অনুপমা ভট্টাচাৰ্য
| অনুপমা ভট্টাচাৰ্য | |
|---|---|
 | |
| জন্ম | ১৯ আগষ্ট, ১৯২৮ আমোলাপট্টি, শিৱসাগৰ |
| মৃত্যু | ৩০ জানুৱাৰী, ২০২২ (বয়স ৯৩) গুৱাহাটী |
| ৰাষ্ট্ৰীয়তা | ভাৰতীয় |
| পেচা | অভিনেত্ৰী, অনাতাঁৰ ঘোষিকা |
| উল্লেখযোগ্য কৰ্ম | ছিৰাজ |
| ধৰ্ম | হিন্দু ধৰ্ম |
| দাম্পত্যসঙ্গী | উদয় ভট্টাচাৰ্য শিৱনাথ ভট্টাচাৰ্য |
| পিতৃ-মাতৃ | গোপাল বেজবৰুৱা (পিতৃ) গুণদা বেজবৰুৱা (মাতৃ) |
| সন্তান | ৰুণুমী ঠাকুৰ |
| আত্মীয়-স্বজন | লক্ষ্মীনাথ বেজবৰুৱা (দেউতাকৰ খুৰাক) আনন্দ চন্দ্ৰ বৰুৱা (মোমায়েক) |
অনুপমা ভট্টাচাৰ্য (ইংৰাজী: Anupama Bhattacharjya; ১৯ আগষ্ট ১৯২৮-৩০ জানুৱাৰী ২০২২) অসমৰ চলচ্চিত্ৰ আৰু মঞ্চজগতৰ এগৰাকী গুৰিধৰোঁতা অভিনেত্ৰী। অসমৰ “মীনা কুমাৰী” হিচাপে খ্যাত[1] ভট্টাচাৰ্যই চল্লিশৰ জগতৰ পৰা আজিলৈকে মঞ্চ, অনাতাঁৰ, বোলছবি আৰু দূৰদৰ্শনত অভিনয় কৰি আহিছে।
জন্ম আৰু শৈশৱ
[সম্পাদনা কৰক]১৯২৮ চনৰ ১৯ আগষ্টত শিৱসাগৰৰ আমোলাপট্টিৰ প্ৰখ্যাত বেজবৰুৱা পৰিয়ালত অনুপমা ভট্টাচাৰ্যৰ জন্ম হয়। তেওঁৰ পিতৃ গোপাল বেজবৰুৱা আৰু মাতৃ গুণদা বেজবৰুৱা। তেওঁৰ তিনিজনী বাই ভনী আৰু এজন ভাতৃ আছিল। বংশসূত্ৰে ৰসৰাজ লক্ষ্মীনাথ বেজবৰুৱা তেওঁৰ ককা (দেউতাকৰ খুড়াক) আৰু বকুলবনৰ কবি আনন্দ চন্দ্ৰ বৰুৱা তেওঁৰ মোমায়েক আছিল।[1] দেউতাকৰ কঠোৰ অনুশাসন আৰু ব্ৰাহ্মণীয় কঠোৰ সামাজিক ৰীতি নীতিৰ মাজেৰে তেওঁৰ শৈশৱ কাল পাৰ হয়। ঘৰুৱা কামকাজত নিচা থকাৰ উপৰিও নাচ-গান অভিনয়তো তেওঁৰ খুব ৰাপ আছিল। বিশেষকৈ চিনেমা চাবলৈ তেওঁ খুব ভাল পাইছিল। ঘৰৰ পৰা মনে মনে গৈ তেওঁ বহুবাৰ হলত চিনেমা চাবলৈ গৈছিল। বিশেষকৈ মীনা কুমাৰী থকা চিনেমা তেওঁ বাদ দিয়া নাছিল। এবাৰ অৱশ্যে তেওঁ ধৰা পৰিছিল আৰু দেউতাকে গম পোৱাত দেউতাকে মাকক দুৱাৰ খুলি দিবলৈ মানা কৰিছিল যদিও মাকে খুলি দিয়াত সেইবাৰলৈ ৰক্ষা পৰে। তেওঁ ফুলেশ্বৰী গাৰ্লছ হাইস্কুলত শিক্ষা গ্ৰহণ কৰিছিল।
বিবাহ আৰু সাংসাৰিক জীৱন
[সম্পাদনা কৰক]বিয়া কি বুজি পোৱাৰ আগতেই ন বছৰ বয়সত উদয় ভট্টাচাৰ্যৰ সৈতে অনুপমা ভট্টাচাৰ্যৰ বিয়া হয়।[1] কিন্তু বিয়াৰ কিছুমাহ পিছতে তেওঁৰ স্বামীৰ মৃত্যু হয়। তেওঁৰ ভাষাত
"কেইমাহমান পিছত এদিন মায়ে হুৰাওৰায়ে কান্দিব ধৰিলে। ওচৰৰ তিৰোতাবোৰে আহি মোৰ গহনা-গাঁথৰি খুলি পেলালে,কপালৰ ফোঁট মচি দিলে। কোনোবাই ক’লে মই হেনো বিধৱা হ’লো। মোৰ সৈতে বিয়া হোৱা মানুহজন জ্বৰ হৈ ঢুকাই থাকিল। মই সেইবোৰ কি জানো?-এই কাপোৰ-গহণাবোৰ খুলি দিয়াতহে মোৰ গাটো পাতল লাগিছে,খেলিবলৈ সুবিধা হৈছে। "
