sahitya-akademi.gov.in/sahitya-akademi/showSearchAwardsResult.jsp?year=&author=&awards=AA&language=ASSAMESE। আহৰণ কৰা হৈছে: নৱেম্বৰ ১৬, ২০১২. 
  24. ১৯১৭ চনৰ পৰা অসম সাহিত্য সভাৰ সভাপতিসকলৰ তালিকা অসম সাহিত্য সভাৰ ৱেবছাইট, আহৰণ: ১৮ নৱেম্বৰ, ২০১২।
  25. "হোমেন বৰগোহাঞিক 'মৎসেন্দ্ৰ নাথ বঁটা' প্ৰদান". glpublications. ২ ফেব্ৰুৱাৰী, ২০১৫. http://amarasom.glpublications.in/Details.aspx?id=20815&boxid=13411250। আহৰণ কৰা হৈছে: 2 ফেব্ৰুৱাৰী 2015. 
  26. "Assam to confer 'Asom Ratna', other awards every year to 'icons'" (en-US ভাষাত). 2021-06-09. https://www.thestatesman.com/india/assam-confer-asom-ratna-awards-every-year-icons-1502971639.html. 
  27. "Homen Borgohain Trust to confer Homen Borgohain Sahitya Bota (Literary Award) to Sarmistha Preetam". দ্যা ছেণ্টিনেল. ২৭ মে', ২০১৯. https://www.sentinelassam.com/amp/north-east-india-news/assam-news/homen-borgohain-trust-to-confer-homen-borgohain-sahitya-bota-literary-award-to-sarmistha-preetam/। আহৰণ কৰা হৈছে: ১৪ মে', ২০২১. 
  28. "Northeast’s first anthology film screened in Guwahati, Assam". The Hindu. 21 April 2019. https://www.thehindu.com/entertainment/movies/northeasts-first-anthology-film-screened-in-guwahati-assam/article26903427.ece। আহৰণ কৰা হৈছে: 19 May 2021. 
  29. "A tale of battling poverty". The Telegraph. 16 February 2020. https://www.telegraphindia.com/north-east/a-tale-of-battling-poverty/cid/1745817। আহৰণ কৰা হৈছে: 19 May 2021.