জাহ্নৱী গোস্বামী

অসমীয়া ৱিকিপিডিয়াৰ পৰা
Jump to navigation Jump to search
জাহ্নৱী গোস্বামী
জন্ম ১৯৭৬
কামপুৰ, নগাঁও, অসম
পেচা সক্ৰিয় সমাজকৰ্মী, The Assam Network of Positive People (ANP+)ৰ সভানেত্ৰী, Assam State AIDS Control Society (ASACS)ৰ সদস্য
সক্ৰিয় হৈ থকা সময় ১৯৯৭-এতিয়ালৈকে

জাহ্নৱী গোস্বামী এইড্‌ছ ৰোগৰ বিষয়ে সজাগতা সৃষ্টি কৰাত এক গুৰুত্বপূৰ্ণ ভূমিকা লৈ অহা অসমৰ এগৰাকী সমাজকৰ্মী । এইড্‌ছ ৰোগত আক্ৰান্ত বুলি ঘোষণা কৰা তেখেতেই উত্তৰ-পূৰ্বাঞ্চলৰ প্ৰথমগৰাকী মহিলা [1]। ১৯৯৬ চনতে নিজৰ দেহত ৰোগ ধৰা পৰাৰ পিছত পোন্ধৰ বছৰ তেখেতে এখন এইড্‌ছমুক্ত সমাজ গঢ়িবলৈ চেষ্টা চলাই আহিছে । ২০০২ চনত তেখেতে অসমৰ এইড্‌ছত আক্ৰান্ত লোকসকলৰ জীৱন-ধাৰণৰ মান উন্নত কৰিবলৈ "দা আচাম নেটৱৰ্ক অৱ পজিটিভ পিপল" গঠন কৰে ।

প্ৰাৰম্ভিক জীৱন[সম্পাদনা কৰক]

জাহ্নৱী গোস্বামীয়ে ১৯৭৬ চনত নগাঁও জিলাৰ কামপুৰ নগৰত জন্মগ্ৰহণ কৰে । চাৰিগৰাকী ভাই-ভনীৰ তেখেত আছিল জ্যেষ্ঠ । সপ্তম শ্ৰেণীত পঢ়ি থাকোঁতেই তেখেতৰ পিতৃ বিয়োগ হয় । ১৯৯৪ চনত মাত্ৰ ১৮ বছত বয়সতে গুৱাহাটীৰ পংকজ শৰ্মা নামৰ এজন ব্যৱসায়ীৰ লগত গোস্বমীৰ বিবাহ সম্পন্ন হয় । তেওঁলোকৰ সন্তান "কস্তুৰিকা" তিনিমহীয়া হওঁতে ১৯৯৫ চনত পংকজ শৰ্মাৰ আকস্মিক মৃত্যু ঘটে । তাৰ পিছত জাহ্নৱী গোস্বামীক শহুৰেকৰ পৰিয়ালে ঘৰৰ পৰা উলিয়াই পঠিয়ায় আৰু তেখেত শুদাহাতে নগাঁৱৰ ঘৰলৈ ঘূৰি আহে [1]

এইড্‌ছৰ সৈতে যুঁজ[সম্পাদনা কৰক]

সঘনাই হোৱা ৰোগৰ বাবে জাহ্নৱী গোস্বামীক গুৱাহাটী চিকিৎসা মহাবিদ্যালয়ত ভৰ্ত্তি কৰা হয় । তাত থাকোঁতেই তেখেতৰ দেহত এইড্‌ছ (AIDS-Acquired Immune Deficiency Syndrome) ৰোগ ধৰা পৰে। উল্লেখযোগ্য যে এই ৰোগৰ বীজাণু হৈছে HIV (Human Immunodeficiency Virus) নামৰ এবিধ ভাইৰাছ । তেওঁৰ লগতে কণমানি কস্তুৰিকাৰো এই ৰোগ হোৱা বুলি চিকিৎসকে ঘোষণা কৰে । তেতিয়াহে স্পষ্ট হয় যে গোস্বামীৰ পতি এই ৰোগত ভুগি আছিল আৰু তেওঁৰ পৰিয়ালবৰ্গ‍ই এই কথা গোস্বামীৰ পৰিয়ালৰ পৰা লুকুৱাই ৰাখিছিল [2]

মৃত্যু আসন্ন বুলি জানিও গোস্বামীয়ে কামপুৰৰ ঘৰলৈ গৈ উচ্চ শিক্ষা গ্ৰহণৰ সংকল্প লয় । পৰিয়ালৰ অনুপ্ৰেৰণা আৰু কেইজনমান অধিবক্তাৰ সহযোগত তেখেতে "সংক্ৰামক ৰোগ চিকিৎসালয় কৰ্তৃপক্ষ"ৰ বিৰুদ্ধে উচ্চতম ন্যায়ালয়ত গোচৰ তৰে । চিকিৎসালয় তথা চৰকাৰৰ বিৰুদ্ধে উচ্চতম ন্যায়ালয়ত গোচৰ তৰা তেখেতেই আছিল প্ৰথম ব্যক্তি [3]। ১৯৯৭ চনত ন্যায়ালয়ে ৰায় দিয়ে যে এইড্‌ছ আক্ৰান্ত ৰোগীৰ চিকিৎসাৰ ক্ষেত্ৰত কোনো ভেদভাৱ থাকিব নোৱাৰে আৰু তেওঁলোককো সাধাৰণ ৰোগীৰ সমানেই সা-সুবিধা প্ৰধান কৰা হ’ব । এই সুখবৰৰ কিছুদিন পিছতেই ১৯৯৮ চনত কণমানি কস্তুৰিকাৰ মৃত্যু ঘটে ।