ইয়াৰ পিছত ‘‘ছিৰাজ’’ত অভিনয় কৰি থাকোঁতে ছিৰাজৰ সংগীত পৰিচালক শিৱপ্ৰসাদ ভট্টাচাৰ্যৰ সৈতে তেওঁ পুনৰ বিয়াত বহে।[1] তেওঁলোকৰ ৰুণুমী নামৰ কন্যাসন্তান এটিৰ জন্ম হয়। কিন্তু ১৯৫৩ চনত শিৱপ্ৰসাদ ভট্টাচাৰ্যৰ মৃত্যু হয় আৰু ২২ বছৰ বয়সতে তেওঁ দ্বিতীয়বাৰৰ বাবে বিধৱা হয়। কাৰোপৰা একো সহায় নাপাই নাটকত অভিনয় কৰি তেওঁ সন্তানক ডাঙৰ দীঘল কৰিবলৈ বাধ্য হয়। এক সংগীত শিল্পী হিচাপে প্ৰতিষ্ঠা লাভ কৰা তেওঁৰ পুত্ৰীয়েও বিয়াৰ কিছু বছৰ পিছত দুজনী কন্যা সন্তান জন্ম দি মৃত্যুমুখত পৰে। জীয়ৰীৰ মৃত্যুৰ পিছত ভট্টাচাৰ্যই তেওঁৰ কিছুমান জনপ্ৰিয় গীত “অ চিকুণ বিহুটি” নামেৰে মুকলি কৰে।[1]
অভিনয় জীৱন
[সম্পাদনা কৰক]স্বামীহাৰা হৈ ঘৰত থকা অৱস্থাতে ফণী শৰ্মাই ছিৰাজত অভিনয়ৰ প্ৰস্তাৱ লৈ আহে। সামাজিক বাধা নিষেধ নামানি ভট্টাচাৰ্যই অভিনয় কৰিবলৈ ওলাই আহে। তাৰেই ফলস্বৰূপে সমাজে তেওঁলোকৰ ঘৰখনক এঘৰীয়া কৰে।[1] চিৰাজত তেওঁ ফাতেমাৰ চৰিত্ৰত অভিনয় কৰে। চিৰাজৰ চিত্ৰগ্ৰহণৰ সময়তেই ইয়াৰ সংগীত পৰিচালক শিৱপ্ৰসাদ ভট্টাচাৰ্যৰ লগত বিবাহ সম্পন্ন হয়।
অনুপমা ভট্টাচাৰ্যই নিমিলা অংক,নতুন পৃথিৱী,মানৱ আৰু দানৱ,ছিৰাজ,সৰাপাত,ৰাংঢালী,মন আৰু মৰম,বিপ্লৱী আদিকে ধৰি প্ৰায় ১৪খন ছবিত অভিনয় কৰে। নটৰাজ থিয়েটাৰত দুবছৰৰ বাবে চুক্তিবদ্ধ হৈ তেওঁ চিৰাজউদ্দোলা,কিয়,ভোগজৰা,কাশ্মীৰ কুমাৰী আদি নাটকত অভিনয় কৰে। তদুপৰি তেওঁ অনাতাঁৰ কেন্দ্ৰতো ঘোষিকা হিচাপে আৰু নাট্যশিল্পী হিচাপে কাম কৰে।
বঁটা আৰু সন্মান
[সম্পাদনা কৰক]- কলাগুৰু বিষ্ণু ৰাভা বঁটা
- আইদেউ সন্দিকৈ বঁটা
- জীৱনজোৰা সাধনাৰ বাবে প্ৰমথেশ চন্দ্ৰ বৰুৱা বঁটা
- ভ্ৰাম্যমাণৰ ৱাইজমেন বঁটা[1]
মৃত্যু
[সম্পাদনা কৰক]২০২২ বৰ্ষৰ ৩০ জানুৱাৰীত আবেলি ৫.৫০ বজাত জিএমচিএইচত শেষ নিশ্বাস ত্যাগ কৰে।[2]
তথ্য সংগ্ৰহ
[সম্পাদনা কৰক]- ↑ 1.0 1.1 1.2 1.3 1.4 1.5 1.6 গীতাঞ্জলি মেধি (অক্টোবৰ ২০০৬). "মোৰ জীৱন মোৰ পৃথিৱী". নন্দিনী,পৃষ্ঠা ৭৬-৭৬.
- ↑ "অসমৰ ভ্ৰাম্যমান জগতৰ প্ৰথম গৰাকী অভিনেত্ৰী অনুপমা ভট্টাচাৰ্য আৰু নাই…". অসমীয়া প্ৰতিদিন. ৩০ জানুৱাৰী ২০২২. https://www.asomiyapratidin.in/actress-anupama-bhattacharjee-no-more/। আহৰণ কৰা হৈছে: ৩০ জানুৱাৰী ২০২২.
বাহ্যিক সংযোগ
[সম্পাদনা কৰক]- অনুপমা ভট্টাচাৰ্য সম্পৰ্কে ইণ্টাৰনেট মুভি ডাটাবেছত থকা তথ্য।
| ||||||||||||||||||||||||||
