নীলিম কুমাৰ

নীলিম কুমাৰ
জন্ম	১৯৬১ পাঠশালা, বৰপেটা জিলা, অসম
পেচা	চৰকাৰী চিকিৎসক, কবি আৰু ঔপন্যাসিক
দাম্পত্যসঙ্গী	পুষ্পাঞ্জলী (ৰিজু)
সন্তান	ফুটুকী, মিচিকি

নীলিম কুমাৰ অসমৰ এগৰাকী প্ৰসিদ্ধ কবি আৰু ঔপন্যাসিক। আধুনিক অসমীয়া কবিতাৰ জগতত তেওঁ অন্যতম জনপ্ৰিয় কবি। তেওঁৰ প্ৰকৃত নাম "হেমেন কুমাৰ শৰ্মা"।^{[উদ্ধৃতিৰ প্ৰয়োজন]} ১৯৬১ চনৰ ৯ মাৰ্চ তাৰিখে বৰপেটা জিলাৰ পাঠশালাত তেওঁৰ জন্ম হয়। পাঠশালাতেই তেওঁৰ শৈশৱকাল অতিবাহিত হয়। তেওঁ কৰ্মসূত্ৰে এজন চৰকাৰী চিকিৎসক। ১৯৮৪ চনৰ পৰা তেওঁৰ কবি জীৱন আৰম্ভ হয়। ১৯৯১ চনত পুষ্পাঞ্জলি গোস্বামী (ৰিজু)ৰ সৈতে বিবাহ পাশত আবদ্ধ হয়। তেওঁৰ দুই কন্যা সন্তান, ফুটুকী আৰু মিচিকি।

সাহিত্য কৰ্ম

নীলিম কুমাৰৰ প্ৰথম কবিতা পুথি প্ৰকাশ হয় ১৯৮৫ চনত। ১৯৯৪ চনত প্ৰকাশিত “অপ্ৰজনন” নামৰ এটি কবিতাৰ বাবে তেওঁ চৰ্চালৈ আহে। এতিয়ালৈ তেখেতে কুৰিৰো অধিক কাব্যগ্ৰন্থ ৰচনা কৰিছে। ইয়াৰ উপৰিও তেখেতে তিনিখন উপন্যাসো লিখিছে। তেওঁৰ এই সৃষ্টিৰ যোগেদি অসম তথা ভাৰতত সুনাম অৰ্জন কৰাৰ লগতে "উদয় ভাৰতী ৰাষ্ট্ৰীয় বঁটা"কে ধৰি কেইবাটাও পুৰস্কাৰো লাভ কৰিছে। ফৰাচী, ইংৰাজী, হিন্দী, নেপালী, বঙালী, উড়িয়া, মাৰাঠী, গুজৰাটী, তামিল, কন্নড়, পঞ্জাবী আদি বিভিন্ন ভাষালৈ তেওঁৰ কবিতা অনুবাদ কৰা হৈছে।

২০০২ চনত অকবিতাৰ বিৰুদ্ধে জেহাদ ঘোষণা কৰি তেওঁ বিতৰ্কত সোমাই পৰিছিল।^{[উদ্ধৃতিৰ প্ৰয়োজন]} ২০০৫ চনত তেখেতে ব্ৰহ্মপুত্ৰৰ পাৰত "কবি সন্মিলন" অনুষ্ঠিত কৰি আশীজন নতুন কবিক কবিতাৰ শিক্ষা দিয়ে। ২০০৬ চনত তেখেতে অসমত এখন "কবিতাৰ বিদ্যালয়" স্থাপন কৰাৰ প্ৰস্তাৱ দিয়ে। নীলিম কুমাৰৰ জনপ্ৰিয় কবিতা "ধুনীয়া তিৰোতাবোৰ"ৰ আধাৰত ২০১১ চনত একে নামৰ এখন চলচ্চিত্ৰ নিৰ্মাণ কৰা হয়।

প্ৰকাশিত কাব্যগ্ৰন্থ

• আচিনাৰ অসুখ
• বাৰী কোঁৱৰ
• পানীত ঢৌ ঢৌবোৰ মাছ
• স্বপ্নৰ ৰেলগাড়ী
• শেলুৱৈ গধূলি
• ম‍ই তোমালোকৰ কবি
• কবিতা সমগ্ৰ (১)
• কবিতা সমগ্ৰ (২)
• ধুনীয়া তিৰোতাবোৰ আৰু অন্য কবিতা
• কাইলৈৰ পৰা আপোনাক ভাল পাম, আজি যে এৰাব নোৱাৰা ব্যস্ততা
• নীলিম কুমাৰৰ প্ৰেমৰ কবিতা
• জোনাক ভালপোৱা তিৰোতাজনী
• আমাৰ আকাশত চাৰিজনী জোন
• নৰকাসুৰ
• এদিন তোমাৰ ঘৰলৈ যাম, তোমাৰ য'ত জন্ম হৈছিল সেই দুখৰ ঘৰটো চাই আহিম কোনে কাক কৈছিল
• নীলিম কুমাৰৰ প্ৰিয় কবিতা
• টোপনিৰ বাগিচা
• কণ কণ কালিকালগা ঢৌ
• আৰু আত্মগাথা
• নীলিম কুমাৰৰ অকবিতা সমগ্ৰ
• Prostitute Moon and other poems
• সকলো বিচ্ছেদেই প্ৰেমৰ পাঠ (২০২০)

প্ৰকাশিত উপন্যাস

• মাখিত উৰি ফুৰা চিত্ৰকৰ
• আকাশ এপাৰ্টমেণ্ট
• খাৰালাম ফাৰাগো

অন্যান্য কৃতিত্ব

• ১৯৯০ চনৰ পৰাই বিভিন্ন সৰ্বভাৰতীয় পৰ্য্যায়ৰ কবিতাৰ উৎসৱ, অনুষ্ঠান, কৰ্মশালা আদিত অংশগ্ৰহণ কৰি আহিছে।
• ১৯৯৬ চনত ভাৰতীয় লেখকৰ প্ৰতিনিধি হিচাপে বাংলাদেশ ভ্ৰমণ কৰি আহে।
• “ইণ্ডিয়ান পোয়েট্ৰি ফৰ দা ইয়ং অন কালচাৰেল ভ্যেলুজ অন দা ৱেব”ৰ নিৰ্বাচক মণ্ডলীৰ সদস্য।
• ২০০১ চনত ফ্ৰান্স-ভাৰত সাংস্কৃতিক বিনিময়ৰ কাৰ্যসূচী লৈ “সাহিত্য অকাডেমি”ৰ উদ্যোগত ফ্ৰান্স ভ্ৰমণ কৰিব যায়।
• সাহিত্য, সমাজ আৰু সংস্কৃতিমূলক সংস্থা “কল অফ দা ব্ৰহ্মপুত্ৰ”ৰ সভাপতি হিচাপে কাৰ্যনিৰ্বাহ কৰি আছে।

পুৰস্কাৰ

• মানৱ সম্পদ উন্নয়ন মন্ত্ৰণালয়ৰ ফেল’শ্বিপ
• “উদয় ভাৰতী” ৰাষ্ট্ৰীয় কবিতা বঁটা

প্ৰসংগ পুথি

• টোপনিৰ বাগিছা, নীলিম কুমাৰ।