কন্যাৰ মৃত্যুৰ পিছত জাহ্নৱী গোস্বামীয়ে এইড্‌ছৰ বিৰুদ্ধে সজাগতা সৃষ্টিকে জীৱনৰ পণ হিছাপে লয় । ১৯৯৮ চনত তেখেতে নিজকে এইড্‌ছ আক্ৰান্ত বুলি মুকলিভাৱে ঘোষণা কৰে [4]

অনুষ্ঠান-প্ৰতিষ্ঠান[সম্পাদনা কৰক]

জাহ্নৱী গোস্বামীয়ে ১৯৯৯ চনত গুৱাহাটীলৈ গৈ "অসম ৰাজ্যিক এইড্‌ছ নিয়ন্ত্ৰণ সমিতি"(Assam State AIDS Control Society, ASACS)ত যোগদান কৰে । কিন্তু তেখেতৰ মানুহৰ ঘৃণাৰ বাবে ঘৰ বিচাৰি পোৱাত অসুবিধা হয় । কেইবছৰমান সমিতিয়ে যোগাৰ কৰি দিয়া কোঠালী এটাত থকাৰ পিছত অৱশেষত ২০০৩ চনত অসম চৰকাৰে তেখেতক এটা ঘৰ প্ৰদান কৰে । এনেধৰণৰ বৈষম্যৰ বাবেই তেখেতে ২০০৬ চনৰ অসম বিধানসভাৰ নিৰ্বাচনত অৱতীৰ্ণ হোৱাৰ পৰা বিৰত থাকিবলগীয়া হয় [2][4]

২০০২ চনত অসমৰ আন এইড্‌ছ আক্ৰান্ত ব্যক্তিসকলৰ সৈতে মিলি গোস্বামীয়ে "Assam Network of Positive People" (ANP+) গঠন কৰে। ইয়াৰ উদ্দেশ্য আছিল এই ৰোগত ভোগা মানুহবোৰৰ জীৱনৰ সক্ষমতা বৃদ্ধি কৰা আৰু তেওঁলোকক সমাজত উচিত স্থান দিয়া । তেওঁলোকে লগতে এটা পৰামৰ্শ কেন্দ্ৰ মুকলি কৰিছে য’ত দৰব-পাতিৰ সুবিধাৰ উপৰিও স্বাস্থ্য পৰীক্ষাৰো সুবিধা আছে[4]

২০০৯ চনত তেখেত "Indian Network of Positive People" (INP+)ৰ সভানেত্ৰী নিৰ্বাচিত হয় । ১৯৯৭ চনত জন্মলাভ কৰা এই অনুষ্ঠানটোৱে সমাজৰ এইড্‌ছ আক্ৰান্ত ব্যক্তিৰ প্ৰতি ভয়, ঘৃণা, বৈষম্য দূৰ কৰিবলৈ অহৰহ প্ৰচেষ্টা চলাই আহিছে [3]

অসম ৰাজ্যিক এইড্‌ছ নিয়ন্ত্ৰণ সমিতিৰ এগৰাকী মূল সদস্যৰূপে তেখেতে চিকিৎসক, নাৰ্চ আৰু পাৰামেডিকেল কৰ্মীসকলক প্ৰশিক্ষণ প্ৰধান কৰে । ইয়াৰ উপৰিও তেখেতে সমগ্ৰ দেশজুৰি কথোপকথন, আলোচনা চক্ৰ, বক্তৃতা আদিত অংশ গ্ৰহণ কৰি এইড্‌ছৰ ওপৰত সজাগতা সৃষ্টি কৰাত অৰিহণা যোগাই আহিছে ।

তেখেতে নিয়মীয়াকৈ এইড্‌ছৰ একমাত্ৰ সাম্প্ৰতিক চিকিৎসা "এণ্টি ৰেট্ৰ’ভাইৰেল থেৰাপী"(Anti Retroviral therapy) গ্ৰহণ কৰি আহিছে ।

তথ্যসূত্ৰ[সম্পাদনা কৰক]

  1. 1.0 1.1 [1]A Positive Approach Towards HIV, by Nava Thakuria,March 2005, Retrieved:15.09.2011
  2. 2.0 2.1 [2]Never Mind the Numbers: India's HIV/AIDS Crisis is Large Enough,By Smita Baruah,1 June 2008, Retrieved:15.09.2011
  3. 3.0 3.1 [3]Jahnabi Goswami,By Parinita Datta, Retrieved:15.09.2011
  4. 4.0 4.1 4.2 [www.twnside.org.sg/title2/women/2006/TWR187p36.doc]Fighting the HIV stigma:Jahnavi's way, By Nava Thakuria,March 2006, Retrieved:15.09.2011